Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> عرب، اسرائیل سانگے:ایرانی محاذ گرم ۔اسرائیلی وزیراعظم دا لندن وچ کوڑاعلان

عرب، اسرائیل سانگے:ایرانی محاذ گرم ۔اسرائیلی وزیراعظم دا لندن وچ کوڑاعلان

November 4th, 2017

سوسال پہلاں راج نیتی پاروں اپنے ویری عثمانی سلطنت نوں توڑن اتے پہلے کیمونسٹ انقلاب نال نبڑن لئی لندنی سرکار نے دھرماں تے فرقیاں نال کھیڈن دی پالیسی بنائی سی جس دا اک وڈا پاوا کوڑ’’بل فور ڈیکلریشن‘‘ سی اتے ایس دی100 ویں سالگرہ تے نیتن ہاہو لندن آ کے گل بات کیتی۔نیتن ہاہو ہوراں لندن وچ آکھیا پئی اعتدال پسند عرب ملکاں تے اسرائیل وچ ایران مخالفتاں پاروں سانگے ودھ رہے نیں۔ایس سلسلہ وچ امریکی صدر ڈونلڈ ٹرمپ دے یہودی جوائی اتے رئیل سٹیٹ اتے میڈیا دے ناخدا جیرڈ کوشنر دا ناں لتا جا رہیا ہے جیہڑا سعودی امریکی اتحاد دے اخیری اکٹھ وچ بہوں سرگرم سی جس وچ نواز شریف نوں ذلیل کیتا گیا سی۔بقول نصرت جاوید، نواز دے مقدر دا فیصلہ اوس دن ہی ہو گیا سی۔
چین مخالف اتے ایران مخالف تیزی نال آپسی جھیڑیاں نوں مکا کے نویں صف بندیاں اسار رہے نیں۔قطری جھیڑیاں توں مڈل ایسٹ وچ اوس نویں صف بندی ول گل ودھی ہے جس پاروں ایران مخالفت وچ سعودی اتحاد اتے اسرائیل نیڑے ہو رہے نیں۔اسرائیلی وزیراعظم نیتن یاہو دا تازہ بیان ایہہ دس رہیا ہے پئی امریکی سعودی اتحاد اتے اسرائیل کیوں نیڑے ہو رہے نیں اتے نویں دنیا دا بوتھا کون، کنج وگاڑن دا پربندھ کر رہیا ہے۔کوشنر ہوری نیویارک آبزرور دے مالک نیں اتے انہاں ایہہ گل من لتی ہے پئی انہاں اخیری امریکی چوناں وچ روسیاں نال سانگے ودھائے سن۔
آپدے فوری مفاداں لئی کسے وی دھرم، فرقے، ملک یانسلی جتھے بندیاں نوں ورتنا اوہ کوڑ پالیسی جس دا موڈھی پہلی وڈی لام دا برطانوی خارجہ وزیر بل فور کہ اج وی بل فور دے آنڈے بچے ایران مخالفتاں دا گھما بنا کے پرانی شراب نویں بوتل وچ ویچن لئی تیار۔اپنی گل بات وچ نیتن یاہو اعتدال پسندی دی نویں تعریفاں کیتیاں جے اتے اج توں بعدوں ہر اوہ ملک اعتدال پسند ہو سی جیہڑا ایران مخالفت وچ حاضریاں بھرے گا سنے اسرائیل تے سعودی عرب۔ٹلرسن تے سعودی عرب دورے وچ عراقی بلارے دی آمد اتے عراق دے وزیراعظم دے بیان بعدوں ایہہ دسیا گیا ہے پئی ایران خلاف گھیرا پورا کیتا جا رہیا ہے۔
ایران دے چھ زمینی ہمسائیاں وچوں ترکی تے آذربائیجان پہلاں ہی ایران دے نال نیں اتے چینی روسی اثر پاروں تاجکستان وی ایس کوڑ مہم توں پراں اتے ساری لڑائی ہن افغانستان، پاکستان تے عراق دے رستے ہی اگے ودھ سکدی ہے۔ امریکہ، سعودی عرب اتے اسرائیل دا وڈا مسلہ ایہہ وی ہے پئی جے شام وچ امن آ گیا تاں شامی تعمیر نو وچ کون کون حصہ دار ہوئے گا؟اتے ایس امن دا تاج روس دے سر پوئے گا تاں امریکی دبدبہ ہور گھٹ سی۔ترکی، ایران تے قطر شامی امن دے راکھے آکھوان گے تاں مڈل ایسٹ دی سیاستاں وچ روسی، چینی اثر ودھے گا۔ایہہ ہے اوہ بدلدی سیاستاں جس دے رنگ اساں پچھلے چھ میہنیاں توں پاکستان وچ وی ویکھ رہے ہاں۔عالمی جنگی ٹھکیداراں لئی وی شامی محاذ دے ٹھنڈے ہون بعدوں نواں محاذ گرم کرنا لوڑی دا ہے پئی سنی اتحاد دا تجربہ، ترکی تے قطر دے ایران نال کھلون بعدوں ناکام ہو چکیا ہے۔ تاں مارے ہن کدی اعتدال پسند عرب ملکاں نوں پکاریا جاندا ہے اتے کدی اسامہ دے مردہ گھوڑے القائدہ اتے ایران دے سانگیاں بارے پرانے کاغذ لہرائے جاندے نیں۔پاکستان دو کشتیاں وچ پیر رکھن دا تاثر دے رہیا ہے کہ پارلیمنٹ دی یمنی قرارداد اک پاسے اتے سعودی امریکی اتحاد وچ حاضریاں اتے راحیل شریف دی نویں نوکری دوجے پاسے۔پر پارلیمنٹ نوں ہن یمنی قرارداد توں اگے ودھن دی لوڑ ہے پئی اسرائیلی وزیراعظم دا لندنی اعلان جنگی نقارے تے پہلی سٹ۔پاکستانی سیاسی لیڈراں نوں وی کھل کے گل کرنی لوڑی دی ہے پئی اوہ اسرائیلی وزیر اعظم دے ارادیاں تے کیہہ آکھدے نیں۔اینج جاپدا ہے پئی امریکی سعودی اتحاد اسرائیل توں دو ریاستی حل منوان دا تاثر دیندے ہوئے ایران مخالف مہماں نوں تیز کرن دا پربندھ کرے گا کہ وڈا ٹیچا شامی جھیڑے دے مکن توں پہلاں اک نواں محاذ گرم کرن دا ہی ہے۔ ساوتھ چینی سمندراں وچ تے نواں جنگی محاذ نہیں بن سکیا کہ ہن  جنگی اکانومی نوں ٹیک دین لئی ایہہ ٹرمپ دی مجبوری وی ہے اتے حجاز، تل ابیب اتے لندن دا پراناسفنہ وی۔چیتے رہے پئی مسلہ کسے دھرم یا قوم دا نہیں سگوں ترکی، ایران، آذر بائیجان، شام، اسرائیل، فلسطین، عراق،سعودی عرب،کویت، یمن وغیرہ تے مشتمل ایہہ ہلال زرخیز چار سمندراں دی درمیانی تھاں ہے جس نوں باہرلیاں دے لوبھ اتے اپنیاں دی کرتوتاں پچھلے سو سالاں توں برباد کیتا ہویا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels