Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> فاٹا: کس لمکایا؟ کس حل کیتا؟گھپ وادھو

فاٹا: کس لمکایا؟ کس حل کیتا؟گھپ وادھو

December 21st, 2017

جنرل ایوب خان آپ نوں ترین پٹھان آکھواندا سی، غلام اسحاق خان ٹوپی(بنوں) دا سی اتے بنگش آکھواندا سی۔ ڈاکٹر خان صاحب چارسدے دا سی اتے اوس دا بھرا ولی خان وی۔ولی خان دے بالکے گھٹ و گھٹ ترے وار مرکز تے صوبے وچ اقتداری ہوئے۔ڈاکٹر خان تے پورے مغربی پاکستان دا پردھان رہیا اتے غفار خان دا بھرا وی سی تے سکندر مرزا دا یار وی۔جماعت اسلامی ضیا الحق دی مچھ دا وال سی اتے ہن فیر صوبہ دی پردھان ہے۔جماعت دے آکھن تے ہی ہن عمران خان دی جماعت صوبے وچ چھپیاں پکے مضموناں دی سکول نصابی کتاباں دا تھرڈ پارٹی آڈیٹ نہیں کروا رہے۔مطب جتھے دل کردا ہے اتھے زور وکھاندے نیں۔جتھے اپنا مفاد نہ ہوئے اتھے گل اتحادیاں تے پا دیندے نیں۔ انہاں وچوں کسے نیں فاٹا دے بندوبست نوں بدلن بارے نہیں سگوں وزارتاں، صدارتاں لین لئی ہی کم کیتے۔اج وی جداں ایہہ پرانا مسئلہ بنے لگن لگیا ہے تے ایہہ سب اتے انہاں دے میڈیائی نا خدا ریفرنڈم تے صوبے وچ فاٹا رلتی کرن دے جھیڑے نوں اینج چک رہے نیں جنج انہاں توں وڈا فاٹا دا ماما کوئی نہیں۔جس فاٹا وچ میڈیا وڑ نہیں سکدا، جتھے لوکاں نوں کھلے عام سیاسی کم دی گنجائشاں نہیں، جس دی وڈی آبادی فاٹا توں باہر بیٹھی ہے اوس نوں صوبے وچ رلتی کرن تے تلے بیٹھے لیڈراں تے صحافیاں نوں جلدی کیہہ ہے؟پچھلی سرکار دے دور وچ صوبہ سرحد دا ناں وی مسلم لیگ(ن) تے پی پی پی رل کے بدلیا سی۔ اوس ویلے وی تکبر توں مارے قوم پرست نما لیڈراں تے جرنلسٹاں ایس ناں وچ ہزارہ دا ناں رلتی نہ کر کے اپنا کانگرسی بغض وکھایا سی پر میاں نوازشریف اوس ویلے وی من گئے سن، سیاسی گھاٹیاں دی پروا نہیں کیتی سی۔ایہہ کسے نوں چیتے ہے؟ہن اک باہرلے ادارے ولوں بنایا اشتہار ٹی وی تے چلدا ہے پئی صوبے دا گورنر وی فاٹا توں آئے۔ایہہ اوہی نیں جنہاں ڈیورینڈ لین پائی سی۔صوبے وچ غیر پختون لسانی اقلیتاں نوں اینج ہی نکرے لایا جائے گا پئی جنج کانگرس جڑویں انڈیا وچ کردی سی۔ پر ایس ویلے جیہڑا پھڈا ہے اوس دا مہاندرا ہور ہے۔ اچکزئی تے پورا پختون ہے۔ کیہہ ریفرنڈم توں سب ڈردے نیں؟فاٹا وکھرا صوبہ بنے یا فیر خیبر پی کے وچ رلے، ایس نال پختوناں نال غداریاں کتھوں نکل آیاں؟پر اینج دا بندوبست اساریا گیا ہے پئی ریفرنڈم پاروں ہورے فاٹا وچ پنجابی راج آ جائے گا۔سلیم صافی ورگے صحافی ایہہ منن لئی تیار نہیں پئی ایہہ جھیڑے تے پختوناں ، خیبر پی کےاتے فاٹا وچ رہن والیاں دے نیں۔جے اج ایس تے جھیڑا ہے تے فاٹا بل وچ ریفرنڈم اتے رلن دی گنجائشاں رکھ لو تے باقی گلاں تے عمل کروادیو۔ جے مسئلہ پشور ہائی کورٹ تے اسلام آباد ہائی کورٹ دا ہے تے ایس نوں وی ریفرنڈم تے رلن والی شق نال جوڑدیو تے کم چلاون لئی بھانویں پشور ہائی کورٹ نوں اختیار دے چھڈو۔
ہر مسئلے نوں حق تے باطل دی لڑائی بناون دا مطلب ایہو ہے پئی کجھ نہ ہی ہوئے۔ایہہ وی ہو سکدا ہے پئی جے فاٹا کل نوں رلے یا وکھرا صوبہ بنے تاں خیبر پی کے دے ناں نوں ہزارہ پی کے کر دیو۔ چٹ وی اپنا تے پٹ وی اپنا والی کانگرسی ضداں چھڈو۔فاٹا والیاں نوں پورے انسانی حقاں دی لوڑ ہے اتے اوہ شروع ہو جان تے اگلے پنج سال تیک سارا کم ہو جائے ایہو سب دے مفاداں وچ ہے۔ریفرنڈم تے رلن دی گل نوں اگے پایا جا سکدا ہے ایس پاروں دوناں دھراں نوں اک اک پیر پچھے پٹنا پیا تے کوئی ماڑا کم نہیں۔ایہہ مسئلے وفاقی پارٹیاں ہی حل کر سکدیاں نیں۔ دو ، ترے ضلعیاں والی پارٹیاں تے میڈیائی ناخدا اپنی نک توں اگے سوچن تے مسلہ ایڈا اوکھا نہیں۔
 نوٹ: انگریزاں امیر عبدالرحمن دا افغانستان کنج بنایا سی، کیوں اوس نوں برٹش انڈیا وچ رلتی نہ کیتا؟ کیوں ڈیورینڈ لین بنائی، کنج پنجابی، پختون تھاواں تے صوبہ سرحد  بنایا 1901 وچ ایس بارے سادے ٹی ویاں تے ہشیار تریخ دسی جاندی ہے۔جس نے وی 1921 توں 1941 دی مانو گنتری دا ریکارڈ ویکھیا ہے اوہ سب جاندا ہے۔سوات دے والی ہوراں وی بڑی گلان لکھیا ں نیں۔ایس بارے وی لکھت آئے گی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels