Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> آئی سی ایس تے اردو۔(کراچی دے غریباں نوں ماموں بناون دی کہانی)

آئی سی ایس تے اردو۔(کراچی دے غریباں نوں ماموں بناون دی کہانی)

امر جلیل۔پنجابی روپ۔وچار
June 29th, 2017

ایہہ آرٹیکل پڑھ کے تہانوں لگ پتہ جائے گا کہ ماڑا تے غریب ہر تھاں کنج بدھو بنایا جاندا ہے، کدی زبان، کدی قوم پرستی، کدی مذہب، کدی فرقہ۔حیران نہ ہونا، جو کوڑ بیانیہ کراچی دے ماڑیاں نوں بدھو بناون لئی آئی سی ایس افسراں پاکستان بنن بعدوں بنایا سی اوسے نوں اج تیک ایم کیو ایم چلا رہی ہے۔تساں ہن امر جلیل دی لکھت پڑھو جس دے پہلے حصہ دا لنک اخیر وچ دتا جا رہیا ہے۔

بٹوارے بعدوں ہندوستان وچ اردو تے تِن وڈے الزام لگے۔ پہلا ایہہ کہ اردو ہندوستان دے بٹوارے دی زبان ہے۔ دوجہ ایہہ کہ اردو اک اسلامی زبان ہے۔ تِیجا ایہہ کہ اردو مسلماناں دی زبان ہے۔ انہاں الزاماں پاروں اردونوں بٹوارے دے بعد ہندوستان وچ پندرہ 20 سال بڑی تکلیف وچ ہنڈھانے پئے۔ بٹوارے دے بعد سرحد دے ایس پار پاکستان وچ تے دوجے بنے ہندوستان وچ اْردو تے لائے گئے الزاماں نوں فخریہ قبولیا گیا تے ایس نوں پھیلایا وی گیا۔ یعنی ہندوستان وچ اردو تے لائے گئے الزاماں نوں فخریہ قبولیا گیا تے پورے پاکستان وچ فروغ دتا گیا۔ تصدیقی طور تے ایس گل دی تشریح کیتی گئی کہ ایتھے اردو مسلماناں دی زبان ہے۔ لہٰذا اردو اسلامی زبان ہے تے ایہہ کہ اردو دی وجہ نال پاکستان وجود وچ آیاسی۔ ایتھوں تک کہ ببانگ دہل آکھیا گیا کہ اردو بولن والیاں نے پاکستان بنایا ہے۔ ایہہ گلاں پاکستان دے ابتدائی سالاں وچ حیران کن لگدیاں سن۔ پاکستان سیاسی، سماجی، اقتصادی، معاشی، مالی تے انتظامی مسلیاں تے بحراناں وچ گھریا ہویا سی۔ ایس وچ زبان دے معاملے نوں ودھا چڑھا کے پیش کرنا پاکستان لئی چنگا ثابت نہیں ہویا۔ ایس پاروں ملک وچ بے چینی جہی پھیل گئی۔ ہندوستان توں آئی ہوئی بیورو کریسی جیہناں وچ آئی سی ایس یعنی انڈین سول سروس دے لوگ شامل سن، پاکستان دے مسلیاں نوں نو پچھے پا کے اردو دا ماما بن کے زباناں دا معاملہ کیوں لے کے بیٹھی؟ ایہہ گل فہم فراستاں تے سمجھ توں باہر دی گل لگدی ہے۔ جے ایس معمہ نوں سمجھن دی کوشش کیتی جائے تے بڑے ہی کوڑے حقائق سامنے آندے نیں۔ بہتر ہے کہ اسی ایس معاملے دی تریخی پس منظر وچ چھان بین کرئیے۔ ہندوستان دے انگریز حکمراناں نے جدوں اصولی طور تے قائد اعظم دے دلائل قبول کردے ہوئے ہندوستان دے بٹوارے تے مسلماناں لئی اک وکھ وطن دی ہامی بھر لتی سی تے فیر ہندوستان وچ مذہب دے در پردہ سلگن والی چنگاری آتش نمرود بن کے بھڑک اٹھی سی۔ آل انڈیا مسلم لیگ دے لیڈران دا ایہہ کہنا کہ انہاں نوں اندازہ نہیں سی کہ ہندوستان دے بٹوارے دی گل طے ہوندے ہی ملک بھر وچ دنگیاں دی اگ بھڑک اٹھے گی، انہاں لیڈران دی گل کھسیانی بلی کھمبا نوچے والی گل لگدی ہے۔ سگوں آل انڈیا مسلم لیگ دی ایہہ گل انہاں دے سیاسی تے سماجی گھاٹیاں یا سیاسی سماجی گھٹ بصیرتاں دا ثبوت دیندی ہے۔ انگریز نے ہندوستان تے اینج ہی قبضہ کیتا سی جس طراں انگریز توں پہلے اسی مسلماناں نے ہندوستان تے قبضہ کیتا سی۔ ہندوستان انگریزاں دا موروثی ملک نہیں سی۔ ہندوستان صدیاں توں ہندواں دا ملک سی۔ انہاں دا ملک دا بٹوارہ ہون جارہا سی۔ لوک اک انچ زمین لئی سالہ سال آپس وچ قنونی تے غیر قنونی لڑائیاں لڑدے رہندے نیں۔ ایہہ تے اک ملک دا بٹوارہ ہون جارہیا سی! فساد،دنگے تے ہونے ہی سن۔ فساد ہوئے تے ایسے وحشی دنگے ہوئے کہ دنیا ہیرو شیما تے ناگا ساکی تے دوسال پہلے سَٹے گئے ایٹم بماں دی تباہ کاریاں بھُل بیٹھی تے سکتہ وچ آگئی۔ ایس وقت پاکستان وچ موج مستیاں کرن والے سوچ وی نہیں سکدے کہ ستر سال پہلے برصغیر تے کیسی قیامتاں آئیاں سن۔ ہندوستان توں پاکستان آن والیاں وچ بہت وڈی گنتری انہاں تھاواں توں آئی سی جتھے دنگے ہوئے سن۔ اوہ زیادہ تر غریب سن، ان پڑھ سن۔ محنت کر کے روزی روٹی کما کے کھان والے سن۔ اوہ اوکڑاں برداشت کریندے ہوئے پیدل، بیل گڈیاں، کھچا کھچ بھریاں ہوئیاں بساں تے ریل گڈیاں دی چھتاں تے سفر کردے ہوئے پاکستان اپڑے سن۔ دولت مند، سرمایہ دار، سیاسی اثر و رسوخ رکھن والے تے پانی دے جہازاں تے ہوائی جہازاں وچ چڑھ کے پاکستان آئے سن۔ پاکستان تے حکومت کرن والے سیاست دان چارٹرڈ جہازاں تے پاکستان پہنچے سن۔ اوہ چنیدہ بیورو کریٹاں تے انڈین سول سروس یعنی آئی سی ایس افسراں نوں اپنے نال لے آئے سن۔ آل انڈیا مسلم لیگ دے سیاست داناں، بیوروکریٹاں تے آئی سی ایس افسراں وچ زیادہ تر ایسے لوک رلتی سن جنہاں نے ہندوستان دا ایہہ حصہ جس تے پاکستان بنیا سی، پہلے کدی نہیں ویکھیا سی۔ اوہ لوگ ایتھوں دے اصلی واسیاں دی رہتل، رسماں رواجاں تے زباناں دے جانونہیں سن۔ سیاست دان تے بیورو کریٹس کراچی ویکھ کے حیران ہوگئے سن۔ سیاست داناں سنے لیاقت علی خان نے قائد اعظم نوں مشورہ دتا سی کہ کراچی نوں عارضی دے تھاں مرکزی حکومت دا مستقل دارالحکومت بنادتا جائے تے سندھ حکومت لئی ٹھٹھہ یا حیدرآباد وچ صوبائی مرکز بنا دتا جائے۔ میں تہانوں دستاویزی گل سنا رہیا ہاں۔ انہاں دناں وچ مرکزی حکومت دے اجلاس وغیرہ سندھ اسمبلی وچ ہوندے سن۔ سندھ حکومت دی اسمبلی تے دفتراں لئی این جے وی گورنمنٹ ہائی سکول کراچی دا تِیجا فلور یعنی تِیجی منزل دتی گئی سی۔ انہاں دناں وچ ایہہ فقیر این جے وی ہائی سکول وچ طالب علم سی۔ سندھ حکومت نوں ٹھٹھہ یا حیدرآباد منتقل کرن دی گل جدوں سندھ اسمبلی دے ایواناں تک پہنچی تے فیر سندھ اسمبلی وچ وڈی جذباتی تے گرما گرم بحث چلی سی۔ کجھ ارکان سندھ اسمبلی نے ایتھوں تک کہہ دتا سی کہ جے سانوں پتہ ہوندا کہ پاکستان بنن دے بعد سندھ دا سِر یعنی کراچی شہر کٹ کے سندھ توں الگ کر دتا جائے گا تے اسی پاکستان دے حق وچ کدی ووٹ نہ دیندے۔ ایہہ دستاویزی تے تحریری گلاں نیں تے سندھ اسمبلی دے پروسیڈنگ فائلز وچ موجود نیں۔ بہرحال قائد اعظم نے مشورہ قبول کرن توں انکار کر دتا سی۔ دھونس جمانا بیورو کریٹاں دی پرانی عادت ہے۔ ہندوستان توں آئے ہوئے افسر اہم عہدیاں تے جا لگے۔ سارے مسلیاں توں لوکاں دی توجہ ہٹان لئی انہاں نے سیاست داناں دے گٹھ جوڑ نال افواہاں دا جال وچھا دتا۔ بے بس پاکستانی افواہاں دے جال وچ پھسدے گئے۔ کجھ ایس طراں دی افواہاں اڑائیاں گئیاں سن، مثلاً پاکستان نازک ترین دور توں لنگھ رہیا ہے۔ ہندوستان ہر حیلے توں پاکستان توڑن تے لگیا ہے۔ اسلام خطرے وچ ہے۔ فسادات دی اگ دا دریا پار کر کے پاکستان پہنچن والے مسکین، مجبور تے بے بس کراچی دے چپے چپے تے کیمپاں وچ پئے ہوئے سن۔ انہاں وچ زیادہ تر لوک غریب تے ان پڑھ سن۔ بیورو کریسی نے انہاں نوں ایہہ کہہ کے بلکہ یقین دواکے ہمیش دے لئی خموش تے خش کر دتا کہ تُسی لوک پاکستان دے والی ہو۔ تُسی ایس ملک دے بانی ہو۔ تہاڈی بے مثال قربانیاں دی وجہ توں پاکستان وجود وچ آیا ہے۔ انہاں دی فلاح تے بہبود دی بجائے آئی سی ایس دے افسران نے سیاست داناں دے نال رل کے کراچی وچ ارباں دی متروکہ املاک آپس وچ ونڈنا شروع کردتی۔
Part 1
http://www.wichaar.com/news/119/ARTICLE/33184/2017-06-19.html
Refrence Daily Jang


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels