Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> قومی اتحاد ترٹ گیا۔۔۔ہن ایم آر ڈی بنن داویلہ ہے۔۔۔مگر؟

قومی اتحاد ترٹ گیا۔۔۔ہن ایم آر ڈی بنن داویلہ ہے۔۔۔مگر؟

August 2nd, 2017

کسی وی ملک دے پاپولر لیڈر خلاف زور زبردستیاں پاروں جداں وی کم پایا گیا جاندا ہے تے اوس دھرتی نوں کتھوں کتھوں سٹ وجدی ہے ایس بارے طاقتور اسٹیبلشمنٹ اپنے فوری فیدیاں پاروں کدی نہیں سوچدی۔عالمی تے مقامی مفاداں نوں اینج رلایا تے ملایا ہو ندا ہے کہ وڈے وڈے دھوکہ کھا جاندے نیں۔پر جے اجیہے فیصلیاں نوں آون والے دس سالاں نوں سامنے رکھ کے ویکھو تاں لگ پتہ جاندا ہے پئی بھٹو دے’’ عدالتی قتل‘‘ تے ضیا دور وچ واپرن والے فرقہ واریت دا آپسی تال میل کیہہ سی؟افغان جہاد کیہہ سی اتے ’’روس دے ڈر‘‘ دا جن کھڑا کر کے کیہڑا کھیڈ عالمی پدر تے 1970دی دہائی دے اخیری سالاں توں شروع ہویا سی۔1980دے ادھ وچ ریشمی سڑک بعنی سلک روڈ پوری ہونی سی تے اوس توں پہلاں ہی ایہہ خطہ ونڈیا جا چکیا سی۔1978توں1988وچکار ساڈی اسٹیبلشمنٹ کیہہ کر دی رہی تے کنج بربادیاں پھلیاں ایہہ سب نوں اک وڈا ڈکا اوس دور وچ ایم آر ڈی لایا سی۔جیہڑے کل تک قومی اتحاد وچ سن انہاں وچوں بہوں سارے لکیر دے پرلے پاسے چلے گئے اتے اوسے بھٹو دی اوسے پارٹی نال بیٹھ کے ضیا شاہی خلاف مورچہ لایا جس نوں کجھ مہینے پہلاں عدالت لٹکایا سی تے ایہہ سب اسٹیبلشمنٹ نال رلے سن۔ہرکاریاں زخمی پارٹی نوں اے زیڈ اووچ الجھایا پر نصرت بھٹو تے بے نظیر جمہوری آپشن نوں آزمایا تے ایم آر ڈی بن گئی۔کیونجے انتشاری سیاست کرن والیاں دا جواب اینج ہی دتا جاسکدا سی۔جو کجھ کل توں ہورہیا ہے ایہہ تے ہونا ہی سی کہ62تے63جے سب تے لگے گی تے گلا لئی دی کہانی اشرافیہ دے ہر ڈرائنگ روم توں نکل سکدی ہے اتے حمام وچ سب ننگے نیں۔اجہی کہانیاں وادھو نیں پر شکل مومناں بنانی اشرافیہ دی مجبوری ہے۔جنج زردادی تے شہباز دی بے نکاہی شادیاں دی خبراں تے پی ٹی آئی والے، ایم کیو ایم والے خش ہوندے سن اینج ہی ایس خبر تے دوجے’’مصلح‘‘ بن کے انج ہی بھاشن دے رہے نیں جنج کل تک علی احمد خان وغیرہ دیندے سن۔ایہہ خبر وی اتھوں ہی آئی ہے جنہاں پہلی خبراں کڈہیاں سن۔ایجنڈیاں نال جڑے صحافی تے پچھلے ترے میہنیاں توں ایکسپوز ہو رہے نیں پر جس ’’گند‘‘ دا آغاز جے آئی ٹی دے ’’ہیریاں‘‘ ایس ملک وچ شروع کیتا ہے اوہ بھٹو دی پھانسی ورگا ہی ہے۔وزیراعظم نواز شریف نوں لاون لئی جیہڑا قومی اتحاد بنایا گیا سی اوہ عدالتی فیصلہ سندے ویلے ہی ٹٹنا شروع ہو گیا سی کہ ہر ستارہ ایس دا کریڈٹ آپ لینا چاہندا سی۔نویں وزیراعظم دی چون ویلے سب نے ویکھیا کہ ہر کسے نیں اپنا امیدوار دتا۔پاکستان وچ انتشاری سیاست دا فیدہ یا تے انہاں عالمی طاقتاں نوں ہوئے گا جیہڑے سمجھدے نیں کہ پاکستان انہاں دے قابو توں باہر جا رہیا ہے یا فیر انہاں نوں جیہڑے پاکستان وچ غیر آئینی بندوبستاں دے حامی نیں۔ایہو وجہ ہے پئی سیاستداناں پارلیمنٹ وچ نواں وزیراعظم بنا کے اک پدر تے انتشاری سیاستاں کرن والیاں نوں رگیدیا ہے۔پاکستان تے اج پریشر ایہہ ہے کہ اوہ جبوتی وچ چین دی آمد بعدوں چینی ایجنڈے توں پراں رہے اتے ایس وچ سعودی عرب، برطانیہ تے امریکہ اک نیں۔ایہو اوہ وڈی لڑائی ہے جس پاروں پاکستان وچ انتشاری سیاستاں نوں کدی اک دھڑے تے کدی دوجے دھرے نوں تھاپڑا دے کے ودھایا جا رہیا ہے۔اک پدر تے سپریم کورٹ دے فیصلے تے ومل توں لے کے نویں وزیراعظم تیک نواز شریف کسے ردعمل توں پراں رہے اتے پی پی پی وی نواز نوں ہٹاون توں بعدوں اگلے ایجنڈے دا حصہ نہیں جاپدی۔ایس موقعہ نوں نواں سوشل کنٹریکٹ بناون ول وی لیجایا جاسکدا ہے اتے انتشاری سیاست نوں ودھان ول وی۔مسئلہ نرا ایہہ نہیں کہ وزیراعظماں نوں ان ہاؤس تبدیلیاں توں بغیر کڈہنا مکایا جائے سگوں وڈا مسئلہ ایہہ ہے کہ پارلیمنٹ دی بالادستیاں نوں سب منن اتے سارے وڈے فیصلے تے پالیسیاں پارلیمنٹ وچ بنن تانجے سب کجھ لوکاں دے سامنے ہوئے۔پاکستان نوں ہمش باہرلیاں بڑی آسانیاں نال ورتیا ہے کیونجے وڈے فیصلے ڈرائنگ روماں وچ ہوندے نیں۔جنہاں نوں اقتدار وچ آون دی جلدی ہے اوہ ایہہ کم مشکل ہی کرن گے پر اج اک نویں ایم آر ڈی دی لوڑ ہے جیہڑی جمہوری میثاق دی روشنی وچ نویں سوشل کنٹریکٹ تے زیادہ تر سیاسی جماعتاں نوں راضی کرے۔پر ایس لئی لوڑی دا ہے کہ سیاست دی کمانڈ انہاں دھڑیاں کول نہ ہوئے جیہڑے ایس ویژن توں وانجھے نیں اتے انتشاری سیاست نوں ودھانا چاہندے نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels