Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> برطانیہ دی چوناں تے ماڑیاں دے مفاداں دی راکھی

برطانیہ دی چوناں تے ماڑیاں دے مفاداں دی راکھی

زمان خان
June 3rd, 2017

برطانیہ وچ 8 جون نوں(5 دناں بعدوں)ملک دے وڈے چون (Election) ہون جارہے نیں۔ تھوڑے دہاڑ رہ گئے نیں، پر لوکی ہلے تک اپنی رائے اک پاسے نہیں لاسکے۔ جیہڑے تے پارٹیاں نال پکے نیں اوہ تے ٹھیک نیں پر عام لوکاں وچ پارٹیاں دے منشور آن توں بعد بڑی تبدیلی آرہی ہے۔ لیبر پارٹی دا ووٹ سروے پاروں تقریباً 12 فیصدی اُتے چلاگیا ہے۔ تیزی نال تبدیلی آرہی ہے پر سڑکاں تے ناں کوئی جلوس، نہ جلسے نہ نعرے بازی۔ نہ کوئی شور، کوئی کسے دے خلاف اخلاق توں ڈگی تنقید نہیں کردا۔نرا، ایشو تے پروگرام تے گل ہوندی ہے۔ لوک وی ایہو ہی سننا چاہندے نیں کہ کیہڑی پارٹی اوہناں نوں کیہہ دیوے گی۔ ایہہ وی نہیں ہوندا کہ جھوٹھے وعدے کرکے ووٹ لے لتے جان تے بعد وچ مکر جاناں۔ سگوں جے کوئی وعدہ کرنا ایس تے اوہنوں پورا کرن دے طریقے وی دسنے نیں۔ فیرایہہ وی دسیا جاندا ہے کہ اوہدا خرچہ کتھوں پورا ہوئے گا۔نرے وعدے نہیں ہوندے سگوں پورا پلان دینا ہوندا ہے۔ جے کوئی پارٹی جھوٹھا وعدہ کرے یا صرف بڑھکاں مار کے لوکاں نوں پھُدو بنانا چاہوے تے اوہنوں نہ کوئی سنجیدہ لیندا ہے تے ناہی ووٹ دیندا ہے۔ جے کوئی کسے ہور وجہ نال پاور وچ آ وی جاوے تے اگلی واری لوک ووٹاں نال اوہدی چھُٹی کرادیندے نیں۔ ایتھے اک رواج ہور وی ہے کہ پارٹیاں دے لیڈر الیکشن توں پہلے ٹی وی تے آکے آمنے سامنے بیٹھ کے ٹاکرا (Debate) کردے نیں۔ جس پاروں لوکاں نوں بہت فیدہ ملدا ہے۔ کیونجے ایس ٹاکرے توں لوکاں نوں پتہ لگ جاندا ہے پئی اوہناں دا کیہڑا لیڈر کینے پانی وچ ہے۔ پر ایس دفعہ کجھ الٹا ہویا ہے۔ کیونجے اے چون وزیراعظم تھریسامے ہوراں نے اصل ٹائم توں ڈھائی سال پہلے کران دا اعلان کردتا ہے اتے ایس دی وجہ اوس ویلے دے کجھ سروے سن جیہڑے کنزرویٹو پارٹی نوں بہت پاپولر پارٹی کہہ رہے سن تے ایہدی پوزیشن تگڑی دس رہے سن۔ جس واسطے تھریسامے نے اپنی اپوزیشن لیبر پارٹی دی ماڑی پوزیشن ویکھدے ہویاں Snap Election دا اعلان کر دتا۔اینج جاپدا ہی کہ گل ہولی ہولی پٹھی ہوندی نظر آرہی ہے۔ہن لیبر پارٹی دامنشور لوکاں وچ بڑی سپیڈ نال جگہ بناندا جارہیا ہے تے کنزرویٹو پارٹی دھڑا دھڑ غلطیاں تے غلطیاں کررہی ہے۔ کدی بڈھیاں دے سردیاں نوں ملن والے گیس بجلی دے بونس تے الاؤنس بند کردیندے نیں۔ کدی پینشن لین والیاں دے علاج تے ہون والے بجٹ نوں گھٹا دیندے نیں۔ ہن اک ہور اعلان کیتا ہے پئی جیہڑے بڈھے بیمار ہوکے Social care لین گے، اوہ خرچہ انہاں نوں آپ دینا ہووے گا۔ جے اوہ آپ خرچہ نہ کرسکے تے اوہناں دے مکان یا پراپرٹی نوں ویچ کے وصولیا جائے گا۔ یا فیراوہناں دے بچیاں نوں اوہ خرچہ دینا پوے گا۔ ایس اعلان توں بعد عام پبلک دے ذہناں تے کنزریٹو پارٹی بارے سوچ بہت بدل گئی ہے۔ جداں کہ لیبر پارٹی امیراں تے زیادہ ٹیکس لان د ا علان کیتا ہے تے بجلی ،پانی، ریلوے تے گیس نوں سرکاری کھاتے وچ لین دا اعلان کیتا ہے۔ایس نوں اک بہوں وڈا انقلابی کم سمجھیا جا رہیا ہے۔ کنزریٹو پارٹی باہر دے ملکاں توں برطانیہ آن والےs immigrant دے ڈھیر خلاف نیں تے اوہناں دے آن،جاون تے اپنا کنٹرول کرنا چاہندی ہے کہ باہروں کوئی برطانیہ وچ وڑے ہی نہ۔لیبر پارٹی سمجھدی ہے کہ برطانیہ وچ ہر ویلے ہنر منداں دی لوڑ رہندی ہے جیہنوں باہروں آن والے ہی پورا کرسکدے نیں تے لوکی وی ایس گل نوں چنگی طراں سمجھدے نیں۔ ویسے تے جدوں دا برطانیہ وچ یورپ نوں چھڈن دا ریفرنڈم ہویا ہے ایتھوں دے حالات خراب ہوندے جارہے نیں۔ چیزاں میہنگیاں ہوندیاں جارہیاں نیں تے پراپرٹی دا کاروبار مندے ول ٹرپیا ہے۔ ایس پاروں لوکاں نوں بہوں چنتا پائی جاندی ہے تے لوکی ایہہ سمجھنا شروع ہوگئے نیں کہ اتلے طبقے نیں یورپ نوں چھڈن دا فیصلہ اپنے مفاد وچ کیتا ہے۔ کیونجے اوہ یورپ دے روز روز دے نویں قنوناں نوں اپنی منافع خوری دی راہ وچ روک سمجھدے نیں۔ لوکاں نوں اے گل وی ہن سمجھ آرہی ہے کہ یورپ توں وکھ ہوکے اصل گھاٹا تے مزدور طبقے نوں ہوناہے جیہڑا آرام نال بارڈر ٹپ کے دوجے ملک جاکے روزگار لبھ لیندا ہے۔ ایہہ ساریاں چیزاں لوکاں دے ووٹ دی پسند تے ناپسند تے اثر پارہیاں نیں۔ باقی اٹھ جون نوں فیصلہ لئی تسی وی ویکھ ہی لینا۔
A previous column of same writer
http://www.wichaar.com/news/119/ARTICLE/32858/2017-04-28.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels