Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> پاکستان ولوں ہک پتر ٹرمپ ہوراں دے ناں۔ سلیم ملک

پاکستان ولوں ہک پتر ٹرمپ ہوراں دے ناں۔ سلیم ملک

پنجابی روپ وچار
January 9th, 2018
5 / 5 (1 Votes)

سوہنے من موہنے مسٹر ٹرمپ جی، تساں ساڈا ناں لے کے ساری دنیا سامنے سانوں جھوٹا آکھیا۔ تساں ات گردیاں مکاون لئی ساڈی کوششاں تے نہ صرف شک کیتا سگوں سانوں کجھ ات گرد گروہاں (تہاڈے منہ وچ خاک) دا سہولت کار وی آکھ دتا۔ تساں سانوں چور آکھیا تے ایہہ کہ اسی تہاڈے 33ارب ڈالر کھاگئے ہاں۔ تساں پک رکھو پئی اساں تہاڈی گل بات دا بالکل وی برا نہیں منایا۔ ساڈے ایس ردعمل دی کجھ خاص وجوہات نیں۔ پہلی گل تے ایہہ ہے تُسی سانوں جو جھوٹا چور تے مکار آکھیا ہے تے تُسی یقیناًکوئی مذاق نہیں کیتا سگوں تُسی کافی سنجیدہ لگ رہے ہو۔ خیر اونج وی تُسی بہوں سنجیدہ طبیعت والے ہی لگدے ہو تے مذاق دے چکر وچ گھٹ ہی پیندے ہو۔ یقین کرو سانوں وی مزاح یا اج کل جس نوں لوک کوئی سیٹائر وغیرہ کہندے نیں، بالکل پسند نہیں ۔ جو وی بدمعاش ساڈے نال سیٹیریکل زبان وچ گل کردا ہے سانوں بہوں بھیڑا لگدا ہے۔ اوہ ساڈا دشمن ہوندا ہے تے ایہو جہے سارے لوکاں نوں اسی ٹھیک ٹھاک سبق سکھاندے نیں۔ ساڈی فتوحاتاں ہلے تک بالکل تازی نیں تے جاری رہندیاں نیں، ایس لئی کسی توں بھُلی ہوئی نہیں نیں۔
میں تہانوں پک نال دس دینا چاہندا ہاں کہ جو وی ساڈی طاقتاں تے امن لئی ساڈی جنگ دا مخول اڈائے گا تے اساں لوہے دے ہتھاں نال اپنا دفاع کردے ہاں۔ ایہہ مذاق مزوق وچ گل بات کرن والے بندے کمزور ہوندے نیں ۔ایس لئی جے اوہ ساڈی عقل مندی تے شک کرن ا تے ایس دا ذکر اذکار سوشل میڈیا تے کرن تے ساڈی قومی تے محکمانہ غیرتاں جوش ماردیاں نیں۔ سانوں غصہ چڑھداہے تے ساڈی ذہانتاں ایس للکار نوں برداشت نہیں کردیاں۔ ساڈا ری ایکشن پڑھنے پا دینداہے۔ ایہہ ہور گل ہے کہ اسی ایس توں سبق کدی سیکھیا نہیں۔ تہانوں ایہہ ریاعتاں نیں کہ تساں ایہہ جو سانوں جھوٹا تے دھوکے باز آکھیا تے ساڈی پالیسیاں تے تنقید اں کیتیاں، پر تہاڈے ایس بیان دے پچھے سانوں انڈیا تے مودی دا بالکل وی کوئی ہتھ نہیں لگ رہیا۔ جے ایس دے پچھے انڈیا دا ہتھ ہوندا تے فیر سانوں بہوں غصہ آنا سی۔ اونج آپس دی گل ایہہ ہے کہ تہاڈے کیس وچ غصہ پی جانا ہی ساڈی ترجیحاں جے۔ اک آخری رعایت تہانوں ایہہ ہے کہ تساں نہ تے لبرل ہو، نہ اک پاکستانی سیاستدان اتے نہ ہی ساڈے پرائم منسٹر۔ ایس پاروں وی تساں جداں ایڈی ذہانتاں نال اساریاں ساڈی پالیسیاں تے تنقیداں کیتیاں تے سانوں غصہ نہیں آیا۔ جے ساڈے پرائم منسٹر ہوندے تے ایہو جہے کسی بیان دے بعد تہاڈی حب الوطنیاں بہوں مشکوک ہوچکیاں ہوندیاں تے تساں ساڈے لئی اک سکیورٹی تھریٹ بن چکے ہوندے۔ اسی اپنی قومی سلامتی پاروں ہن تک تہاڈا مکو بیہہ دتا ہوندا۔
جس بندے نوں ایہہ استثناء حاصل نہ ہوئے یا کسی نے ایہہ گل سانوں مخول وچ کیتی ہوندی تے اسی ایس نوں چوکھاسبق سکھاندے۔ اساں اوس تے ایہو جہے الزاماں دی بارش کردے کہ اوہ اتے اوس دے گھر والے کسی نوں منہ وکھان جوگے نہ رہندے۔ اوہ خوف توں پُھل کے بھینسا بن جاندے تے موچی گیٹ توں لنگھن دی کدی کوششاں وی نہ کردا۔ صرف ایہو نہیں سگوں اسی تے کجھ ایسی پکی پرائیویٹ کاروائیاں وی پا دیندے جس دا ذکر شاید تساں تے کرلیندے پر شریف دے بندے انہاں تے چُپ ہی رہنا بہتر سمجھدے نیں۔
اونج وی ٹرمپ جی آپ سرکار دارعب بہوں ہے۔ امریکی صدارتی کھڑپینچاں دے دنیا تے وڈے کرم نیں۔ تساں بہو ں ملکاں وچ جمہوریت لیاون لئی انہاں ملکاں توں بے انت قربانیاں لیتیاں نیں۔ ماضی دے نیڑے توں ہی لے لو، عراقی عوام نوں صدام حسین توں آزاد کراون لئی تہانوں لکھاں ٹن بارود اوتھے سٹنا پیاتے کئی لکھ بندے زندگی توں ہی آزاد ہوگئے۔ باقی جو بچے نیں اوہ تہاڈے دتے ہوئے بارود دی بو ساری زندگی سونگھدے رہ سن تے تہاڈے احسان تھلے دبے رہن گے۔
افغانستان دی بربادی وچ وی تہاڈا کردار اپنی مثال آپ ہے۔ پہلے تسی انہاں نوں سرخ آندھی توں بچایا تے فیر اسامہ بن لادن دی مجمانی توں انہاں دی جان چھڈائی۔ یقین کرو ایس ساری کوشش وچ افغانستان تے تہاڈی گولہ باری ایڈی کامیاب سی کہ ایس توں نرا افغانستان نہیں سگوں پاکستانی بچے وی کنبدے رہندے سن۔امریکی صدارتی پردھاناں دا اونترے ملکاں دی عوام نوں انسانی حقاں تیک رسائیاں دین تے اوتھے جمہوریت نوں تگڑا کرن دا ول چوکھاہے۔ ایس لئی اسی تہاڈی گلاں نوں بہوں سنجیدگی نال لیندے ہاں۔ تسی جنج کسی ملک دی عوام دے نال ہمدردیاں کردے ہو ،پک رکھو پئی لوکاں دے رونگٹے کھلوجاندے نیں۔ انہاں نوں عراق تے افغانستان یاد آجاندے نیں تے آسمان توں برسدے گولے نظر آن لگدے نیں۔ ہلے ہلے تساں ایرانی عوام نوں انہاں دی ظالم سرکار توں آزادی دوان دی گل کیتی ہے تے یقین منو کہ ساری دنیا نوں ایران دی فکر ہون لگی ہے۔ ایس لئی آقا، تسی سانوں ڈالر بے شک نہ دیو پر ساڈی عوام نوں جمہوریت تے آزادی دین دی فکر نہ کرو۔ اسی تہاڈی دتی ہوئی جمہوریت، انسانی حقاں دی راکھی تے گولہ بارود دے مکس پیکج دے قابل نہیں جے۔
ہم سب بلاگ تے چھاپیا گیا سی
ملک ہوری چکوال دے نیں اتے اج کل ایس پی او دے پردھان نیں


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels