Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> پاکستان تے امریکی غصہ:ایوب تے ضیا ایس نوں ہی ورتیا سی

پاکستان تے امریکی غصہ:ایوب تے ضیا ایس نوں ہی ورتیا سی

December 23rd, 2017

کاوڑ بیت المقدس دے مسئلہ تے امریکی فیصلے دی حمائیتاں نہ کرن دیاں پر غصہ ات گردیاں تے نکل رہیا ہے۔سعودی عرب وکھرا پاکستان توں پراں پراں اتے یو اے ای وی کہ پاکستان نہ قطر نال وگاڑ پیدا کیتا اتے نہ ہی ایران مخالف ایجنڈے نوں اگے ودھایا۔افغانستان دے دورے تے اچانک اپڑے امریکی نائب صدر مائیک پینس ہوراں توپاں دا رخ پاکستان ول کر لتا ہے۔ انہاں آکھیا پئی پاکستان ات گرداں تے مجرماں نوں پناہواں دیندا ہے۔ایس توں پہلاں امریکی ایہہ گل صاف آکھ چکے نیں پئی اوہ سی پیک دے خلاف نیں۔ایہہ وی آکھیا جا رہیا ہے پئی پاکستان وچ 21 عالمی امدادی ایجنسیاں خلاف کاروائیاں وی چین پاروں ہو رہیاں نیں۔چیتے رہے پئی انہاں ایجنسیاں نوں60دناں اندر اپیل دا حق ہے۔پروشلم دے امریکی فیصلے دی مخالفت پاروں ایہہ سب مسئلے رل مل پاک امریکہ سانگیاں وچ وگاڑ ودھا رہے نیں۔پاک امریکہ سانگیاں وچ وگاڑ نوں ماضی وچ جنرل ایوب خان اتے جنرل ضیا الحق اپنے غیر آئینی کماں وچ ورتیا سی۔1956دی اسمبلی اپنے اخیری سال پاکستان وچ کم کردے امریکی سفیر دی غیر سفارتی حرکتاں بارے اسمبلی وچ بحثاں جھیڑیاں سن۔اوس امریکی سفیر کوئٹہ وچ پاکستان دی اندرونی سیاستاں بارے اونتری گلاں کیتیاں سن۔ایس خلاف لہور دے میاں افٹخار الدین اسبلی وچ سوال چکیا سی۔بحثاں پاروں پریشر ودھیا تے امریکی سفیر نوں ویلہ مکن توں پہلاں ہی مڑ واشنگٹن بلوا لتا گیا سی۔ جنرل ایوب خان نے مارشلا لاون بعدوں اسمبلیاں توڑ دتیاں سن اتے میاں ہوراں دی اخباراں پاکستان ٹائمز تے امروز تے قبضہ کر لتا سی۔1976دے اخیری مہینیاں وچ وزیراعظم ذولفقار علی بھٹو نے پاکستان نوں اوکڑاں توں کڈہن لئی شاہ ایران تے افغانستان دے صدر داؤد نال رل کے علاقائی جھیڑیاں نوں مکاون دا آہر کیتا۔صدر داؤد نوں لہور دے شالا مار باغ بلایا گیا۔ اوہ ڈیورنڈ لین منن لئی تیار ہو گیا اتے ایران ضمانتی بنیا۔پردھان ملکاں یعنی امریکہ تے روس توں پچھے بغیر علاقائی ملکاں دی آپسی سانجھ نوں وڈیاں پسند نہ کیتا۔کسنجر دا بیان وی اوسے دور وچ آیا پر ہشیاریاں نال بھٹو تے الزام ایٹم بم بناون دا لایا گیا اتے فرانس نال ڈیل نوں رگیدیا گیا۔فیر اپریل1977وچ بھٹو نوں پنڈی دے راجہ بازار آکے دسنا پیا پئی باہرلی طاقتاں میرے خون دی پیاسیاں نیں۔ضیا شاہی وچ اساں پاک امریکہ سانگیاں دا نواں بھنڈار ویکھیا۔پر اج دی دنیا ہور ہے جس وچ ٹرمپ روس تے چین خلاف نویں جنگ دا ہیرو بننا چاہندا تے ہے پر اوس نوں امریکہ دے اندر توں وی پوری حمائیتاں نہیں مل رہیاں۔ٹرمپ اپنے پہلے غیر ملکی دورے تے سعودی عرب گیا سی جتھے سعودی عرب اسلامی عسکری اتحاد دا اکٹھ سجایا سی۔ اوس اکٹھ وچ جداں سعودی ایرانی جھیڑیاں نوں مکاون دے حامی بن کے نواز شریف تقریر کرنی سی تے اوس نوں ڈک دتا گیا سی۔پاکستان یمن تے قطری جھیڑیاں پاروں اپنی پوزیشن دس چکیا سی۔واپسی تے نواز شریف آکھیا پئی اسلامی عسکری اتحاد وچ پاکستان دی رلت بارے فیصلہ پارلیمنٹ کرے گی۔اک کالمچی لکھیا پئی نواز دے فارغ ہون دا فیصلہ اوسے دن متھ لتا گیا سی۔پاکستان دی پارلیمنٹ اوسے یمنی قرارداد تے پکی ہے جس وچ ایہہ لکھیا ہے پئی اساں مسلم ملکاں دے جھیڑیاں وچ پارٹی نہیں بناں گے۔نواز تے28جولائی نوں فارغ ہو گیا پر ن۔لیگ سرکار یمنی قرارداد تے ہلے وی پکی۔چھ دسمبر دے بیت المقدس بارے ٹرمپی فیصلے پاروں اک ہور موقعہ آیا۔ایس وار تے سعودی عرب وی امریکی فیصلے خلاف ووٹ دتا۔پر مائیک پینس دے تازے بیان توں جاپدا ہے پئی امریکی غصہ ودھ رہیا ہے۔ایس تیزیاں نال بدلدی صورتحال وچ پاکستان دے آرمی چیف سینیٹ وچ آ کے آکھ چکے نیں پئی پارلیمنٹ خارجہ پالیسی بنائے تے اساں عمل کراں گے۔اسلامی عسکری اتحاد دا سر پیر کسے نوں پتہ نہیں۔اندر و اندر کیہڑی کھیڈاں چل رہیاں نیں ایس دا چیتا وی ہو جا سی۔پاکستانی خارجہ افسر امریکی نائب صدر دا جواب تے دتا ہے پر ایس اونٹھ کس پاسے بیٹھنا ہے ایس بارے خدشے وادھو۔جے پارلیمنٹ خارجہ بارے پالیسی بنا سکدی ہے تے اتحاد بارے وی گل کرے۔آئی ایس پی آر ولوں آکھیا گیا ہے پئی اجہے امریکی بیاناں پاروں ات گردیاں خلاف جاری مہماں ماٹھیاں پئے سکدیاں نیں۔یروشلم بارے فیصلے دی شکست بعدوں اک پاسے پاکستان ول توپاں دا رخ ہے تے دوجےپاسے امریکہ وانگ اسرائیل نے وی اقوام متحدہ دے ادارے یونیسکو نوں چھڈن دا اعلان کر دتا ہے۔ 


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels