Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> حکومت دے وس وچ کجھ نہیں۔ نصرت جاوید

حکومت دے وس وچ کجھ نہیں۔ نصرت جاوید

وچار ڈیسک
November 24th, 2017

ہورے ’’ووٹ دی قوت‘‘ توں اساری سرکار کئی حوالیاں توں بے وس نظر آوندی جے۔ لکھاریاں وچ سچ لکھن دی ہمتاں ہی نہیں رہیاں۔ ’’مذاکرات‘‘ ہوئے چلے جارہے نیں تے اگلے مہینے دی 3 تریخ نوں امریکی وزیر دفاع نے اک دن لئی پاکستان آنا ہے۔ ساڈی ریاست اتے حکومت نوں سدھا سدھا ایہہ دسن لئی کہ افغانستان وچ سپر طاقت نوں لوہے دے چنے چباون تے مجبور کرن والے ’’حقانی نیٹ ورک‘‘ تے قابو پاؤ گے یا فیر۔۔۔۔۔۔۔

پاکستان ٹیلی ویژن دے سنہری دناں دے حوالے توں بہوں مشہور ہوئے آغا مرحوم توں میں بہوں کجھ سیکھیا۔ تعلق انہاں نال ہورے، میر،ا واجبی ہی رہیا۔ ’’استادی شاگردی‘‘ والی صورت وی نہیں سی۔ ساڈی عمراں وچ بہوں فرق سی۔ کجھ سالاں لئی میں اپنی نوجوانی دے دناں وچ، جداں ڈرامے لکھے تے اوہ ایس PTV دے بہوں وڈے افسر ہوندے سن۔ ایس ادارے دے ہیڈ کوارٹر وچ کم کریندے سن۔ تکنی، انہاں دی ، ہر شے تے ہوندی سی۔ کم دی کوئی شے ٹی وی سکرین تے دیکھدے تے تڑپ اُٹھدے۔ انہاں دی خاہش ہوندی کہ ایس چیز دے خالق نوں مزید کم لئی اکسایا جائے۔ میری خش بختیاں کہ میرے ورگے بے ہنر ے وچ وی انہاں نے تخلیقی جراثیم لبھ مارے۔ انہاں دی وفات دے بعد لکھے اک کالم وچ یاد کیتا سی کہ 2007 دے شروع وچ پتہ نہیں کیوں آغا صاحب دے ذہن وچ ایہہ دھن سمائی پئی مرزا غالب دے آخری دیہاڑیاں بارے ہک ڈرامہ تیار کیتا جائے۔ ڈرامیاں دی پروڈکشن اوہ کئی سالاں توں چھڈ چکے سن پر انہاں دا وعدہ سی کہ انہاں دی خاہش دے پاروں سکرپٹ تیار ہوگیا تے اوہ ایس نوں خود پروڈیوس کرن گے۔ منوں بھائی انہاں دے پسندیدہ لکھاریاں وچ اْگڑویں لکھاری سن۔ انہاں توں ذکر ہویا تے موصوف نے ودھدی عمر دے نال نازل ہوئی بے دلی تے کاہلی دے جواز گھڑنا شروع کردتے۔ لہور دی اک محفل وچ انہاں دوناں وچ ایس پاروں بحث چل رہی سی تے میں وی اوتھے موجود سی۔ اچانک آغا صاحب دی نگاہ میرے تے پئی تے اعلان کردتا کہ ’’تسی ایہہ ڈرامہ لکھو گے‘‘۔ منوں بھائی نے بہوں مسرت تے خلوص دے نال انہاں دے ایس فیصلے دی اگے ودھ کے تائیداں کیتیاں۔ میں شرمندہ ہویا اتے ہاں وں نال کم چلاندہ رہیا۔ ایہہ سوچدے ہوئے دل نوں تسلی دتی کہ ’’رات گئی بات گئی‘‘ ہوجائے گی۔ ساڈے اسلام آباد پرتن دے اک ہفتے بعد آغا ناصر باقاعدگیاں نال لمبی واک کردے سن میرے گھر دے نیڑیوں لنگے تے گھنٹی وجا کے مینوں باہر بلایا۔ اپنی واک دے معمولاں وچ تبدیلی انہاں نوں پسند نہیں سی۔ کھڑے کھڑے بس اینا پچھیا کہ میرے کول غالب دے خط پتراں دا سب توں مستند تے بہترین مجموعہ ، جس نوں مولانا غلام رسول مہر ہوراں مرتب کیتا سی، ہے۔ اوہ مجموعہ میری سس دی لائبریری وچ موجود سی۔ میں آغا صاحب نوں دسیا تے انہاں نے حکم دتا کہ میں ایس نوں چُک کے بستر دے کول رکھ لواں تے جداں وی وقت ملے ایس کتاب نوں کھول کے پڑھنا شروع کردواں۔ ’’ساڈی خاہش ہے کہ تسی 1857 دے حالات نوں غالب دی نظر نال ویکھنا شروع کرو۔‘‘ ایہہ کہن دے بعد اپنی واک ول ٹُر پئے۔ مولانا غلام رسول مہر والا مجموعہ انہاں دے جان دے بعدمیں اپنی پواندی ول رکھ لتا۔ اج وی اوتھے پیا ہے۔ جداں وی موقعہ ملدا ہے ایس نوں پڑھنا شروع ہوجاندا ہاں۔ ’’غالب والی نظر‘‘ ہلے تک نصیب نہیں ہوپائی۔ 2007 ہی وچ مینوں اک سیمینار دے سلسلے وچ دلی جان دا اتفاق ہویا تے آغا ناصر وی ساڈے نال سن۔ اوتھے اک سویرے پِیراں وچ واک کرن والی جُوتی پاکے مینوں وڈی مسیت لے گئے۔ اوتھے ہرے بھرے پِیر دے مزار توں اسی غالب دے کوچہ بلی ماراں والے گھر گئے جس نوں ہن اک میوزیم بنادتا گیا ہے۔ اوتھوں فراغ تھین بعدوں تریخی دلی دے ہراوس کوچے وچ جانا پیا جو کسی نہ کسی طراں غالب یا 1857 دے حوالے توں اہمیتاں رکھدا سی۔ آغا صاحب دا بچپن دلی تے میرٹھ دے درمیان واقع اک قصبے فرید نگر وچ گذریا سی۔ انہاں دے دو بھرادلی وچ سرکاری نوکر سن۔ انہاں دی خالہ وی ایس شہر وچ رہندی سی۔ ایہہ معلومات مینوں ایس سفر دے دوران نہیں سگوں’’آغا توں آغا ناصر تک‘‘ والی کتاب پڑھدے ہوئے ملیاں نیں۔ آغا صاحب دی اہلیہ تے انہاں دی تخلیقی سفر دی کئی حوالیاں توں ’’سہولت کار‘‘ محترمہ صفیہ ناصر نے ایس کتاب نوں چھپوایا ہے۔ بنیادی طور تے ایہہ کتاب اوہناں نوٹس تے رلتی ہے جو آغا صاحب اپنی سوانح عمری لکھن لئی بنائے سن۔ایہہ کتاب لکھن نوں انہاں دل ہرگز مائل نہیں ہورہیا سی۔ چاہن والیاں دے اصرار تے یاداں نوں ویہلے ویلے چ لکھدے رہندے۔ افسوس انہاں یاداں دی کتابی صورت انہاں دے پورے ہون بعدوں توڑ چڑھی۔ ’’آغا سے آغا ناصر تک‘‘ اک فرد نہیں ایسے عہد دی داستان ہے جو قیام پاکستان توں کجھ سال پہلے شروع ہوندا ہے۔ ایس عہد وچ بھرپور توانائی امیداں دے ایسے موسم وچ اگڑویں نظر آندی ہے جداں پاکستان بنن دے فوری بعد جوان ہوندی نسل نے بے پناہ جذبے دے نال ایس ملک نوں سنوارن تے ایس وچ جدید ترین ابلاغی ادارے کھڑے کرن لئی اپنی صلاحیتاں نوں بھرپور انداز وچ ورتا۔ ایہو جہی توانائی تے گرم جوشی سانوں قرۃالعین حیدر دی ’’کار جہاں دراز ہے‘‘ دے انہاں سالاں وچ وی بہوں شدت دے نال اُچھلدی نظر آندی ہے جداں ’’عینی‘‘ پاکستان وچ سی۔ وزارت اطلاعات توں منسلک ہوکے دنیا نوں نویں ملک توں متعارف کروان لئی دستاویزی فلماں تے پبلسٹی بروشرز تیار کررہی سی۔ ’’عینی‘‘ اک روز لندن روانہ ہوگئی تے اوتھوں بھارت واپس۔ قرۃ العین دی بھارت واپسی میری دانست وچ امید دی شکست سی۔ آغا صاحب نے امید دا دامن کدی نہیں چھڈیا۔ بہوں دھیمے لہجے وچ مہذب گل بات کرن والے آغا ناصر نوں ہمیش ایہہ امید رہی کہ پاکستان دے لکھاری تے تخلیق کار اپنی صلاحیتاں نوں ایس ملک تے نازل ہوئی آفتاں دے مقابلے لئی استعمال کرن گے۔ ’’آغا سے آغا ناصر تک‘‘ وچ شاید ایس لئی بہوں مہارت نال سمجھایا گیا ہے کہ 1970 دی دہائی دے ابتدائی سالاں وچ ’’سقوط ڈھاکہ‘‘ ہوجان دے بعد وی پاکستانیاں نے ہمت نہیں ہاری سی۔ قوم نوں 1973 وچ دستور ملیا۔ لاہور وچ اسلامی کانفرنس ہوئی۔ پاکستان ٹیلی ویژن نوں دنیا بھر دے میڈیائی ماہرین نے ایشیاء دا سب توں موثر تے جاندار نیٹ ورک تسلیم کیتا سی۔ انہاں سب نے رل کے ثابت کیتا کہ پاکستانی ہرگز اک پست ہمتاں والی قوم نہیں ہے اتے بھیڑے حالاتاں وچ وی کھلو جاندی ہے ۔ لوڑ ایس نوں نری نابری توں مالا مال حکمراناں تے انہاں توں وادھو اجہے لکھاریاں تے تخلیق کاراں دی جو انتشاری ا تے خلفشاری کیفتاں نوں ویلے سر ویکھ کے انہاں دا مقابلہ کرن دی ٹھان لین۔ غالب نوں 1857 دی ہیجانی کیفتاں وچ گرفتار ہوندا وکھاندے ہوئے آغا ناصر شاید سانوں انہاں دناں دے پاکستان لئی تیار کرنا چاہ رہے سن۔ 1857 دا پردھان کردار بہادر شاہ ظفر سی۔ قنونی تے اخلاقی اعتباراں توں ’’بادشاہ‘‘ انتشار ی قوتاں دے سامنے بے بسا سی۔ بنگال تے بہار تے اپنا جبر مسلط کرن دے بعدوں ایسٹ انڈیا کمپنی اودھ تے یوپی تے قبضہ جما چکی سی تے فیر دلی وچ اوس دے ڈیرے وادھو سن۔ ایس دی راہ ڈکن لئی بغاوتاں ہوندیاں نیں۔ انگریز ایس نوں غدار کہندا ہے۔ ایس غدر یا بغاوت نوں مذہبی جواز فراہم کرن دی کوششاں ہوندیاں نیں تے ہندو مسلم پاڑ پئے جاندا ہے۔ دلی ’’تلنگے‘‘ سہولت کاراں دی نازل کردہ افراتفریاں دا نشانہ بن جاندا ہے۔ غالب ورگے حساس تے تخلیقی صلاحیتاں توں مالامال بندے اپنے گھراں وچ گواچی گاواں وانگ قید۔ پاکستان دے دارلحکومت اسلام آباد دا انہاں دناں کجھ اینج دا ہی حال ہے۔ ہورے ’’ووٹ دی قوت‘‘ توں قائم ہوئی سرکار کئی حوالیاں توں بے وس نظر آرہی جے۔ لکھاریاں وچ سچ بیان کرن دی ہمتاں ہی نہیں رہیاں۔ ’’مذاکرات‘‘ ہوئے چلے جارہے نیں تے اگلے مہینے دی 3 تریخ نوں امریکی وزیر دفاع نے اک دن لئی پاکستان آنا ہے۔ ساڈی ریاست اتے حکومت نوں سدھا سدھا ایہہ دسن لئی کہ افغانستان وچ سپر طاقت نوں لوہے دے چنے چباون تے مجبور کرن والے ’’حقانی نیٹ ورک‘‘ تے قابو پاؤ گے یا فیر۔۔۔۔۔۔۔۔۔۔۔ کاش میں آغا ناصر دی رہ نمائی وچ غالب نوں 1857 دے تناظراں وچ رکھ کے کجھ سمجھ لتا ہوندا۔
 Published in Naw e Waqat, Daily 


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels