Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> پنجاب دا چورن۔یاسر پیرزادہ

پنجاب دا چورن۔یاسر پیرزادہ

وچار ڈیسک
November 16th, 2017

پیارے بچو! جس طرحاں کہ تسی جاندے ہی ہو پئی پنجاب والے ہمیش دوجے صوبیاں دا حق کھاندے نیں، چڑھدے سورج دی پوجا کردے نیں، وسائلاں تے مل ماردے نیں، نوکریاں وچ وی پنجابیاں دا حصہ زیادہ ہے۔ پردھان عہدیاں تے وی پنجابی ہی لگدے نیں، قومی اسمبلی وچ وی انہاں دی ا جارہ داریاں نیں، پردھان اداریاں وچ وی انہاں دا سکہ چلدا ہے تے نہ جانے انہاں دے کول کیہڑی چمک ہے جو اکھاں نوں خیرہ کردیندی ہے۔ دوجے پاسے نِکے صوبیاں نال شودراں والا سلوک ہوندا ہے ۔ایہہ نکے صوبے ملک دی کمائی دا ذریعہ نیں پر انہاں تے خرچ کجھ نہیں ہوندا۔ نکے صوبے معدنی وسائلاں توں مالا مال نیں پر غربتاں دی ایتھے ڈھیر وادھو۔ راج دربار دے وڈے فیصلیاں وچ انہاں دا کردار نہ ہون دے بربر ۔ قومی اسمبلی وچ انہاں دی اوقات دا اندازہ ایس گل توں لایا جاسکدا ہے کہ تن صوبے رل وی پنجاب نوں نہیں ڈھا سکدے ۔ایہو نہیں سگوں ریاست دے دوجے معاملیاں وچ وی انہاں دے نال اینج ہی زیادتیاں ہوندیاں نیں۔ آؤ ہن انہاں گلاں نوں کجھ مثالاں نال سمجھن دی کوشش کردے ہاں۔
پیارے بچو! سب توں پہلے تے ایہہ ذہن وچ رکھو پئی پنجاب نوں گال کڈہنا اک فیشن ہے ۔پئی، جے تہاڈے نلکے وچ پانی نہیں آرہیا، تہاڈے شہر وچ لوڈشیڈنگ ہے، گلیاں وچ کوڑے دے ڈھیر نیں، تہانوں نوکری نہیں ملدی، کارویہار مندا ہے، بیوی میکے چلی گئی ہے یا ایویں کسے ہور گلپاروں تہاڈا موڈ خراب ہے تے تسی اپنا غصہ کڈھنا چاہندے ہو تے بلا کھٹکے پنجاب نوں دو چار صلواتاں سنادیو۔رب نے چاہیا تے تہاڈی شعلہ بیانیاں نوں میڈیا کوریج دیگا، حب الوطنی تے شک وی نہیں اٹھے گا، اپنے صوبے وچ داد وی ملے گی تے ہوسکدا ہے کہ تہانوں نِکا موٹا لیڈر بنا دتا جائے۔ یاد رکھو کہ گال دیندے ہوئے یا الزام لاندے وقت ایہہ کوئی نہیں پوچھدا کہ سچ کیہ ہے۔ مثلاً ،کیہ کس نوں یاد ہے کہ چار سال پہلے لہور شہر وچ ہر اک گھنٹے دے لئی لوڈشیڈنگ ہوندی سی حالانکہ ایس شہر توں بجلی دے بل دی وصولیاں دی شرح 97 فیصدی سی جداں کہ ایس دے مقابلے وچ فاٹا وچ بل دی وصولیاں جیڈیاں سن اوہ ایتھے لکھدے ہوئے شرم آندی ہے۔ ادھر کراچی وچ وی لوڈشیڈنگ دا یہو حال سی کہ لہور دے مقابلے وچ اک چوتھائی توں وی گھٹ لوڈشیڈنگ ہوندی سی تے جینا ٹائم بجلی آندی سی اوہ ساڈے کراچی دے بھراواں لئی مفت سی، تھینکس ٹو کنڈا سسٹم۔ ہاں، بھرا توں یاد آیا اک بھائی صاحب اینج دے وی گذرے نیں جیہناں نے پورے ملک دے میڈیا نوں ہائی جیک کیتا ہویا سی۔ جے اوہ پنجابی ہوندے تے بھلا دسو پنجاب دے حصے دی گلاں وچ کینے فیصد اضافہ ہوندا!
پیارے بچو، ایہہ حقائق لکھن دے نیں نہ دسن دے، ایہہ گلاں صرف اپنے تک رکھنیاں جے۔ یاد رکھن دی گل صرف ایہہ ہے کہ اک سازش دے تحت حالیہ مردم شماری وچ کراچی دی آبادی نوں گھٹ کردتا گیا ہے تاکہ شہر نوں اوس دے حق توں محروم کیتا جاسکے۔ غضب خدا دا جس شہر دی آبادی بچہ بچہ جاندا ہے کہ تِن کڑوڑ توں زیادہ ہوئے گی، اوس دی آبادی ڈیڑھ کڑوڑ وی نہ نکلی تے لہور دی آبادی سوا کڑوڑ تک پہنچ گئی۔ خبردار بچو، تہانوں انج گمراہ کُن پروپیگنڈے توں متاثر ہون دی لوڑ نہیں جس وچ اعداد و شمار دی مدد توں ایہہ دسیا جارہیا ہے کہ 1981 وچ کراچی دی آبادی 53 لکھ سی، ساڑھے تِن فیصد ی دی شرح درست نہیں تے آبادی ودھن دے بعد ایہہ آبادی 1998 وچ 93 لکھ ہوگئی۔ حالیہ مردم شماری وچ آبادی ودھن دی شرح درست نہیں ۔جے آبادی ایہو ساڑھے تِن فیصدی دی شرح توں ہی ودھدی تے اوس صورت وچ وی کراچی دی آبادی پونے دو کڑوڑ توں اُتے نہ جاندی۔ جداں کہ ساڈا دعویٰ گھٹ و گھٹ تِن کڑوڑ دا ہے تے تِن کڑوڑ آبادی حاصل کرن لئی ضروری سی کہ کراچی دی آبادی سوا چھ فیصدی دی شرح توں ودھدی، جیہڑا ناممکن ہے تے جے انج ہویا ہے تے ایس دا مطلب کہ ہر چھ چوں دو یا تِن لوکاں نوں(نویں مانو گنتری وچ) گنیا ہی نہیں گیا جیہری اک مخولیہ گل ہے۔ اسی ایہہ وی کہندے ہاں کہ کراچی دے کجھ دیہاتی علاقیاں دی آبادی کراچی وچ شامل ہی نہیں کیتی گئی۔ پر جے ایس آبادی نوں وی ملا لیا جائے تے کل گیارہ لکھ دا اضافہ بن دا ہے تے رون دا مقام ایہہ ہے کہ شہری تے دیہی علاقیاں دی حد بندیاں کرنا خود صوبائی حکومت دا کم سی۔ ’’پنجابی وفاق‘‘ دا ایس توں کوئی تعلق نہیں سی۔
پر پیارے بچو، جس طرحاں میں آکھیا کہ انہاں اٹ و اٹھ حقیقتاں نوں چکن دی لور نہیں، زور صرف ایس گل تے دو کہ کراچی دی آبادی نوں اک سازش دے تحت گھٹ کیتا گیا ہے اتے ایس دے نال نال ایہہ بھل جاؤ کہ حالیہ مردم شماریاں پاروں پنجاب دی قومی اسمبلی پوریاں9 سیٹاں گھٹ ہوچکیاں نیں تے باقی نِکے صوبیاں دی سیٹاں ودھ گیاں جے۔ ایہہ گل وی پی جاؤ کہ ایس مردم شماری وچ سندھ دا حصہ گھٹ نہیں ہویا تے کے پی تے بلوچستان دا ودھیا ہے جداں کہ پنجاب واحد صوبہ ہے جس دا حصہ 56 توں گھٹ ہوکے 53 فیصد ی رہ گیا ہے ۔تشہیراں صرف ایس گل دی کرو کہ پنجاب آبادی دی بنیاد تے ہمیش حکومت بنا لینداہے۔ ایس گل نوں چھڈ دو کہ دنیا بھر وچ وفاق دی اکائیاں دی نمائندگی دا ایہو طریقہ ہے کہ اک ایوان آبادی دی بنیاد تے دوجا ایوان یونٹاں(صوبیاں) دی بنیاد تے عوام دی نمائندگیاں کردا ہے۔ تسی صرف ایہہ سبق یاد کرو کہ پردھان حلقے ہمیش پنجاب توں ہوندے نیں۔ ایس لئی بالادستی پنجاب دی ہے۔ ایہہ گل دہران دی لوڑ نہیں کہ ماضی دے چار آمریاں چوں تِن غیر پنجابی سن تے انہاں چوں اک نے تے کراچی دے نال اپنی محبت دا ثبوت 12 مئی نوں دتا سی جو اج وی سب نوں چیتے ہے۔
پیارے بچو! ایہہ سبق یاد رکھو کہ پنجاب نے نِکے صوبیاں دا استحصال کیتا ہے۔ ایہہ بھل جاؤ کہ پنجاب دے حکمراناں دی وی چُھٹی کروائی گئی ہے تے چھُٹی کروان والے غیر پنجابی سن۔ ایہہ گل رٹ لو کہ پردھان اسامیاں تے پنجاب قابض ہے تے ایہہ بھل جاؤ کہ سی ایس ایس سنے ساریاں وفاقی ملازمتاں وچ کوٹے دی وجہ توں پنجابی طلبہ تے نِکے صوبیاں دے طلبہ نوں فوقیتان دتی جاندیاں نیں۔ ایہہ گل وی کہندے رہن وچ کوئی حرج نہیں کہ پنجاب نے ہمیش سامراج دا ساتھ دتا ہے ۔پر ایہہ گل بھل جاؤ پئی ہر مزاحمتی پارٹی تے لہر لہور توں ہی اٹھی ہے۔ بلوچاں تے ظلم وی پنجاب دے کھاتے وچ پاؤ، قطع نظر ایس حقیقت دے کہ ایس ظلم دے خلاف سب توں تگڑی آواز چَکن والا اک پنجابی تے لہوری صحافی ہے۔
سبق: پیارے بچو! ایس باب وچ اسی ایہہ سبق سکھیا کہ جے اسی انج ہی حقیقتاں توں نظراں چراندے ہوئے اکھاں تے تعصباں دی عینک چڑھا کے اپنا اپنا چُورن ویچاں گے تے فیر گل ایتھے تک آن پہنچے گی کہ پشور وچ دھماکہ پشتون مرن، لہور وچ دھماکہ پنجابی مرن،پر خون کسے پنجابی، بلوچ، سندھی یا پختون دا نہیں سگوں پاکستانی دا بہندا رہیا۔ غریب بھانویں راجن پور دا ہوئے یا پنجگور دا، سب دا سانجھا ہے۔ پر ایہہ ساریاں گلاں دا ایہہ ہر گز مطلب نہیں کہ پنجاب نے نِکے صوبیاں دے نال کوئی زیادتی نہیں کیتی، استحصال ہویا ہے، جس دے خلاف مزاحمت وی کیتی جانی چاہیدی ہے پر غلط گلاں توں اپنا مقدمہ کمزور کرن دی تھاں پنجاب دی استحصالی اشرافیہ دی ایسیاں نا انصافیاں دا پردہ چاک کرنا چاہیدا ہے جس بارے پکیاں شہادتاں موجود نیں۔
کالم دی دُم: ایہہ گل سندے سندے کن پک گئے کہ کراچی توں ملک دا ستّر فیصد ریونیو آندا ہے پر کسی نے اج تک ایس ضمن وچ کوئی سرکاری کاغذ بطور ثبوت دے پیش کرن دی لوڑ محسوس نہیں کیتی ایس لئی اج ایہہ دعویٰ کررہیا ہاں کہ ملک دا 90 فیصد ریونیو تحصیل پتوکی توں آندا ہے اینج ہی تے اینج ہی سہی۔
نوٹ: مردم شماری توں متعلق اعداد و شمار جواں سال لکھاری حسان خاور دے حالیہ شائع شدہ مضمون توں لتے گئے نیں۔
 نومبر دی8تریخ نوں جنگ وچ چھپیا


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels