Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> نظام نوں کجھ نہیں ہو سی۔بھٹو توں نواز تیک۔۔۔نصرت جاوید

نظام نوں کجھ نہیں ہو سی۔بھٹو توں نواز تیک۔۔۔نصرت جاوید

وچار ڈیسک
August 8th, 2017

اپنے عمران خان صاحب وی بادشاہ بندے نیں۔ 2013 دی چوناں بعدوں، ایس لئی چلائی مہم دے دوران لگی چوٹ توں ٹھیک ہون دے بعد قومی اسمبلی وچ تشریف لیائے تے 4 حلقے کھولن دا مطالبہ کردتا۔ نواز حکومت نے ایس مطالبے تے کماحقہ توجہ نہ دتی تے ’’جعلی انتخابات‘‘ دی بدولت ’’چور تے لٹیریاں‘‘ تے مشتمل قومی اسمبلی توں نجات پان لئی اسلام آباد وچ 126 دناں تک دھرنا دتا۔ ایس دھرنے دے دوران عیاں ہوگیا کہ ساڈی ریاست دے دائمی ادارے وی آئین دے مطابق ’’سب تے بالادست پارلیمان‘‘ نوں خاص اہمیت نہیں دیندے۔ ایس دے قائد یعنی وزیراعظم نوں بچان لئی انہاں اداریاں نے کوئی خاص دلچسپی نہیں وکھائی۔ پلس اہلکار سگوں تحریک انصاف دے جذباتی کارکناں توں اپنے تحفظ دی بھیک منگدے رہے۔ ایس دھرنے دے ذریعے عمران خان صاحب نے ایمپائر نوں انگلی چک کے نواز شریف نوں کریز چوں باہر کڈھن دا مطالبہ کیتا سی۔ ساڈے رویتی ’’ایمپائر‘‘ نے انگلی نہ چکی۔ بد قسمتی توں APS والا واقعہ وی ہوگیا جس نے ریاستی اداریاں دی ساریاں توجہ دہشت گردی دے خلاف آپریشن ضرب عضب ول کردتی۔ ایس آپریشن دی شاندار کامیابی نے سعودی عرب نوں ایہہ خاہش پالن تے مجبور کیتا کہ اوہ پورے عالم اسلام نوں ساڈے دین مبین دی غلط تشریحاں پاروں پھیلائی دہشت گردی دے مقابلے لئی اک ’’مسلم نیٹو‘‘ دا قیام عمل وچ لیائے۔ آپریشن ضرب عضب دے کمان دار، ساڈے جنرل راحیل شریف صاحب نوں مجوزہ اتحاد دا سربراہ مقرر کردتاگیا۔
امریکی صدر دے حالیہ دورہ سعودی عرب دے دوران ٹرمپ دے جوائی نے جو وائٹ ہاؤس دی مشرق وسطی دے بارے وچ پالیسی سازی دے عمل وچ سب توں اہم کردار ادا کردا ہے اک سرکاری کھانے دے دوران اپنا سارا وقت ساڈے جنرل صاحب دے نال اک میز بیٹھ کے گذاریا۔ ایس میز تے تیجے بندے صرف شاہزادہ محمد بن سلمان سن جو ہن باقاعدہ ولی عہد بنا دتے گئے نیں۔ عالم اسلام دی واحد ایٹمی قوت ہون دے دعوے دار اسلامی جمہوریہ پاکستان دے تیجی وار منتخب ہوئے وزیراعظم نوں ایس دورے دے دوران قطعی کوئی اہمیت نہیں دتی گئی سی۔ ٹرمپ ولوں نواز شریف نوں ایس دور ے دوران جان بجھ کے نظر انداز کرنا واضح طور تے سگوں ایہہ پیغام دے رہیا سی کہ پاکستان دے وزیراعظم دے منصب توں انہاں دا فارغ ہونا ٹھہر چکیا ہے۔ صبح گیا یا شام گیا۔ نوازشریف دی فراغت دا حقیقی بندوبست ساڈے عمران خان صاحب ہی نے تے کیتا سی۔ 4 اپریل 2016 دی صبح پانامہ دستاویزات اک دھماکے دی صورت نمودار ہوئیاں۔ ایس وچ نواز شریف دے بچیاں دے ناں آئے تے تحریک انصاف نے نواز شریف توں استعفیٰ طلب کرلتا۔ اوہ استعفیٰ دین تے رضا مند نہ ہوئے تے خان صاحب سپریم کورٹ چلے گئے۔ سپریم کورٹ نے انہاں دی ابتدائی درخاست نوں ’’فروعی‘‘ دس کے واپس گھل دتا تے عمران خان صاحب نے اپنے وکلا دی مدد نال ایس نوں جاندار بنایا۔ سپریم کورٹ نے ایس نوں قابل سماعت قرار دین وچ دیر لائی تے ضدی تے ثابت قدم عمران خان نے اسلام آباد دے لاک ڈاؤن دا علان کردتا۔ انہاں دی دائر کردہ درخاست ایس لاک ڈاؤن دی بدولت نہ صرف باقاعدہ سگوں روزانہ دی بنیاداں تے سماعت لئی منطور ہوگئی۔ کئی مہینے دی پیشیاں ،ریاست دے 6 دائمی اداریاں ولوں ہوئی تفتیش تے عمران خان صاحب دی جدو جہد مسلسل دے باعث بالآخر نواز شریف 28 جولائی 2017 نوں اک تاریخی فیصلے دے ذریعے ’’نااہل‘‘ قرار دے کے وزارت عظمی توں فارغ کردتے گئے۔ خان صاحب تے انہاں دی جماعت نے ایس ’’نااہلی‘‘ تے یوم تشکر منایا۔ اسلام آباد دی پریڈ گراؤنڈ وچ عوام دے ٹھاٹیں ماردے سمندر نے ایس تقریب دے دوران سپریم کورٹ دے ’’5 عظیم ججاں‘‘ تے JIT دے ’’قومی ہیروز‘‘ دی ستائش وچ مسلسل زندہ باد دے نعرے لائے۔ اک طویل تے جان توڑ تحریک دے بعد نواز شریف نوں وزارتِ عظمیٰ توں فارغ کروان بعد عمران خان صاحب نوں ایہہ خدشہ لاحق ہوگیا ہے کہ ’’نااہل‘‘ قرار دتا ایہہ سیاست دان جس نوں سپریم کورٹ نے ’’ گاڈ فادر‘‘ وی آکھیا ،بدھ دے دن جی ٹی روڈ دے ذریعے لہور جاندے ہوئے ’’نظام‘‘ نوں خطرے وچ پاون دی کوشش کررہیا ہے۔ سپریم کورٹ تے NAB نوں اپنے ہاکیاں والے وکھا کے دباؤ وچ پاون دے منصوبے بنا رہیا ہے۔ خان صاحب ولوں اتوار دی سہ پہر نواز شریف ولوں جی ٹی روڈ دے ذریعے لہور جان دے فیصلے دے خلاف جاری ہوئے بیان نوں میں دوبارہ غور نال پڑھیا۔ ایمان داری دی گل ہے مینوں بلکل سمجھ نہیں آئی کہ نواز شریف بذریعہ جی ٹی روڈ لاہور روانگی ’’نظام‘‘ نوں خطرے وچ کس طراں تے کیوں پاسکدی ہے۔ اوہ ’’نظام‘‘ جس دے بارے وچ عمران خان صاحب بہت فکر مند دکھائی دے رہے نیں ایس دے تحت سپریم کورٹ توں نااہل ہوئے نواز شریف دے نامزد کردہ شاہد خاقان عباسی ہن ایس ملک دا وزیراعظم ہے۔ ایس ’’نظام‘‘ دے تحت اٹک توں رحیم یار خان تک پاکستان دے آبادی دے اعتبار توں سب توں وڈے صوبے دے وزیراعلی کوئی ہور نہیں نواز شریف دے سکے بھرا شہباز شریف نیں۔ نواز شریف انہاں دوناں دی فراغت لئی تے کوئی تحریک چلان توں رہے۔ آن والے 6 مہینیاں دے دوران سپریم کورٹ دے اک عزت مآب جج دی براہ راست نگرانی وچ نواز شریف تے انہاں دی دے قریبی عزیزاں نوں احتساب عدالتاں دے روبرو اپنے خلاف لگے الزاماں دا جواب وی دینا ہے۔ انہاں دوناں فیصلیاں توں بچنا کسی وی صورت ممکن ہی نہیں۔ فیصلہ پاکستان دی اعلی ترین عدالت دا ہے جس دے خلاف اپیل دی کوئی گنجائش ہی نہیں۔ عمران خان صاحب نے ویسے وی نواز شریف نوں صرف وزارت عظمی توں فارغ ہی نہیں کروانا سی۔ انہاں دا ایہہ عہد وی سی کہ نااہل قرار پائے نواز شریف نوں اڈیالہ جیل وی پہنچان گے۔ انہاں دی ساریاں خواہشاں ہن پوری ہورہیا نیں۔ ایس دے باوجود عمران خان صاحب پتہ نہیں کیوں فکر مند نیں۔ نواز شریف نوں جی ٹی روڈ دے ذریعے لاہور جاکے پنجابی والا چن لان دیو۔
پاکستان دی ریاست ایس دے دائمی ادارے تے ساڈی اعلی ترین عدالت ہر گز اینی کمزور نہیں کہ نااہل ہویا اک سیاست دان اسلام آباد توں بذریعہ جی ٹی روڈ لاہور پہنچے تے سب کجھ ہل کے رہ جائے۔ 1977 وچ وی غالباً اگست ہی دا مہینہ سی جداں جنرل ضیا الحق ورگے رحمدل تے نیک طینت انسان نوں وی مجبور کردتا کہ اوہ بھٹو دے خلاف احمد رضا قصوری دی دائر کردہ FIR نوں فائلاں چوں کڈھ لہور دے جسٹس مشتاق مرحوم دے ہتھوں انصاف دی فراہمی نوں یقینی بنائے۔ نواز شریف دا ’’استقبال‘‘ وی انہاں لئی خیر دی خبر نہیں لیائے گا۔ ریاست دے سارے دائمی اداریاں باہم رل کے انہاں نوں عبرت دا نشان بنان دا فیصلہ کرلتا ہے۔ اپنی بھرپور عوامی قوت دی بدولت خان صاحب ایس مشن دی تکمیل لئی انہاں اداریاں دے اہم ترین سہولت کار ثابت ہوئے نیں۔ اوہ سہولت کاری دے ایس عمل نوں جاری رکھن، ’’نظام‘‘ نوں ہرگز کچھ نہیں ہوسی۔

Published in Nawa e Waqat
http://www.nawaiwaqt.com.pk/columns/08-Aug-2017/644813


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels