Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ’’ٹھیک‘‘ کجھ نہیں ہونا ہے!۔ نصرت جاوید

’’ٹھیک‘‘ کجھ نہیں ہونا ہے!۔ نصرت جاوید

وچار ڈیسک
July 11th, 2017

برگد دے سائے تلے اُگے پودے رْکھ نہیں بن سکدے۔ انہاں چوں کسی ’’متبادل‘‘ دا لبھنا حماقت جے۔ ’’جمہوریت بچان‘‘ دی فکر وچ مبتلا ساڈے کئی بقراط تے سقراط پر ایس حماقت دا ارتکاب کیتے چلے جارہے نیں۔ نواز شریف صاحب دا کوئی ’’آصف علی زرداری‘‘ وی نہیں ہے۔ انہاں نوں یوسف رضا گیلانی بنا کے کوئی راجہ پرویز اشرف لے آنا تے ’’وقت تے ہون والی‘‘ اگلی چوناں دی سکون نال تیاری کرنا ناممکن ہوجائے گا۔ غالب نے آکھیا سی ’’پاتے نہیں جب راہ ،تو چڑھ جاتے ہیں نالے‘‘ تے پارٹی تے ہلے شروع ہوئی ہے سگوں ہونی ہے۔ جس روز ایہہ کالم نوں ویکھوں گے ایس دن ریاست دے چھ اداریاں دے نمائندیاں تے مشتمل JIT نے اپنی رپورٹ پاکستان دی اعلی ترین عدالت نوں پیش کرنی ہے۔ساڈے بہوں سارے یار ایہہ امیداں لائے بیٹھے نیں کہ تفصیلاں وچ جائے بغیر اوس دیہاڑ نواز شریف نوں گھٹ و گھٹ یوسف رضا گیلانی ضرور بنادتا جائے گا۔ میں ہلے تک ساڈے ایتھے مبینہ طور تے موجود ’’آزادی صحافت‘‘ دے ایام شباب دی شناخت نہیں کرپایا واں۔ فیلڈ مارشل ایوب خان دے عہد وچ اکھ کھلی سی۔ زمانہ طالب علمی جنرل یحیی دی نذر ہویا تے کل وقتی صحافت دے راہیں رزق کمان دا طریقہ ضیاالحق دے دور وچ سکھیا سی۔ شاید سپ دا ڈسیا ہون دی وجہ توں رسی توں وی خوف کھاندا ہاں۔ ممکنہ عدالتی فیصلیاں تے قیاس آرائی صحافیانہ اعتبار توں غیر اخلاقی ہی نہیں، خلاف قنون وی تصور کردے ہوئے تے توہین عدالت دی جسارت کر ہی نہیں سکدا۔ جان دی امان پاندے ہوئے تاہم عرض اینا ضرور کرنا ہے کہ محض 10 جولائی دے روز ہی نواز شریف نوں یوسف رضا گیلانی بنانا ممکن نظر نہیں آرہیا۔ ہفتے دی شام چار وفاقی وزراء نے رل مل جو پریس کانفرنس کیتی ہے، ایس نے پیغام ایہو دتا ہے۔ انہاں چاراں وچ آکھیا جاندا ہے اک ممکنہ ’’متبادل‘‘ وی موجود سی۔ مینوں ایس خیال توں وی اتفاق نہیں ہے۔ ’’عشق‘‘ نوں جوانی درکار ہوندی ہے۔ ایہہ چاروں اپنی جوانیاں گزارن دے بعد وی بقولِ فیض کجھ عشق کیتا کجھ کم کیتا وچ مصروف رہے نیں۔ کامل یکسوئی توں اپنے اصل اہداف تے توجہ نہیں دے پائے۔ کجھ معاملات دے بارے وچ انہاں دا واویلا جے جائز وجوہات دی بنا تے سی۔ انہاں وجوہات نوں تسلیم کردئے ہوئے وی مینوں انہاں وفاقی وزراء نوں یاد صرف ایہہ دوانا ہے کہ انہاں دے وزیراعظم آئینی طور تے ایس ملک دے ’’چیف ایگزیکٹو اکھواندے ہوئے وی گریڈ 18 توں 20 دے افسراں تے مشتمل کمیٹی دے روبرو پیش ہوگئے سن۔ میاں صاحب نے وزیراعظم دے منصب تے برقرار رہندے ہوئے وی ایس کمیٹی دے روبرو پیش ہو کے در حقیقت پاکستان نوں 1950 دی دہائی وچ دھکیل دتا سی۔ اک مفلوج گورنر جنرل دا اوہ دور جداں سیاستدان ’’مسلم لیگی‘‘ ہوکے سُتے تے صبح اُٹھ کے ’’ریپبلکن‘‘ ہوجاندے سن۔ چودھری محمد علی وڈے زیرک بیورو کریٹ منے جاندے سن۔ پردے پچھے لُکیا کٹھ پتلیاں متعارف کروان تے انہاں نوں ہلان دے بعد تھیلے وچ واپس پاون والا افسر مگر سکندر مرزا سی۔ نسبی اعتبار توں میر جعفر دا ایہہ وارث برطانوی سامراج نے اپنی ’’پولیٹکل سروس‘‘ وچ ٹرین کردے ہوئے میجر جنرل دے عہدے تک پہنچا دتا سی۔ اک آرمی چیف جنرل ایوب خان نوں وزیر دفاع بنا کے کابینہ دارکن اسی مرزا نے بنایا سی۔ کابینہ وچ بیٹھ کے جنرل ایوب نے اقتدار دا کھیل خوب سمجھ لیتا تے آخر کار 1958 وچ ساڈے Savior دے طور تے نمودار ہوئے تے فیلڈ مارشل ہوگئے۔ ساڈے نوجواناں دی بے پناہ اکثریت دے محبوب عمران خان انہاں دی 1960 والی دہائی نوں پچھلے کجھ دناں توں مسلسل یاد کیتے چلے جارہے نیں۔ ایوب خان توں عمران خان دی ایس والہانہ عقیدت نے لوک کہندے نیں انہاں دے فرزند گوہر ایوب تے پوتے عمر ایوب نوں بہت متاثر کیتا ہے۔ انہاں دوناں دی پاکستان تحریک انصاف وچ رلت دا وقت ہویا جاندا ہے۔ گوہر ایوب خان پر 1977 دے انتخاب وچ اصغر خان دی تحریک استقلال وچ وی ہویا کردے سن۔ بھٹو مخالف تحریک دے ہنگام وچ ہری پور جیل وچ نظر بند وی رہے۔ بندہ بڑا ڈہین ہے۔ پاک فوج وچ کیپٹن ہویا کردے سن۔ اوتھوں استعفی دے کے کاروبار دا فیصلہ کیتا تے گندھارا موٹرز ورگی شاندار کمپنی بنا دتی۔ حسد دے مارے لوک گلاں بناندے تے فیلڈ مارشل بہت معصومیت نال سوال پچھدے نیں کیہ میرے پُتراں نوں ایس ملک وچ کاروبار دا حق وی نہیں ہے؟ دور پر اوہ سنہری سی۔ صحافت اج دے دناں ورگی بے باک نہیں سی تے پانامہ پیپرز وی منظر عام تے نہیں آئے سن۔ ہن پُتراں دے کاروبار دا حساب دینا ضروری ہوندا ہے۔ دس جولائی نوں ایس حساب دی پہلی قسط ساڈے سامنے آئے گی۔ پُتراں دے کجھ اعمال دی سزاواں شاید انہاں دے والد نوں وی ملے۔ ایہہ سوال پہلے اپنی تھاں موجود رہے گا کہ پانامہ دستاویزات وچ آئے باقی 399 ناواں دا کیہ ہویا۔ جیہناں لوکاں نے ایہہ گیم لائی ہے یقین کیتی بیٹھے نیں کہ برگد دا درخت ڈھگ گیا تے ایس دی لکڑی وڈھ کے گھر نوں لے جان دی خواہش وچ مصروف ہجوم نوں ایہہ 399 ناں بھل جان گے۔ وقت قبل از وقت انتخاباں ول ودھے گا۔ پاکستان تحریک انصاف دی ٹکٹ لے کے ایہہ انتخاب لڑن نوں ہر شخص دیوانہ ہو رہیا ہوئے گا۔ ایسے سادہ لوحاں نوں کرپشن توں بچان لئی تسلی ایہہ وی دتی جائے گی جداں آئے گا عمران تے سب ٹھیک ہوجائے گا۔ میرے منہ وچ ہلے توں ڈھیر ساری خاک، ’’ٹھیک‘‘ کجھ وی نہیں ہونا ہے۔ برگد ڈھگیا تے پودیاں نوں سایہ دار پھل دار درخت بنن تک بہوں وقت لگے گا۔ پودیاں دے درخت بنن تل چلچلاندی دھپ ہے، ساون دا حبس ہے سردی دی شدت ہے گل چل نکلی تے ایس نوں بہوں دور تک پہنچن لئی بہوں وقت لگے گا۔ ایتھوں تک دے پہنچن دے بعد مینوں اپنا قلم رکھ دینا چاہیدا ہے۔ اشارے، کنائے، تلمیحات تے استعارے آزادی صحافت دے مبینہ ایام شباب وچ مینوں ایسے خوف وچ مبتلا اذہان تے چھائے ہیولیاں نوں بے نقاب کردیندے نیں۔ تحریر وچ روانی نہیں ہوندی۔ ٹامک ٹوئیاں مارکر ڈنگ ٹپامے دی بچگانہ کوشش نظر آندی ہے۔ اپنا بھرم برقرار رکھن لئی تہانوں اجازت طلب کرنا ضروری ہے۔ کھل کے گل بات اک دن ضرور ہوئے گی۔ ذرا دس جولائی لنگ لین دیو۔

Nawa e Waqt


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels