Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> سیاسی عمل وچ نکھار صرف سیاسی عمل توں ہی ہو سی۔ نصرت جاوید

سیاسی عمل وچ نکھار صرف سیاسی عمل توں ہی ہو سی۔ نصرت جاوید

وچار ڈیسک
July 12th, 2017

پچھلے ہفتے دے آخری دناں وچ ایہہ سوچ کے بہت پریشان ہوندا رہیا کہ پیر 10 جولائی دی صبح اُٹھ کے ایس کالم وچ کیہ لکھیا جا سی۔ ایس دن دی دوپہر 6 مختلف ریاستی اداریاں دے نمائندیاں تے بنی کمیٹی نے سپریم کورٹ دے سامنے شریف خاندان دے اثاثیاں بارے اپنی تفیشی رپورٹ پیش کرنا سی۔ میں ایس رپورٹ دی باقاعدہ مکھ وکھالی توں پہلے ایس دے بارے وچ کوئی قیاس آرائیاں نہیں چاہندا سی۔ عدالتی عمل بارے قیاس آرائیاں توں میرا مسلسل تے سوچیا سمجھیا اجتناب میرے کم نہیں آیا ۔ 20 اپریل نوں سپریم کورٹ دے 5 رکنی بنچ نے پانامہ دے حوالے نال جو فیصلہ سنایا سی ایس دے بارے وچ بہوں محتاط رہندے ہوئے تے مناسب الفاظ پاروں اپنی بے ساختہ تے ایماندارانہ رائے دا اظہار کیتا سی۔ مینوں خدشہ سی کہ سپریم کورٹ دے حکم توں بنائی کمیٹی وچ MI تے ISI دے نمائندیاں دی رلت پاکستان دی مخصوص تریخ دے تناظر وچ شریف خاندان دے اثاثیاں بارے چکے سوالاں نوں اخیر عسکری قیادت دے حوالے کردی نظر آئے گی۔ میرے خدشے دے ایس ایمان دارانہ اظہار نوں 5 مئی دے روز تشکیل پان والی کمیٹی نے اپنے معاملیاں وچ مداخلت سمجھیا۔ اسی نوں متنازعہ بنان دی جسارت قرار دے کے سپریم کورٹ دے روبرو اج رپورٹ لکھوا دتی۔ سپریم کورٹ نے میری زبان بندی دا حکم تے نہیں دتا پر مینوں لکھدے ہوئے ہمیشہ اوہ پنجابی محاورہ یاد رہندا ہے جو اصرار کردا ہے کہ طاقتور دا گھونسہ بعض اوقات تہاڈے وجود لئی رب توں وی زیادہ نزدیک ہوندا ہے۔ JIT دے معاملیاں تے چپ کر کے ’’ڈروٹ‘‘ لینا ہی مناسب سمجھیا۔ پتھر وچ بند ہوئے کیڑے نوں وی رب کریم رزق عطا فرماندا ہے۔ میری خوش قسمتی کہ اتوار دی رات سون توں پہلاں کراچی دے اک صوبائی اسمبلی دے حلقے دی ضمنی چوناں دا رزلٹ مکمل ہو کے ساڈے سامنے آگیا۔ ایس رزلٹ نے مینوں دس جولائی دی دوپہر نوں پیش ہون والی رپورٹ دے بارے وچ قیاس آرائی توں بچا لیا۔ اتوار دی شام ٹی وی کھولدے ہی جداں کراچی دی ضمنی چوناں دا ذکر شروع ہویا تے شدت توں ایس شخص دی یاد آنا شروع ہوگئی جس نے ایم کیو ایم توں وکھ ہو کے ڈیفنس دے اک مکان وچ کمال ہٹی کھولی سی۔ خود نوں ماضی دے گناواں دا تسلسل اتے ایس دا اعتراف کردے ہوئے پارسا بنائے کسی وی شخص دی طراں کمال دی ہٹی چلان والا اپنے مخالفین دے خلاف مسلسل بد زبانیاں کردا رہیا۔ جانے کیہڑے صحافتی تقاضے دے تحت ایس دی ہر پریس کانفرنس ساڈے ملک دے آزاد و بے باک ہون دے دعوے دار ٹی وی چینل live دکھان تے مجبور ہوندے۔ ایم کیو ایم دے لندن وچ کئی سالاں توں بیٹھے بانی دے اک اشارے تے کجھ وی کرن تیار کئی نامی گرامی افراد کمال دی ہٹی تے آکے اپنے گناواں دے اعتراف دے بعد معافی دے طالب گار نظر آندے۔ انہاں سب نے رل کے اپنے وطن نال محبت نوں ثابت کرن لئی اک پاک سرزمین پارٹی دے قیام دا اعلان وی کردتا۔ سانوں دسیا گیا کہ تازہ تازہ صاف ستھرے ہوئے انہاں لوکاں دی جماعت ہن لندن وچ بیٹھے شخص نوں تریخ دے کوڑے دان وچ سٹ دے گی۔ میں بد نصیب پر ایہہ فریاد کردا چلا گیا کہ کیماڑی توں بند روڈ تے چلدے ہوئے برنس روڈ وی آندا ہے تے رنچھور لین وی۔ فیر گاندھی گارڈن ہے جتھے تِن ہٹی دے پل تک پہنچ کے رستے ماضی دے لالو کھیت تے گولی مار ول جا نکلدے نیں۔ انہاں علاقیاں دی گلیاں تے محلیاں وچ رہن والے نوجواناں لئی بے تحاشا گناواں دے بعد غسل فرما کے پاک سرزمین دے جھنڈے وچ لپٹے پارسا دے کول کوئی پیغام نہیں۔ ایس دی ہٹی چل نہیں پائی۔ فاروق ستار وغیرہ نے دل کڑاکر کے اک درست فیصلہ کیتا۔ خود نوں ایس نوزائیدہ پارسا توں دور رکھیا۔ 22 اگست 2016 دی تقریر دے بعد تنہا ہوئے شخص توں فاصلہ رکھدے ہوئے اپنے سیاسی وجود نوں برقرار رکھن دی کوشش جاری رکھی۔ ایہہ گل درست ہے کہ اتوار دا ضمنی انتخاب اوہ جِت نہیں پائے۔ ایس انتخاب وچ دل و جان توں حصہ لے کے انہاں نے خود نوں ووٹاں دے حوالے نال پر اک قوت وی ثابت کردتا۔ فاروق ستار ولوں کھڑے ہوئے امیدوار نوں لندن توں آئے بائیکاٹ دے حکم دے باوجود متاثر کن ووٹ ملے نیں۔ انہاں ووٹاں نے ایہہ پیغام وی دتا ہے کہ آئندہ انتخاب وچ کراچی فی الوقت پیپلز پارٹی یا ایم کیو ایم دے علاوہ کسی تیجی پارٹی یا ایم کیو ایم دے علاوہ کسی تیجی جماعت دے نال چلن نوں تیار نہیں۔ عمران صاحب دی جماعت نے وی ایس انتخاب وچ اپنا امیدوار کھڑا کیتا سی۔ ایس لئی ووٹ منگن کپتان خود کراچی وی تشریف لے گئے سن۔ شاہ محمود قریشی تے جہانگیر ترین نے وی انتخابی مہم وچ حصہ لیتا۔ پولنگ توں کجھ ہی دن پہلاں اصل رونق لان تے ٹی وی سکریناں تے ہر موقعہ دی غزل منہ زبانی سنان والے راولپنڈی دے بقراط عصر وی تشریف لے گئے۔ ٹی وی Ratings تے ووٹ حاصل کرن دی قوت پر دو قطعاً مختلف معاملات نیں۔ پی ٹی آئی دا ککھ توں لکھ ہویا امیدوار آخر بہت بھیڑی طراں ہار گئے۔ عرفان مروت وی جیہڑے کدی ایس حلقے دی اہم ترین شخصیت سمجھے جاندے سن۔ ایس دی کوئی مدد نہ کر پائے۔ اک کالعدم تے مذہب دے ناں تے سیاست کرن والی جماعت دی حماقت وی روشن خیال تحریک انصاف دے کم نہ آسکی۔ آئندہ عام انتخابات وچ وی گھٹ و گھٹ کراچی دی حد تک اینج ہی ہوندا نظر آرہیا ہے۔ پیپلز پارٹی دے اک جیالے نے وفاداری بشرط استواری دی بنیاد تے ایہہ سیٹ جِت لتی ہے۔ سینیٹر سعید غنی تے انہاں دے والد ہمش ٹریڈ یونین سیاست توں وابستہ رہے نیں۔ نظریاتی کارکن نیں۔ خوب پتہ ہے کہ حلقیاں وچ مقید نچلے تے متوسط طبقے دے ووٹر نوں بجلی، پانی تے سڑک توں جڑُے معاملات دا حل درکار میسر رہے۔ آصف علی زرداری ایہو جہے کارکناں نوں اپنی حقیقت پسندانہ طبیعت دی وجی توں کائی زیادہ دقعت نہیں دیندے۔ طے کر بیٹھے نیں کہ 1985 دے بعد توں انتخاب دا کھیل دھڑے باز وڈیریاں تے چودھریاں نے چُک لتا ہے۔ ایس حلقے لئی انہاں دی ترجیح عرفان اللہ مروت سن۔ غلط یا صحیح بنیاداں تے سابق صدر غلام اسحاق خان دے ایس طاقت ور داماد دے نال کراچی دے قدیمی جیالے خاص طور تے خواتین کاکناں دے دلاں وچ بُریاں یاداں موجود نیں۔ آصف صاحب دی دھیاں نے یکجا ہوکے عرفان اللہ مروت دے بارے وچ مذمتی ٹویٹ دے ذریعے کارکناں دے جذبات دا اظہار کردتا۔ ٹکٹ اک سچے کارکن سعید غنی نوں مل گیا تے ایس نے دن رات محنت نال میڈیا وچ اپنی جماعت دے بارے وچ موجود بے پناہ تعصب دے باوجود ایہہ نشست جِت لتی۔ اتوار ہی دی رات کراچی توں بہت دور گلگت بلتستان اسمبلی دی اک خالی ہوئی نشست تے وی پیپلز پارٹی دا امیدوار جتیا ہے۔ مذہب دے ناں تے سیاست کرن والے ملا ایس امیدوار دے خلاف یکجا ہوگئے سن۔ گلگت نوں کراچی توں اپنی تمام تر مشکلات دے باوجود پیپلز پارٹی نے اک حوالے نال اکٹھا وکھیا گیا ہے۔ ملکی یکجہتی دے حوالے توں ایہہ اک اہم پیغام ہے جے ایس توں وی زیادہ عیاں ایہہ حقیقت ہوئی ہے کہ سالاں دی محنت تے رشتیاں توں بن سیاسی جماعتاں نوں کمال دی ہٹی ورگی لانڈریاں کھولن دے ذریعے ختم نہیں کیتا جاسکدا۔ سیاسی عمل وچ نکھار صرف سیاسی عمل ہی دے ذریعے آندا ہے۔ کتھے ہور توں ایس نکھار نوں نہیں کیتا جاسکدا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels