Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> امریکی پنگا سر تے ہے

امریکی پنگا سر تے ہے

وچار ڈیسک
August 30th, 2017

vاج کل ڈونلڈ ٹرمپ دیا بڑکاں تے بہت گل بات ہورہی ہے۔ کوئی اینوں پھوکیاں بھڑکاں تے ٹرمپ دی پالیسی کہہ رہیا ہے تے کسے دا خیال ہے اوہ جو آکھ رہیا ہے اوہ اینج ہی کر کے وکھا دے گا جنج آکھ رہیا ہے۔ کجھ دا خیال اے پئی پاکستان تے میلی اکھ رکھن دا مطلب ہے پئی اوہ چین نال پنگا لے رہیا ہے۔کجھ دا خیال ہے کہ جے پاکستان دے اندر امریکہ نے کوئی پنگا بازی کیتی تے چین امریکہ نوں سانبھ لے گا۔ ایہہ وی خیال ہے پئی پاکستان دی فوج تے سیکورٹی ادارے ایڈے ڈاھڈے نیں پئی امریکہ پنگا لین دی جرات ای نہیں کرسکدا۔ کئی کہندے نیں پئی ہن روس نے وی پاکستان نال کھلون دی ہاں کردتی ہے ا تے امریکہ پاکستان توں دور ہی رہے گا۔ کجھ ایہہ وی کہندے نیں کہ انڈیا وی پاکستان ول امریکہ دی پالیسی ویکھ کے سدھا ہوجائے گا۔ یعنی انڈیاموقعے دی تاڑ وچ ہے اتے موقع ملدے ہی چپھٹا مارے گا۔ ایہہ ساریاں گلاں اپنی اپنی تھاں تے تھوڑیاں تھوڑیاں ٹھیک ہوسکدیاں نیں پر مینوں انہاں سارے خیالاں وچ کوئی زیادہ اپنی جڑت نہیں لگدی۔ ٹرمپ نے جس پالیسی تے حکمت عملی دا اعلان کیتا ہے اے، اوس نوں جے ذرا دھیان نال ویکھئے تے پتہ لگدا ہے کہ امریکہ لئی پاکستان وچ حالات پنگانہ کرن دے جڈے وی چانس لکھے نیں ایس سب بارے امریکی پالیسی یا Strategy بنان والیاں نوں پتہ ہے۔ اوہ ایسی معاملے وچ کوئی بھولے نہیں۔ ایسے لئی میرا خیال اے وے کہ اوہ ایسا طریقہ بنان گے جیہدے نال اوہناں دی ڈائرکٹ پھڑائی نہ ہووے۔ اے طریقہ اوہ پہلے وی ورتدے رہے نیں۔ ٹوِن ٹاور القاعدہ والیاں کولوں ہی ٹوہا کے تے دنیا وچ امریکی آپ مظلوم بن گئے ا تے ٹاوراں دے سرتے ساری دنیا نوں جنگ وچ کھوبھ دتا ۔ ہن افغانستان تے پاکستان وچ جنے وی دہشت گرداں دے گروپ تے تنظیماں نیں سب کسے نہ کسے رستے امریکیاں دے نال رابطے وچ ہے نیں۔ہن امریکہ نے افغانستان وچ اک چار ہزار گمنام دفاعی افسرگھلن دا علان کردتا ہے۔ اصل وچ امریکہ وچ ریگولر فوج دے نال نال کئی پرائیویٹ سیکورٹی کمپنیاں کم کردیاں نیں جیہڑیاں کئی ملکاں وچ امریکی فوج نوں مدد دیندیاں نیں۔ امریکی حکومت یا سکیورٹی ایجنسیاں ایہناں کمپنیاں نوں ایس کم دا ٹھیکہ دیندے نیں۔ ایہہ کمپنیاں اصل وچ امریکہ لئی کم کرن والے کرائے دے قاتل نیں جہناں نے ہزاراں دی تعداد وچ کمانڈو ٹریننگ دے جسوس اتے اینج دے کم وچ مہارت رکھن والے جوان بھرتی کیتے ہوئے نیں۔ ایہناں وچ امریکی بلکہ دنیا بھر توں رنگروٹ لتے گئے نیں۔ جیہناں نوں ہر طراں دا ظلم، قتل تے فساد پیدا کرن دی تربیت دتی جاندی ہے۔ بلیک واٹر تنظیم جیہدا ناں ہے، اوہ اجہی اک اکیڈمی ہے۔ اوہ وی ایس کم لئی چنی گئی ہے۔ ٹرمپ دے جوائی دے اوہناں نال گوڑھے سانگے نیں ۔ ٹرمپ دا جوائی کٹر یہودی وی ہے تے ٹرمپ دا خاص الخاص ایڈوائزر وی ہے۔ ٹرمپ دا خیال ہے کہ امریکہ نوں جتھے وی حملہ کرنا چاہی دا ہے اوتھوں منافعے دی جنگ ہی کرنی چاہیدی ہے ۔ افغانستان تے پاکستان بارے اوہدے خیال وی ایسے ای طراں دے نیں تے اوہنے اپنی پچھلیاں حکومتاں تے تنقید وی کیتی ہے کہ اوہناں نیں دہشت گردی دی لڑائی تے 800 بلین ڈالر وی خرچ کردتے سن تے امریکہ نوں اوہدے مطابق اپنیاں لڑائیاں چوں منافع وی نہیں ہویا۔ پچھلیاں حکومتاں سارا کم وچ ہی چھڈ کے واپس آگیاں ۔ٹرمپ آکھیا ہے کہ میں ہن جاکے چھیتی واپس نہیں آناں نالے سارے پچھلے گھاٹے پورے کرنے نیں ۔ایہو نہیں سگوں اوہ افغانستان تے پاکستان وچ فیرتوں مذہبی انتہا پسندی ودھان گے تے اوہناں گروپاں نوں استعمال کرن گے تے پاکستان وچ دہشت گردی وچ فیر توں وادھا ہون دا بہت چانس ہے۔ بعض لوکاں دا خیال ہے پئی امریکہ ،روس تے چین دے ہوندیاں ہویاں ایسا نہیں کریگا۔ اوہناں مورکھاں نوں پتہ نہیں کہ امریکہ نے کہڑا آپ ہتھیں سارا کجھ کرناں ہے۔ طالبان ، داعش تے القاعدہ امریکہ لئی سب کجھ کرے گی تے ہن نالے جنگاں کوئی سرحداں اوتے ہی تھوڑی ہوندیاں نیں۔اسیں تے فیر proxy جنگاں وچ بڑے ماہر ہاں۔ کشمیر وچ دو دہایاں توں پراکسی وار لڑرہے آں۔ ہن جے اوہ ای پراکسی والیاں، مجاہداں دیاں فوجاں پاکستان دے خلاف لائیاں تے کہڑی اچنبے والی گل ہے۔ ایس سارے مسئلے دا حل نہ تے کسے فوجی طاقت دے بیلنس نال ہوسکدا ہے نہ ای چین تے روس اینوں روک سکن گے۔ ایہدا اک ہور حل ہے کہ پاکستان اپنی پالیسی وچ بنیادی تبدیلیاں کرلے تے مذہبی لوکاں دی سیاست وچوں دوری پیدا کرے تے ریاست نوں مذہب تے فرقہ پرستی توں اتے لے جائے اتے ریاست نوں سیکولر بنادے۔ نہیں تے ایس آن والی شامت توں جان نہیں چھٹنی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels