Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> آرمی چیف، آرمی چیف ہوندا جے۔ نصرت جاوید

آرمی چیف، آرمی چیف ہوندا جے۔ نصرت جاوید

وچار ڈیسک
October 11th, 2017

تہاڈی خیر ہوئے پئی میرے کولوں ایہہ سوال نہ پچھنا کہ میں ایہہ گل بہوں زور دے نال کیوں یاد دوانا چاہ رہیا ہاں۔ناں نہاد آزادی صحافت دی موجودہ بہار وچ وی ہر گل کھل کے بیان نہیں کیتی جاسکدی۔ اوس گلی دے لوگ بہوں نمانے نیں۔ دام وچ پھسا لیندے نیں۔ طوطے لئی مناسب ایہو ہے کہ پنجرے وچ قید رہے۔ اپنے مالک دی دتی ہوئی چوری کھائے۔ اوہ ایس نوں میاں مٹھو چوری کھانی اوہ کیہ آکھ کے پچکاردا رہے۔ پنجرہ اچانک کھل گیا تے طوطیا من موتیا اوس گلی ول اڈ جا سی ا تے کسی نہ کسی پھندے دی گرفتاں وچ آجاسی۔ گل بہرحال تہانوں یاد ایہہ دوانی ہے کہ آرمی چیف خواہ اوہ کوئی وی ہوئے بہوں با اختیار تے طاقتور ہوندا ہے۔ ایس عہدے دی اصل بنیاد ہی Command and Control تے پردھانی نال نتھی ہے۔ حمید گل مرحوم بہوں مقبول جرنیل سن۔ عوام ہی نہیں ادارے وچ وی انہاں دے بے پناہ چاہن والے سن۔ ISI دی سربراہی دے بعد ملتان ورگی زبردست تے شاندار مانی کور دے پردھان بنے۔ بہوں لوکاں نوں پکی امیداں سن پئی اخیر اوہ آرمی چیف بنائے جان گے۔ نواز شریف تے غلام اسحاق خان نے مگر اسلم بیگ دے بعد سٹا آصف نواز جنجوعہ مرحوم دا کڈہیا۔ گل صاحب نوں ایہہ چون پسند نہ آئی۔ شاید کجھ لوکاں توں اپنی ناراضگی دا اظہار وی کردتا ہوئے گا اتے جنرل جنجوعہ تک گل پہنچ گئی۔ حکم ہویا کہ کور چھڈ کے ٹیکسلا دے اسلحہ ساز کارخانے دا چارج لین دی رپورٹ دین۔ حمید گل مرحوم ہچکچائے۔ آصف نواز ترکی دے دورے تے سن۔ اوتھوں اک حکم جاری ہویا تے گل صاحب ورگے Legendary افسر دا فوجی کیرئیر مک گیا۔ دراز قد وجہیہ تے منہ پھٹ جنرل آصف نواز جنجوعہ بڑی آن بان والے چیف سن۔ پر زندگی انہاں نال وفا نا کرسکی۔ دل دے دورے دے ہتھوں جاں بحق ہوئے تے ایس وقت دے صدر غلام اسحاق خان نے جنرل وحید کاکڑ نوں آرمی چیف لادتا۔ جنرل وحید نوں لاون توں پہلاں ادارے دے کئی سرکڈویں افراد مینوں کمال اعتماد نال دسدے رہے کہ آصف نواز دے جانشین صرف واہ دے اک مشہور خاندان دے جنرل فرخ ہوسکدے نیں جو آصف نواز مرحوم دے چیف آف سٹاف ہویا کردے سی۔ سٹاپر کاکڑ ہوراں دا نکلیا جیہناں دا اسی صحافیاں نے کدی ذکروی نہیں سنیا سی۔ کاکڑ صاحب درمیانے قد دے اک Lieow شخص سن۔ اخباراں وچ اپنے بیاناں تے تصویراں چھپوان دا انہاں نوں ہر گز کوئی شوق نہیں سی۔ راولپنڈی تے اسلام آباد دے خاندانی فوجی اکثر مینوں ایہہ دسدے کہ نواز شریف دے نال تخت یا تختہ والی جنگ وچ الجھے اسحاق خان نے کاکڑ ہوراں دی چون نری نسلی تے لسانی الار پاروں کیتی۔ ہورے بابے دے لائے تے ایس دے وفادار سمجھے جان والے کاکڑ ہوراں نے پر اخیر 1993 دے سیاسی تناؤ توں جان چھڑان لئی ناں نہاد کاکڑ فارمولا ورتیا۔ صدر غلام اسحاق خان، وزیراعظم نواز شریف نوں اہنے عہدیاں توں استعفی دین تے مجبور کیتا۔ معین قریشی ہوری امریکہ توں بلاکر نگران وزیراعظم لائے گئے۔ نویں چوناں ہوئیاں تے بی بی بے نظیر بھٹو اک وار فیر وزیراعظم بن گیاں۔ مسلم لیگ دے کئی سرکردہ افراد سرگوشیاں وچ جنرل کاکڑ نوں غیر ملکی طاقتاں دے ایما تے بے نظیر نوں دو وار اقتدار وچ لیان دا ذمہ وار ٹھہراندے رہے۔ محترمہ بے نظیر بھٹو دے دوجے دور اقتدار وچ وی بہت متحرک رپورٹر ہویا کردا سی۔ ایس دور دے اہم ترین وزیراں تے اعلی سرکاری افسر وی کسی محفل وچ ملدے تے سرعام دسدے پئی اپنے ادارے لئی جنرل کاکڑ نے محترمہ بے نظیر دی دوجی حکومت توں ہر گل بات منوائی۔ اوہ کئی اعتبار توں جنرل اسلم بیگ ہوراں توں کتھے زیادہ اثر والے ثابت ہوئے۔ انہاں دی اثر انگیزی دے باوجود محترمہ دی بہوں خاہش سی کہ جنرل کاکڑ اپنی نوکری وچ توایکٹینشن قبول کرلین۔ کاکڑ ہوری منن توں انکاری رہے۔ ویلے سر رٹائر ہوئے تے جاندے ہوئے ایس گل نوں وی یقینی بنایا کہ جنرل کرامت انہاں دے جانشین مقرر ہون۔ احتیاطاً ایہہ حقیقت یاد دوانا وی ضروری ہے کہ اپنا عہدہ سنبھالن دے کجھ ہی دناں بعد جنرل کاکڑ نے انٹیلی جنس دے حوالیاں توں اک بہت ہی ذہین تے بااثر منے پرمنے جنرل اسددرانی نوں انہاں دے عہدے توں فارغ کردتا سی۔ وجوہات ایس دی فی الوقت بیان کرنا ضروری نہیں۔ عرض مینوں صرف ایہہ کرنا ہے کہ آرمی چیف، آرمی چیف ہی ہوندا ہے۔ اپنے ادارے دے بارے وچ کسی وی فیصلے دا حتمی اختیار فقط ایس دے کول ہوندا ہے۔ واٹس اپ گروپس دے ذریعے پھیلائیاں کہانیاں آرمی چیف نوں اوہ فیصلے لین تے ہر گز مجبور نہیں کرسکدیاں جس نوں اوہ اپنے ادارے دے مفاد وچ مناسب نہ سمجھدے ہون۔ تحمل تے برداشت تے وقت دے تقاضیاں نوں سمجھدے ہوئے اپنائی ہوئی لچک کمزروی نہیں سگوں حکمت اکھواندی ہے تے حکمت نوں آزمائش وچ نہیں پایا جاندا۔ اپنی گل ایتھے ختم کرن دے بعد وچ ایس کالم نوں اپنا لکھیا سب توں نکاکالم شمار کروانا چاہندا ہاں۔
Published in Nawa e Waqat


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels