Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> روہنگیا جھیڑا:خارجی مداخلتاں نال مسلہ ہور وگڑدا ہے۔ چین۔مغرب انکاری۔نری عیاری

روہنگیا جھیڑا:خارجی مداخلتاں نال مسلہ ہور وگڑدا ہے۔ چین۔مغرب انکاری۔نری عیاری

October 24th, 2017

چین دا اشارا بڑا سدھا ہے پر وائس آف امریکہ، بی بی سی ورگے ایس نوں سمجھنا نہیں چاہندے کیونجے اوہ انکاری صورتحال وچ نیں۔چین سمجھدا ہے پئی برما نوں افغانستان،عراق تے لبیا نہیں بننا چاہیدا۔جیہڑے پچھلے لمیرے چر توں بیرونی مداخلتاں کردے ہوئے کئی ملک تباہ کیتے نیں اوہ روہینگیاں لئی مگر مچھ دے اتھرو بہارہے نیں۔چین اتے چینی کمیونسٹ پارٹی دسیا ہے پئی اوہ تشدد تے ات گردی دوناں خلاف نیں اتے خارجی مداخلتاں نہیں کردے۔مغرب نوں کدی کرداں دا ریفرنڈم یاد آندا ہے تے کدی اوہ چار فیصدی روہنگیاں لئی اسمان سر تے چک لیندے نیں پر فلسطین تے کشمیر تے نہ ملالہ نوں کجھ یاد آندا ہے اتے نہ آکسفورڈ یونیورسٹی والے کسے بھارتی یا اسرائیلی ایوارڈ جتن والے نوں کجھ آکھدے نیں۔پاکستان وانگ سوچی وی برمی فوج نال مل کے جمہوری رستے کڈہن تے لگی ہے کہ خارجی مداخلتاں نال جمہوری رستے وچ وگاڑ پیدا ہوئے گا۔مغربی میڈیا سوچی نوں کمزور کر کے وگاڑ پیدا  کر رہیا ہے؟ہن تساں ہشیار خبر پڑھو

چین آکھیا ہے کہ بیرونی مداخلتاں توں برما دا جھیڑا حل نہیں ہوسی۔ چین امن پاروں میانمار(برما) دی حکومتی کوششاں دی حمایت کردا ہے۔ چینی عہدیدار ولوں ایہہ بیان اک ایسے وقت سامنے آیا ہے جداں میانمار دی رخائین ریاست وچ تشدد جاری ہے۔ رخائین وچ شدت پسنداں دے حملیاں دے بعد میانمار فوج دی جوابی کاروائیاں دے بعد پنج لکھ توں زیادہ روہنگیا فرار ہوکے بنگلادیش وچ پناہ لین تے مجبور ہوئے سن۔ دوجے پاسے اقوام متحدہ دے عہدیداراں نے میانمار دی حکت عملی نوں روہنگیاں برادری دی نسلی صفائی قرار دتا ہے۔ امریکہ دے وزیر خارجہ ریکس ٹلرسن نے انہاں ظالمانہ کاروائیاں دا ذمہ وار میانمار دی فوج نوں قرار دتا۔ چین دی کمیونسٹ پارٹی دے بین الاقوامی امور دے نائب سربراہ گوایسہو نے چین وچ کمیونسٹ پارٹی دی کانگرس دے موقع تے نامہ نگاراں نوں دسیا کہ چین رخائین وچ ہون والے حملیاں دی مذمت کردا ہے تے اوہ امن لئی میانمار دی کوششاں حمایت کردا ہے۔ انہاں نے مزید آکھیا کہ چین تے میانمار دی دیرینہ دوستی ہے تے چین ایہہ سمجھدا ہے کہ میانمار اپنے طور تے ایس مسئلے نال نبڑ سکدا ہے۔ جداں انہاں توں پچھیا گیا کہ روہنگیا بحران توں متعلق چین دی پالیسی مغربی ملکاں توں مختلف کیوں ہے تے گوا نے آکھیا کہ چین کسی دوجے ملک دے اندرونی معاملیاں وچ لتاں نہ اڑان دے اصول تے کاربند ہے۔انہاں نے آکھیا کہ حال وچ تہانوں اک ملک دے دوجے ملک وچ مداخلت دے نتیجے ویکھے ہون گے جداں اک ملک نے دوجے ملک وچ مداخلت کیتی۔ اسی اینج نہیں کردے۔ تاہم انہاں نے ایہہ وضاحت نہیں کیتی کس مداخلت دے نتیجے خراب نکلے۔(وائس آف امریکہ دے ہشیار تے انفارمڈ صحافی افغانستان،عراق تے لبیا نوں بھل گئے) گوا نے آکھیا کہ چین میانمار وچ وگاڑ نہیں چاہندا کیونجے ایس توں چین وی متاثر ہوسکدا ہے کیونجے چین تے میانمار دے وچکار لمیرا سانجھا باڈر ہے۔ انہاں نے مزید آکھیا کہ اسی تشدد تے دہشت گردی دی کاروائیاں دی مذمت کردے ہاں۔ چین دی کمیونسٹ پارٹی میانمار دی رہنما آنگ سانگ سوچی دے نال سانگے چنگے کرن وچ پیش پیش ہے جیہناں نے چینی حکومت دی تھاں کمیونسٹ پارٹی دی دعوت تے 2015 وچ چین دا دورہ کیتا سی۔ دوجے پاسے کمیونسٹ جماعت دے بین الاقوامی امور دے شعبہ دے سربراہ سان ٹاؤ نے سوچی نال ملاقات لئی ایسے سال اگست وچ میانمار دا دورہ کیتا سی۔ رواں سال اگست دے بعد توں روہنگیا مسلماناں دی وڈی گنتری میانمار توں فرار ہون تے مجبور ہوئی جداں باغیاں دے حملے دے ردعمل وچ میانمار دی فوج نے سخت کاروائی کیتی تے فرار ہون والے بعض افراد نے سکیورٹی فورسز تے آتش زنی، قتل تے جنسی زیادتی دے الزام لائے۔ یورپی یونین تے امریکہ میانمار دی فوجی قیادت اوتے مخصوص پابندیاں لاون تے غور کررہے نیں۔ تاہم انہاں نوں ایس گل تے وی تشویش ہے کہ ایسی کاروائی معیشت لئی سود مند نہیں ہے تے ایس وجہ توں سوچی تے فوج دے درمیان پہلے توں چلدی لڑائی ہور ودھ سکدی ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels