Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ٹرمپ سرمایہ داری دا سردار اتے دھرمی جھیڑے۔پر اساں کتھے ہاں

ٹرمپ سرمایہ داری دا سردار اتے دھرمی جھیڑے۔پر اساں کتھے ہاں

تنویر زمان خان
December 16th, 2017

سرمایہ داری نوں جیوندا رہن لئی ہر ویلے اک’’ دشمن یا ویری‘‘ دی لوڑ رہندی جے۔ پہلے ستر ورے تے روس نال آڈا لا کے رکھیا تے دنیا دو کیمپاں وچ ونڈی رئی۔ ہن روس توں بعد سرمایہ داری نوں چلان والیاں نوں کوئی نواں دشمن چاہیدا سی جیہڑا ہن اگے سو سال چلدا رہے اتے سرمایہ داری دنیا وچ اپنا چکر چالو رکھے۔ ایس کم لئی اوہناں نے مذہب نوں ورتن دا فیصلہ کیتا تے اوہناں نوں لگیا پئی اسلام والیاں نوں ایس نویں چکروچ پھسانا سب توں سوکھا ہے۔ کیونجے ایہہ مذہب دے ناں تے ہر ویلے بغیر کجھ سوچے سمجھے لڑنے مرنے نوں تیار رہندے نیں۔ نالوں نال انہاں وچ اینج دے مسلمان وی ہیگے نیں جیہڑے کرائے تے وی ایہہ کم کردے نیں۔ امریکی سامراج نوں ایس گل دا تجربہ پہلے روس نال افغانستان وچ لڑکے ہو چکیا سی۔ افغانی وارلارڈ امریکی ڈالر لے کے اوہناں دا کم وی کردے رہے نیں تے مذہب دے ناں تے اپنا کاروبار وی چلاندے رہے نیں۔ دنیا وی سوکھی تے آخرت وی، ایس دی وڈی وجہ اے وے پئی سرمایہ داری نوں مذہبیاں نوں پال کے اپنے نظام نوں کوئی خطرہ محسوس نہیں ہوندا۔ اوہ جاندے نیں پئی ایہہ تے اگلے جہاں والی زندگی پچھے دوڑ دے نیں۔ اوہناں ایس سوچ نوں خوب ورتیا تے ہن تک ورت رہے نیں تے اگے ہور 50 توں 60 سال ایہہ دھرمی ٹھیکے آرام نال چل سکدے نیں۔ ایس لئی تے کسے ملک وچ وچ القاعدہ نوں ظاہری طور تے مار دے نیں۔ فیر کسے ہور جگہ تے اوہناں نوں ہی اپنے مفاد لئی ورتدے نیں تے خرچہ پانی وی چکدے نیں۔ ایس لئی ایہہ گل تے غور کرو تے بڑے آرام نال سمجھ آجاندی ہے پئی جداں وی ایہناں نے دہشت گرداں دے خلاف جنگ شروع کیتی ہے اوس توں بعد ہن تکر دہشت گرداں وچ گھاٹے دی بجائے وادھا ہویا ہے۔ ایس وادھے دا وہناں نوں کیہ فرق پیا ہے؟ ساری لڑائی تے فلسطین وغیرہ وچ کررہے نیں تے دہشت گردیاں وی اوہناں ملکاں وچ ہی ہور رہیاں نیں۔ عراق ، شام، پاکستان یا یمن ول ہی پواڑے پیندے نیں۔ ہر پاسے مسلمان ہی مسلمان دا ویری وکھدا ہے ایس توں زیادہ کامیاب جوڑ توڑ ہو ہی نہیں سکدا ہے۔ ہن اوہناں نوں جاپدا ہے پئی ایس فساد نوں زیادہ ودھان دی لوڑ ہے تے ہن ایہہ ٹرمپ دا یروشلم نوں اسرائیل دا دارالحکومت بنان دا آرڈر آگیا ہے۔ ہن لڑائی مسلمان ملکاں چوں کڈ کے مسیحی تے یہودی کمیونٹیاں نوں وی لپیٹ وچ لے لتا ہے۔ یروشلم تِناں دھرماں دا گڑھ ہے۔ یہودیاں دا سارا مذہب یروشلم وچ ہی ہے۔ اوہناں دا قبلہ وی اوتھے تے اوہناں دے پچھلے گذرے بنی وی اوتھے ہی سن۔ اوہناں دی قبراں وی اوتھے ہی نیں۔ اوہناں دا وڈا عبادت خانہ وی اوتھے جس نوں ہیکل سلیمانی آکھیا جاندا ہے۔ اوس دی کند ھ دی موریاں وچ یہودی پرچیاں لکھ کے اپنیاں مراداں رب تک گھلدے نیں۔ تاکہ رب ڈائریکٹ اوہناں دی چھٹی پڑھے تے اوہدے تے کوئی فیصلہ کرے۔ ایس تھاں تے مسیحیاں دے پردھان نبی یسوع مسیح (مسلماناں دے حضرت عیسی علیہ السلام) ہوری یہودیاں اگے مسیحیت دی تبلیغ کردے سن۔ یسوع مسیح وی بچپن توں ایتھے یروشلم وچ آگئے سن۔ توریت وچ وی یروشلم دا بہت ذکر ہے تے بائبل وچ وی ایہہ تھاں مسیحیاں لئی وی اوڈی ہی پاک تے مقدس ہے۔ سگوں یسوع مسیح نوں یہودیاں نے ایسے شہر وچ صلیب دتی تے اوہ تھاں ہن مسیحیاں دی زیارت گاہ تے عبادت گاہ ہے۔ جس پتھرا تے کھڑا کرکے یسوع مسیح نوں سولی دتی گئی سی اوہدے تے اک گرجا گھر بنیا ہویا ہے۔ جتھے چووی گھنٹے پادری پوجا پاٹ کردے رہندے نیں۔ ایس ہی طراں مسلماناں لئی وی ایہہ شہر بہوں اوچا درجہ رکھدا ہے۔ ایہہ شہر جیدے وچ مسلماناں دا پہلا قبلہ وی ہے تے اوہ تھاں وی ہے جتھوں رسول کریم ؐ معراج شریف تے اسماناں اتے گئے سن۔ اوہناں دی حضرت موسیٰ، حضرت سلمان، حضرت اسحاق تے حضرت داؤد نال معراج شریف تے جاں توں پہلے جیہڑی ملاقات ہوئی سی اوہ وی ایسی شہر وچ بیت المقدس تے ہی فرشتے جبرائیل نے کرائی سی۔ ایسی طراں ایہہ شہر اج دنیاں دے تِن وڈے مذہباں دا مڈھ ہے۔ تِن مذہباں والے ایس شہر توں دور نہیں کیتے جاسکدے۔ ایس لئی اسرائیلی حکومت تے فلسطینی اتھارٹی دا یاسرعرفات دے زمانے وچ اک معاہدہ ہویا سی پئی ایس شہر نوں سانجھی اتھارٹی نال چلایا جائے گا۔ ایہہ شہر ویسے وی اسرائیلی یہودیاں نے مسلماناں کولوں کھولیا سی تے ایہہ تھاں ہن جھگڑے والی تھاں ہے۔ ایس تھا ں دا فیصلہ کوئی وی مذہب صرف اپنے حق وچ نہیں کرسکدا۔ ایس دا کوئی فیصلہ آپس وچ رل مل کے ہی ہوسکدا ہے جس دے وچ سارے مذہب اک دوجے دا خیال کرن تے سب ایس نوں رل مل کے چلان۔ ایہہ شہر سارے مذہباں دیاں زیارتاں نال بھریا ہے تے ایتھے اجیہا بندوبست ہونا لوڑی دا ہے جس پاروں تِنوں مذہباں نوں منن والے ایتھے آندے جاندے رہن۔ فیر ٹرمپ کون ہوندا ہے ایس تھاں دا کوئی فیصلہ کرن والا تے اوہ وی صرف یہودیاں دے حق وچ۔ اوہدی وجہ اک ایہہ وی سمجھ آندی ہے کہ ٹرمپ نے اپنے الیکشن وچ ایہہ نکتہ رکھیا سی کہ اوہ جِت گیا تے یروشلم نوں اسرائیل دا دارالحومت بنا دے گا۔ ایہہ سب اوہنے اوس امریکی یہودی لابی نوں خش کرن لئی کیتا سی جیہڑے الیکشن وچ ٹرمپ تے مال لا رہے سن۔ ہن اوہناں ہی ٹرمپ نوں آکھیا ہے پئی ہن توں ایہہ فیصلہ کرتے یروشلم نوں اسرائیل دا دارالحکومت من۔ اسی ایس کم لئی تیرے تے مال لایا سی۔ ایس پریشر وچ ٹرمپ نے ایہہ اعلان کیتا۔ ایس اعلان دے پچھے وڈی سازش اوہی ہے جیہدا شروع وچ ذکر کیتا ہے کہ دہشت گردی دی لڑائی نوں چالو رکھن لئی مذہبی پھڈا سب توں ودھیا ہتھیار ہے۔ مذہبی انتہا پسندی جڈی مرضی ودھ جائے ایہہ سرمایہ داری لئی کوئی خطرہ نہیں بن دی۔ جیویں سوشلزم یا اصلی والی عوامی جمہوریت مادر پدر سرمایہ داریاں نوں ڈکدی ہے، مذہبی بندوبست اونج نہیں ڈکدا۔ کوئی مذہبی نظام سرمایہ داری دا بدل نہیں ہے۔ اوتھے دنیا وی دولت دی غیر مساوی ونڈ نوں تقدیر آکھیا جاندا ہے تے نالے رب دی دین۔ جداں کہ وسوشلزم وچ وڈے امیراں کولوں دولت لے کے تے غریباں نوں وی حصے دار بنایا جاندا ہے۔ تاکہ امیر تے غریب دا گیپ تھوڑا ہوجائے تے ایہہ گل سرمایہ دار نوں منظور نہیں۔ ایس لئی اوہ دنیا نوں اپنی دولت تے قبضے نوں قائم رکھن لئی ہر ویلے لڑدے ویکھنا چاہندا ہے۔ مذہبی لڑائی کراہے پاندی ہے پئی لوکی دولت دی غیر مساوی ونڈ پاروں نہیں سگوں اک دوجے نوں کافر کہہ کے لڑدے مردے رہندے نیں۔ ایہہ بہت خطرناک لڑائی ہے جیہڑی وڈے پدر تے شروع کر دتی گئی ہے۔ لگدا ہے ہن فیر ایس مذہبی لڑائی توں لکھاں بندے مرن گے تے سرمایہ دار دا اسلحے تے نشے دا کاروبار چمکے گا۔ پر ایہہ یروشلم وچ شروع ہون والی لڑائی پوری دنیا نوں اپنے لپیٹ وچ لے لووے گی ۔ایس لئی ایس ونڈ تے ایس قسم دے ٹرمپ ازم دی جڈی مخالفتاں کیتیاں جاون اوہ گھٹ ہے۔ ایسے فسادیاں توں ایس زمین نوں صاف کرنا سب انسان دوستاں دا کم ہے تے اوہناں دی ذمہ واری وی ہے۔ ایہہ چمکھی لڑائی ہے جیہڑی سانوں ہی لڑنی ہے۔
Tanveer Zaman is a leftist Pakistani who lives in UK now. He wrote for Wichaar regularly. Uou can see his previous articles in section Column and clomnists at our website


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels