Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> اج 11 اگست جے: غیر مسلم پاکستانیاں دا دیہاڑ تے نواں سوشل معاہدہ

اج 11 اگست جے: غیر مسلم پاکستانیاں دا دیہاڑ تے نواں سوشل معاہدہ

August 11th, 2017

اج دے دن 70 سال پہلاں بانی پاکستان قائداعظم محمد علی جناح ہوراں نویں وطن دی نیہاں رکھن لئی ملک بنن توں تِن دن پہلاں قنون سازا اسمبلی وچ تواریخی تقریر کیتی سی پر پاکستان دے پالیسی سازاں، اداریاں دے وڈکیاں، اسمبلی توں باہر طاقتور گروہاں سنے میڈیا اپنے قائد دی ایس تقریر نوں بھلا دتا۔گھٹ وگھٹ70 سال توں سٹیبلشمنٹ ایس تقریر نوں بھلن دی مہماں تے لگی ہوئی ہے۔اج جو سیاست پاکستان وچ مختلف ادارے کررہے نیں اوہ اوسے کوڑ بیانیے دا تسلسل ہے جیہڑاقائداعظم تے علامہ اقبال دے خیالاں خلاف پاکستان وچ سٹیبلشمنٹ رچایا ہویا ہے۔ تاں مارے پاکستان نوں جس نویں سوشل معاہدے دی لوڑ ہے ایس دا وڈا حصہ ایہو ہے کہ ملک وچ سارے شہری برابر ہون تے قنون دی حکمرانی ادارے تے وی لاگو ہوئے اتے پارلیمنٹ دی پردھانی سارے ادارے تے گروہ منن۔ جداں پاکستان بنایا گیا سی تاں اوس ویلے پاکستان وچ غیر مسلم پاکستانیاں دی گنتری وادھو سی اتے کل پاکستان وچ 22 فیصدی غیر مسلم پاکستانی وسدے سن۔ 16 دسمبر 1971 نوں جداں پاکستان ٹٹیا تے ایہہ گنتری گھٹ کے 5 فیصدی تک آگئی کیونجے مشرقی بنگال وچ غیر مسلماں دی گنتری وادھو سی۔ ایس طراں پاکستان ٹٹن نال غیر مسلم پاکستانیاں نوں بہوں نقصان ہویا۔ پر ایہہ گل اپنی تھاں غور کرن والی ہے پئی انہاں غیر مسلم پاکستانیاں نوں بربر دا پاکستانی شہری کون، کیوں نہیں منیندا سی اتے اوس مگر کیہڑی سوچ سی۔ ایہہ سوچ قائداعظم دی تے نہیں سی پر جداں اوہ تقریر کررہے سن تے اوس اسمبلی وچ بیٹھے کجھ ممبر ایہہ سوچ رکھدے سن پئی بانی پاکستان دی تقریر ٹھیک گل نہیں۔ ایہہ گل پہلی قنون ساز اسمبلی دے ممبر چوہدری نذیراپنے انٹرویو وچ آپ دسی جیہڑا ’’قائداعظم اور ان کے رفقاء‘‘ نامی کتاب وچ چھاپیا گیا۔ پر نذیر ورگیاں دی ایڈی ہمت نہیں سی کہ ایہہ گل قائداعظم کولوں پچھ سکدے۔ قائداعظم 11 اگست 1947 نوں جیہڑی تقریر کیتی اوہ خطبہ الہٰ آباد دے تسلسل وچ سی کہ جس وچ کھلا کھلا لکھیا سی کہ ریاست وچ سب شہری بلا امتیاز مذہب، رنگ، نسل تے زبان،بربر ہونے چاہیدے نیں۔ حیران ہون والی گل تے ایہہ ہے کہ پاکستان بناون دی لہر وی اک اقلیت چلائی سی کیونجے انہاں نوں لگدا سی کہ ساڈے حق سانوں نہیں ملن گے۔جیڑی لہر اقلیتاں دی راکھی لئی چلی سی اوس نوں بھلا دتا گیا کیونجے سٹیبلشمنٹ لوکاں نوں ٹرک دی بتی مگر لا کے اپنا الو سدھا کرنا چاہندی سی۔سٹیبلشمنٹ دی ایس سوچ پاروں قائداعظم دی وفات توں بعد اوس گروہ نوں وی موقع مل گیا کہ جیہڑا آپدی تنگ نظر سوچ نوں پاکستان وچ نافظ کرنا چاہندا سی۔ ایہہ گروہ نرے مسلماناں نوں ہی پاکستان دا مکمل شہری سمجھدا سی اتے اپنے آپ نوں اسلام دا اکلا ٹھیکدار۔ کسی وی وطنی ریاست وچ کسے گروہ نوں دونمبر شہری آکھنا اک تنگ نظر سوچ دا بوتھا ہوندا ہے۔ اتے ایس گروہ نے قرار داد مقاصد راہیں ایہہ تاثیر دین دی کوشش کیتی پئی پاکستان وچ غیر مسلماں دی حیثیتاں دو نمبر شہری دی نیں۔ایس کم وچ مولانا مودودی، سر ظفراللہ خان،مولانا شبیر احمد عثمانی تے لیاقت علی خان اک صفحے تے سن۔ ایس قرار داد نوں پہلے وزیر خزانہ تے بعد چوں تریجے گورنر جنرل بنن والے موچی گیٹ کے غلام محمد ورگیاں دی مدد نال آئین دا حصہ نہ بنن دتا اتے ایس نوں آئین دے دیباچے تک محدود کردتا گیا۔ اوس ویلے میڈیا دا اک وڈا حصہ وی، اج وانگ، انہاں لوکاں دے نال سی جیہڑے قرارداد مقاصد نوں آئین دا پورا حصہ بنانا چاہندے سن۔ پر میاں افتخار الدین ورگیاں اپنے اخباراں راہیں ایس نوں پاکستان خلاف سمجھیا۔ میاں افتخار الدین دی تقریر اسمبلی ریکارڈ دا حصہ ہے جس وچ انہاں آکھیا پئی قرار داد مقاصد دا ٹیچا پاکستان دے اصل مسلیاں توں توجہ ہٹانا ہے۔
قائداعظم دی زندگی وچ ہی نواں آئین بنان لئی جیہڑی کمیٹیاں بنایاں گیاں سن انہاں چوں اک کمیٹی غیر مسلم پاکستانیاں بارے وی کم کررہی سی۔ اوس رپورٹ نوں 1949 دے اخیری مہینیاں وچ اسمبلی وچ گھل دتا۔ قرارداد مقاصد لیاون والیاں نے 1950 تے 1960 دے دہاکیاں وچ پوری جان ماری کہہ ایس قرارداد نوں آئین دا حصہ بنایا جائے اتے فیر ایس دی بنیاد تے اجہے قنون بنائے جان جس پاروں پاکستان وچ غیر مسلم پاکستانیاں نوں دونمبر شہری آکھیا جائے۔ پر 1973 دے اصلی آئین دی منظوریاں ویلے وی اوہ کامیاب نہ ہوسکے اتے قرارداد مقاصد آئین دے دیباچے وچ ہی رہی کہ جس پاروں اوہ آئین دے قوانین تے اثر نہیں پاسکدی سی۔ جماعت اسلامی سنے بہوں ساریاں مذہبی جماعتاں ایس لئی مطالبے کردیاں رہیاں جیہڑے ریکارڈ دا حصہ نیں۔ فیر انہاں دا درینہ مطالبہ مکار جنرل ضیا نے پورا کیتا اتے نہ صرف قرارداد نوں آئین دے دیباچے وچوں کڈکے آئین دا حصہ بنایا گیا سگوں 63,62 ورگی شقاں نوں انج بنایا گیا جس پاروں مستقبل وچ اسلام دی آڑ لے کے اسمبلی دے ممبران نوں سدھا کرن دا ایجنڈا وی بنا دتا گیا۔ افغان جہاد پاروں اوہ گروہ تگڑے ہوگئے جنہاں نوں پہلے دن توں قائداعظم دی 11 اگست دی تقریر بھیڑی لگدی سی۔ کیونجے ایس گروہ نے ساڈی ریاست نوں بھارت مخالفت دے بیانیے تے اساریا سی تاں مارے قرار داد مقاصد نوں آئین دا حصہ بنانا لوڑی دا سی۔ ایہہ لڑائی 1980 دی دہائی توں اج تیک جاری ہے۔ اج سیاستداناں نوں چیتا ہوگیا ہے پئی 63,62 تے قرار داد مقاصد نوں آئین دا مکمل حصہ بناون مگر کیہڑیاں سیاستاں سن؟ 11 اگست نوں ایس لئی اہمیتاں حاصل نیں کہ قائداعظم جس پالیسی نوں بنایا سی اوس تے اج مڑ جھات پاون دی لوڑ ہے۔ایہو نواں سوشل معاہدہ ہے۔ اج پاکستان دی آبادی جے 20 کڑوڑ ہے تے اوس وچ 5 فیصدی دا مطلب ہے کہ اک کڑوڑ غیر مسلم پاکستانی ایس ملک دے واسی نیں۔ انہاں اک کڑوڑ پاکستانیاں نوں پاکستان وچ بربر دا شہری بناون لئی قرار داد مقاصد نوں مڑ آئین دے دیباچے تک لیجانا لوڑی دا ہے اتے قنون دی نظر وچ سب اداریاں تے گروہاں نوں برابر رکھنا وی لازم۔ 11 اگست نوں جے اساں 70 سالاں پرانی قائداعظم دی گل نوں من لیے تاں ملک وی تگڑا ہوسی اتے غیر مسلم پاکستانی وی ایس نال ہو زیادہ جڑن گے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels