Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> دی بلیک پرنس تے مہاراجہ دلیپ سنگھ

دی بلیک پرنس تے مہاراجہ دلیپ سنگھ

July 29th, 2017

سانجھے پنجاب دے اخیری مہاراجے دلیپ سنگھ اُتے اک فلم سارے لہور دے سینما گھراں وچ لگی۔ مینوں اگدوں ای ایس دی اُڈیک سی کیوں جے ایہہ فلم دلیپ سنگھ بارے سی۔تے پنجاب دی تواریخ بارے ماڑی موٹی جانکاری کر کے میں ہفتے نوں اپنے پورے ٹبر نوں نال لے کے فلم ویکھن گیا۔ کیوں جے میں چاہندا آں کہ نویں پیڑھی نوں وی پتہ لگے اسیں کون آں، ساڈی تواریخ کیہ ہے ؟ تے ساڈے نال کیہ کیہ دھروہ ہویا اے؟ میرا وچار سی کیوں جے کئی دناں توں ایس فلم دی دُھم مچی ہوئی اے تے پاکستان اندر جیو فلمز ایس نوں پیش کر رہیا اے،ایس لئی چوکھا رش ہووے گا تے خبرے ٹکٹ ملے یاں نہ ملے۔پر جد اسیں سینما اپڑے تاں اُکا رش نہیں سی۔بوہتا حال خالی سی۔
پر فلم بہت شاندار سی۔بھاویں فلم لہور تے پنجاب بارے سی پر لہورئیے پتہ نہیں کتھے سن۔ اج 175ورھیاں پچھوں کسے نوں یاد نہیں سی رنجیت سنگھ کون سی؟ اوس پنجاب لئی کیہ کیتا؟ تے اوس توں وی ودھ سن 1947توں مگروں جیویں اساں اپنی وار (تواریخ) نوں وساریا اے اوہ وی گھٹ قوماں نے کیتا ہونا اے۔بھاویں ساڈیاں فلماں وچ سکھ نوں ہمیش چنگا تے ہندو نوں مکّار بنا کے دسیا جاندا رہیا اے پر بلیک پرنس نوں لوکاں اِنج نال ویکھیا جیویں ویکھن دا حق سی۔
کل روزوار انگریزی اخبار ’ڈان‘ وچ ایف۔ایس۔ اعجازالدین نے ایس بارے کالم لکھیا۔ اوہناں اپنی سوہنی انگریزی وچ گل بڑے سوہنے ڈھنگ نال چھوہی پر ادھا کُو کالم لکھن پچھوں اوہ اج دی پاکستانی سیاست دے بھبھل بھوسے وچ پے گئے تے گل کراہے پے گئی۔ چیتے رہوے پئی اعجازالدین فقیر خاندان دے جی نیں جیہناں دے وڈکے رنجیت سنگھ راج وچ شامل سن۔
اوہناں پنجاب دے اک چھیویں دریا دی گل کیتی اے جیہڑا لہو دا دریا اے۔اوہ آکھدے ہن پنجابیاں نوں بلّی وانگر لہو دی تریہہ اے تے رنجیت توں لاء ہن تیک کجھ وی نہیں بدلیا۔رنجیت سنگھ نے آکھیا سی میرے پچھوں انگریز پنجاب اُتے ملَ مار لین گے پر اوس نوں نہیں پتہ سی اوس دی پُتر اِنج راج لئی اک دوجے دے گھاٹے لان گے۔
مہاراجہ دلیپ سنگھ رنجیت سنگھ دا اخیری پُتر سی تے رانی جنداں اوہدی ماں سی تے اوہ 1893وچ پیرس دے اک ہوٹل وچ ماڑے حالاں وچ چلانا کر گیا سی۔ اوہ بہوں نکّا سی جد انگریزاں پنجاب اُتے 1849وچ مَل ماریا تے اوس نوں ولایت لے گئے۔ اوس نوں عیسائی بنا دتا گیا تے ملکہ نے اوہنوں اپنی چھتر چھاں ہیٹھ پالیا۔اوس کول جگ دی ہر شے سی اوہ انتاں دا نشانے باز سی۔اوہ سن 1861وچ ہندوستان آیا تے اپنی ماں نوں ملیا۔فلم وچ رانی جنداں دا رول شبانہ اعظمی نے کیتا اے۔ رانی جنداں اوس ویلے انھی ہو چکی سی پر اوس اپنے پُتر وچ ’شیر پنجاب‘ دے لہو نوں جگایا تے اوس نوں اپنا تخت لین لئی ونگاریا۔ جد دلیپ سنگھ اپنی ماں نوں دسدا اے پئی ملکہ مینوں’ بلیک پرنس‘ کہندے اے تے رانی جنداں اوس نوں غصے نال
جوا ب دنیدی اے،’ توں پرنس نہیں مہاراجہ ایں،تیرے اندر شیر پنجاب دا لہو اے تے توں عیسائی نہیں سکھ اے۔
دو ورھے جو اوہ اوہدے نال رہندی اے اوس اندر اوہدے اصل نوں جگاون دی کوشش کردی اے۔اخیر اوہ پرت آوندا اے تے ہندوستان جاون دی صلاح بناوندا ے۔ اوس چٹھیاں آوندیاں نیں لکھاں سکھ اوس دی اُڈیک کردے پئے ہن۔کجھ جتھیاں دے آگو اوہنوں لندن آ کے وی ملدے نیں۔ اوہ لندن توں ہندوستان دے لئی تُردا اے پر پہلوں ای سرکار نوں کن ہو جاندے نیں۔اوس دیاں ساریاں چٹھیاں پھڑیاں جاندیاں نیں۔تے اوس نوں یمن وچ ڈک لیا جاندا اے۔اوہ لندن دی تھاں پیرس چلا جاندا اے جتھے اوہنوں نابریاں دے کئی جتھے ملدے نیں۔جیہناں وچ آئرش وی نیں۔اوہ روس جان دا سوچدا اے تے اوس نوں پکّ کرایا جاندا اے پئی زار اوس دی مدد کرے گا تے اوہ زار دیاں فوجاں نال افغانستان توں ہندوستان حملہ کرے گا۔انگریز دی فوج وچ سکھ سپاہی اوس نال مل جان گئے تے اوہ اپنی سرکار واپس لے لئے گا۔پر روس اوس دی زار نال کوئی ملنی نہیں ہوندی تے اوس ناکام پیرس پرت آوندا اے تے ایتھے ای اپنے ساہ پورے کر جاندا اے۔اوہ پرت کے ولایت نہیں جاندا تے نہ ہی ملکہ کولوں کوئی مدد لیندا اے۔
پہلی گل تاں ایہہ اے پئی اسیں ایس گل نوں منیئے پئی رنجیت سنگھ سرکار پنجاب دی پہلی سرکار سی تے اوس سکھ راج نہیں پنجابی تے مقامی راج سی۔ہندو شاہی پچھوں اک ہزار ورھیاں پچھوں پنجابیاں دی سرکار آئی سی۔دوجے رنجیت سنگھ نے گھٹو گھٹ پنجاہ ورھے انگریزاں نوں ڈکی رکھیا تے ایتھے آون نہیں دتا۔ تیجے اوس ہی شمال توں آوندے دھاڑیاں نوں ڈکیا۔ جس دن پنجابیاں نوں ایہہ سار ہو گئی پھیر اوہناں نوں پتہ لگے گا پئی پنجاب اُتے پنجابیاں نے انگریزاں خلاف کنیاں جاناں واریاں سن تے جیہناں نوں اسیں سکھ سمجھ کے فارع کردینے آں۔ تواریخ نوں دھرم نوں پاسے دھر کے ویکھن دی لوڑ اے تے تخت لہور دا کُھسن ساڈے اپنے راج دا کُھسن سی۔ جد سانوں ایہ سار ہوگئی پھیر اسیں مہاراجہ دلیپ سنگھ دی فلم اپنی کہانی سمجھ کے ویکھاں گے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels