Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> کیہہ سٹیبلشمنٹ نواز دا مکّو ٹھپ سکے گی؟ہرکارے تیز۔باندر ہتھ ماچس؟

کیہہ سٹیبلشمنٹ نواز دا مکّو ٹھپ سکے گی؟ہرکارے تیز۔باندر ہتھ ماچس؟

September 16th, 2017

اوہ ہر پاپولر ہوندی شئے توں اینج ہی گھابردی ہے جنج چور داڑھی رکھ کے وی ایس ڈر وچ رہندا ہے پئی پھڑیا نہ جائے۔پاپولر میڈیا ہوئے یا کوئی مفاداتی گروہ یا فیر سیاسی لیڈر، ہر کسے توں گھابرن دا ایہہ ڈر اوس نوں گھٹی وچ نوآبادیاتی ویلے توں ملیا ہے جداں اوس دا جنم ہویا سی۔جس وی پاکستان دی تواریخ پڑھی ہے وہ جاندا ہے پئی ایہہ پہلی وار تے نہیں ہویا، کوئی نویں گل ہوئے تاں بندہ گل وی کرے۔پہلے دن توں ایہہ سٹیبلشمنٹ چوناں توں ڈردی ہے، پاپولر لیڈر شپ خلاف جہاد تک کرواندی ہے۔امریکہ، برطانیہ، سعودی عرب اگے لمی پئے جاندی ہے، اوس ویلے سارے ادارے در وٹ لیندے نیں تے حاضریاں لواندے نیں۔پر ملکی پدر تے ایہہ سٹیبلشمنٹ پاٹے خان بن جاندی ہے۔مشرقی پاکستان تے اسامے دے کیس بارے گل نہ ہی کرو، کہ سٹیبلشمنٹ دی طاقتاں لوکاں ریمنڈ ڈیوڈ کیس وچ ویکھ لتیاں سن۔ عدالت توں سیکورٹی اداریاں تیک سب لین حاضر سن۔
ونڈو تے ورتو دے اصولاں تے پل کے جوان ہوئی ایس سٹیبلشمنٹ نوں سیاستداناں نوں سیاستداناں راہیں، صحافیاں نوں صحافیاں راہیں، کاروباریاں نوں کاروباریاں راہیں، اداریاں نوں اداریاں راہیں لڑاون دا ول جمدے ہی سکھا دتا گیا سی کہ تازے کھیڈ وچ اوہ بڑی ہشیاری نال وکیلاں دی لہر بعدوں سر چکدے بار تے بینچ نوں مڑ کینڈے وچ لے آئے نیں۔اوہ گول کیپراں نوں رلا لیندے نیں تانجے اوہ اپنے خلاف ہی گول ہون دین۔پر اوہ ایہہ بھل جاندے نیں کہ لوکاں وچ انہاں دی حرکتاں دا ہمش پٹھا اثر ہویا ہے۔جنج پانی آپدارستہ بناندا ہے اینج سیاست وی اپنے رستے بناندی ہے۔جے کوئی سمجھدا ہے پئی اوہ پچھے لک کے وار وی کردا جائے گا تے اوس تے الزام وی نہیں لگے گا تے ایہہ اوس دی سادگی ہے یا فیر سراب۔بھانویں اوہ اپوزیشن پارٹیاں تے میڈیا نوں لوبھ تے پریشر نال نال رلا لین پر لوک ایس ننگے، چٹے کھیڈ دے جانوں نیں۔کدی کسی نے قتل کرن والے چاقو تے وی الزام لایا ہے کہ سہولت کار لوکاں نوں صاف نظر آرہے نیں۔اک زمانہ سی پئی ایہو سٹیبلشمنٹ مہاجراں تے پنجابیاں دا ناں لے کے اوس مگر لکدی سی پر اج اوہ غیر پنجایباں مگر لکن دی کوشش کر رہی ہے کہ کیہہ ایہہ سمجھن لئی کافی نہیں؟سٹیبلشمنٹ بھانویں داڑھی رکھ لے، متھے تے محراب بنوا لے، نسوار دا تنبہ نک وچ پائے، اجرک، پگڑی، شیروانی پائے یا کتے کچھے دبائے، ہن اوس دا کوئی حربہ زیادہ نہیں چلنا۔ڈی ایچ اے چوریاں توں لے کے ڈی ایچ اے سیاسی پارٹیاں تے ڈی ایچ اے صحافیاں توں سب واقف ہو چکے نیں۔
مکّو ٹھپن دی ریت وی انہاں نوں نوآبادیاتی حکمران دے کے گئے سن پر جنہاں دے مکّو انگریزاں ٹھپّے سن کیہہ اوہ مر مک گئے؟دور کیوں جاندے ہو، کل جنرل ایوب خان نے میاں افتخارالدین دا مکو ٹھپیا سی ، فیر ضیا نے سنسر شپ لائی سی اتے اوس توں بعد اج تساں جنگ، جیو دی خلاف ہو، کیہہ تساں میڈیا دا مکّو ٹھپ سکے؟ایوبڑے نے سیاستداناں تے ایبڈو لایا تے لوکائی پیپلز پارٹی بنا کے جواب دتا۔کیہہ تساں بھٹو دا مکّو ٹھپ سکے؟شرفو پاپولر سیاستداناں نوں کڈھیا پر اج آپ ذلیل ہو رہیا ہے۔اج بھانویں پی پی پی نوں نال رلا لو، پر کیہہ تساں نوازشریف دا مکّو ٹھپ سکو گے؟تساں تے وکیلاں، ڈاکٹراں تے صحافیاں دا مکّو وی نہیں ٹھپ سکدے۔جداں طالبان سب دا مکّو ٹھپن
دی کوشش کیتی سی تے انہاں نوں شمالی اتحاد دا تحفہ ملیا سی کہ ایس مکّو ٹھپن دی سیاست وچوں کوڑ ہی نکلدا ہے۔کل نوں ایہہ نہ لکنا پئے جائے پئی باندر ہتھ ماچس آئی سی تے اوس اپنے گھر نوں ہی ساڑ لتا۔الزام باندر تے آئے گا نہ کہ ماچس تے۔

More Readings
http://www.wichaar.com/news/117/ARTICLE/33472/2017-09-15.html
http://www.wichaar.com/news/117/ARTICLE/33466/2017-09-12.html
http://www.wichaar.com/news/119/ARTICLE/33450/2017-09-07.html
http://www.wichaar.com/news/119/ARTICLE/33331/2017-07-21.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels