Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> عرفان حبیب پورا سچ بولن:کانگرس دا کھڑچ کنڈل تے پدماوتی

عرفان حبیب پورا سچ بولن:کانگرس دا کھڑچ کنڈل تے پدماوتی

December 24th, 2017

بھارت، بنگلہ دیش تے پاکستان وچ کانگرسی دانشوراں دا بھنڈار کہ انہاں جیہڑے انڈے بچے دتے نیں اوہ قوم پرستیاں اتے بنیاد پرستیاں دا اک ہور کوڑ رنگ پئی اج جس جتھے بندی دا ناں بی جے پی ہے اوہ کانگرس دے کوڑ بیانیے توں ہی جمی ہے۔جداں تیک کانگرسی دانشور ایس بیانیے نوں ٹھیک کردے ہوئے پورا سچ نہیں لکھن گے بی جے پی دا بھوت انہاں نوں چڑاندا رہے گا۔
اج کل بھارت وچ اک فلم پاروں رولے وادھو کہ جس داناں ہے پدماوتی۔ایس فلم وچ ’’ستی‘‘ دی ہندو گھٹ راجپوت رسم نوں مڈھ متھ کے ایس وچوں ہندو بنیاد پرستیاں دا اجیہا بالن تیار کیتا گیا ہے جس اوتے بی جے پی دی ہانڈی چڑھائی جا سکے۔ویسے ایہہ ول وی بی جے پی والیاں کانگرس توں ہی سکھیا ہے۔پئی اشوک، اکبر تے1857 ورگیاں کوڑ ہانڈیاں کانگرس والے ہی چڑھاندے رہے نیں جس پاروں کانگرس دا تھیسس اگے ودھدا سی۔تریخ نوں جڈا کانگرس رگیدیا ہے اڈا ہی ہن بی جے پی رگید رہی ہے اتے اینج دا ہی کم سرکاری پدر تے پاکستان تے بنگلہ دیش وچ ہی جاری جے۔
مشہور بھارتی تریخ دان پروفیسر حبیب دے تریخ دان پتر اتے کھوجی پروفیسرعرفان حبیب نے بی بی سی تے پدماوتی فلم نوں سامنے رکھدے ہوئے گل بات کیتی ہے۔ایس دا لنک وی تھلے دے رہے ہاں کہ عرفان ہوراں نرا بی جے پی نوں تریخ بدلن دا ذمہ وار آکھیا۔انگریزاں تریخ نوں وگاڑن دا کم چھویا سی اتے آریا،ہندو دور، مسلم دور تے لہور دربار نوں سکھ سرکار آکھن دا کم انگریزاں چکیاسی۔ایہو نہیں سگوں حملہ آور، مسلم حملہ آوراں والی کوڑ تریخ وی انگریزاں چلائی سی۔ایس وچوں جو کجھ کانگرس نوں سوٹ کردا سی اوہ اپنا لتا اتے اجیہا نیشنلزم بنایا جس وچ بھارت تے پاکستان دی دشمنیاں نوں ہندو مسلم رنگ دتا گیا۔کانگرس سیکولرازم تے گنگا جمنی تہذیب نوں ہشیاریاں نال ورتدی رہی اتے نال نال ہندوتا نوں وی ٹیک دتے رکھیا۔کانگرس دی اینٹی پاکستان مہماں اتے کشمیر دی لڑائیاں نوں دھرمی ٹیک دین پاروں دھرم نوں ورتیا جاندا سی۔ بی جے پی والے اوہی لوک نیں جیہڑے کانگرس دی دھرم نوں ورتن والی پالیسیاں اتے پاکستان مخالفتاں توں ہلا شیریاں لے کے جوان ہوئے نیں۔جنج پاکستان وچ افغان جہاد تے بھارت مخالف جہاد اتے بنگلہ دیش وچ بدھ مت خلاف اینٹی برما جہاد پاروں انتہاپسندیاں ودھان نال طالبان ورگے پیدا کیتے گئے اونج ہی بی جے پی والے وی کسے ہور نہیں سگوں کانگرس ہی جمے نیں۔پاکستان وچ طالبان اتے مذہبی ات گردیاں خلاف بیانیہ بناو ن والے نہ تے ایس وچ افغان جہاد دی مخالفت پاندے نیں اتے نہ ہی اینٹی انڈیا مہماں۔عرفان ہوراں بی جے پی والیاں نوں نازی آکھیا پر اوہ ایہہ نہ دس سکے پئی انہاں نازیاں دی سیکولر انڈیا وچ ٹہل سیوا کون، کون، کنج کردا رہیا ہے۔عرفان ہوراں بی جے پی والیاں تے ایہہ الزام لایا پئی اوہ ہشیاریاں نال برٹش دور تے مسلم دور نوں رلا کے ایہہ تاثر دیندے نیں پئی ہندوستان تے مسلم دور توں باہرلیاں دا قبضہ ہو چکیا سی۔ پر عرفان ہوری ایہہ تے دس دین پئی کیہہ ساڈی تریخ وچ کوئی ہندو یا مسلم دور ورگی چیز ہے سی؟ انگریز توں پہلاں لکھیاں کتاباں وچ کسے مسلم یا ہندو دور دی گل کیتی گئی سی؟البیرونی، فرشتہ، تاریخ طاہری، ابن بطوطہ یا ہندو لکھاریاں کوئی اینج دی گل لکھی سی؟رومیلا تھاپڑ ورگے کوکدے رہے پر انہاں دی تے کسے گل نہ سنی۔اسلام توں پہلاں جیہڑے پارسی، جینی اتے بدھ مت نوں منن والے حکمران بنے سن انہاں نوں وی کانگریس بڑی ہشیاریاں نال ہندواں دے کھاتے پاندی سی کیونجے انگریز ایہو دس گیا سی تے ایہہ سوٹ وی کردا سی۔ایس سب بارے کانگرسی دانشور یا تے چپ رہے یا فیر من مرضیاں دی تریخاں گھڑدے رہے۔عرفان ہوراں نوں بی جے پی دے سیٹھاں اتے کارپوریٹ ورلڈ نال سانگے بھیڑے لگدے نیں پر اوہ بھل گئے پئی ایہہ کارپوریٹ ورلڈ والے کدی کانگرس دی نال وی سن۔اج عرفان ہوری سوال کردے نیں پئی ایہہ راجپوت پرائڈ کیہہ ہے؟ اوہ آپ دسن پئی اوہ گنگا جمنی پرائڈ کیہہ سی؟کانگرس دور وچ فلماں، ڈرامے، ہیرو تے بیانیے ہر تھاں گنگا جمنی کردار تے تریخ ہی اگے اگے ہوندی سی پر ہن بی جے پی والے کدی راجپوتاں نوں چکدے نیں، کدی مہاراشٹر نوں تے کدی بھگت سنگھ پاروں سکھ پنجاب نوں۔بی جے پی تے کانگرس دی کوڑ وچ تاج محل نوں وی رگیدیا پر پٹیل انہاں دا ہیرو ہے۔کون پٹیل بھلا؟ یاد جے؟ کل دا پٹیل اج دی بی جے پی ہے۔ 
بی جے پی جو کر رہی اوہ کوڑ تے ہے پر ایس دا اک تسلسل وی ہے اتے اج کانگرسی دانشوراں نوں پہلاں اپنے کوڑ بیانیے ول مڑ جھات پاون نال نواں بیانیہ اسارنا ہو سی۔
عرفان ہوراں دی گل بات پڑھن لئی تھلے ککل کرو۔
http://www.bbc.com/urdu/regional-42470742


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels