Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> تساں ملک نعیم نوں سیہاندے ہو؟ بدلدا ویلہ اتے رتھ باندھ۔نصرت جاوید

تساں ملک نعیم نوں سیہاندے ہو؟ بدلدا ویلہ اتے رتھ باندھ۔نصرت جاوید

وچار ڈیسک
December 16th, 2017

رت بدلدی ہے تے تازیاں ہواواں ہی نہیں سگوں نویں پکھیرو وی آندے نیں۔کجھ وس جاندے نیں کجھ اگانہہ ٹر جاندے نیں نواں سویرا دے کے۔پاکستانی سیاست وچ 1958تیک چلدیاں اسمبلیاں نوں رگیدن توں بعدوں1962،1985اتے 2002وچ گملیاں راہیں جعلی ہواواں چلاون تے ربوٹ پکھیرو اڈاون دا سربندھ کیتا گیا پر جد جد ویلہ بدلیا، نویں رت آئی تے انہاں وچوں ’’اصلی ہیرے‘‘ چھن چھن کے وکھرے ہوندے گئے۔ کدی بھٹو، نواز بنے تے کدی ملک نعیم۔ جنج ’’جن‘‘ دی جان طوطے وچ اینج ہی ویلے دی جان بدلدی رت وچ پئی رتھ باندھ وی رل جاندے نیں۔روسی آرکائیو گواہ پئی 1984توں1986نویں رت ول ودھن تے افغان پراجیکٹ دے مکن ول ودھن دا زمانہ سی۔کولڈ وار مکاون دے فیصلے کتھے ہوئے، کیوں ہوئے ایس بارے آرکائیوز ہن بھرے نیں پر اوس ویلے بدلدی رت نوں سونگھن والے ٹاواں ٹاواں سن۔تساں ملک ہوراں دی کہانی پڑھو تے سوچو پئی ساڈی ہشیار سٹیبلشمنٹ اوس بدلدی رت نوں ڈکن لئی جیہڑے کوڑ سفنے ویکھے سن انہاں نوں بغیر جنازہ پڑھائے ، ضرب عضباں تے ضرب الفساداں وچ دببن بعدوں وی انہاں کجھ نہ سکھیاکہ رت بدلن دی شوکراں وادھو۔سیاستدان کل وی جاندے سن تے اج وی کہ نصرت جاوید گواچی لہر چوں جیہڑی اج بارے لشکارے پاندی کہانی لکھی جے اوہ آپ پڑھ لو۔
 
وڈے شہراں وچ اک اونترے چکر تک محدود رہندے ہوئے صحافی اکثر کھوہ دے ڈڈو وانگ ہوجاندے نیں۔ انگریزی زبان والے ببلbubble وچ گرفتار یعنی’’بلبلے‘‘ وچ بند، سوچ پاروں امریکی صحافیاں دی وڈی اکثریتاں ٹرمپی اٹھان دے سبب نوں ویلے سر جان نہ پائی سی۔ اوس تے انہاں دے تجزیاں دے برخلاف اخیر کر دتی اتے وائٹ ہاؤس جا اپڑیا تے اوہ صحافی اپنی لکھتاں وچ ہن حیران ہی نہیں سگوں ذہنی اعتباراں نال ہاری ہوئی جنگ دے سپاہی بن چکے نیں۔ ذوالفقار علی بھٹو نوں 4 اپریل 1979 وچ پھانسی دین دے بعد جنرل ضیاالحق نے پورے پیراں بھار کھلو کے ساڈے ملک نوں اک نواں بیانیہ دتا سی۔ اسلام دی نشاہ ثانیہ دا ڈھونگ رچاند اتے افغانستان نوں جہاد پاروں کمیونز م توںآزاد کروان دے کھڑچ کنڈل وچ رجھیا ایہہ بیانیہ انتہائی بے رحمی دے نال میڈیا نوں غلام بناکے قوم دے ذہناں وچ ٹھونسیا گیا۔ پردھان اڑچل تے ایہہ وی ہے پئی اسی اج تک ایس بیانیے توں آزاد نہیں ہو پائے جے۔ ایس کالم وچ میں نرا 1985 وچ ہون والیاں چوناں بارے ہی گل چھواں گا۔ انہاں (غیرجماعتی) چوناں توں 4 سال پہلے 1981 وچ ساریاں سیاسی جتھے بندیاں(جماعتاں) بین کر دتیاں ہوئیاں سن۔ جمہوریت دی بحالی دے ناں تے MRD ناں دا اتحاد قائم ہویا سی۔ ایس دی سرگرمیاں پر نرے وڈے شہراں تک ہی سن۔ 1983 وچ غلام مصطفی جتوئی مرحوم نے ایس دے بینر تلے عوامی لہر چلاون دی کوششاں کیتیاں تے ایس دا سیک سندھ دے پنڈاں تھاواں تیک ہی رہیا۔بہوں سارے جیی انے رستیاں دا شکار ہوئے، ہزاراں گرفتار ہوئے۔ کئی اک جلاوطنیاں پلے پیاں۔ ہارے ہوئے سپاہیاں والی ذہنیتاں ساڈا قومی رویہ بن گیاں۔ شہراں تک جڑے، میرے ورگے صحافی انہاں دناں، سنسر توں بچ بچا کے اک دو جملے شائع کروان وچ کامیاب ہوجاندے تے خود نوں وڈا تیہہ مار خان شمار کردے۔ حق و صداقت دے علمبردار وغیرہ وغیرہ۔ ایسے ماحول وچ جنرل ضیا تے ایس دے ہرکاریاں غیر جماعتی بنیاداں تے قومی تے صوبائی اسمبلیاں لئی چوناں دا اعلان کیتا تے ساڈی(جرنلسٹاں) اکثریتاں نوں یقین سی کہ فوجی دوروچ کروائے صدارتی ریفرنڈم وانگ انہاں چوناں وچ حصہ لین لئی خلق خدا گرم جوشیاں نہیں وکھائے گی اتے گھراں وچ بیٹھی رہے گی۔ انہاں چوناں توں کجھ مہینے پہلے پر میں بھارت وچ موجود سی۔ اندرا گاندھی دے قتل دے بعد جیہڑیاں چوناں ہو رہیاں سن ایس لئی چلائی مہم نوں مختلف شہراں وچ ریل دی تھرڈ کلاس دے ذریعے پہنچ کے ، بہوں سستے ہوٹلاں وچ ٹہردے ہوئے ویکھیا تے رپورٹ کیتا۔ دلی تیک جڑے سینئر صحافیاں دی اکثریتاں نوں یقین سی کہ اندرا گاندھی دے مرن بعدوں ایس دی جماعت وچ جان نہیں رہے گی۔ ناں نہاد قیادتی بحراناں پاروں اخیر رلی ملی حکومت بنے گی۔ دلی وچ مقیم ساڈے سفارتکاراں نے اینج ہی دے تجزیے اپنی حکومت نوں وی گھلے سن۔ ’’ہواڑہ ایکسپریس‘‘ دے ذریعے دلی توں کلکتہ سفر کردے ہوئے ریل دے تھرڈ کلاس ڈبے وچ جو دیہاتی وی مختلف شہراں توں سوار ہوندے مینوں ملے انہاں دا اکثر جملہ اک ہوندا۔ لمڈے (راجیو) نوں اک چانس ضرور دینا ہے۔ ایس فقرے نے مینوں ایہہ دعویٰ کرن تے مجبور کردتا کہ 1984 دی چوناں وچ کانگریس اینی اکثریتاں لے گی جو شاید نہرو اپنے سفنیاں وچ سوچدا ہوئے گا، چوناں دے رزلٹ میری لاج رکھ لتی۔ بھارتی چوناں پاروں ملے تجربے دی بنیاد تے میں 1985 وچ عام لاریاں راہیں راولپنڈی توں چکوال تے اوتھوں مظفر گڑھ تک دا اک لمیرا سفر کیتا۔ سفر پاروں کھرا ایہہنکلیا پئی پنڈاں تھاواں وچ رہندے لوکاں دی پردھان اکثریتاں 1985 دی چوناں وچ حصہ پان نوں بے چین ہے۔ انہاں چوناں وچ دھڑے تے برادری مڈھلا کردار ادا کیتا سی۔ امیدواراں دے منہ متھے دا وی وڈکا رول رہیا۔ شہراں تیک جڑے صحافیاں نے انہاں چوناں راہیں ابھرے نویں چہریاں نوں انہاں دناں اہمیتاں ہی نہ دتیاں۔ ایہہ الگ گل ہے کہ نواز شریف وی انہاں چہریاں وچ رلتی سن تے چودھری نثار علی خان وی۔ قومی اسمبلی دی ممبریاں دا حلف چکن دے فوری بعدوں انہاں نے قومی اسمبلی لئی جنرل ضیاالحق دے چنیندے خواجہ صفدر مرحوم دی تھاں سید فخر امام نوں سپیکر لئی ووٹ دے کے اپنی ’’خود مختاریاں‘‘ دا اعلان کردتا سی۔ انہاں ہی چہریاں دی توانائیاں پاروں سندھڑی توں آئے محمد خان جونیجو مرحوم ورگے نمانا جنرل ضیا دے سامنے کھلو گیاسی۔ جونیجو حکومت دا پہلا بجٹ ڈاکٹر محبوب الحق ہوراں پیش کیتا سی۔ ایس بجٹ تے بحث وچ حصہ لیندے ہوئے خوشاب توں چنیدہ اک رکن کھلویا ا تے پریس گیلری وچ موجود میرے ورگے بہوں سارے صحافیاں نوں حیران کرگیا۔ ناں ایس رکن دا ملک نعیم سی۔ قومی سیاست وچ عسکری قیادتاں دے قبضیاں دا طنزیہ ذکر کریندے ہوئے 30 سال دے ایس نوجوان سپوت نے حیران کن جراتاں نال ایہہ تجویز پیش کیتی پئی پاک فوج نوں انہاں دے سیکٹرز دے حوالے توں مختلف کمانڈز وچ تقسیم کردتا جائے۔ مختلف کمانڈز وچ تقسیم فوج دا سربراہ مارشل لاء لان توں پہلے اپنے رفقا نوں On Board لیان وچ ایڈاکامیاب نہیں رہے گا جنج ایوب خان، یحییٰ خان تے جنرل ضیاء بڑے سوکھے ہو کے مارشلاء لائے سن ۔ 1985 وچ قومی اسمبلی وچ کھڑے ہو کے آرمی چیف دی طاقت نوں کمزور کرن دی ایہہ تجویز دیوانگی دیکھدی جرات مندی سی تے ملک نعیم نے وکھا دتی۔ اوس چیخاں دی تھاں نمے نمے اجہی دلیلاں دا بھنڈار لایا جنج اوہ کسے سمینار وچ گل بات کر رہیا ہوئے۔ قومی اسمبلی دی کاروائی وچ وقفہ ہویا تے میں بڑی چاہتاں نال ایس ممبر نوں ملن گیا۔ تعارف ہویا تے بہوں خش اخلاقیاں نال پیش آئے۔ پر کوئی گرم جوشیاں نہ وکھائیاں۔ اپنی ذات بارے گل بات کرن وچ وی زیادہ دلچسپیاں نہ وکھائیاں۔ چہرے تے مسکراہٹاں دوستانہ وادھو رہیاں۔ شیہہ جوان لمبے تڑنگے ملک نعیم ہوری مردانہ وجاہتاں دا اک باکمال نمونہ سن۔ کسی محفل وچ موجود ہوندے تے تساں انہاں نوں نظر انداز کررہی نہیں سکدے سو۔ اپنی ذات دے بارے وچ ورتی ایس دی بے احتیاتی نے مینوں مجبور کیتا کہ کجھ سینئر سیاست داناں توں ایس دا بیک گراؤنڈ جانیا جائے۔ چودھری انور عزیز اجیہے ویلیاں وچ میرے ورگے’ ببل وچ بند‘‘ صحافیاں دے بہوں کم آندے نیں۔ رب کریم انہاں نوں لمیری عمر عطا فرمائے۔ انہاں دے راہیں پتہ چلیا کہ آرمی چیف دی طاقت نوں کمزور کرن دی’’ تخریبی‘‘ تجویز دین والا ملک نعیم پاک فوج دے اک بہوں ہی مشہور بریگیڈئر سجاول دا منڈا ہے ،اتے اتوں خوشاب دا اعوان وی۔ انہاں دے نانکے اوتھوں دے مقامی سیاستاں دے بے تاج بادشاہ منے جاندے نیں۔ ٹرانسپورٹ دے کاروبار تے چھائے ہوئے نیں۔ ملک نعیم نے انہاں دی سرپرستیاں توں بغیر ہی قومی اسمبلی دی سیٹ جت لتی ہے۔ 1985 توں 1993 تک ملک نعیم صرف اپنی شخصیت دے بل تے قومی اسمبلی دی سیٹ جت دا رہیا۔ نواز شریف دے پہلے دور وچ ایس دا شمار پنچ پیاریاں وچ ہوندا سی یعنی اوہ پنج وفاقی وزیر جیہڑے نواز شریف دی کیچن کیبنٹ اکھوندے سن۔ اپنی ایس قربت دے باوجود اوہ میرا گوڑا یار بن گیا۔ وفاقی وزیر لئی دتے گھر وچ رہن دی تھاں F7/2 دی اک کوٹھی دے دو کمریاں تک محدود رہیا جس نوں انہاں دناں ’’پنجاب ہاؤس‘‘ آکھیا جاندا سی۔ نواز شریف دے حواری انہاں دناں مینوں ’’جیالا‘‘ شمار کردے سن۔ میری ’’وفاداری‘‘ انہاں دی نظر وچ مشکوک سی۔ مہینے وچ گھٹ و گھٹ تِن یا چار وار لمیریاں راتاں، میرے نال کلے بیٹھ کے دھانسو بحثاں توں بغیر ایس نوں چین نہیں آندا سی۔ عالمی امور تے کوئی نویکلی کتاب چھپدے ہی ایس نے پڑھ لتی ہوندی سی۔ انہاں کتاباں توں لبھے سچ جھوٹ نوں اوہ میرے نال وچاردا سی۔ فیر اک اونتری بماری نے ایس نوں خموش کردتا۔ کئی سالاں تک بسترے نال لگا رہیا۔ گل بات ایس دی مڈھلی آن تے بان سی۔ اوہ کملا ایس توں وانجھیا گیا تے میں ایس نوں بے کسیاں اتے بے وسیاں دی حالتاں وچ ویکھن دی خود وچ کدی ہمتاں ہی نہ کر سکیا۔ کچھ دیہاڑے پہلاں ایس نوں دفنایا تے میں ہلے تک 1985 دے بجٹ اجلاس وچ ہوئی ایس دی تقریر دے جادو توں باہر نہیں آیا تے ہور کیہہ لکھاں؟
Published in Nawa e waqat daily


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels