Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> فساد دی جڑ دا کجھ بندوبست ہونا چاہیدا ہے۔ محمد حنیف

فساد دی جڑ دا کجھ بندوبست ہونا چاہیدا ہے۔ محمد حنیف

وچار ڈیسک
July 6th, 2017

ہلے کجھ ہفتے پہلے پاکستان دے مایہ ناز ادیب ندیم اسلم دا نواں ناول ’دی گولڈن لیجنڈ‘ پڑھیا۔ ناول دے آغاز وچ ہی لہور توں ملدے جلدے شہر وچ ریمنڈڈیوس ٹائپ اک امریکی اک شخص نوں گولی مار دیندا ہے۔ ہلاک ہون والا اک معروف آرکیٹیکٹ ہے۔ ایس دی بیوہ نرگس ہلے اس صدمے توں نڈھال ہے کہ اس دے گھر اک خفیہ ادارے دا افسر گھس آندا ہے تے کہندا ہے کہ عدالت وچ پیش ہوجاؤ تے امریکی نوں معاف کرو ورنہ۔۔۔۔
نرگس انکار کردی ہے تے افسر دھمکی دیندا ہے، پر نرگس فیر وی نہیں منیندی۔ افسر ایس دی اک پسندیدہ کتاب تے ایس دے مرحوم خاوند دی نشانی اوتے خنجر آزمائی کردا ہے۔ نرگس سمجھ جاندی ہے کہ افسر ایس توں بیان دوا کے رہے گا۔ اوہ اپنی اک لے پالک دھی نوں لے کے راتوں رات دوڑ جاندی ہے تے باقی ناول وچ مفرورہی رہندی ہے۔ انجام جاننا چاہندے ہو تے ناول خریدو تے پڑھو۔ جتھوں تک مینوں علم ہے ایہہ وٹس ایپ تے مفت دستیاب نہیں۔ جے ایس ناول وچ تہانوں اپنے دیس تے ایس دے ادریاں دی سچی جھلک نظر نہ آئے، جے ایس کہانی دی اندوہناک خوبصورتی نال تہاڈی اکھاں وچ بانی نہ آئے تے کتاب دی قیمت واپس کر وا داں گا۔ ہلے ایہہ ناول ختم ہی کیتا سی کہ ریمنڈڈیوس دی کتاب آگئی جو نہ پڑھی ہے، نہ پڑھاں گا۔ مینوں کرائے دے قاتلاں دے احساسات وچ کوئی دلچسپی نہیں ہے۔ کتاب وچ جو بریکنگ نیوز ہے اوہ دراصل پہلے اک امریکی صحافی دی کتاب وچ چھپ چکی ہے۔ میری صحافی برادری نوں وی اودوں پتہ چل گئی ہوئے گی کہ لہور وچ جداں عدالت وچ ریمنڈڈیوس دے ہتھوں مارے جان والیاں دے رشتہ دار واری واری آکے قصاص تے دیت دے قنون دے مطابق اپنے پیاریاں دا خون معاف کررہے سن تے آئی ایس آئی دے سربرہ جنرل پاشا کمرہ عدالت وچ بذات خود موجود سن تے امریکی سفیر نوں ٹیکسٹ میسیج کرکے پل پل دی کاروائی دی خبر دے رہے سن۔ جداں مریکی صحافی دی کتاب The way of the knife وچ ایہہ کہانی چھپی تے زیادہ تر صحافی بھائی، جنرل پاشا توں اینے فرینک نہیں ہوئے سن کہ انہاں دی گل کردے۔ ادارے دے سربراہ دا خوف جاندے جاندے جاندا ہے تے ہن کافی وقت گزر چکیا ہے ایس لئی سب جنرل پاشا دا ناں لے کے ماتم کررہے نیں کہ ہائے ہائے ویکھو کس طراں اساڈے بھراواں دے قاتلاں نوں عزت دتی گئی۔ ساڈی خود مختاری دی چادر اک وار فیر تار تار ہوئی۔ انہاں موسمی مرثیہ نویساں نوں کدی ایہہ توفیق نہیں ہوئی کہ عدالت وچ پیش ہو کے اپنے بچیاں دے قاتل نوں معاف کرن والے لواحقین توں پچھن کہ بھائی تُہاڈے نال کسی زور زبردستی تے نہیں کیتی، کیہ جنرل پاشا خود تہاڈے گھر چل کے آئے سن یا کسی ماتحت افسر نوں گھلیا گیا؟ کیہ ایس نے تہانوں قصاص تے دیت دی شرعی حیثیت دے بارے وچ سمجھایا سی کہ کیہ وسیع ترمفاد دا واسطہ دتا سی تے دسیا سی کہ اسی اپنے دوست ورگے بھراء امریکہ نوں ناراض نہیں کرسکدے۔ یا سیدھا سدھا ایہہ آکھیا کہ عدالت وچ پیش ہوکے ریمنڈ ڈیوس نوں معاف کرو ورنہ؟؟؟
ہور تے ہور کسی نے لواحقین توں مڑ کے ایہہ وی نہ پُچھیا کہ جیہناں کڑوڑاں دا عدالت وچ وعدہ کیتا گیا سی اوہ ملے یا نہیں؟ مینوں ندیم اسلم دا ناول بہت خوبصورت پر بہت بھیانک وی لگا سی۔ پر زندگی ندیم اسلم دا ناول نہیں ہے۔ ایہہ ایس توں وی زیادہ بھیانک ہے۔ ایس وچ کسی کردار نوں ادارے توں آئے ہوئے افسر دے سامنے جرات انکار نہیں ہے۔ سب نے سر تسلیم خم کیتا تے فیر منظر توں اینج غائب ہوگئے جس طراں اوہ زندہ ہی نہ سن۔ باقی رہی ایہہ بحث کہ کیہ جنرل پاشا نوں عدالت وچ موجود ہون دی ضرورت سی یا نہیں تے ایہہ نرا قصہ پاون لئی ہے یا ٹیلی ویژن تے بیڑیاں دی لڑائی جاری رکھن دا بہانہ۔ آئی ایس آئی کوئی ایدھی فاؤنڈیشن نہیں ہے کہ لاچاراں دی مدد کرے گا، ایہہ ملکی سلامتی دے نازک تے مشکل فیصلیاں تے عمل درآمد کردی ہے۔ جداں ایہو جہے فیصلیاں تے عمل درآمد کرن لئی کوئی وڈا ڈرامہ سٹیج کرنا پئے تے ڈائریکٹر دا آپ اوس تھاں تے ہونا لوڑی دا ہے۔ میں پاکستان دے عظیم تھیٹر ڈائریکٹرضیا محی الدین نوں ویکھیا ہے کہ اپنے ڈائریکٹ کیتے ہوئے ڈرامے دے دوران اکثر آخری نشستاں تے بیٹھ کہ ڈرامہ ویکھدے سن۔ میں سوچدا سی پئی کیوں ؟ ریہرسل ہوچکی ،ڈرامے دے دوران ضیا صاحب ہدایتاں وی نہیں دے سکدے تے کیوں ہر پرفارمنس وچ موجود ہوندے نیں؟
اک سیانے بھراء سمجھایا کہ ایس لئی پئی اداکاراں نوں پتہ ہوندا ہے کہ ضیا صاحب ہال وچ موجود نیں، اک اک حرکت ویکھ رہے نیں۔ جے کوئی چوک ہوئی تے ضیا صاحب ایسی دی کلاس لین گے کہ ساری ایکٹنگ بھل جائے گی۔ ہن جنرل پاشا ضیا محی الدین دے پائے دے ڈائریکٹر تے کدی نہ بن پائے پر اپنی ذاتی موجودگی نال انہاں نے ایہہ گل یقینی بنائی کہ ڈرامے دے دوران سارے ایکٹر سکرپٹ تے قائم رہن۔ جنرل پاشا دے خیر خواہ انہاں نوں مشورہ رہے نیں کہ اوہ میڈیا تے آکے اپنی صفائی پیش کرن۔ انہاں نوں ایسا ہر گز نہیں کرنا چاہندا۔ جداں ادارے دے سابق سربراہ ٹی وی تے آندے نیں تے انہاں دا رہیا سہیا دبدبہ وی ختم ہوجاندا ہے۔ ادارے دے اک سابق سربراہ جاوید ناصر نے ایہہ حل کڈھیا کہ اوہ کدی کدھار ٹی وی تے آندے سن پر شکل نہیں وکھاندے سن بس اک نورانی جیہاہیولہ نظر آندا سی۔ اک پرانے انٹرویو وچ اوہ کہندے پائے گئے کہ اسامہ دا سارا قصہ ایس لئی شروع ہویا کہ سعودی عرب وچ امریکی اڈیاں تے ننگی کُڑیاں نیکراں وچ گھمدیاں سن۔ ایہو جہیاں گلاں سن کے کمزور ایمان والیاں دا دل ویسے ہی دہل جاندا ہے تے دل نال ایہو دعا نکلدی ہے کہ ہن چونکہ ساڈے سابق سپہ سالار سعودی عرب وچ نیں تے انہاں نے امہ دی کمان سنبھال لتی ہے تے انہاں دی پہلی ترجیع ایہہ ہونی چاہیدی ہے کہ فساد دی جڑ، انہاں بے لباس کُڑیاں لئی کجھ عبایا وغیرہ دا بندوبست کرن۔
ایہہ آٹیکل بی بی سی تے چھپیا جے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels