Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ارائیں بچے دا دل وحشی ہوگیا

ارائیں بچے دا دل وحشی ہوگیا

محمد حنیف
June 18th, 2017

کسی دھندے دے بند ہون دا کیہ ماتم کرنا۔ اک بند ہوندا ہے تے دس کھل جاندے نیں۔ لہور دی قدیم تے سب توں وڈی کتاباں دی دکان فیروز سنز بک شاپ ،الفلاح بلڈنگ مال روڈ نال جڑی، ایس سال دے شروع وچ بند ہوئی تے زندہ دلان لہور دی زندہ دلی وچ کوئی فرق نہیں آیا۔ جنہاں نے کتاباں دے ایس خزینے تے شٹر ڈگدے تے کرائے لئی خالی دا بورڈ لگا ویکھیا اوہناں نے وی ایہو سوچیا ہوئے گا کہ اخیر دو کنال تے پھیلی ایس دکان دی لوڑ ہی کیہ سی۔ میں متفق ہاں۔ لہور وچs Reading تے World Last The ورگے جدید کتاب گھر وی موجود نیں۔ فیروز سنز دی وی شہر وچ ہور شاخاں نیں، اوتھوں خریدو تے آن لائن آرڈر کر لو، کتھوں ڈاؤن لوڈ کر لو۔ ویسے وی کتاباں پڑھن نال ایس ملک داکیہڑا مسئلہ اج تک حل ہویا ہے؟ جنے پیسیاں دی کتاب آندی ہے اینے وچ فوڈ سٹریٹ تے دو بندے رل کے کڑاہی کھا سکدے نیں۔ پر کیہ کیتا جائے کہ میری فیروز سنز بک شاپ توں اک حسین تے کسی حد تک شرمناک یاد وابستہ ہے۔دکان بند ہون دا سنیا تے یاداں دا دریچہ کھل گیا۔ یاد رہے کہ اعلیٰ تعلیم لئی لہور آن والے کئی بچیاں دی طراں ساڈی پرورش وی ایسے ماحول وچ ہوئی سی جتھے ایہہ سمجھایا جاندا سی کہ گھر وچ اک کتابِ مقدس موجود ہے تے کسی ہور کتاب دی کیہ ضرورت ہے۔ والدین دا خیال سی کہ جفاکش ارائیں بچیاں دا کردار کہانیاں دی کتاباں پڑھ کے خراب ہو سکدا ہے۔ ایس لئی کتاباں دی دکان وچ سال وچ صرف اک وار جانا ہوندا سی۔ اوکاڑہ دے مرکز وچ واقع مقدر بک شاپ بہت وڈی لگدی سی۔ پر صرف سلیبس دی کتاباں خریدی جاندیاں سن تے اردو دی کتاب پہلے ہی دن چٹ لیتی جاندی سی۔ باقی سال کسی مہمان دے رہ جان والے ڈائجسٹ، کسی محلے دار دے گھر پئے پرانے اخبار یا پِنڈ دے ڈاکٹر دے کول آن والے فیملی پلاننگ دے رسالے 'سکھی گھر' توں ’’ہوس‘‘ پوری کیتی جاندی سی۔ ایس ماحول توں نکل کے جدوں پہلی دفعہ لہور دی فیروز سنز بک شاپ وچ داخل ہویا تے اپنی حالت اوہی ہوئی جیہڑی منٹو دے اک پینڈو کردار دی لہور دے بازار حسن وچ جاکے ہوندی ہے۔ یااللہ، اینی کتاباں، اینے رنگ برنگے ناول، شاعری دا سیکشن، تریخ دی کتاباں، آپ بیتیاں، اوتوں اینا ٹھنڈا ماحول، اوچی چھت نال لگے بہت تھلے تک ٹنگے پکھے، کتاب چکو، کجھ صفحے پڑھو تے واپس رکھ دو، کوئی پوچھن والا نہیں کہ خریدو گے وی یا مفت ہی چسکے لیندے رہو گے۔ جیب وچ پیسے گھٹ ہوندے سن، کسان گھرانے دی تربیت نے وی ایہو سکھایا سی کہ کتاب خریدنا فضول خرچی ہے ایس لئی مفتے وچ کتاباں پڑھن دی کچھ عادت جہی پئے گئی سی۔ کالج دے ہاسٹل وچ وی چھوٹے وڈے شہراں توں منڈے آئے سن جنہاں نوں لہور وچ کوئی نہیں جاندا سی، زندا دلان نال ذرا خوف وی آندا سی۔ ایس وچ اسی اپنے پینڈو پن نوں لُکان لئی تے شہری بچیاں نوں امپریس کرن لئی کسی کتاب یا رسالے نوں ڈھال بنائے رکھدے سن۔ فیصل آباد توں آئے ہوئے اک شہری بچے نے آکھیا ایہہ تُسی ہر وقت پڑھدے رہندے ہو، مینوں وی پڑھنا ہے پر مینوں نہیں پتہ کہ کیہڑی کتاباں پڑھنیاں چاہیدِیاں نیں۔ میں آکھیا فیروز سنز چلدے ہاں۔ دل وچ لالچ دی اک لہرجہی اٹھی تے پچھیا کہ کینیاں کتاباں خریدو گے؟ ایس نے آکھیا ست اَٹھ۔ میں دل وچ آکھیا خریدے گا تے ہور پڑھاں گا میں۔ بس جی، اینج لالچ وچ رجھے ارائیں بچے دا دل وحشی ہوگیا تے ایسی ایسی کتاباں خریدیاں جنہاں دا صرف ناں سُنیا سی۔ سکول وچ علامہ اقبال دی نظماں دا رٹا لاندے آئے ساں تے بال جبریل خریدنی ہی سی۔ فیض دا ناں سُنیاسی ایہہ سمجھ نہ آیا کہ کتاب دا ناں دستِ صبا کیوں ہے۔ کیہ ہوادے وی ہتھ ہوندے نیں؟ علی پور دا ایلی سکول دی لائبریری وچ ویکھی تے سی پر چھون دی اجازت نہیں سی، خرید لتی۔ کرنل محمد خان دی بجنگ آمد دا اک چیپٹر پڑھیا سی پوری کتاب چُک لتی۔ حالت اوہی سی جیہڑی الف لیلیٰ دی کہانی وچ ایس بچے دی ہوندی ہے جیہڑا بازاروچ جاندا ہے تے مٹھائی دی ساری دکاناں کھلی پر دکاندار غائب۔ ایس خزینے نوں سمیٹ کے ہاسٹل واپس آیا تے دل وچ پلان بناندا رہیا کہ پہلے کیہڑی پڑھاں گا۔ نال و نال دل وچ تھوڑی ندامتاں وی کہ نویں نویں دوستی دا فیدہ چکیا جا رہیا ہے۔ ہاسٹل پہنچ کے نویں دوست نے آکھیا ایہہ ساریاں کتاباں تہاڈیاں ہی نیں، برتھ ڈے پریزینٹ۔ میں پچھیا کیہڑی برتھ ڈے۔ ساڈے پِنڈ وچ کتاب دے علاوہ برتھ ڈے نوں وی بدعت سمجھیا جاندا سی تے ساڈا خیال سی کہ ایہہ چیز کوئی فلماں وچ ہوندی ہے۔ جتھے وحید مراد بیٹھ کے پیانوو بجاندا ہے تے اوہ گانا گاندا ہے۔ نویں دوست نے آکھیا میں تہاڈے سٹوڈنٹ کارڈ تے ویکھیا ہے اج تہاڈی تریخ پیدایش ہے۔ ندامت، قہقہے وچ بدل گئی تے میں شہری بابو نوں سمجھایا کہ پِنڈ وچ تریخ پیدائش نوں سنجیدگی نال نہیں لتاجاندا۔ جس دن بچے نوں سکول داخل کران جاندے نیں استاد پنچ سال پِچھے کر کے اسی دن دی تریخ پادیندا ہے۔ جس دن سکول وچ ساڈا داخلہ ہویا ماسٹر صاحب نے پنچ سال پِچھے کر کے یکم اپریل پا دتی۔ ساڈے والدین نوں اپریل فول دا علم نہیں سی۔ ماسٹر صاحب دے بارے میں اج وی یقین نال نہیں کہہ سکدا۔ ساڈا خیال ہے کہ کتاباں پڑھن نال یقیناً انسان بہتر نہیں ہوندا۔ زندگی وچ ذاتی لائبریریاں والے درندہ صفت وی ویکھے نیں تے چِٹے ان پڑھ وی۔ پرہن وی کتاب نوں صدقہ جاریہ سمجھدا ہاں تے کوئی بہت چنگی کتاب پڑھاں تے کسی نویں یا پرانے دوست نوں دے دیندا ہاں۔ برکتاں دے مہینے وچ ایہہ بابرکت واقعہ بتان دا مقصد ایہہ ہے کہ فوڈ سٹریٹ دے اپنے مزے نیں پر چنگی توں چنگی کڑاہی دا مزہ وی اگلے دن بھل جاندا ہے پر کتاب وچ پڑھیا اک چنگا جملہ وی ساری عمر نال رہندا ہے۔
پنجاب دے ضعلے اوکاڑہ جمے محمد حنیف دا ایہہ کالم بی بی سی وچ چھاپیا گیا سی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels