Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> جداں جناح انگریز وائسرائے نوں منہ تے ڈبل کراس(نوسرباز) آکھیا

جداں جناح انگریز وائسرائے نوں منہ تے ڈبل کراس(نوسرباز) آکھیا

December 26th, 2017

پاکستان وچ تے دیسی وائسرائے مان نہیں پر’’ محمد علی جناح۔۔اوہ سیاستدان سی جو (انگریز) وائسرائے اگے سدھی سدھی گل کرن دی ہمتاں رکھدا سی جداں کہ دوجے سیاستدان (وائسرائے سامنے) بیسٹ انگلش جینٹل مین اتے بیسٹ کرسچن وانگ گل کردے سن‘‘۔ایہہ گلاں کانگرس ورکنگ کمیٹی دے ممبر اتے سنیئر لیڈر کانجی دوارکا داس نے اپنی کتاب’’آزادی ول دس سال1937توں1947‘‘(انگریزی)صفحہ55تے لکھی ہے۔انہاں ایہہ گل اوس وقوعے نوں لکھن بعدوں کیتی جیہڑا گست1940دا ہے جداں وائسرائے ’’زمینی خدا‘‘ ہوندا سی اتے جو کجھ پاکستان وچ غیر منتخب اشرافیہ کردی ہے اوہ اوسے طاقتور وائسرائے دے تکبراں دا تسلسل ہے۔ پر ساڈے ایتھے اجہے سیاستدان سن جیہڑے اوس تکبر اگے کھلو جاندے سن۔
اقبال تے جناح دیاں اجہی گلاں پاکستان وچ سرکاری پدر تے انہاں دا دیہاڑ مناون والے نہیں کردے اتے نہ ہی نصابی کتاباں وچ ایہہ گلاں چھاپیاں جاندیاں نیں۔
کانجی جو کجھ لکھیا اوس دا لنک وی دے رہے ہاں تانجے اٹھ واٹھ مارن والے حوالہ ویکھ تے پڑھ سکن۔
چیتے رہے پئی دوجی وڈی لام ستمبر1939وچ چھیڑی گئی سی اتے ست صوبیاں وچ حاکم ہشیار کانگرس نوں لگدا سی پئی ایس لام وچ انگریز ہار سکدا ہے تاں مارے ایس ویلے نوں ورتدے ہوئے انگریزاں نال ڈیل ہو سکدی ہے۔انہاں اکتوبروچ اسمبلیاں توں استعفے دے کے آپدا بھارودھایا۔ جناح اتے مسلم لیگ کانگرسی وزارتاں دے ٹٹن نوں نجاتاں دا دن آکھیا اتے کجھ مہینے بعد مارچ1940وچ لہور وچ پنجاب تے بنگال دے پردھان وزیراں دی ٹیک نال انگریزاں نوں دس دتا کہ جے تساں کوئی ڈیل کرنی ہے تاں مسلم اکثریتی صوبیاں دا فیصلہ انہاں دی مرضیاں نال کرو۔پنجاب تے بنگال سب توں وڈے مسلم اکثریتی صوبے سن اتے دوناں دے چونویں پردھان وزیر قرارداد لہور تے کھلوتے سن۔پنجاب تے بنگال پاروں ہی ایس قرارداد دی تواریخی اہمیتاں سن۔ انہاں حالاتاں وچ وائسرائے انڈیا لارڈ لینلیتھگو اگست1940وچ انڈیا نوں ڈومینین سٹیٹس دین بارے تجویزاں دتیاں سن۔حالات تاں مارے وگڑ رہے سن کیونجے دس مئی توں ہٹلر دی فوجاں فرانس ول کامیابیاں نال اگے ودھ رہیاں سن اتے ایہہ لگ رہیا سی پئی فرایس توں بعدوں برطانیہ ہن ہورے جرمناں توں بچے گا نہیں۔جولائی وچ کانگرس پونا وچ اکٹھ کیتا جس وچ ڈبل پالیسی سامنے آئی۔اک پاسے کانگرس انگریز نوں ہراون والیاں نوں جی آیا نوں آکھن لئی گنجائشاں رکھیاں تے دوجے پاسے راجی جی، راج گوپال اچاریہ اتے ولبھ بھائی پٹیل انگریزاں نال ڈیل کرن تے لگ گئے تانجے کانگرسی وزارتاں دی بحالیاں ہو سکن۔ایس پاروں اگست وچ وائسرائے بمبئی اپڑے۔ کانجی دوارکاداس نوں سردار پٹیل ساری گل دس چھڈی۔چومکھی کھیڈن دے ماہر انگریز وائسرائے ایس دوران نیشنل ڈیفنس کونسل وچ جناح نوں پچھے بغیر پنجاب تے بنگال دے پردھان وزیراں نوں رلتی کر لتا سی۔وائسرائے پردھان وزیراں نوں آکھیا پئی میں تہانوں مسلم لیگ پاروں نہیں سگوں وزیر اعلی دی حیثیتاں نال رلتی کیتا ہے۔پر جناح ہوراں نوں پتہ سی پئی انہاں نوں مسلماناں دی حیثیتاں وچ رلتی کیتا گیا ہے اتے ایس پاروں جناح دی اوہ طاقت مکاون دا آہر کیتا گیا ہے جس دا لشکارہ مسلم لیگ نے23مارچ1940لہور وچ وکھایا سی۔گیارہ اگست نوں وائسرائے بمبئی اپڑیا جتھے سردار پٹیل ہوری وائسرائے نال ملن لئی اوتاولے ہو رہے سن اتے انہاں کانجی نال ایس بارے گل وی کیتی۔ وائسرائے قائداعظم نال وی ملنا چاہندا سی جس دا ویلہ متھیا جا چکیا سی۔وائسرائے پرشوتم داس،فرانسس لوو،فریڈرک سٹونز، کے ایم منشی تے جناح نوں ملنا سی۔ متھے گئے ویلے تے جناح نہیں اپڑے حلانکہ اوہ ویلے سر اپڑن تے مشہور سن۔طاقتور انگریزوائسرائے پندرہ منٹ جناح نوں اڈیکدا رہیا۔ایس دوران جھل پنے وچ فون وی کھڑکائے گئے۔کانجی بڑی ہشیاری نال سب لکھیا ہے۔ کانجی نوں پک پئی جناح جاندے بجھدے ہوئے لیٹ ہویا سی کیونجے اوس نوں وائسرائے تے بہوں غصہ سی۔پردھان وزیراں دے ڈیفنس کونسل جان بعدوں جناح ایہہ بیان دے چھڈیا سی کہ وائسرائے انہاں نال ڈبل کراس کیتا ہے۔پندرہ منٹ بعدوں جناح ہوری وائس ریگل چیمبر وچ آ چکے سن۔وائسرائے انہاں نوں جی آیا نوں آکھیا اتے لیٹ آون دا ذکر گول کردے ہوئے بولیا’’مسٹر جناح، تساں مینوں غلط سمجھیا، پر ہن میں تہانوں اپنا نقطہ نظر دسدا ہاں‘‘۔اوس دے گل کرن توں پہلاں ہی جناح پرت کے آکھیا، ’’تساں میرے نال نوسربازیاں (ڈبل کراس) کیتیاں نیں‘‘ اتے ایہہ آکھن توں بعد قائداعظم وائس ریگل چیمبر توں باہر نکل گئے۔پندرہ منٹ اڈیک وچ بٹھا کے ، وایسرائے نوں ملے اتے اپنی گل منہ تے آکھ کے بغیر کوئی ہور گل کیتے مڑ آئے۔کجھ دناں بعدوں پنجاب دے پردھان وزیر سکندر حیات مسلم لیگ کونسل دی میٹنگ لئی بمبئی آئے۔جناح ہوراں نوں پک سی پئی وائسرائے سکندر نال وی نوسربازیاں کیتیاں ہون گیاں۔ انہاں سکندر اگے وائسرائے دا اوہ پتر رکھ دتا جس وچ وائسرائے جولائی وچ بمبئی دے گورنر نوں لکھیا سی پئی وڈی لام پاروں مسلماناں نوں بھرتیاں ول رام کرن لئی اے کے فصل الحق تے سکندر حیات نوں ڈیفنس کونسل وچ رلانا ہے۔سکندر حیات نوں وی انگریزاں دا کھیڈ سمجھ آ گیا اتے انہاں کونسل توں اگست وچ ہی استعفی دے چھڈیا۔
ایہہ لکھت محمد علی جناح دی142ویں سالگرہ تے وچار ولوں چھاپی گئی ہے۔ کانجی دی کتاب وچ لکھی کہانی ایس لنک تے ویکھو
https://punjabpunch.blogspot.com/2017/12/mr-viceroy-you-have-double-crossed-me.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels