Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> لہور دا دھرناوی گیا۔ہن اگلا ایجنڈا کیہہ ؟الزام تے گالاں وادھو

لہور دا دھرناوی گیا۔ہن اگلا ایجنڈا کیہہ ؟الزام تے گالاں وادھو

December 2nd, 2017

تاجا حوالدار اتے بونے صحافی اپریل توں جولائی اتے نومبر دے اخیری دناں تیک نرے اک بندے نوں نکرے لاون لئی جیہڑے ایجنڈے چلائے اوہ سٹیبلشمنٹ دی رسوائیاں دا بوتھا ہی بنے کہ جڈا زور ضیا الحق پی پی پی خلاف لایا سی اوس دا نیوٹن دے تریجے قنون پاروں عام لوکاں دی پدر تے اڈا ہی ردعمل ہویا سی۔سٹیبلشمنٹ دا ایہہ خیال وی کوڑ نکلیا پئی جے پی پی پی نال ہوئے گی یا چپ کرے گی تاں ایس وار رزلٹ ہور نکلے گا۔پرجے20اپریل توں پہلی دسمبر دا چارٹ بناؤ تاں عدالت توں میڈیا تیک سٹیبلشمنٹ نوں موڈھے دین والے وی پراں جا کھلوتے نیں۔عالمی پدر تے مربی سعودی عرب اپنی ڈھال نہیں بن سکدا، ساڈی کیہہ بنے گا۔امریکی دفاعی پردھان جم میٹس ہوری وی آ رہے نیں۔جداں پولے پین دی واری آندی ہے تاں مزاحمتاں وی پٹھیاں پئے جاندیاں نیں۔14۔اگست1941نوں دنیا دی پردھانیاں امریکہ نوں اٹلانٹک چارٹر پاروں ملیاں سن اتے دستخط کرن والے برطانیہ دا خیال سی اوہ پرانے سلسلے وی جاری رکھے گا۔ دسمبر1941وچ نویں پادشاہ دے واشنگٹن دربار وچ روس،چین سنے26ملکاں حاضریاں دتیاں اتے لمیری رقماں، اسلحہ ونڈیا گیا۔نال و نال پرانے پردھان ملکاں یعنی فرانس تے برطانیہ نوں حکم ملیا پئی چارٹر پاروں ہن نوآبادیاں مکاون دا کم شروع کرو اتے رپورٹ وی گھلو۔ برٹش انڈیا سب توں وڈی نوآبادی سی اتے ایس دا نمبر لا دتا گیا۔چرچل، روزویلٹ خط پتر ایس دے گواہ۔ہشیار بر طانوی بیوروکریٹاں مارچ1942وچ کرپس مشن گھلن دا وعدہ فرمایا۔روس ایس نویں کھیڈ دا سربالا سی اتے روس دی سفارشاں تے واشنگٹن حکم دتا پئی برطانیہ کیمونسٹ پارٹی آف انڈیا تے 17سالاں توں لائیاں پابندیاں چک لے۔حکم ٹالنا اوکھاسی تاں جولائی وچ عمل ہو گیا پر اگست توں آل انڈیا کانگرس’’انڈیا چھڈو لہر‘‘ اساری۔ چرچل امریکیاں نوں پتر لکھیا اساں تے نوآبادیاتی بندوبست لپیٹن لئی وڈی پدر داوفد گھلیا سی پر اتھے ساڈے خلاف بغاوتاں نیں۔ امریکیاں جواب دتا پئی تساں اپے خفیہ اداریاں دی مدد نال جیہڑی بغاوتاں دی مہم ’’انڈیا چھڈو لہر‘‘ پاروں اساری ہے اوس نال سانوں چکر نہیں دے سکدے۔ایہہ ڈبل گیم نہیں چلے گی۔چھ سالاں وچ ہویا اوہی جس بارے فیصلہ14۔اگست1941نوں ہو چکیا سی۔جڈیا ں مینگنیاں برطانیہ پائیاں اوس نال سلطنت دا کم ہور خراب ہویا اتے اج وی1947دے بدترین فساداں اتے پنجاب تے بنگال دی ونڈ دا الزام سلطنت دے سر ہی ہے۔برطانوی لکھاری پیٹر کلارک لکھیا پئی اساں اٹلانٹک وچ سب کجھ گنوا چکے ساں پر چرچل ہوری پارلیمنٹ وچ جھوٹ بولدے رہے۔ سبق بس ایڈا ہے پئی سٹیبلشمنٹ پارلمنٹ وچ سب گلاں کرے اتے پالیسی جو وی بنانی ہے، یمنی قرارداد توں اگے پچھے ہونا ہے، وغیرہ سب بارے کھل کے گل ہوئے۔دھرنیاں نال ایہہ بیل ہور خراب ہی ہوئے گا، منڈھے نہیں چڑھنا۔ایہہ کم نو گیارہ بعدوں لوڑی دا سی پر مشرف دی ڈبل گیم کم ہور خراب کیتا۔ہن پارلیمنٹ نوں سب نوں بلا کے اک وار فیر یمنی قرارداد بارے بحثاں چلانیاں چاہیدیاں نیں۔پرانی حرکتاں نوں ڈکا لاون دا کوڑا گھٹ بھرنا ہو سی۔پر کجھ قوتاں اج وی انتشاری ایجنڈیاں نوں جاری رکھنا چاہندے نیں۔نواز نوں مکاندے مکاندے اوہ جیہڑا جن بوتل چوں کڈہنا چاہندے نیں اوہ ہک وڈی انتشاری مہم دا بوتھا ہے۔ضیا ایسے کوڑ پالیسی پاروں الطاف نوں جمیا سی۔لہور دا دھرنا وی مک گیا، پر اگے نوں کٹا کیہڑا ہے؟ مسلہ کسے ادارے دا نہیں سگوں پرانے بیانیے دے سہولت کاراں دا ہے جیہڑے نیشنل ایکشن پلان بعدوں وی پرانے کم بند نہیں کرنا چاہندے۔دھرنیاں دی سیاستاں نوں ہوا دینا اتے ایران مخالفتاں دی مہماں سانوں جے منظور نہیں تے ایس بارے پارلیمنٹ ملک دے فیدیاں نوں سامنے رکھ کے کھلے فیصلے کرے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels