Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> زرداری، گرئیٹر پنجاب اتے نواز شریف

زرداری، گرئیٹر پنجاب اتے نواز شریف

September 7th, 2017

جداں پنجاب توں ووٹ ملن تے سب چنگا، پر جے اپنی حرکتاں پاروں پنجاب توں فارغ ہوجاون تاں فیر انہاں دی پنجاب مخالفت ویکھن والی ہوندی ہے۔ ایہہ کم نرا زرداری ہوراں دا نہیں سگوں تحریک انصاف تے ساڈی سٹیبلشمنٹ سب وچ ایہہ رویہ نظر آندا ہے۔اج کل تے بڑے بڑے جگادری تے آزاد صحافی آکھوان والے نری پنجاب دشمنی وچ نواز شریف دی سیاست دے مکن دی دہائیاں پا رہے نیں۔ دور کیوں جاندے ہو، آل انڈیا کانگرس جداں پنجاب وچ ناکام ہوئی سی تاں اوس پنجاب دی دھرمی ونڈ بارے مارچ 1947 نوں آواز چکی سی۔ کانگرس دی پنجاب مخالفت اک تواریخی مثال ہے کہ جس نوں بھٹو ہوری تے جاندے سن پر زرداری تے اوس دے حواری نہیں جاندے۔ 2008 تیک وی پیپلز پارٹی پنجاب وچ اک وڈی آواز سی پر 2008 توں بعد بابر اعوان، رحمن ملک، قائرہ، کھوسہ، وٹو ورگیاں پارٹی نوں پنجاب وچ ڈوبن لئی بڑا کردار ادا کیتا۔ پنجابی وچ تقریر کرن نال ہی کم نہیں چلدا سگوں دل نال پنجاب وچ جیہڑا آئے گا اتے پنجاب بارے ایس دی سوچ کوڑ نہیں ہوئے گی اوس نوں پنجابی گل لاندے نیں۔ محمد علی جناح کیہڑا پنجابی سی؟ جداں پنجاب 1938 توں بعد ’’جناح ۔سکندر پیکٹ ‘‘ راہیں مسلم لیگ وچ آیا سی تاں جاکے مسلم لیگ ایم کیو ایم دی تھاں اک عوامی پارٹی بنی سی۔
زرداری صاحب، گاندھی وانگ پنجاب دی گل کرن نال گل نہیں بنے گی۔ پنجابی ایس چکر وچ نہیں آون گے۔ پنجاب دی ونڈ دے ایجنڈے تے اج پی پی پی تے پی ٹی آئی کھلوتی ہے اتے ایہہ کوڑ ایجنڈا ہے جس دی نیہاں اے این پی اتے ایم کیو ایم رکھیاں سن۔ پی پی پی تے پی ٹی آئی دی تنظیماں نوں ہی ویکھ لو کہ اوہ پہلے توں پنجاب ونڈن دا ادھار کھائے بیٹھے نیں۔ سندھ دی ونڈ تے زرداری ہوراں نوں اگ لگ جاندی ہے۔کراچی والے وکھرا صوبہ منگن تے اوہ سندھ دھرتی نال غداریاں پر جے پی پی پی پنجاب دی ونڈ لئی نعرے لائے تاں اوس نوں پنجاب وچ کیہہ آکھیا جائے؟خیبر پختونخوا دے قوم پرست وی صوبے دے پنجابیاں نوں مزید ونڈن تے دباون تے یقین رکھدے نیں۔ اوہ فاٹا نوں رلانا چاہندے نیں کیونجے ہندو کو، ہزارہ پنجابیاں دا مڑ خیبر پی کے وچ گورنر وی نہ آئے۔ اک گھٹیا اشتہاری فلم جیو تے چلدی ہے جس وچ خیبر پی کے دی گورنرشپ پہلے توں فاٹا والیاں نوں دین دی گل کیتی جارہی ہے۔ جے فاٹا نوں رلاون دا ایڈا ہی شوق ہے تے فیر بلوچستان دے پختوناں دا کیہ قصور ہے؟ فیر خیبرپی کے دے پنجابیاں تے بلوچستان دے بلوچاں دی جان چھڈ دیو۔ ایہہ سب رولے زرداری ہوراں نوں نظر نہیں آندے تے اوہ نواز شریف تے گریٹر پنجاب دا الزام لاکے رانجھا راضی کرنا چاہندے نیں۔ سٹیبلشمنٹ جنج میاں نواز شریف نوں اقامے تے کڈھیا ہے اوہ اک کوڑ کم سی اتے زرداری ہوری نویں آئی جے آئی دا حصہ سن۔پر کجھ جگادری صحافیاں اکھاں کبوتر وانگ بند کیتیاں ہوئیاں نیں۔پی پی پی دا پنجاب بارے بیانیہ کوڑ ہے۔بس قومی اتحاد بننا رہ گیا سی کہ 28 جولائی توں بعدایہہ داغ وی پی پی پی تے لگ ہی گیا۔ بے نظیر قتل کیس دے فیصلے بعدوں جو جتیاں پی پی پی نوں پئے رہیاں نیں اوہ سب زرداری تے انہاں دے یاراں دا کیتا دھریا ہے۔ زرداری ہوری سندھی ٹوپی پاکے سندھ دے لوکاں دا کڈا امتحان لین گے تے عمران پشتو گاون چلا کے پٹھاناں نوں2018وچ رام کر لین گے؟ نواز شریف سٹیبلشمنٹ نال لڑائی بعدوں ہن باقی صوبیاں وچ وی مقبول ہے۔ ایہہ اک وڈی حقیقت ہے کہ 1947 وچ کانگرس تے انگریزاں رل مل کے پنجاب دی دھرمی ونڈ کیتی سی اتے ہر پنجابی نوں ایس دا ملال ہے کہ بھانویں اوہ سکھ، ہندو، پنجابی ہوئے یا پنجابی مسلمان۔ گریٹر پنجاب آکھ کے زرداری ہوری پنجابیاں نوں کیہ یاد کروانا چاہندے نیں؟ پنجابیاں نوں گالاں کڈھ کے جے کانگرس دا کجھ نہیں بنیا تے عمران تے زرداری دا وی کجھ نہیں بنے گا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels