Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> پنجابی آئینی پردھان جنہاں نوں اقتدار توں کڈھیا گیا

پنجابی آئینی پردھان جنہاں نوں اقتدار توں کڈھیا گیا

July 11th, 2017

اج کل پنجاب نوں گالاں کڈھ کے اپنا الو سدھا کرنا زیادہ آسان ہے۔ تاں مارے وڈے وڈے اینکر نما دانشور ایس کشتے یا ’’نسخہ کیمیا‘‘ نوں آزماندے نیں۔ کجھ لوک پنجاب مخالف تعصباں پاروں راضی ہوجاندے نیں پر جانن والے تے جاندے ہی نیں کہ کون کتھوں بول رہیا ہے تے کیوں اتے کل تک اوہ کیہہ آکھدا رہیا۔جے نوازشریف نوں ہٹا دتا گیا تے ایہہ کوئی خبر نہیں ہوئے گی کہ ایہہ تے پاکستان وچ ہمیش توں ہوندا آیا ہے۔ پر جے نوازشریف کھلوتے رہے تے اگلی چوناں تک وزیراعظم رہے تے ایہہ وڈی خبر ہوسی جس نوں پاکستانیاں اج تک نہیں سنیا۔ اسٹیبلشمنٹ دوسری وار وٹاں نال اقتدار دی منتقلی ویکھن توں بیزار ہے تے ایہو اصل ایجنڈا ہے۔
تساں پاکستان وچ غیر آئینی طریقیاں پاروں ہٹاون والیاں دی ذرا ایہہ لسٹ ویکھو تاں فیر اوس تازے ایجنڈے بارے غور کرو جیہڑا اج کل چلایا جارہیا ہے۔ ویسے ایس تازے ایجنڈے دے بھونڈے پن دی مثالاں وادھو نیں پرتساں پہلاں حقائق ویکھ لو۔
پاکستان دے تیسرے گورنر جنرل موچی دروازے لہور دے پنجابی غلام محمد سن جنہاں نو 7اگست1955 نوں ایوب، سکندر گٹھ جوڑ فارغ کیتا سی۔جنرل ایوب نوں سکندر مرزا آرمی چیف دے نال نال وزیر دفاع وی بنا دتا سی۔ پاکستان دے چوتھے وزیراعظم چوہدری محمد علی سن جیہڑے جلندھر دے پنجابی سن اتے انہاں نوں وزیراعظم دے عہدے توں 12ستمبر 1956 نوں فارغ کیتا گیا سی۔ پاکستان دے 7ویں وزیراعظم فیروز خان نون جنہاں گوادر خریدن دی جرأت کیتی سی اتے سرگودھے دے پنجابی سن۔ انہاں نوں وی7 اکتوبر نوں ایوب سکندر گڈھ جوڑ نشانہ بنایا سی۔ کیونجے اوس ویلے دی اسمبلی نے پاکستان وچ کم کردے امریکی سفیر خلاف کاروائی کیتی سی تاں مارے ایوب خان آقا نوں راضی کرن لئی مارشل لاء دتا سی تے اسمبلی مکادتی سی اتے پہلی عام چوناں نہ ہون دتیاں سن۔
گل ایتھے مکدی نہیں سگوں 1993تے 1999نوں وزیراعظم نوازشریف نوں دووار اقتدار توں کڈھیا گیا۔ویسے ایجنڈا چلاون والے بھل جاندے نیں کہ گیلانی وی پنجاب توں وزیراعظم سن اتے راجہ پرویز اشرف وی۔اینج 6 وار پنجاب توں تعلق رکھن والیاں نون کڈہیا گیا۔اُردو بولن والے وزیراعظم لیاقت علی خان نوں قتل کیتا گیا تے خواجہ ناظم الدین تے آئی آئی چندریگر نوں فارغ کیتا گیا کہ کل ملاکے ایہہ نرے3 ہوندے نیں۔ محمد علی بوگرہ پہلے بنگالی اتے تیجے پاکستانی وزیراعظم سن اتے سکندر مرزا پہلے بنگالی گورنر جنرل جیہڑے پہلے پاکستانی صدر وی بنے۔ بوگرہ ہوراں توں 12اگست 1955تے سکندر مرزا نوں 27اکتوبر 1958وچ فارغ کیتا گیا۔ پاکستان دے 5ویں وزیراعظم حسین شہید سہروردی سن جنھاں نوں 17اکتوبر 1957وچ فارغ کیتا گیا۔ ایہہ وی ترے ہوندے نیں۔ سندھیاں وچ ذوالفقار علی بھٹو 5جولائی 1977تے محمد خان جونیجو 29مئی 1988 توں بعد دو وار بے نظیر بھٹو ہوراں نوں 6اگست 1990تے 5نومبر 1996 وچ فارغ کیتا گیا۔ یعنی چار وار اک سندھی پردھان فارغ ہویا۔ مشرف دور وچ ترے وزیراعظم بدلے گئے جنہاں وچ ظفر اللہ جمالی بلوچ سن، شوکت عزیز تے ہورے پاکستانی وی نہیں سن اتے چوہدری شجاعت حسین پنجابی تے سن پر اوہ اپنی ایکسپائری تریخ لے کے وزیراعظم بنے سن۔ پختوناں وچ غلام اسحاق خان صدر بنے اتے انہاں نوں 1993وچ نواز دے نال فارغ کیتا گیا سی۔
چیتے رہے پئی جداں کاکڑ فارمولے نال نوازشریف نوں فارغ کیتا گیا سی تے عدالت چپ ہوگئی سی اتے جداں اکتوبر 1999 وچ ڈکٹیٹر مشرف انہاں نوں کڈھیا سی تے عدالت تے مشرف نوں ترے سال تک حکومت دی اجازتاں دے کے کس دے خلاف فیصلہ دتا سی؟عدالت تے ڈکٹیٹر رل کے پبجابی وزیراعظم خلاف کم کیتا سی۔
جیہڑا وی پاکستان دی تریخ توں واقف ہے اوہ جاندا ہے کہ اسٹیبلشمنٹ کسے نوں کیوں تے کدوں فارغ کرن دا فیصلہ کردی ہے۔ سب توں زیادہ گنتری تے پنجابیاں دی ہے۔ پر اسٹیبلشمنٹ دا مسئلہ سندھی، بلوچ، پختون تے پنجابی نہیں ہوندا سگوں اوہ آپ نوں ایس ملک پاکستان دا حاکم سمجھدے نیں۔ ایہہ آکھنا کہ عدالتاں کدی پنجابیاں خلاف فیصلے نہیں دتے اک کوڑ بیانیہ ہے۔ ایہہ آکھنا کہ پنجابیاں خلاف اسٹیبلشمنٹ کجھ نہیں کردی، ایہہ تے اسٹیبلشمنٹ دی سیوا کرن والا بیانیہ ہے اتے حقیقتاں نال ایس دا کوئی سانگا نہیں۔اسٹیبلشمنٹ چونویں قیادتاں تے آئینی حکمراناں نوں تھلے لا کے رکھنا چاہندی ہے۔
جیہڑی اسٹیبلشمنٹ اک امریکی ’’حسبوس‘‘ اگے ہتھل سی تے انہاں ایبٹ آباد آپریشن ہون دتا اوہ اپنے وزیراعظماں نوں ذلیل کروا کے کیڑے تمغے لانا چاہندی ہے؟ پاکستان وچ ہن تیک چار مارشلاء لگ چکے نیں۔ انہاں وچ دو پٹھان (ایوب تے یحیٰ) اک پنجابی تے اک اُردو بولن والا سی۔ کیہہ اسی ایہہ آکھیے کہ پٹھان سارے مارشلاء چاہندے نیں؟ ڈکٹیٹر دا وڈا حوالہ اوس دا دھرم، فرقہ ، قومیت یا زبان نہیں کہ اوس نوں نرا ڈکٹیٹر ہی آکھنا چاہیدا ہے۔ جے قومیتی بنیاداں تے کوڑ بیانیہ ہی چلانا ہے تے کیہ اساں ایہہ آکھاں گے کہ اک اُردو بولن والے جرنیل مشرف تے پنجابی وزیراعظم نوں کڈھیا سی؟ یا اسی ایہہ آکھاں گے کہ اک پٹھان صدر غلام اسحاق خان تے پہلے سندھی تے فیر پنجابی وزیراعظم نوں کڈھیا سی؟ اساں اپنے ایجنڈے پاروں ایس حد تک ڈگ تے سکدے ہاں پر ایہہ بیانیہ اک بند گلی وچ جاوڑ دا ہے؟ پاکستان وچ پہلے دن توں لڑائی چل رہی ہے کہ فیصلے اسمبلیاں وچ ہون گے یا باہر؟ اتے اسٹیبلشمنٹ ڈرائنگ روماں وچ فیصلے کرن دی عادی ہے۔ پر اوہ یاد رکھن کہ ایہہ ملک سیاستداناں بنایا سی کہ اقبال
تے جناح اسمبلیاں دے ممبر بنے۔ ایس لئی سیاسی عمل تے جمہوریت پاروں ہی ایہہ ملک اگے ودھ سکدا ہے، وگرنہ پواڑا جاری رہے گا۔پنجاب نوں گالاں کڈہن نال تساں دوجے صوبیاں دے سیاسی ورکراں نوں بے وقوف نہیں بنا سکدے ہاں کجھ ہرکارے قوم پرستاں نوں نال رلا سکدے ہو۔اسٹیبلشمنٹ کئی وار پنجابی آئینی حکمراناں نوں فارغ کیتا ہے پر میڈیا تے ایہہ کوڑ بیانیہ چلایا جارہیا ہے کہ اسٹیبلشمنٹ سندھیاں خلاف تے پنجابیاں دی حمائیتی ہے۔ ایہہ گل اسٹیبلشمنٹ نوں سوٹ کردی ہے۔اخیری گل ایہہ ہے جداں اسٹیبلشمنٹ بھٹو ہوراں خلاف کم کیتا سی اوس ویلے بھٹو ہوری پنجاب دے ہی لیڈر سن کہ انہاں نوں وزیراعظم پنجاب نے ہی بنایا سی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels