Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> این جی اوز کیہہ نیں اتے انہاں خلاف کون؟

این جی اوز کیہہ نیں اتے انہاں خلاف کون؟

سلیم ملک
December 25th, 2017
5 / 5 (1 Votes)

’’میں گند نوں بو دتی جے‘‘۔ ایہہ مشہور فقرہ اختر حمید خان مرحوم دا ہے جنہاں اورنگی پائیلٹ پروجیکٹ دا نیہہ پتھر رکھیا سی۔ اورنگی پائیلٹ پروجیکٹ (OPP) اوہ منصوبہ ہے جس نے پاکستان یا ہورے دنیا دی سب توں وڈی کچی آبادی اورنگی ٹاؤن کراچی دا سیورج سسٹم وچھایا سی۔ ایہہ منصوبہ اورنگی وچ رہن والے لوکاں دے نال رل کے بہوں گھٹ لاگت نالوں پوراکیتا گیا سی۔ ایہہ اپنی قسم دا اک انوکھا منصوبہ سی جس توں نہ صرف اورنگی ٹاؤن دی گلیاں گندے پانی توں پاک ہوئیاں سگوں اورنگی ٹاؤن دے رہائشیاں نوں اپنے پیراں تے کھلون دا پک ہویا سی۔ ایس منصوبے دی شاندار کامیابیاں پاروں OPP دے ناں توں اک فلاحی تے ترقیاتی ادارہ یعنی این جی او اساری گئی۔ کوئی وی ذی شعور شخص، مرد، عورت یا ٹرانس جینڈر، کسی وقت وی کسی خاص یا عام مسئلے نوں حل کرن لئی این جی او یا فلاحی ادارہ بنان دا سوچ سکدا ہے تے بنا وی سکدا ہے۔ بس تہانوں کسی پرابلم دا علم تے احساس ہونا چاہیدا ہے۔ پرابلم دا علم تے احساس تہانوں کجھ پڑھدے ہوئے، کتھے رہندے ہوئے یا صرف کتھوں لنگدے ہوئے وی ہوسکدا ہے۔ ایہہ چھٹی دا دن نہیں ہے تے صبح دے گیارہ وجے نیں۔ تسی کسی پِنڈ یا محلے توں لنگھ رہے ہو۔ تسی دیکھدے ہو کہ سکول جان دی عمر دے کجھ بچے ایس وقت گلیاں وچ نظر آرہے نیں۔ اک حساس شخص دا دماغ ایہہ سوچے گا کہ ایہہ بچے ایس وقت گلی وچ کیوں نیں؟۔ سکول وچ کیوں نہیں نیں؟ تسی انہاں بچیاں توں پچھدے ہو تے پتہ چلدا ہے کہ ایس علاقے وچ کوئی سکول ہے ہی نہیں۔ ایس لئی ایہہ بچے سکول نہیں جاسکدے۔ انہاں بچیاں نوں انہاں دا تعلیم دا مڈھلا حق نہیں مل رہیا۔ تسی انہاں بچیاں نوں تعلیم دا حق دوان دی ٹھان لیندے ہو۔ ہن تہاڈے کول انہاں بچیاں نوں تعلیم دا حق دوان لئی دو کم کیتے جا سکدے نیں۔ اک سدھا جیہا حل ایہہ ہے کہ اوتھے اک سکول کھول دتا جائے ا تے بچیاں نوں ایس سکول راہیں تعلیم دینا شروع کرسو۔ دنیا وچ لکھاں درد دل رکھن والے لوکاں نے لکھاں ایسے سکول چلائے نیں تے ہن وی چلارہے نیں۔ ہن سکول بناون تے چلان لئی پیسیاں دی لوڑ ہوندی ہے۔ جداں تک تہاڈے کول پیسے نیں تے تسی ایہہ سکول چلاسکدے ہو اتے بچیاں دا تعلیم دا حق پورا کرسکدے ہو۔ ایہہ سکول بنان تے چلان لئی تسی اک فلاحی ادارہ یا این جی او بنا سکدے ہو۔ این جی اوز دے ایسے کماں نوں سروس ڈیلیوری آکھیا جاندا ہے جس وچ اوہ پتہ مارکے لوکاں دیاں لوڑاں، تھوڑاں پوریاں کریندے نیں۔ بچیاں نوں انہاں دا تعلیم دا حق دوان دا اک ہور طریقہ وی ہوسکدا ہے۔ ریاست دا ایہہ فرض ہے کہ اوہ ایسا بندوبست کرے کہ سکولے جان دی عمر دے سارے بچیاں نوں انہاں دا تعلیمی حق مل سکے۔ جے کجھ بچے سکول نہیں جارہے اتے اوس تھاں کوئی سکول موجود نہیں تے ایس دا مطلب ہے کہ ریاست تے حکومت اپنا فرض پورا نہیں کررہے۔ تسی ایہہ ٹھان لیندے ہو کہ یا تے حکومت دی مدد کرنی ہے یا حکومت نوں مجبور کرنا ہے کہ اوہ انہاں بچیاں لئی سکول کھولے تے چلائے تانجے انہاں بچیاں نوں انہاں دا تعلیمی حق مل سکے۔ ایس لئی تسی لوکاں نوں احساس دواندے ہوکہ اوہ حکومت توں اپنے بچیاں لئی سکول دا مطالبہ کرن۔ لوکاں نوں آگہیاں دین دے نال نال تسی انہاں دی تربیتاں وی کردے ہو کہ اوہ اپنا مطالبہ پورا کران لئی کیہ کجھ کرسکدے نیں۔ ایہہ کم کرن لئی وی تسی اک فلاحی ادارہ یا این جی او بناسکدے ہو۔ لوکاں دا رل مل کم کرنا تانجے اوہ اپنے حقاں لئی اپنی حکومت تے دوجے ذمہ واراں توں مطالبے کرن تے منوا سکن، ایڈوو کیسی اکھواندا ہے۔ ایہہ اک بہت ہی اہم کم ہے جو بہت ساریاں ماڈرن این جی اوز کردیاں نیں۔ سروس ڈیلیوری تے ایڈووکیسی توں اڈ اک ہور وی اہم کم ہے جو این جی اوز کردیاں نیں۔ اوہ کم ہے ریاست، حکومت اتے پارلیمنٹ دے کم اتے کارکردگیاں تے نظر رکھنا۔ جداں حکومتی ادارے اپنا کم چنگے طریقیاں نال نہ کر رہے ہون تے این جی اوز لوکاں نوں ایس بارے احساس دواندیاں جے۔ تانجے اوہ نوٹس لین تے حکومت نوں مجبور کرسکن کہ اوہ ایس گھاٹے نوں پورا کرے۔ پارلیمنٹ جے کوئی ایسا قنون پاس کرن دی کوشش کردی ہے جو غریب یا پہلے توں کمزور طبقے لئی مزید خرابیاں کر سکدا ہوئے تے این جی اوز ایسے قنوناں تے پالیسیاں دے گھاٹے سامنے لیاندی ہے۔اوہ پارلیمنٹ نوں مشورے دیندی ہے کہ اوہ اجہے کم نہ کرن۔چالو قنوناں بارے وی اوہ ایہو کم کریندی ہے۔ یعنی این جی اوز نگران دا رول وی ادا کردیاں نیں۔ اوہ کوڑ ریتاں تے شہریاں لئی نقصان دہ ریاستی پالیسیاں نوں وی چیلنج کردیاں جے۔ معاشرے دے طاقت ور لوک تے ادارے جیہڑے انہاں کوڑ ریتاں دے ٹھیکیدار ہوندے نیں تے اوہ این جی اوز دے ایس رول توں ڈر دے رہندے نیں تے انہاں نوں مکاون یا ماڑا کرن لئیاونترے کم وی کردیاں نیں۔ اج کل ایہہ جنگ زوراں تے ہے تے درجناں انٹرنیشنل این جی اوز دی رجسٹریشناں مکایاں گیاں جے۔خوش قسمتیاں نال میں پچھلے 30 سالاں وچ پاکستان وچ کئی این جی اوز نوں بن دے، پھُلدے پھیلدے تے پردھان کارنامے کریندے ویکھیا ہے۔ بدقسمتی نال کجھ اک اداریاں تے انہاں دے چلان والے زبردست لوکاں نوں قتل ہوندے وی ویکھیا ہے۔ ساڈے معاشرے وچ لوکاں دے حقاں لئی کم کرن لئی ایہہ ظلم کوئی نویں گل نہیں ہے۔
چکوال دے سلیم ملک ڈویلپمنٹ سیکٹر نال لمیرے چر توں جڑے نیں۔پنجاب یونیورسٹی تے بریڈ فورڈ یونیورسٹی توں پڑھے ملک ہوراں ڈویلپمنٹ سٹڈیذ برطانیہ توں پڑھی ہے۔ 


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels