Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> کوڑ قنون:سوچی توں نواز تیک:سیاستدان رستے کڈھ لیندے نیں،ڈکٹیٹر بند کر دے نیں

کوڑ قنون:سوچی توں نواز تیک:سیاستدان رستے کڈھ لیندے نیں،ڈکٹیٹر بند کر دے نیں

October 1st, 2017

سول ملٹری بیوروکریسی نوں ایہہ گل سمجھ نہیں آندی کہ اوہ سیاستداناں نوں سیاست کرن توں ڈک نہیں سکدے۔سیاستداناں نوں شکستاں صرف تے صرف عوامی میدان وچ ہی دتیاں جا سکدیاں نیں کہ ڈکن والا ہر رستہ سیاستداناں دے فیدیاں وچ ہی جاندا ہے۔برما دے آمر نے وی سوچی دی عوامی مہانتا توں ڈر کے ایہہ قنون بنوایا سی پئی جس دا پکا رشتے دار باہرلا ہو سی اوہ آئینی طور تے برما دا صدر نہیں بن سکے گا اتے وزیر وی نہیں۔ جنج مشرف دو وار توں ودھ وزیراعظم نہ بنن دا قنون نرا بے نظیر تے نواز شریف نوں ڈکن لئی بنایا سی اینج ہی برمی ڈکٹیٹر نوں وی پتہ سی پئی سوچی دا مر چکیا خصم غیر برمی سی۔کیوبا جمے میخائل ایریس دی ماں کنیڈا دے سفیر دی دھی اتے پیو انگلش سی۔سوچی ہوراں1972وچ ایریس نال ویاہ کیتا سی اتے ایریس ہوری کینسر پاروں مارچ1999وچ پورے ہو گئے سن۔2008وچ جداں امریکی تے چینی یاریاں ودھ رہیاں سن ، سوچی دے حق اتے ملٹی پارٹی سسٹم ول برما نوں جانا سی تے ڈکٹیٹر ہوراں سوچی دا عوامی رستہ بند کرن لئی ایہہ کوڑ قنون بنایا سی۔اجہے قنون اتے عدالتی فیصلے آپ ریاست دا مذاق بن جاندے نیں۔2016وچ ڈکٹیٹر دی مرضیاں خلاف برمی لوکاں وڈی گنتری وچ سوچی دی پارٹی نوں جتوایا کہ جے برمی ججاں، جرنیلاں تے اشرافیہ نوں کوئی شرم،حیا ہوندی تے اوہ آپ اوس کوڑ آئینی شق نوں کڈھ ماردے۔ پر انہاں اوہی کیتا جو ہر ڈکٹیٹر اتے اوس دے چمچے اتے پچھلگ کریندے نیں۔سوچی نے اپنی پارٹی دے اک ہور لیڈر نوں صدر بنایا اتے پارلیمنٹ نے کجھ مہینیاں بعدوں ’’سٹیٹ کونسلر‘‘ دا نواں عہدہ بناون دا بل منظور کر لتا۔ہن سوچی صدر، وزیراعظم تے نہیں، پر اوس دا مقام سب توں اوچا ہی ہے۔سیاستدان رستے کڈھ ہی لیندے نیں کہ ایہہ گل سول ملٹری تے عدالتی اشرافیہ نہیں سمجھدی یا فیر سمجھنا نہیں چاہندی۔انہاں نوں ایہہ منظور نہیں پئی کوئی انہاں توں تگڑا ہوئے، ملکی فیصلے کرے اتے تاں مارے اوہ اٹھ و اٹھ ماردے نیں۔نواز شریف کوئی عہدہ نہ وی لے تاں وی اوہ لیڈر ہی رہے گا اتے لیڈر دی سیاسی مجبوری ہوندی ہے پئی اوہ عوام نوں دس دے کہ اوہ کیہہ چاہندا ہے۔سوچی سٹیٹ کونسلر بن کے اپنا آپ دسیا تے نواز ہن پارٹی صدر بن کے لوکاں نوں دسن گے پئی انہاں دا لیڈر قیم ہے۔پر جے ایہہ رستہ نہ وی ہوندا تاں کیہہ نواز نوں لیڈری توں ہٹایا جا سکدا سی؟جداں اشرافی طبقے عدالتاں، قنوناں تے آئین دا کوڑ ورتارا کریندے نیں تے اوس نال ریاست دا بوتھا ہور وگڑدا ہے۔جس بے شرمی نال ایہہ کم برما وچ ہوئے اوہ کوئی اکلی مثال نہیں۔ پر عوامی لیڈراں دا رستہ ڈکیا نہیں جاسکدا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels