Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> جو فیصلہ ہونا ہے، اوہ اسی سب جاندے ہاں۔نصرت جاوید

جو فیصلہ ہونا ہے، اوہ اسی سب جاندے ہاں۔نصرت جاوید

وچار ڈیسک
June 27th, 2017

ربّ کریم توں میری فریاد ہے کہ عیدالفظر دے فوری بعد Whatsappدی سہولت پاروں بنی 6 ریاستی اداریاں تے مشتمل تحقیقاتی کمیٹی، سپریم کورٹ دے دتے 60دناں وچ ہی اپنا کم مکمل کر لے۔ ’’جرائم پیشہ‘‘ شریف خاندان اپنے ’’گاڈفادر‘‘ سمیت عبرت دا نشان بنے۔ انصاف دا بول بالا ہوئے تے شریف خاندان دے زوال توں سبق سکھ کے اساڈی اشرافیہ رزقِ حلال کمان دا چلن اختیار کرن تے مجبور ہوجائے۔
شریف خاندان توں نجات پان دے بعد ساڈے ملک وچ جمہوریت تے ادارے جدوں مضبوط ہوجان گے تے بحیثیتِ قوم سانوں اہم ترین فیصلے کرن دی ہمت وی ہوجائے گی۔ ایس ضمن وچ فوری توجہ افغانستان تے مبذول کرنا ہوئے گی جتھے نومنتخب امریکی صدر 4000 مزید فوجیاں نوں گھل کے ایس جنگ نوں جتن دی تیاری کر رہیا ہے جو ایس دا ملک نائن الیون دے بعد توں ہن تک ارباں ڈالر تے ہزاراں جاناں دے کے وی مکا نہیں پایا ہے۔
’’دریافت‘‘ ٹرمپ نے بالآخر ایہہ کیتا ہے کہ افغانستان وچ ایس دی اوکڑاں دا اصل ذمہ وار کوئی ’’حقانی‘‘ نامی نیٹ ورک ہے۔ ایس دے لوک ہورے،پاکستان وچ لُکے ہوئے دسے گئے نیں۔ ساڈے انٹیلی جنس ادارے انہاں لوکاں دا سراغ نہیں لگا پاندے کیونجے اوہ ’’ضربِ عضب‘‘ تے ہن ’’ردالفساد‘‘ دے عنوان دے تحت چلائے آپریشنز دے ذریعے پاکستان وچ مذہب دے نام تے پھیلائی دہشت گردی توں نبڑن وچ رجھے ہوئے نیں۔ امریکہ نوں ڈرون طیاریاں تے Human Intelوغیرہ دے ذریعے حقانی نیٹ ورک دے لوکاں دا اپنے تئیں پتہ چلانا ہوئے گا۔
کیونجے امریکہ نوں افغانستان دا قضیہ حل کرن لئی اپنی مدد آپ ہی کرنا ہوئے گی ایس لئی پاکستان نوں Coalition Supportدے ناں تے جو رقماں دتیاں جاندیاں سن، ہن دستیاب نہیں ہون گئیاں۔ ساڈی ریاست نوں پر ایس بارے فکر مند ہون دی لوڑ نہیں۔ ایس ملک وچ ’’ٹیکس چوراں‘‘ دی اْگڑی علامت سمجھیا جاون والا شریف خاندان اپنے انجام نوں پہنچ گیا تے ایس دے بعد ساڈے صنعت کار تے کاروباری افراد(سیٹھ) اپنے کھاتے دا ٹیکس ، اپنے آپ ریاستی خزانے وچ جمع کروانا شروع ہوجان گے۔ ویسے وی چین جو کہ اپنا یار ہے تے جس تے جان وی نثار ہے 50ارب ڈالر دی خطیر رقم توں کاشغر نوں گوادر دے نال اک جدید ترین شاہراہ دی تعمیر دے ذریعے ملان لئی دن رات اک کر رہیا ہے۔ ایس شاہراہ دے دوناں پاسے فی الوقت بجلی پیدا کرن والے کارخانے وی بہت تیزی دے نال کھڑے کیتے جارہے نیں۔ بجلی وادھو تے تسلسل دے نال مہیا ہونا شروع ہوگئی تے ساڈے ایتھے ملکی تے غیر ملکی منڈیاں وچ پہنچن لئی مال وی تیار ہونا شروع ہوجا سی۔ انہاں دی تیاری لئی مزدوراں دی ضرورت بیروزگاری دے خاتمے وچ آسانیاں پیدا کرے گی۔
نواز شریف دے تیجی وار ایس ملک دے وزیر اعظم بنن دے بعد توں ساڈی برآمداں وچ خطرناک حد تک کمی دا رجحان وی ختم ہون دا ناں نہیں لے رہیا۔ برآمدای شئیواں وچ مسلسل گھاٹیاں پاروں ساڈے زرمبادلہ دا خزینہ ودھ نہیں رہیا۔ برآمداں وچ مسلسل گھاٹیاں توں اڈ پچھلے دو سالاں توں انہاں رقماں وچ وی مسلسل کمی ویکھن وچ آرہی ہے جو غیر ملکاں وچ رہندے پاکستانی مزدور اپنے رشتے داراں نوں گھلدے سن۔ برآمداں دے ذریعے کمائی دے بعد غیر ملکاں توں آئی ایہہ رقماں پاکستان وچ معاشی رونقاں لیاون وچ اہم کردار ادا کردیاں نیں۔
پریشانی دی گل ایہہ وی ہے کہ پاکستان دے غیر ملکاں وچ محنت مزدوری دے ذریعے پیسہ کماکے اپنے عزیزاں نوں گھلن والیاں دی سب توں زیادہ تعداد سعودی عرب تے متحدہ عرب امارات وچ وسدی ہے۔ ایہہ دونویں ملک انہاں دناں تیل دی قیمت وچ مسلسل کمی پاروں معاشی اوکڑان دا شکار نیں۔ معاشی اوکڑاں نے خاص طور تے سعودی عرب نوں سب توں زیادہ متاثر کیتا ہے۔ اسی لئی اوتھوں دے شاہ سلیمان نے اپنے لاڈلے پُتر محمد بن سلمان نوں ہن اپنا ولی عہد مقرر کردتا ہے۔
31سالہ ولی عہد 2030 تک اپنے ملک نوں محض تیل دی دولت تے انحصار توں نجات دلانا چاہ رہے نیں۔ایس ہدف نوں حاصل کرن لئی انہاں کئی ماہراں نال طویل مشاورتاں بعدوں اک طویل المدتی منصوبہ وی بنارکھیا ہے۔ ایس منصوبے دی بدولت سعودی عرب وچ غیر ملکی سرمایہ کاری نوں فرو غ دین دے اقدامات چکے جان گے۔ عالمی سرمایہ کاراں نوں محمد بن سلمان دے بنائے منصوبے تے بہت اعتماد ہے۔ اسی لئی بدھ دی صبح جدوں انہاں دے ولی عہد دا اعلان ہویا تے دنیا بھر دی سٹاک مارکیٹس وچ تیزی دا رجحان نظر آیا۔
ہر حوالے نال بہت ہی بااختیار تے ا پنے اہداف نوں عجلت وچ حاصل کرن دی لگن وچ مبتلا محمد بن سلمان نوں پر یقین ہے کہ ایران، شام ، یمن تے بحرین ورگے ملکاں وچ مسلکی بنیاداں تے تخریب کاری دی سرپرستی کردے ہوئے سعودی عرب نوں اپنی معاشی ترقی دے ہدف تے توجہ مرکوز کرن نہیں دے رہیا۔ انہاں دی نظر وچ Enoughہن Enoughہوچکیا ہے۔ایران نوں اپنا رویہ ہر صورت تبدیل کرنا ہوئے گا۔
ایران نوں ایس خطے وچ تنہا کرن دی خاطر ہی محمد بن سلیمان دی ہلا شیری تے قطر دے بائیکاٹ دا اعلان ہویا ہے۔ہن پاکستان ورگے ملکاں توں آکھیا جا رہیا ہے کہ اوہ فیصلہ کرے کہ اوہ سعودی عرب دے ساتھ نال ہے یا قطر دے نال۔ اینج جاپدا ہے کہ اک قطری شہزادے دے خط دی بنیاد تے اپنا سیاسی وجود برقرار رکھن دی فکر وچ مبتلا نواز شریف دے لئی ایس ضمن وچ فیصلہ کرنا یقیناًبہت مشکل ہے۔ ایہہ فیصلہ وی پاکستان وچ ’’کسی ہور‘‘ ہی نوں کرنا ہوئے گا۔ شاید اسی ادارے نوں جس نے افغانستان نوں روس توں آزاد کروایا سی اتے ایس ملک نوں کمیونزم دے فروغ دا مرکز نہیں بنن دتا سی۔
ایس ادارے دی سعودی عرب تے قطر دے درمیان جھگڑے دے بارے وچ کیہ سوچ ہے ایس دی سانوں خبر نہیں۔ اگرچہ ایس ادارے دے حال ہی وچ ریٹائر ہوئے سربراہ جنہاں نوں اسی مزید کجھ عرصے تک اپنے عہدے تے فائز ویکھنا چاہ رہے ساں، انہاں دناں سعودی عرب وچ مقیم نیں۔
حال ہی وچ امریکی صدر ٹرمپ جدوں 50 مسلمان ملکاں نوں اسلام تے دہشت گردی دے بارے وچ اپنے فرمودات سنان سعودی عرب تشریف لے گئے سن تے اپنے ایس ملک وچ قیام دے دوران انہاں نے مسلم اْمہ دی واحد ایٹمی قوت ،پاکستان دے تیجی وار منتخب ہوئے وزیر اعظم نال ملاقات دی ضرورت ہی محسوس نہیں کیتی سی۔
ٹرمپ دے داماد،جو مشرقِ وسطیٰ دے بارے وچ امریکی فیصلہ سازی دے حوالے توں حرفِ آخر سمجھے جاندے نیں،البتہ اک میز تے محمد بن سلمان تے ساڈے راحیل شریف دے نال بیٹھے ہوئے سن۔ راحیل شریف صاحب دی ایس میز تے دو انتہائی طاقت ور لوکاں دے نال موجودگی نال اسی عام پاکستانیاں نوں خیر دی امید رکھنا چاہیدی ہے۔ شاید ایس دی وجہ توں ساڈی ریاست دے دائمی اداریاں نوں وی مشرقِ وسطیٰ دے بارے وچ پکی پالیسی بنان وچ آسانی ہوئے گی۔سعودی عرب وچ مقیم لکھاں پاکستانی مزدوراں دا روزگار بچان تے انہاں ولوں اپنے عزیزاں دی کفالت لئی گھلی جان والی رقماں دی ترسیل نوں یقینی بنان لئی جو فیصلہ کرنا ضروری ہے ایس نوں سمجھن لئی سانوں آکسفورڈ یا ہارورڈ یونیورسٹی توں ڈگری لین دی لوڑ نہیں۔ جو فیصلہ ہونا ہے اوہ اسی سب جاندے ہاں، صرف ایس دا اعلان ہونا باقی ہے۔ JIT جے اپنا فریضہ 60دناں ہی وچ سرانجام دے لے تے ایس فیصلے دا اعلان وی آسانی نال ہوجائے گا۔ ایس وقت تک تُسی عیدالفطر نوں مناسب انداز وچ اپنے خاندان دے نال منان دی تیاری شروع کرو۔

ایہہ آرٹیکل عید توں پہلاں نوائے وقت وچ چھپیا سی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels