Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> وزیراعظم عمران خان۔۔محمد حنیف

وزیراعظم عمران خان۔۔محمد حنیف

پنجابی روپ: وچار
October 29th, 2017

مینوں عمران خان دے وزیراعظم بنن دی خبر کجھ سال پہلے اک ستویں جماعت دے بچے توں ملی۔ بچے نوں سیاست نال کدی کوئی دلچسپی نہ رہی سی سگوں جے پیو ٹی وی تے کوئی سیاسی شو ویکھن دی کوشش کردا تے فوراً ریموٹ کھوہ کے چینل بدل دتا۔ ایسے بچے اک دیہاڑ اچانک پچھیا کہ کیہ ساڈے اگلے وزیراعظم عمران خان ہون گے؟ ایہہ پچھلے الیکشن توں کافی پہلے دی گل ہے۔ حالات ایہہ سن کہ عمران خان ہر روز کسی چینل تے ،کسی پروگرام یا دوجے مہماناں دے نال مجمان بنے بیٹھے ہوندے سن۔ اک دن خود انہاں گناہ گار اکھاں نے ویکھیا کہ اوہ اینج بولنا شروع ہوئے، حامد، جس دن میں وزیراعظم ہواں گا، فیر ،خود ہی رکے تے ہسے، پینل دے دوجے ارکان وی حوصلہ پھڑ کے ہسے اتے حامد وی مسکرایا۔ عمران خان نے آکھیا، ٹھیک ہے ہس لو، پر جس دن میں وزیراعظم بنا گا تے۔۔۔ میں بچے نوں پچھیا کہ تہانوں کس طراں پتہ ہے کہ عمران خان وزیراعظم بنے گا؟۔ ایس نے آکھیا کلاس وچ اک مُنڈا کہہ رہیا سی۔ مینوں خوشی ہوئی کہ مہنگے پرائیویٹ سکول دے بچیاں نوں وی سیاست وچ ایسی ہی دلچسپی ہے جس طراں کدی ٹاٹ سکولاں والیاں نوں ہوندی سی۔ کراچی وچ عمران خان دے پہلے ساتھیاں وچ عارف علوی رلتی نیں۔ میں تہانوں حلفیہ دس سکدا ہاں کہ دنیا وچ انہاں توں چنگا دنداں دا ڈاکٹر نہیں ہے۔ مینوں سیاست، معیشت، تاریخ تے فلسفے دی زیادہ سمجھ نہیں ہے ،پر دنداں دے علاج دا بہوں تجربہ ہے۔ ڈاکٹر عارف علوی نے ایس لکھاری دے ایسے ایسے دنداں نوں شہادتاں توں بچایا جیہناں تے لندن تے ہانگ کانگ دے ڈاکٹر فاتحہ پڑھ چکے سن۔ ڈاکٹر صاحب پہلے دنداں تے لیکچر دیندے سن۔ کہندے سن دند انسان دے جسم دی سب توں تگڑی ہڈی ہے، پر تسی ویکھو، انہاں دا کیہ حشر کیتا ہے۔ فیر آہستہ آہستہ اپنی تے عمران خان دی سیاست تے وی لیکچر دے دیندے سی۔ ایس عمل دے دوران انہاں نے دند سازاں والی ڈرل میرے منہ وچ پارکھی ہوندی سی۔ کوئی کملا ہی ہوئے گا جو ایس صورتحال وچ سیاسی اختلافاں دی جرات کرے ۔ فیر ڈاکٹر صاحب نے دنداں دی ڈاکٹری چھڈ کے سارا وقت سیاست شروع کردتی۔ مینوں اینج لگیا جس طراں ایس قوم لئی انہاں نے میرے دنداں دی قربانی دے دتی۔ ہن انہاں نوں روز ٹی وی تے ویکھ کے خوش وی ہوندا ہاں پر دنداں دے پرانے درد وی تازہ ہون لگدے نیں۔ فیر پچھلی چوناں توں پہلے رُت ایسی بدلی کہ لہور دے مشہور جلسے دے بعد ہر کوئی پی ٹی آئی وچ شامل ہون لگا۔ جس طراں کہ پاکستانی کرکٹ دے تریخ دان تے سینیئر خبرچی عثمان سمیع الدین نے اپنے اک مشہور مضمون وچ لکھیا ہے کہ قوم نوں کجھ حال جیہا چڑھ گیا۔ وکٹاں تے وکٹاں ڈھگن لگ پئیاں۔ ایس نوں لگیا کہ ملک وچ سیاست نہیں ہورہی گلی دی کرکٹ چل رہی ہے جس وچ کوئی سکور نہیں کر پارہیا، صرف کِلیاں اڑ رہیاں نیں۔ پہلے پی ٹی آئی صرف لونڈیاں، لپاڑیاں دی پارٹی سمجھی جاندی سی فیر انہاں گناہ گار اکھاں نے ویکھیا کہ کراچی دے پہلے وڈے جلسے وچ جاوید ہاشمی باغی، باغی دے نعرے لوا رہیا سی۔ شاہ محمود قریشی جو کدی ہیلری کلنٹن دے متھے نال متھا ٹکرا کے قوم نوں پیغام دے چکیا سی، چوہدری سرور جو سکاٹ لینڈ نوں فتح کرچکیاسی اتے لہور دے گورنر ہاؤس توں ہوندے ہویا عمران خان دے دروجے تے جا پہنچیا سی۔ جہانگیر ترین جیہناں دی دریا دلی ویکھ کے دل توں آہ نکلدی ہے پئی کاش میں وی تہاڈا مالی ہوندا۔ فردوس عاشق اعوان، بابر اعوان،کیہڑا چیمہ، چٹھہ، چوہدری سی جو پی ٹی آئی وچ نہیں آیا۔ فیر جس شہر میرا جنم ہویا یعنی اوکاڑہ توں خبر آئی کہ اشرف سوہنا وی پی ٹی آئی وچ آوڑیا۔ جداں اسی بچے سی تے پہلا سیاستدان تے پہلا جیالا تے پہلا بندہ جس دا ناں سوہنا سی اوہ اشرف صاحب ہی سن۔ ایس دے بعد توں مینوں لگن لگیا ہے کہ اصل وچ پورا ملک ہی پی ٹی آئی وچ رلت کرچکیا ہے۔ جو کجھ لوک بچے نیں اوہ صرف ساڈا واہمہ نیں یا صرف ایس وقت دا انتظار کررہے نیں جداں عمران خان دے کول کجھ لمحیاں دی ویہل ہوئے تے اوہ انہاں دے نال سلفی بنوائے۔ کدی کدی دل وچ ایہہ خیال ضرور آندا ہے کہ جے واقعی پورا ملک پی ٹی آئی وچ شامل ہے تے تبدیلی دا سفر اگے کس طراں چلے گا؟ رہی گل وزیراعظم بنن دی تے دل تے ہتھ رکھ کے دسو کہ پچھلے چار سال توں پاکستان دا اصلی وزیراعظم کون ہے؟ شیروانی کوئی وی پا لے، وزیراعظم ہاؤس وچ کوئی آئے، کوئی جائے کیہ طاقت دا اصل مرکز بنی گالہ نہیں ؟ کیہ سڑکاں تے، عدالتاں وچ، میڈیا تے ساڈے دلاں وچ عمران خان دا راج نہیں ہے؟ اردو دے بزرگ ادیب دسیا کردے سن کہ شہر تے ظاہری حکمران کوئی وی ہوئے اصل انتظام کسی ولی کسی بابے دے ہتھ وچ ہوندا ہے۔ کیہ عمران خان انہاں سب بابیاں دے بابے نہیں؟ ہن تے میں کسی تے ٹھنڈے مقام تے عمران خان نوں ریلیکس کردے ہوئے انہاں دی تصویر ویکھدا ہاں تے لگدا ہے کہ اوہ وزارتِ عظمیٰ توں تقریباً رٹائرہون نوں تیار نیں۔ ایسی تسلی دے نال کسی پہاڑی تے باغ وچ بیٹھ کے کافی وچ اینے اطمنیان نال چینی کون ہلاسکدا ہے۔ اوہی جو سارا کھا، ہنڈا چکیا ہوئے۔ کوئی دن جاندا ہے کہ اسی ٹی وی تے ویکھاں گے کہ عمران خان کہہ رہے ہون گے، حامد، جداں میں وزیراعظم ہویا کردا سی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels