Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> پلس نوں فری ہینڈ تے راؤ انوار۔ سیکورٹی دا گھما۔۔نصرت جاوید.

پلس نوں فری ہینڈ تے راؤ انوار۔ سیکورٹی دا گھما۔۔نصرت جاوید.

وچار ڈیسک
January 25th, 2018

پلس افسر اراؤ انوار انہاں دناں میڈیا تے رونقاں لا رہے جے۔ ہورے ایہہ کالم چھپن تیک پھڑیچے ہی نہ جان۔ ایس دے بعد کیہ ہوئے گا ایس سوال دا جواب میرے کول تے نہیں۔ گماں ایہو ہے کہ ون سونے فسانے گھڑدا میڈیا کجھ چر بعدوں ایس نوں بھل جاسی۔ میڈیا دے ریڈار توں غائب ہوجان گے۔ کجھ دناں بعد انوار دے وکیل بھرا، پلس فورس وچ موجود ایس دے یاراں دی مدد نال کجھ اجہے قنونی قنون سقماں تیک اپڑ ہی جان گے جس پاروں ایس دی ضمانتاں اوکھیاں نہیں رہن گیاں۔ پھڑیچن بعدوں اک وار ضمانتاں تے چھٹ گیا تے ایس دے بعد، کون جیوندا ہے تیری زلف دے سر ہون تک، والا طولانی قصہ چل سی۔ عدالت توں باہر باہر ہون والے قتل جاری رہ سن۔ ریاست مشکوکاں نوں چکن وچ رجھی رہے گی۔ لوکاں نوں انہاں دا قصور دسے بغیر بلاوارنٹ پھڑیچن دے ہن تک تے ویسے وی بہانے وادھو۔ قومی سلامتی تے دہشت گردی نال جڑے خدشیاں پاروں گھراں توں چکے کئی بندے ا تے انہاں دے گھر والے ہن تے انہاں نوں لبھن دی فریاد کرن توں وی گھبراندے نیں۔ کجھ مہینے پہلاں چکے بلاگراں دا قصہ تے تہانوں یاد ہوئے گا۔ اوہ غائب ہوئے تے انہاں دے بارے وچ کہانی ایہہ پھیلائی گئی کہ اوہ جعلی ناواں توں سوشل میڈیا تے مذہب دی توہین وچ مصروف سن۔ چودھری نثار علی خان ورگا پنج وقت دا نمازی بطور وفاقی وزیر داخلہ اصرار کردا رہیا کہ ایسے کسی الزام دی کوئی تصدیق نہیں ہوپائی۔ بلاگرز گھراں نوں مڑ آئے تے خموش ہوگئے۔ اپنی جان دی حفاظتاں پاروں انہاں دے گھر والیاں نوں نویں مکان محلے لبھنے پئے۔ ساڈی ریاست دا اصل مسئلہ ایہہ ہے کہ اوہ ون سونے مافیاواں توں نجاتاں دا قنونی رستہ نہیں لبھ پائی۔ اخیر تنگ آکے خود مہامافیا دا روپ دھار لتا۔ مرحوم نصیر اللہ بابر میرے اک شفیق بزرگ وی سن۔ محترمہ دے دوجے دور حکومت وچ بہوں پردھان وزیر داخلہ بنے۔ انہاں دناں دے آرمی چیف جنرل وحید کاکڑ نے انہاں نوں صاف الفاظ وچ دس دتا کہ اوہ پاک فوج نوں کراچی دی سیاسی دلدل وچ الجھانا نہیں چاہن گے۔ ایہہ سیاسی حکومت اپنے مسائل خود ہی حل کرے۔ بابر ہوراں نے پلس نوں دتے انّے اختیاراں پاروں کجھ دناں وچ کراچی دا امن بحال کردتا۔ امن بحالی دے ایس موسم وچ مینوں کئی وجوہاتاں پاروں اکثر کراچی جانا پیا سی۔ رپورٹر تے میں ساں پئی کئی ایسی کہانیاں معلوم ہوئیاں جیہناں توں پتہ چلیا کہ پلس دے کجھ افسر اپنے اختیاراں نوں مافیا وانگ ورتدے نیں۔ میں کجھ ناواں تے انہاں توں جڑیاں کہانیاں نوں ڈبل چیک کیتا تے بابر ہوراں توں ملاقات دی درخاست کیتی۔ اوکھے سوکھے ہو کے انہاں نوں کجھ گلاں، کجھ پلس افسراں دے ناں لے دسیاں۔ اوہ بے دلی نال میری گل بات سُندے رہے تے اخیر میری بے وقوفی دا مذاق اڑاندے ہوئے انگریزی دا ووہ محاورہ سنایا جو چور نوں پھڑن لئی thief setting a دی تجویز دیندا سی۔ میں حیران ہویا تے گھر واپس آگیا۔ ایس ملاقات دے پچھوکڑ وچ جداں ستمبر 1996 وچ مرتضیٰ بھٹو دی پلس Encounter وچ مرن دی خبر آئی تے ایس نوں سن کے ماتمی ضرور ہویا پر حیران ہرگز نہیں ہویا۔ مرتضیٰ بھٹو دی Encounter پاروں وکھائی ہلاکت نے پیپلز پارٹی ولوں بااختیار صدر بنائے سردار فاروق خان لغاری نوں اخیر محترمہ دی دوجی حکومت مکاون دا حوصلہ بخشیا۔ ایس حکومت نوں برطرف کردے ہوئے انہاں نے جو چارج شیٹ پڑھی کراچی وچ عدالت توں باہی و باہر کیتے قتل ایس وچ سب توں اتیسن۔ انہاں دے احتساباں دی پر نوبت ہی نہ آئی۔ نویں چوناں ہوئیاں تے ہیوی مینڈیٹ دے نال نواز شریف دوبارہ ایس ملک دے وزیراعظم بن گئے۔ سندھ دے شہری حلقے ایم کیو ایم نے جت لتے۔ ایس صوبے وچ مخلوط حکومت بنی جس نوں حکیم سعید دے قتل دے بعد مکایا گیا۔ فیر نواز شریف وی نہ رہے۔ جنرل مشرف آئے تے کراچی انہاں نے خشی خشی ایم کیو ایم نوں out source کردتا۔ ایس دور وچ پلس دے انہاں لوکاں نوں چُن چُن کے ماریا گیا جو نصیر اللہ بابر دی نگرانی وچ چلائے آپریشن دے دوران Encounter دے حوالے توں مشہور ہوئے سن۔ انہاں ہلاکتاں دا ساڈے میڈیا وچ کدی ذکر تک نہیں ہویا۔ سانوں مدہوش رکھن نوں سگوں داستان ایہہ گھڑی گئی کہ جنرل نقوی دے ادارہ برائے قومی تعمیر نے پلس اصلاحواں دا بیڑا وی چُکیا ہے۔ انہاں اصلاحواں نوں تیار کرن وچ اہم ترین کردار اک ایسے پلس افسر نے وی ادا کیتا جو کراچی دے آپریشن کلین اپ دے دوران بابر صاحب دے بہت چہیتے منے جاندے سن۔ ایس افسر دے مداحاں دا خیال ہے کہ ایس ملک دی لمیری خیر لئی جے صاف ستھرے ٹیکنوکریٹس دی حکومت اخیر بنے گی تے اوہ ایس وچ وی اہم مقام حاصل کرن گے۔ میری فکر افراد دے بارے وچ نہیں سگوں نظام دے بارے وچ ہے۔ راؤانوار دی مسلسل مذمتاں وی میری ترجیحاں نہیں۔ بنیادی سوال ایہہ ہے کہ کیہ اسی بطور شہری پک نال ایس گل تے قائل ہوچکے ہاں کہ ساڈے ایتھے افراد نہیں، ادارے تگڑے ہون۔نرا اداریاں نوں تگڑا کرنا وی مسئلے دا حل نہیں ہے۔ انگریزی ہی دا اک ہور محاورہ سانوں سمجھاندا ہے کہ Absolute Power Corrupts Absolutely۔ کسی وی ادارے نوں مکمل خود مختاریاں دین دے بعد ایس تے کسی نہ کسی انداز دا چیک رکھنا وی لوڑی ہے۔ خود مختاریاں تے نظراں رکھن والا ایہہ بندوبست اوسے صورت بن سکدا ہے جداں شہریاں دے حقاں تے ذمہ واریاں تے پک کردے ہوئے کھلے ذہن نال کسی بھرپور مکالمے دا پربندھ کیتا جائے۔ میڈیا دا پیدا کردہ ہیجانی Hype ایسے مکالمے دا لشکارا نہیں۔ پلس نوں فری ہینڈ دین دا مطالبہ اوتوں بہوں ودھیا نظر آندا ہے، ناں نہاد فری ہینڈ ہی پر راؤ انوار پیدا کردا ہے۔ ایسے لوکاں نوں روکن دا کیہ بندوبست ہوئے؟


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels