Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ہن زرداری بچ نہیں سکدا ؟ وسعت اللہ خاں

ہن زرداری بچ نہیں سکدا ؟ وسعت اللہ خاں

وچار ڈیسک
September 23rd, 2017

مشرف دی نویں بونگیاں بارے وسعت ہوراں جھات ماری ہے اتے ایس نوں بی بی سی چھاپے چاڑھیا جے۔ مشرف جڈا بولے گا اڈا پھسے گا اتے نالوں نال آپدے سہولت کاراں نوں وی پھسائے گا۔ تساں آپ پڑھ لو۔
حقیقت پتہ کر نا ہوئے تے آنگ سان سوچی کمانڈر انچیف جنرل من آنگ تے صوبہ رخائن دے سکیورٹی انچارج کرنل ٹینٹ تن سنے تسی کسی توں وی پچھ لو کہ روہنگیا لکھاں دی گنتری وچ کیوں دوڑ رہے نیں تے انہاں دے گھر کون جلا رہیا ہےَ؟ سوچی دا جواب ہے مینوں لگدا ہے اوتھے آپس وچ بہت دشمنیاں نیں اتے مسلمان مسلمان نوں مار رہیا ہے۔ جنرل من آنگ کہندے نیں ایہہ بحران خود دوڑن والیاں نے پیدا کیتا ہے۔ کرنل ٹینٹ ہوری کہندے نیں ایہہ بنگالی دہشت گرد خود اپنے گھراں نوں اگ لارہے نیں۔ جے ایہہ سچ ہے تے فیر پرویز مشرف دا ایہہ کہنا وی سچ ہے کہ بے نظیر بھٹو نوں آصف زرداری نے قتل کروایا جے۔ ایہہ اک منطقی سوال ہے کہ ایس قتل دا حتمی فیدہ کس طراں پہنچایا؟ آصف زرداری نوں (یعنی پارٹی قیادت تے ملکی صدارت انہاں دے ہتھ آگئی)۔ ایس مشرقی منطق توں قتل دی کئی دوجی وارداتاں دا وی سراغ سمجھو لبھ گیا۔ جس طراں لیاقت علی خان نوں خواجہ ناظم الدین تے غلام محمد نے قتل کرایا تاکہ ناظم الدین ڈیل دے تحت گورنر جنرل دی کرسی غلام محمد لئی خالی کرکے خود وزیراعظم بن جائے۔ چوہدری ظہور الہٰی نوں الذولفقار نے تھوڑی چوہدری شجاعت حسین نے مروایا۔ بطور گرگ باراں دیدہ چوہدری صاحب نوں چنگی طراں پتہ سی کہ والد بزرگوار نوں رستے توں ہٹان بغیر نہ مستقبل بعید وچ مسلم لیگ ق دے صدر بن جان گے تے نہ ہی وزیراعظم۔ ضیا الحق دے قتل دی سازش دراصل چیئرمین سینیٹ غلام اسحاق خان تے وائس چیف دا عہدہ قبضہ کرن والیاں کیتی سی۔ مشرف صاحب نے نرا الزام ہی نہیں لایا سگوں ویڈیو وچ ایہہ وی دسیا کہ بے نظیر قتل دی سازش تے عمل کس طراں ہویا۔ اک دفعہ دا ذکر ہے کہ زرداری تے حامد کرزئی ا تے حامد کرزئی تے بیت اللہ محسود دی پکی دوستی سی۔ زرداری نے حامد کرزئی نوں آکھیا یار ذرا بیوی نوں مروانا ہے کجھ مدد تے کرو۔ حامد کرزئی نے بیت اللہ محسود نوں آصف دی دتی ہوئی سپاری گھلوائی تے بیت اللہ نے بندے بی بی دے پچھے لا دتے۔ تاہم مشرف صاحب ولوں ہلے ایہہ وضاحت ادھارہے کہ آیا اٹھارہ اکتوبر دو ہزار ست نوں بی بی دی کراچی وچ لینڈنگ دے فوراً بعد کار ساز تے خود کش حملہ وی سپاری ڈیل وچ شامل سی یا بیت اللہ توں صرف 27 دسمبر دے حملے دا کنٹریکٹ ہویا سی۔ ہن ایہہ کون پچھے کہ جے مشرف نوں پتہ چل ہی گیا سی تے فیر انہاں نوں بی بی نوں انہاں دی مرضی دی مکمل سکیورٹی کیوں نہیں دتی۔ مشرف صاحب ایہہ وی کہہ رہے نیں کہ سکیورٹی فراہم کرنا انہاں دی ذمہ واری نہیں سی تے نال ہی شکوہ وی کررہے نیں کہ ایس قتل توں میرا تے بہت نقصان ہویا تے زرداری نوں پورا فیدہ پہنچایا۔ پر نقصان کیہ ہویا؟ ذاتی یا فیر ق لیگ نوں جتوان دے منصوبے تے پانی پھرن تے بی بی دی ویکھا ویکی نواز شریف دی وی پاکستان لینڈنگ دی شکل وچ؟ تے جداں اصل حقیقت آشکار ہوہی گئی سی تے فیر قاتل نوں اندر کرن دے بجائے خود کیوں ایوان صدر توں باہر ہوگئے تے اوہ وی قاتل ولوں فل گارڈ آف آنر وصولن دے بعد۔ چلو، باہر تے ہوگئے پر جداں صدر زرداری دے دور وچ سکاٹ لینڈ یارڈ دی ٹیم تے فیر اقوام متحدہ دا تحقیقاتی کمیشن آیا تے مشرف صاحب کم از کم انہاں نوں لندن وچ بیٹھے بیٹھے خط لکھ کے سازش دا پردہ تے فاش کرسکدے سن تاکہ بی بی مظلوم دا کیس مزید نو سال نہ کھیچدا۔ تے ایہہ کیہ معمہ ہے کہ بے نظیر قتل کیس سنن والی انسداد دہشت گردی دی خصوصی عدالت پرویز مشرف نوں حتمی فیصلے توں وی پہلے اشتہاری ملزم قرار دے چکی سی۔ فیر وی عدالت نوں اصل حقائق مہیا کرکے اپنی جان یا عزت چھڑان دے بجائے جناب شیخ دوڑے دوڑے پھردے رہے۔ مرتضیٰ بھٹو نوں وی تے آصف زرداری نے مروایا سی تاکہ پلان دے مطابق بی بی دی حکومت برطرف ہوجائے۔ بی بی مقدمات توں گھبرا کے بیرون ملک رہائش اختیار کرلتی۔ خود آصف وی مرتضیٰ دے حامیاں دے بدلے دے ڈر توں احتیاطاً کئی سال لئی جیل وچ لکے رہے تے فیر ملک توں باہر چلے گئے تے اوتھے بی بی نوں پٹی پڑھائی کہ تسی آخر پاکستان کیوں نہیں جاندے۔ ڈردی ہیں کیہ؟ تے جداں نو سال بعد بے نظیر بھٹو آصف زرداری دے بہکاوے وچ آکے پاکستان آئی تے شوہر نال نہ آیا کیونکہ اوہ نہ صرف سپاری دے چکیا سی سگوں ڈی آئی جی پنڈی سعود عزیز تے ایس ایس پی خرم شہزاد نوں وی نوٹ لاچکیا سی کہ جس طراں ہی بی بی دا قصہ تمام ہوئے، میرے آن توں پہلے پہلے خون دے سب دھبے مٹا دو تاکہ میں اطمنیان نال بیوی دی لاش وصول لواں۔ ایہہ سی لمیرا فیدہ مرتضیٰ بھٹو نوں 1996 وچ قتل کروان دا۔ جداں مرتضیٰ دا قتل ہویا تے میرے حملے دے عبداللہ پنواڑی نے سب توں پہلے آکھیا سی کہ ایہہ آصف نے کروایا ہے۔ پر ایس غریب دے کول کوئی ٹھوس ثبوت نہیں سی۔ پر پرویز مشرف دے کول ہے تے اوہ یقیناًایس نوں عدالت وچ دستی پیش کرن ۔ مشرف چاہندے تے اپنے ساڑھے اٹھ سالہ دور صدارت وچ سیاہ وسفید دے مالک ہون دا فیدہ چکدے ہوئے بھلے چیف جسٹس نوں والاں توں کھچدے پر مرتضیٰ بھٹو قتل کیس وچ ذاتی دلچسپی لے کے دودھ دا دودھ پانی دا پانی وی کرسکدے سن۔ پر انہاں نے وی پتہ نہیں کیوں اوہی کیتا جو بقول انہاں دے پیپلز پارٹی نے بعد چوں اپنے پنج سالہ دور اقتدار وچ بی بی قتل کیس نوں کسی منطقی انجام تک نہ پہنچا کے کیتا۔ کیونکہ قاتل تے دراصل زرداری سی۔ مشرف صاحب دی تازہ ویڈیو ویکھ کے دل خوش فہم نوں پتہ نہیں کیوں لگدا ہے کہ ہن انہاں دا پیمانہ صبر لبریز ہوچکیا ہے۔ چالاک قاتل آصف زرداری ولوں انسداد دہشت گردی عدالت دے پنج ملزماں نوں بری کرن دے فیصلے تے پلس افسر سعود عزیز، خرم شہزاد تے پرویز مشرف نوں سزائے موت دے مطالبے دی پیٹیشنز لاہور ہائی کورٹ وچ سماعت لئی منظور ہون دے بعد ایک دن ضرور دوران سماعت عدالت دا دروازہ چر مراندے ہوئے کھلے گا تے بھاری بوٹاں دی ٹھک ٹھک دے نال گر جیلی آواز چھت توں ٹکرائے گی ،ٹھہرو جج صاحب میں دسدا ہاں کہ دراصل قاتل کون ہے۔ ڈھیں ڈھیں ڈھیں۔۔۔۔۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels