Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> سپیڈ‘‘ تے ’’شہادت‘‘ دا رلا

سپیڈ‘‘ تے ’’شہادت‘‘ دا رلا

نصرت جاوید
June 9th, 2017

عمران خان دے کجھ معصوم تے نیک دل چاہن والے انہاں دناں وچ بہت پریشان نیں۔ انہاں نوں اوہ تصویر ہرگز پسند نہیں آئی جس وچ لوکاں نوں عموماً ’’اپنی تھاں تے‘‘ رکھن والے ’’کپتان‘‘ پیپلز پارٹی توں تحریک انصاف وچ آن والی ڈاکٹر عاشق اعوان دا سواگت انہاں نوں چادر پواکے کررہے سن۔ بادشاواں دی عطا کردہ خلعت ورگی ایہہ چادرپاون دے بعد ڈاکٹر صاحبہ ’’دخترِ سیالکوٹ‘‘ دے مرتبہ تے فائز ہوچکی جے۔ امید ہن ایہہ بنھی جارہی ہے کہ ایس دبنگ دختر دی تحریک انصاف وچ رلت دے بعد 1990 دی دہائی توں سینٹ وچ آن دے بعد مختلف قومی اسمبلیاں لئی مسلسل منتخب ہون والے خواجہ آصف دی سیالکوٹ توں آئندہ انتخابات وچ کامیابی ناممکن ہوجائے گی۔ عثمان ڈار نے ایہہ کوشش 2013 وچ وی کیتی سی پر اوہ ناکام رہے سن۔ ہن ڈار تے اعوان رل گئے نیں تے کسی ’’تیسرے‘‘ دے امکانات مندے پئے گئے نیں۔
’’دخترِ سیالکوٹ‘‘ دی تحریک انصاف وچ رلت تے شاداں افراد نوں ایہہ خبر نہیں کہ ضلع سیالکوٹ وچ اک ’’گجر‘‘ برادری وی ہوندی ہے۔ چودھری انور عزیز کئی سالاں تک ایس برادری دے اصل کنگ میکررہے سن۔ 1985 دے انتخاباں وچ چودھری امیر حسین تے چودھری اختر وریو دی دریافت دا سہرا انہاں ہی دے سربنھیا جاندا جے۔ فیرسیالکوٹ وانگ ناروال وی اک ضلع بن گیا تے شکر گڑھ ایس دی تحصیل ہویا۔ سیالکوٹ دے حصہ وچ آئے علاقیاں دے گجر،چودھری امیر حسین تے وریو خاندان توں سیاسی قوت حاصل کرنا شروع ہوگئے۔
سیالکوٹ ہی دے اک تے قدآور ’’فرزند‘‘ وی نیں۔رحمن ملک انہاں دا ناں ہے۔ پیپلز پارٹی دے ’’اِدھر ڈوبے اْدھر نکلے‘‘ چیئرمین نوں ’’انکل رحمن‘‘ رموز مملکت دی گہرائیاں تے پیچیدگیاں سمجھان لئی اکثر انہاں نال اکلے ملاقات کردے ہوئے دکھائی دیندے نیں۔ ریاست دے دائمی اداریاںں وچ بیٹھے کجھ افراد نوں وی پیپلز پارٹی دی ’’اہمیت‘‘ دا اندازہ رحمن ملک دے نال ملاقاتاں دی بدولت ہی حاصل ہوندا ہے۔ انہاں نے سیالکوٹ لئی آئندہ انتخابات دے دوران کیہ حکمتِ عملی بنارکھی ہے ایس دا علم سانوں ہرگز نہیں۔شائد کوئی Bigسرپرائزدین دی تیاری کررکھی ہے۔
ایس کالم وچ پر مینوں سیالکوٹ دے ممکنہ انتخابی سین تے غور نہیں کرنا۔میرا اصل مقصد عمران خان دے کجھ معصوم تے نیک دل چاہن والیاں نوں صرف ایہہ سمجھان دی کوشش کرنا ہے کہ اپنے کپتان دی ’’مجبوریاں‘‘ دل وڈا کرکے تسلیم کرن۔ انہاں توں خفانہ ہون۔ ’’دخترِ سیالکوٹ‘‘ ورگے افراد دی تحریک انصاف وچ رلت دے بعد سگوں ایہہ سوچ کے مطمئن ہوجان کہ خان صاحب کی وزارتِ عظمیٰ تقریباََ ’’پکی‘‘ ہورہی ہے۔
ساڈے ایتھے اقتدار دے کھیڈ دی بنیادی Dynamicsنوں جانن لئی ضروری ہے کہ ہمیش یاد رکھیا جائے کہ کوئی سیاست دان عوام دے براہِ راست ووٹاں توں وزیر اعظم منتخب نہیں ہوندا۔قومی اسمبلی دی 344نشستاں نیں۔ انہاں چوں 272لئی براہِ راست انتخابات ہوندے نیں۔انہاں چوں اکثریتی نشستاں جتوجماعت ہی اپنے سربراہ یا سربراہ دے کسی بلارے نوں وزیر اعظم دے عہدے تے فائز کرن دا حق رکھدی ہے۔ 272نشستاں تے اکثریت حاصل کرن والی مجبوری ہی ناں نہاد Electables نوں اہمیتاں عطا کردی ہے۔
کسی وی سیاسی جماعت نوں ایہہ موقعہ صرف اک وار ملدا ہے کہ اوہ کسی حلقے وچ ’’کھمبا‘‘ وی کھڑا کردے تے اوہ جیت جاندا ہے۔ 1970 دی چوناں وچ ذوالفقار علی بھٹو دی پیپلز پارٹی دے نال یہو ہویا سی ۔ 1977 دے انتخابات تک پہنچندے ہوئے پر ایہو جماعت Electables توں رجوع کرن تے مجبور ہوچکی سی۔
تحریک انصاف نوں ’’کھمبے‘‘ والا موقعہ 2013 وچ مل چکیا ہے۔ اگلے انتخابا ں وچ ایہہ موقعہ اس نوں مڑ نصیب نہیں ہوئے گا۔ وجہ ایس دی بنیادی ایہہ ہے کہ2013وچ عمران اک ’’نواں چہرہ‘‘ سی۔ اوہ ہر سیاسی معاملے وچ ’’ذراہٹ کے‘‘ دکھائی دیندا سی۔ 2013 دے بعد توں پر اوہ فارسی محاورے والی ’’کانِ نمک‘‘ وچ جاکے ’’نمک‘‘ہوچکیا ہے۔ہر صورت اقتدار حاصل کرن دے جنون وچ ایس نے ہر اوہ ہتھکنڈہ اختیار کیتا جو روایتی سیاستدان اپنایا کردے نیں۔
90 دے دہاکے وچ نواز شریف تے محترمہ بے نظیر بھٹو نے اک دوجے دی حکومتاں نوں پنچ سال والی آئینی مدت پورا کرن نہیں دتی سی۔ وقت توں پہلاں انتخاباں نوں یقینی بنان لئی انہاں نے غیر سیاسی قوتاں نال گٹھ جوڑ وی کیتا سی ۔ انہاں دی سفاکانہ ضد بالآخر جنرل مشرف دے دس سالاں قبضہ تیک لے گئی۔ دوناں نوں سب کجھ لٹاکے کجھ ہوش آگیا تے میثاقِ جمہوریت وغیرہ ہویا۔
2013دے بعد توں عمران خان نے 1990 دی دہائی والے محترمہ بے نظیر بھٹو تے نواز شریف دے آزمائے تمام ہتھکنڈے اپنائے نیں۔ اسلام آباد وچ اگست 2014ء وچ 126دن تک دھرنا دے کے ’’ایمپائر‘‘ دی اْنگلی نوں اڈیکیا۔ اوہ ’’انگلی‘‘ نہ اٹھی تے 2016وچ پانامہ دستاویزاں دے منکشف ہون دے بعد توں سپریم کورٹ نوں از خود نوٹس لین دے اختیاراں دا استعمال کردے ہوئے نواز شریف دے ’’احتساب‘‘ تے مجبور کیتا۔
نواز شریف ہن وی اپنی تھاں تے موجود نیں پر سپریم کورٹ دے دو ججاں نے انہاں نوں ’’گاڈ فادر‘‘ کہہ دتا ہے۔ سپریم کورٹ دی بنائی JIT ہن صرف ایہہ ویکھ رہی ہے کہ ’’گاڈ فادر‘‘ دا ’’طریقہ واردات‘‘ کیہ ہے۔ شاید اوہ طریقہ دریافت ہوہی جائے۔ ایس دی دریافت دے بعد وقت توں پہلاں چوناں ضروری ہوجان گیاں۔
انہاں انتخابا ت وچ عمران خان نوں پر واک اوورہرگز نہیں ملے گا۔شہباز شریف تے انہاں دی Speed پاکستان دے آبادی دے حوالے توں سب توں وڈے صوبے ،پنجاب وچ اپنی تھاں موجود رہے گی۔ نواز شریف دے چاہن والیاں نوں Whatsapp تے متحرک لوکاں ددی بدولت‘‘ شہادت‘‘ دا رْتبہ وی مل جائے گا۔ ’’سپیڈ‘‘ تے ’’شہادت‘‘ دا رلا نویں انتخاباں وچ تحریک انصاف لئی کافی اوکڑاں کھڑی کرسکدا ہے۔ عمران خان نوں انہاں اوکڑاں توں نبڑن لئی غلام مصطفےٰ کھر ورگے تجربہ کار ’’خلیفیاں‘‘ تے ’’دخترِ سیالکوٹ‘‘ ورگی دبنگ شخصیتاں دی لوڑ ہے۔ا یہو جیہے لوک جیہناں نوں اپنے حلقیاں وچ برادریاں دی سمجھ ہوئے۔ جیہناں نوں علم ہوئے کہ انتظامیہ کسی امیدوار نوں جتوان لئی پولنگ دے دن تے انتخابی عمل دے دوران کیہڑے ’’خاص‘‘ ہتھ وکھاندی جے۔
اک حقیقت تے ساڈے سیاسی مبصرین نے کدی غور ہی نہیں کیتا تے اوہ ایہہ ہے کہ ساڈا آئین کسی صورت ایس گل نوں یقینی نہیں بناندا کہ قومی تے صوبائی اسمبلیاں دی چوناں اک دن ہون۔ نواز شریف JIT دی مشقت بھری تحقیق دی بدولت گاڈ فادر ثابت ہوگئے تے کیہ ضمانت ہے کہ وقت توں پہلاں ہون والی چوناں نری قومی اسمبلی لئی نہیں ہون گیاں۔ ایہو جہی صورت وچ موجودہ صوبائی اسمبلیاں تے انہاں دے ذریعے بنیاں حکومتیاں اپنے پنچ سالہ آئینی مدت برقرار رکھن دا حق رکھدیاں نیں۔ ایس حق توں انہاں نوں سوائے مارشل لاء ورگے غیر معمولی اقدام دے محروم کیتا ہی نہیں جاسکدا۔ ایس گل دے امکان لہذا کافی روشن نیں کہ نواز شریف دی ممکنہ نااہلی دے بعد صرف قومی اسمبلی لئی وقت توں پہلاں چوناں ہون۔ جے اینج ہویا تے پنجاب دے وزیر اعلیٰ ہوندے ہوئے شہباز شریف اپنی ’’سپیڈ‘‘ دے نال تحریک انصاف دے امیدواراں لئی کافی پریشانیاں کھڑی کرسکدے نیں۔ صرف Electables انہاں پریشانیاں دے تدارک لئی اہم کردار ادا کرسکدے نیں۔ انتخابی سیاست وچ نوزائیدہ نیک دل لوک ساڈی تریخ دے اک قطعی نویں ’’انتخاب‘‘ دی Dynamics نوں سمجھ ہی نہیں پان گے۔
عمران خان صاحب دے معصوم تے نیک دل چاہن والیاں توں لہذا میری فریاد ہے کہ اوہ ڈاکٹر اعوان ورگے افراد نوں چادر پوا کے ’’دخترِ سیالکوٹ‘‘ بنان والے واقعات توں اپنا دل چھوٹا نہ کرن۔اپنی قیادت دی فراست تے ایمان برقرار رکھن۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels