Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> پاکستان تے کوڑ بیانیئے:پنجاب توڑو تے جمہوریت تگڑی ہوئے گی۔پہلی قسط

پاکستان تے کوڑ بیانیئے:پنجاب توڑو تے جمہوریت تگڑی ہوئے گی۔پہلی قسط

December 24th, 2017
5 / 5 (1 Votes)

دنیا وچ جنج نکے وڈے ملک نیں اینج ہی ملکاں وچ نکے وڈے صوبے یا ریاستاں ہوندیاں نیں۔جداں دی دنیا وطنی ریاستاں اتے اک بندہ اک ووٹ ول گئی ہے اوس ویلے توں آبادی دی گل وادھو ہون لگی اتے ایس پاروں ہی جمہوریت ول سفر تیز ہویا۔کیونجے پاکستان بنن توں پہلاں توں صوبے موجود سن تاں مارے پاکستانی جمہوری بندوبست نوں فیڈریشن دے اصولاں تے اساریا گیا۔1973دے آئین پاروں قومی اسمبلی آبادی اتے سینیٹ صوبیاں دی بنیاد تے بن دے نیں۔چار صوبیاں وچ پنجاب سب توں وڈا صوبہ ہے اتے پنجابی گنتری پاروں پاکستان وچ سب توں ودھ۔پنجابی تواریخی طور تے پنجاب ہی نہیں سگوں خیبر پختونخوا،بلوچستان ، سندھ اتے ریاست آزاد کشمیر وچ کئی صدیاں توں وسدے نیں۔پنجابی مسلمان تے برٹش پنجاب(1849-1947) اتے مہاراجہ رنجیت سنگھ دے لہور دربار(1799-1849) وچ وی 50فیصدی توں ودھ سن۔اج دے پاکستان وچ نرے پنجاب اندر پنجابی پاکستان دی کل آبادی دے50فیصد توں ودھ نیں۔ایہو وجہ ہے پئی قومی اسمبلی وچ پنجاب دی سیٹاں وی ودھ نیں۔پر ایس نوں پنجاب دا جرم بنا کے، اج کل پیش کیتا جاندا ہے۔ایہہ کوئی نویں گل نہیں کیونجے ساڈی سٹیبلشمنٹ1971تیک وی وڈے صوبے خلاف مہماں کھڑی کردی رہی ہے۔قصور انہاں دا وی نہیں کہ انگریز دور وچ اسارے گئے ریاستی ادارے لوک ویری ریت دی گڑھتی لے کے کھڑے کیتے گئے سن اتے ایہہ لوکائی توں بدوبدی ڈردے رہندے نیں۔پر مسئلہ جے نرا سٹیبلشمنٹ تیک ہوندا تاں ایہہ لکھت لکھن دی لوڑ نہ پیندی۔ساڈے ایتھے اجہے دانشوراں دا گھاٹا نہیں جیہڑے ہر بھیڑے کم دا الزام پنجاب یا پنجابیاں تے دھر کے اپنا رانجھا راضی رکھدے نیں۔حیران نہ ہونا، انہاں وچ کجھ پنجابی وی رلتی نیں۔انہاں سب وچ سانجھی گل ایہہ ہے پئی انہاں نوں پنجاب دی تواریخ بارے ککھ نہیں پتہ یا فیر ایہہ انگریز دے پھیلائے علم تے اٹھ واٹھ ماردے رہندے نیں۔انہاں وچ پختون،بلوچ،سندھی قوم پرست وی نیں، مہاجر دانشور وی،پنجاب وچ وسن والے اْردو دانشور وی اتے اوہ پنجابی وی جیہڑے اپنی دھرتی بارے دوجیاں توں پچھدے نیں۔میاں نواز شریف تے آصف زرداری ،میاں رضا ربانی ورگیاں پاروں جداں دی اٹھارویں ترمیم ہوئی ہے ایہہ ہور گھجل ہو گئے نیں پئی ہن تے ست سالاں توں صوبیاں نوں رقماں وی مل رہیاں نیں اتے تعلیم سنے بہوں سارے محکمے پورے صوبائی کنٹرول وچ نیں۔جے پنجاب ولوں میاں نواز شریف ایس ترمیم وچ رلتی نہ ہوندا تاں ایہہ ہک ادھورہ سفنہ ہی رہنی سی۔ہن جداں ست سالاں وچ کجھ وڈے کم ایہہ اپنے صوبیاں وچ، رقماں ہون دے باوجود نہیں کر سکے تے ہن آکھدے نیں پئی کیونجے پنجاب دا سائز بڑا وڈا ہے تاں مارے پاکستان وچ جمہوریت تگڑی نہیں ہو سکدی۔ایس گل دا نکھیڑا کرن لئی اساں ایہہ وی ویکھاں گے پئی کیہہ نکے وڈے صوبے نرے پاکستان وچ ہی نیں؟یا ہور ملکاں وچ وی اینج ہوندا ہے۔ایس توں بعد اساں گل کراں گے پئی پاکستان دی جمہوری لہر وچ پنجابیاں دا کڈا حصہ ہے۔کیونجے پنجاب نوں ہر ویلے رگیدن والیاں نوں بھارت اتے کانگرس نال بہوں پیار ہے ایس لئی اسی پہلے بھارت دی مثال نوں ویکھدے ہاں فیر امریکہ، برطانیہ بارے وی گل چھواں گے۔ بھارت دے کل29صوبے اتے ست فیڈرل تھاواں نیں۔اک ارب توں ودھ آبادی دے ایس وڈے ملک وچ نری نو ریاستاں دی آبادی80کڑوڑ توں وادھو ہے۔پاکستان وچ چار وچوں اک صوبے دی آبادی ادھی ہے تے بھارت وچ 29دا چوتھا حصہ وی ایڈا ہی بندا ہے۔انہاں نو بھارتی صوبیاں وچ یوپی،مہاراشٹر، بہار تے مغربی بنگال دی آبادی50کڑوڑ توں ودھ ہے۔ایس حساب نال ایہہ پاکستان وچ پنجاب دے سائز توں چروکنا ودھ ہے۔ایسے حساب نال بھارت دی قومی اسمبلی دی سیٹاں نیں۔جیہڑا نو وچوں پنج صوبیاں وچ وی جت جاندا ہے اوہی دلی وچ سرکار بنادا ہے۔کجھ صوبیاں دی سیٹاں دس توں وی گھٹ نیں تے کجھ دی سیٹاں 40توں80تک۔چلو ہن امریکہ بہادر دی مثال وی ویکھ لو کیونجے امریکہ تے سب دے سر دا تاج ہے۔ امریکہ وچ 50ریاستاں یا صوبے نیں۔انہاں وچ نری بارہ ریاستاں دی آبادی50فیصد توں ودھ ہے اتے کل435 وچوں260 سیٹاں ایتھوں نیں۔اجہی امریکی ریاستاں بہوں نیں جس دی اک، دو یا ترے سیٹاں نیں۔آندے نیں جیہڑا امریکی صدارتی امیدوار کیلی فورنیا، ٹیکساس، فلوریڈا، نیویارک تے پنسلووینیا جت رہیا ہوئے اوہ جت ول ودھ جاندا ہے۔برطانیہ ساڈا پرانا آقا سی تے ہن ایس دی مثال وی ویکھ لیندے ہاں۔ برطانیہ چار ملکاں انگلینڈ، سکاٹ لینڈ، ویلز تے شمالی آئر لینڈ رل مل بنایا سی۔ایس وچ نرا انگلینڈ آبادی دا 84%ہے۔ایہہ مثالاں کافی نیں پئی ایہہ جانن لئی کہ جے پنجاب وچ ادھی آبادی رہندی ہے تے ایہہ کوئی انہونی گل نہیں۔اگلی لڑی وچ پاکستان دی جمہوری لہر وچ پنجابیاں دے رول بارے گل ہو سی۔
نوٹ:کوڑ بیانیئے وچ پنجاب تے پنجابیاں بارے پھیلائیاں گمراہیاں بارے گل ہو سی کیونجے ایہہ جھوٹ ایڈا پھیل چکیا ہے کہ کجھ پنجابی وی ایس نوں سچ من چکے نیں۔اکثر ٹی وی پروگراماں تے کانفرنساں وچ، کالماں وچ اجہے جھوٹ سنن بعدوں ہی ایہہ لڑی وارسلسلہ لکھن دا آہر کیتا ہے۔تساں تھلے دتے ای میل تے آپدے خیالاں نوں سانجھا کر سکدے ہو۔
ٖجے تساں لکھنا چاہو تے ایس ای میل تے اپنی لکھت گھلو
aamirriaz1966@gmail.com


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels