Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ڈراوا سیکورٹی دا تے سیاستدان:جناح،کرنل دی پھیلائی بم دی افوا دی پروا نہ کیتی

ڈراوا سیکورٹی دا تے سیاستدان:جناح،کرنل دی پھیلائی بم دی افوا دی پروا نہ کیتی

August 14th, 2017

سیکورٹی دا گھما پاکستان بنن توں پہلاں ہی تیار کر لتا گیا سی کہ گورے حکمران جاندے جاندے جیہڑیاں بماریاں چھڈ کے گئے سن انہاں وچ انگریزی زبان، بیوروکریسی،کوڑ عدالتی بندوبست ہی نہیں سی سگوں سیکورٹی دا گھما وی سی۔اج توں پورے70سال پہلاں13۔اگست1947 دی شام نوں برٹش انڈیا دا اخیری گورنر جنرل ماوئنٹ بیٹن کراچی اپڑیا۔ اوس نے14۔اگست نوں سویرے سویرے اک وڈے پروگرام وچ، نو وجے،قائداعظم محمد علی جناح نوں پاکستان دی گورنر جنرلی سونپنی سی۔اوہ جلدی وچ سی اتے اک وجے تیک اوس نوں مڑ دلی اپڑنا سی جتھے اینج دی ہی اک ہور تقریب نہرو لئی ہونی سی۔ماؤنٹ بیٹن نوں ائیرپورٹ تے گورنر سندھ غلام حسین ہدائیت اللہ جی آیا نوں آکھیا سی تے اک انگریز کرنل وی نال سی جس دا ذکر اگے آئے گا۔ایہہ تے سب جاندے ہی نیں پئی شوہدا ماوئنٹ بیٹن دوناں ملکاں داسانجھا گورنر جنرل بننا چاہندا سی پر جناح واپسی دا کوئی وی بوہا کھلا نہیں رکھنا چاہندا سی۔ایس دا غصہ برٹش سرکار اتے اوس دے افسراں ماوئنٹ بیٹن تے ریڈ کلف کڈہیا وی۔ہورے ایہہ وقوعہ وی جہیرا تساں پڑھو گے اوسے غصے دا تسلسل ہوئے۔سیکورٹی دی آڑاں وچ دوجیاں نوں ذلیل کرن دی ایہہ کہانی اودھوں شروع ہوئی جداں سلطنت برطانیہ ولوں قائداعظم نال جورے پہلے ملٹری سیکٹری کرنل ولیم برنی ہوراں ماوئنٹ بیٹن نوں دسیا کہ خفیہ والیاں دی اطلاع ہے کہ کل جناح تے بم سٹیا جائے گا تاں مارے کجھ سوچنا ہوئے گا۔ ذراویکھو، تے اوس ماحول نوں یاد کرو، ملک بنن جا رہیا ہے تے منزل سب نوں نظر آرہی ہے تے سب خش نیں۔ پر کنج اک کرنل رنگ وچ بھنگ پا دتی ہوئے گی۔ شکر ہے اوس دور وچ ’’کیپیٹل ٹاک‘‘ نہیں ہوندا سی کہ ہورے کرنل ہوری اٹھ وجے ٹی وی تے وی آ جاندے تے اینکر نال رل کے طوفان کھڑا کر دیندے۔انگریز کرنل پہلاں ایہو گل جناح نوں وی دس چکیا سی پر ہشیار جناح ہوری کرنل دے چکر نوں سیہان گئے سن اتے 14۔اگست دی تقریب جاون والا متھیا رستہ بدلن دی کرنل والی تجویز نوں مسترد کر دتا سی۔ایہہ سارا وقوعہ ادھ پچدے طریقے نال ماوئنٹ بیٹن دے انفارنیشن سیکٹری(پریس اتاشی)ایلن کیمبل جانسن اپنی کتاب ’’ماوئنٹ بیٹن نال مشن‘‘وچ بیان کیتا ہے پر پوری گل سمجھن لئی تہانوں کرنل مجید ملک دی کہانی وی پڑھنی ہو سی۔ایہہ مجید ملک اوہی نیں جہیڑے ٖفیض احمد فیض، پطرس بخاری تے ایم ڈی تاثیر دے یار وی سن اتے پاکستان بنن توں پہلاں1946وچ پورے انڈیا وچ رائیٹر دے نمائندے وی۔ انہاں لکھیا ہے پئی جداں قائداعظم نوں ملن بعدوں ماوئنٹ بیٹن اپنے ٹھکانے تے ٹر گئے تے جانسن پیلس ہوٹل آگیا جتھے میڈیاوالے ٹہرے سن۔جانسن وی ایس میٹنگ بارے لکھیا ہے۔ اوس میٹنگ وچ کجھ فارن صحافیاں نے ائیر پورٹ تے جناح دی غیر حاضری نوں سلطنت دی توہین قرار دتا۔کرنل برنی تے ماوئنٹ بیٹن نے جداں جناح نال بم دی افوا دا ذکر کیتا تے جناح ہوراں گیند ماوئنٹ بیٹن دے کورٹ وچ سٹ دتی اتے آکھیا پئی جے توں کل لئی رستہ بدلنا چاہنا ہیں تے دس دے، میرا تے اجیہا کوئی ارادہ نہیں۔بس فیر سویرے سب اوسے رستے توں گئے تے ہویا کجھ وی نہیں۔سیکورٹی دا گھما انگریز بنا کے دے گیا ہے اوس نوں ہن انہاں دے پچھلگ ادارے چلاندے رہندے نیں۔جے سمجھو تے70سال پرانے ایس وقوعے وچ سبق وادھو۔تھلے ال لنک وی دتا ہے پئی ایس بارے ہور تفصیلاں پڑھ سکدے ہو۔
Link to read about A C Johnson and the controversy more
https://punjabpunch.blogspot.com/2016/08/partition-reporting-by-johnson-13-14-15.html
another link  of same writer articles
Act of 1947, British Parliament misleading debates and Pakistan
https://www.dawnnews.tv/news/1062916
Pakistan and the Punjab
http://www.wichaar.com/news/119/ARTICLE/27156/2011-08-13.html

14 August: A Day of Freedom & Democracy
https://punjabpunch.blogspot.com/2016/08/14-august-day-of-freedom-democracy.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels