Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> داڑھی

داڑھی

جاوید بُوٹا
May 31st, 2017

’’اکھِیاں والیو اکھِیاں بڑی نیامت اے۔‘‘
گلِیاں، محلیاں، بازاراں اَتے مِزاراں دے باہر کُجھ ڈھونگی انّھے تے کُجھ سچے اکھِیاں دے چانن توں وانجھے فقِیر، ہتھ وِچ ڈنگوری پھڑی جاں پھیر بال دے موڈھے اُتے ہتھ رکھی، منگن لئی بڑی درد بھری آواز وِچ ایہہ کوِتا وکھو وکھ راگاں اَتے سُراں وِچ گاؤندے وکھائی دیندے نیں۔ پر جدوں بلوچِستان دے ضلع گوادر دے شہر اوڑماڑہ دی میونسپل کمیٹی دے افسراں دُکانداراں نوں سد کے رمضان دے مہینے وِچ شیواں دے مُل نہ ودھان دی ہدایت کرن دے نال نائیاں نوں وی ہداریت دِتی کہ ’داڑھی دا اسلامی کٹ بناؤن ہور کوئی کٹ نہ بناؤن ۔ اِسلامی کٹ توں اڈ داڑھی دا کوئی وی کٹ غیر اسلامی ہووے گا اَتے ایہہ داڑھی دی توہِین ہووے گی۔
جمعیت علمائے اسلام فضل الرحمان گروپ دے رُکن مولوی مُحمد امِین ہوراں آکھیا اے اسیں ایہدے اُتے زبردستی عمل نہیں کروا سکدے کیونجے اوہناں کول قنونی اِختیار نہیں ایس لئی زبانی ہدایت ای دے رہے آں۔
ایہہ خبر پڑھدیاں ای فقِیراں دی کوِتا ملو ملی اپنا رُوپ وٹا کے بُلھاں وِچوں تِلک کے باہر آگئی۔
’’داڑھیاں والیو آئی تُہاڈی شامت اے،‘‘
اَتے اکھاں موہرے 1960 دی دہائی وِچ ’ ٹیڈی ‘ فیشن والا اوہ ویلا کِھنڈگیا جدوں کُڑِیاں تنگ پُہنچیاں دِیاں شلواراں اَتے گوڈیاں توں واہوا اُچے گھیرے والِیاں تنگ قمیضاں پاؤندِیاں اَتے مُنڈے تنگ موری دِیاں پتلوناں، لمی تِکھی چُنج والے بُوٹ پاؤندے اَتے وڈے لمے بودے رکھدے۔ ایہدے خِلاف سرکاری اَتے قنونی اِختیار تاں خبرے اودوں کِسے کول ہے سی جاں نہیں؟ کُڑِیاں نوں تاں لوکاں دِیاں بولِیاں ای سہنِیاں پیندِیاں پر گلِیاں مُحلیاں وِچ سیانے، ایانے رل کے ٹیڈی مُنڈیاں دا مَوجُو وی لاؤندے اَتے من پرچاؤن لئی ’ ٹیڈی ‘ دی پتلون دا پُہنچا قینچی نال وڈھ دیندے، بوٹ دی تِکھی چُنجھ کُتر دیندے اتے لمیاں بودیاں وِچ قینچی ایہو جیہا ہل چلاؤندی کہ وِچارے ’ ٹیڈی ‘ کول نائی دے اُسترے نال اپنے سِر وِچ سُہاگہ پھیرائے بِنا ہور کوئی چارہ نہیں سی ہوندا۔ ٹیڈیاں دے بھاگ چنگے سن اودوں اجے ’’ توہین ‘‘ دا چھاپا اِیجاد نہیں سی ہویا، نہیں تاں ایہناں سیانیاں، ایانیاں نے، پُہنچے، چُنجھاں جاں بودے کٹن دی تھاں خبرے کِنِیاں کُو زندگِیاں اُتے موت دا سُہاگہ پھیر دِتا ہوندا۔
توہینِ مذہب.... اَتے ہُن..... توہیِن داڑھی ۔ توہیِن داڑھی دی گل کوئی مونہہ زبانی ہدایتاں اُتے تاں نہیں نا مُکنی۔....... داڑھی نال ہُن توہین چمبڑ گئی اے۔ ........ توہین جیہنوں چمبڑ دی اے، چھڈدی اے کوئی، ......... لے کے ای بہندی اے۔ ........ ہُن تاں چل سو چل۔
توہینِ داڑھی بِل اسمبلِیاں وِچ پیش ہووے گا ویلھے بیٹھے ممبراں لئی ہتھ پیر تے مونہہ ہلاؤن لئی موقع دِتا جاوے گا۔ اوہدے حق وِچ تے خِلاف بحثاں چھڑن گِیاں۔ دھرنے دِتے جان گے۔ جلوس نِکلن گئے۔ لانگ مارچاں ہون گِیاں، ہڑتالاں ہون گِیاں۔ ٹی. وی اُتے بریکِنگ نیوزاں دا ہڑ۔ ریٹِنگ دی دوڑ۔ دھرمی سوجھواناں دے وچار وٹاندرے، لڑائی جھگڑے توں توں میں میں، جُوت پتان۔ داڑھی دا کیہڑا کٹ، ٹھپا جاں میچا اسلامی اے۔ ایہدا فتوا سعودی عرب دے کِسے عالم دا ہووے جاں مُقامی عالم دا۔
’ سرکار دا منظُور شُدہ اِسلامی داڑھی کٹ ٹرینِنگ سینٹر ‘، نائیاں دی ٹرینِنگ لئی سینٹر وی کُھل جان گے۔ سکولاں کالجاں وِچ کلاساں اَتے یونیورسٹِیاں وِچ ’ اسلامی داڑھی کٹ‘ ڈِیپاٹمینٹ۔ اِشتہاراں وِچ کم کرن والے ماڈلاں دِیاں، اِشتہاری کمپنِیاں دِیاں موجاں۔
سرکار وِچ ’ اِسلامی ڈاڑھی کٹ ‘ دے ناں توں8 اِک نواں محکمہ وی اُساریا جائے گا۔ ایس سارے کار ویہار نوں ویکھن لئی اِک نویں وزارت وی وجود وِچ آوے گی ۔ کار جاں موٹر سیکل دے کاغذاں وانگ ایہہ محکمہ ہر داڑھی والے نوں راشن کارڈ ورگا کوئی کارڈ جاری کرے گا تانجے پُچھ پرتیِت ویلے اوہ وکھا سکے کہ اوہنے اپنی داڑھی اِسلامی کٹ دا اِمتحان پاس کِیتے سرکاری لائسنس والے نائی توں بنوائی اے۔
ایڈا وڈا کاروبار ہووے تے چِین پِچھے رہ جائے، پِڑ وِچ نہ کُدے، اے کِیویں ہو سکدا اے۔ چین تاں لوکاں نوں سوکھیاں رکھن لئی لوڑیندِیاں شیواں سستے بھاء دُنیا دی ہر نُکرے اپڑا دیندا اے۔ جیہڑی وی شئے چُکّو، چِینی ٹھپا، میڈ اِن چائینا۔ چِینی کنمپنِیاں نے سرکار توں اسلامی کٹ داڑھی دے ٹھپے منظُور کروا لینے نیں۔ ایہہ ٹھپے جاں میچے ہر طرحاں دے بُوتھیاں لئی ہون گے، بھایں خربُوزے، ہدوانے جیڈا بُوتھا ہووے جاں انبی ورگا۔
پھیر اِک ہور وی بڑا وڈا کاروباری ٹولا اے ’ جعل سازاں ‘ دا۔ اوہناں وی ایس وگدی گنگا وِچوں ہتھ دھونوں پِچھے تاں نہیں رہنا۔ اوہناں دی وی چاندی۔
ایہناں نقلی اَتے جعلی لائسنساں، سرٹِفکیٹاں اَتے ٹھپیاں لئی پُلس دِیاں دوڑاں، چھاپے، ناکے اَتے موجاں ای موجاں......
داڑھی دے اسلامی کٹ نے تاں پھٹے چک دِتے۔ ہر پاسے لہراں بہراں کروا دِتِیاں، پر ....... مُچھ....... مُچھ وچاری نوں کِسے پُچھیا ای نہیں۔ ویسے چنگا ای اے کِسے ناں تائیں وی نہیں لیا مُچھ دا۔ جے مُچھ ولے وی اسلامی کٹ دا دھیان آ جاندا تاں اوہناں دا کیہ ہوندا جیہڑے ہر ویلے مُچھاں نوں تاء دیندے رہندے نیں۔ مُچھ نیویں نہیں ہون دیندے بھاویں............... خیر چھڈو مُچھ دی گل ایس ویلے۔ جدوں اوہدی واری آئے گی تاں ویکھی ڈِٹھی جائے گی۔ حال دی گھڑی تاں اِسلامی کٹ داڑھی دی اے۔
****





Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels