Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ایران دے خلاف سازشاں تے راحیل شریف دا کردار ۔اسلم خان

ایران دے خلاف سازشاں تے راحیل شریف دا کردار ۔اسلم خان

وچار ڈیسک
May 28th, 2017

ایران نشانہ جے اتے ٹرمپ تے ایس دے حواری شکاری نیں۔ ایران، ایران تے ایران، ریاظ وچ ہون والی اسلامی ملکاں دی سربراہ کانفرنس ایران دے گرد گھیرا تنگ کرن دا اعلانِ عام سی۔متلون مزاج صدر ٹرمپ نے ایران نوں دہشت گردی دا مرکز قراردیندے ہوئے ایس نوں عالمی سطح تے تنہا کرن دا مشورہ دتا۔ انہاں نے آکھیا کہ دہشت گردی دنیا بھر وچ پھیل چکی ہے پر امن دا رستہ ایس قدیم تے مقدس سرزمین توں نکلدا ہے۔ بھارت نوں دہشت گردی دا شکار قرار دیندے ہوئے دراصل انہاں نے کشمیر بارے امریکی خارجہ پالیسی بیان کیتی ہے پر دہشت گردی دے خلاف صف اول دی ریاست پاکستان، ایس دی لازوال قربانیاں 18ہزار توں زیادہ فوجی شہدا ، 60ہزار نہتے عوام الناس دی قربانیاں تے 500ارب ڈالر دے برابر معاشی نقصاناں دا صلہ مکمل خموشی سی۔ پاکستان دا ناں تک نہیں لتا گیا، ذکر تک نہیں کیتا گیا۔ ساڈی کامیاب خارجہ حکمت عملی دا انجام ایہہ ہے کہ ٹرمپ کشمیر وچ جاری تحریک حریت تے کشمیری عوام دی بے مثال قربانیوں نوں ''بھات دے خلاف دہشت گردی''قرار دے رہیا ہے۔
ریاظ کانفرنس وچ خادم حرمین شریفین شاہ سلمان نے خطاب کردے ہوئے آکھیا کہ ایران دے حکمران عالمی دہشت گردی دے امام تے گرو نیں۔ پوری دنیا دے سامنے ساڈی ایہہ ذمے واری ہے کہ اسی ہر برائی تے انتہا پسندی دی قوتاں نال نبڑن لئی اس دے سامنے کھڑے ہوجائیے۔ریاظ کانفرنس وچ خادم حرمین شریفین شاہ سلمان تے صدر ٹرمپ دے خطاباں توں عیاں ہوجاندا ہے کہ ایہہ سارا ناٹک ایران دے خلاف رچایا گیا سی جس نوں گھیرن لئی بے پناہ دولت دے بل بوتے تے پاکستان سمیت دوجے مسلم اکثریتی ملکاں نوں ہانکن تے لگادتا گیا ہے ۔پاکستان لئی لمحہ فکریہ ہے کہ ساڈے پیارے جرنیل راحیل شریف ایران خلاف خلاف تشکیل دتے جان والے فوجی اتحاد تے مسلم نیٹو قرار پان والے اسلامی عسکری اتحاد دی قیادت کررہے نیں جس دے بارے وچ جنرل راحیل شریف دی وکالت کردے ہوئے انہاں دے اک قریبی جرنیل دوست شعیب امجد نے دعویٰ کیتا سی کہ جنرل راحیل شریف نے ایس اتحاد دی سربراہی لئی ایران دی رلت دی پیشگی دی شرط رکھی ہے۔
پاکستانی حکمراناں دے سامنے امریکہ دا شکوہ کرنا تے ،انھے دے سامنے رونا ہے۔ انہاں دی زبان بندی تے بے بسی دی سب توں وڈی وجہ تے انہاں دا اوہ کالا دھن ہے جو مغربی تے یورپی بنکاں وچ بظاہر محفوظ ہے پر جس دی اک اک پائی دی ٹریل انہاں ملکاں دی ایجنسیاں نوں پتہ ہے۔ امریکہ وقت پین تے اپنے بنکاں وچ پئے اثاثے منجمد کرن وچ ذرا بھر نہیں ہچکچائے گا۔ سو اک طراں نال ساڈے اہل اقتدار عمر بھر بلیک میلنگ دا شکار رہن گے۔ پر حیرت تے اپنے اعلےٰ کمانڈر تے ہے جس دے خاندان وچ دو نشان حیدر تے جس دے کریڈٹ تے اپنے بیش بہا قیمتی پلاٹ قومی مفاد وچ نچھاور کرنا ہے۔ ساڈے اعلیٰ کمانڈر(ر) جنرل راحیل شریف نے اپنی سروس دے دوران جو عقیدت تے محبت دے پھول قوم توں سمیٹے اوہ گھٹ لوکاں دے نصیب وچ آئے نیں۔ ہن انہاں تے انگلیاں اٹھنیاں شروع ہوگئیاں نیں۔ کچھ ستم ظریف تے انہاں نوں راحیل شریف دی بجائے ریال شریف کہن لگے نیں پر انہاں لئی ہن وی موقع ہے کہ اوہ اپنی عمر بھر دی کمائی جو نیک نامی دی صورت وچ ہے ، ضائع ہون توں بچالین۔ انہاں دی سربراہی وچ اسلامی نیٹو دی کمان توں اینج لگدا ہے پاکستان ایس ایران مخالف اسلامی اتحاد دا سب توں وڈا محرک ہے۔ پیسہ جے انہاں دا مطمع نظر نہیں رہیا تے انہاں نوں فیصلہ کرن وچ مشکل پیش نہیں آنی چاہیدی۔
تازہ ترین صورت حال وچ ایہہ حقیقت سامنے آچکی ہے کہ ایس ناں نہاد اسلامی اتحاد دا مقصد ہی ایران دے خلاف مورچہ بندی ہے۔ ایس لئی جنرل راحیل شریف نوں اپنے ''وچن''دا پاس کردے ہوئے ایفائے عہد دا ثبوت دیندے ہوئے مسلم نیٹو ددی سربراہی توں فوری طور تے وکھ ہوجاناچاہیدا ہے کہ ایہو اُچے شملیاں والے انہاں دے آباد واجداد، راجپوت سرداراں دا صدیاں توں چلن رہیا ہے جیہناں نے زبان تے ہمش جان قربان کیتی ہے جو رسمِ جوہر وکھاندے ہوئے دہکتے کولیاں وچ چھلاں مار کے ہسدے مسکراندے جان وار دیندے سن کہ آبرو دا صدقہ جان ہوندی ہے۔ ایس ماملے وچ تے چند ڈالراں دی قربانی دینا ہوئے گی تے عزت تے آبرو دے مقابل ایہہ چنداں مہنگا سودا نہین جے۔ ورنہ ایس فرقہ وارانہ فوجی اتحاد دی وجہ نال پاکستان نوں مستقبل قریب وچ ہولناک نتائج بھگتنا پین گے۔ ایس حوالے نال بار بار ذکر آندا ہے کہ حکومت پاکستان نے جنرل راحیل شریف نوں عسکری اتحاد دا سربراہ بنن لئی عدم اعتراض دا سر ٹیفیکیٹ جاری کیتا ہے جس دی اصل حقیقت کجھ اینج ہے کہ ہر ریٹائرڈ فوجی افسر لئی ریٹائرمنٹ دے بعد 2سال تک بیرون ملک سفر لئی پیشگی اجازت نامہ لازمی ہوندا ہے۔ اسی طراں دا اجازت نامہ جنرل راحیل شریف نوں دتا گیا سی جداں کہ اسلامی فوجی اتحاد دی سربراہی دی اہمیت دے پیش نظر ایس دا چرچا باربار تے ضرورت توں زیادہ ہویا۔ ویسے تے ریٹائرمنٹ دے بعد ہر فوجی ،افسر ہر تھاں تے آن جان وچ مکمل آزاد ہوندا ہے۔ اوہ کھٹمنڈو نیپال جائے یا فیر ریاظ، سعودی عرب دا رستہ اپنائے۔ پر وطن دے انہاں سجیلے جواناں توں توقع کیتی جاندی ہے کہ اوہ آخری ساہ تک اپنے کسی قول وفعل دے ذریعے مادر وطن دی آن بان تے شان تے کسی قسم دا حرف نہیں آن دین گے کہ فوجی مقررہ وقت تے وردی اْتاردیندا ہے پر بوٹ دم آخر پائی رکھدا ہے تے دفاع وطن دا حلف آخری ساہ تک موثررہندا ہے۔ ایہہ سارے حربی فلسفے کمانڈو جرنیل مشرف نے ٹھمریاں' دادرے تے راگ ملہار دی نذر کردتے کہ شبینہ محافل وچ بے قابو ہوکے ڈھولکی تے رقص کناں ہوکے جرنیلی آن بان دا جنازہ کڈھ چکے نیں۔
رہے جناب نواز شریف تے انہاں نوں سعودی ایران تنازعات توں بچن تے ایس وچ مکمل غیرجانبدار رہن لئی اپنے دوست تے ہم مزاج ترک صدررجب طیب اردگان دے نقش قدم تے چلنا چاہیدا ہے جیہناں نے اپنی مقامی مصروفیتاں دا بہانہ کرکے ریاظ کانفرنس توں جان چھڑالتی سی تے قطاروچ لگ کے ٹرمپ توں مصافحہ کرن دی ذلت توں اپنے آپ نوں بچالیا۔ سعودی عرب تے ایران دے مسلکی اختلافاں تے فرقو لڑائیاں وچ مکمل غیرجانبداری پاکستانی خارجہ حکمت عملی دا بنیادی ستون ہونی چاہیدی ہے جو ناں نہاداسلامی عسکری اتحاد توں فوری جان چھڑائے بغیر ممکن نہیں ہے۔ قبل ایس دے کہ وقت ہتھ چوں نکل جائے پاکستان نوں مشرق وسطی دے پھڈیاں وچ الجھے بغیر غیرجانبداری دا علم چک لینا چاہیدا ہے۔ قومی مفاداں دی راکھی تہاڈے اپنے دوست اردگان توں سیکھ سکدے نیں ۔اردگان دا راستہ پاکستان دا راستہ ہونا چاہیدا ہے۔ شام دی لڑائی وچ براہ راست فریق ہون تے ا مریکہ دا پاکستان توں کتھے ودھ کے دوست ہون دے باوجود اردگان غیرحاضررہ کے درمیانی رستہ کڈھ سکدے نیں تے ساڈے شہ دماغ اینج کیوں نہیں کرسکدے ۔ جناب نواز شریف دے دماغ وچ ایہہ حقائق ہر لمحہ، ہر پل تازہ رہنے چاہیدے نیں کہ جسدِملت سعودی عرب تے ایران دی پراکسی جنگ توں لگن والے زخماں دی وجہ توں پارہ پارہ ہوچکیا ہے۔ ہن ایس وچ مزید ستم برداشت کرن تے سہن دی سکت نہیں ہے۔ سانوں صدرٹرمپ توں وی سبق سیکھن دی لوڑ ہے جو انتخابی مہم دے دوران مسلماناں توں نفرت دا ووٹ لے کے وائٹ ہاؤس پہنچے سن پر امریکی مفاداں دے تحفظ وچ انہاں نے بلاتوقف اپنا تھوکیا چٹ کے سعودی عرب دا پہلا غیرملکی دورہ کرکے 380ارب ڈالر دے معاہدے کرلتے نیں۔ اسلام آباد وچ ترک سفیر نے ایس کالم نگار دے جناب اردگان دے آمرانہ رجحانات تے صدارتی نظام وچ کرائے جان والے ریفرنڈم دے تناظر وچ لکھے جان والے انتہائی محتاط کالم تے انتہائی تلخ زبان وچ جواب دتا جس دا ترجمہ شائع ہوچکیا ہے۔ جس دے بعد اصولاًتے مینوں اردگان دے بارے وچ کدی کلمہ خیر نہیں کہنا چاہیدا سی۔ پر آمر مطلق بنن دی راہ تے گامزن صدر اردگان نے جداں اپنے قومی مفاداں دا تحفظ کردے ہوئے ریاظ کانفرنس وچ شرکت نہ کرکے درمیانی راہ کڈھی تے ایہہ کالم نگار انہاں دی تحسین تے مجبور ہے ۔اسی طراں سوڈان دے صدر حسن البشیر نے شمولیت توں صاف انکار کرکے کسی نائب وزیرنوں گھل دتا تے کیہ سوڈان تے زندگی دے دروازے بند ہوگئے نیں۔ پچھلے دناں بھاری ووٹاں توں دوبارہ منتخب ہون والے ایرانی صدر حسن روحانی دا شخصی خاکہ انہی صفحیاں تے شائع ہویا سی پر اج جداں ایران تے ناجائز محاصرہ کرن دی کوشش کیتی جارہی ہے تے ایس بارے اپنے قارئین نوں آگاہ نہ کرنا ظلم ہوئے گا۔ جے تہانوں یاد ہے تے پچھلے مہینیاں دے دوران اسلامی یونیورسٹی وچ حقوق دانش دے نسبتاًنوِیں مضمون دے استاد پروفیسرعزیز الرحمن نے میری تحریراں وچ عدم مطابقت تے فکری عدم تسلسل ول توجہ دوائی سی۔ پر کیہہ میں مطابقت تے تسلسل دے چکر وچ حقائق دا قتلام کردواں ؟ اینج ممکن نہیں ہے، کسی وی صاحب ضمیر نوں اینج نہیں کرنا چاہیدا۔ سیاسی قائدین توں گذارش ہے کہ امریکی صدر دے مسلکی تے فرقہ وارانہ اختلافات نوں ہوا دین دا نوٹس لین۔ خاص طور تے شعلہ بیان سینیٹر سراج الحق تے فکر مودودی تے صاحب خلافت وملوکیت دے پیروکار، مفت دے حج تے عمریاں نوں بھلا کے ایران دے خلاف جاری امریکی سرپرستی تے سعودی عالمی سازشاں تے اپنا موقف واضح کرن۔

اصل مضمون دا لنک دے رہے ہاں تے ویروا وی کہ لکھاری کجھ گلاں بھل جانا چاہندا ہے تے کجھ بارے ذکر نہیں کرنا چاہندا۔خطہ نوں کون کون فرقو ونڈ ول لیجا رہیا ہے ایس بارے پوری گل کیوں نہیں ہوندی۔کیہہ افغان جہاد وچ ساڈی پالیسی فرقہ پرستیاں تے نہیں کھلوتی سی؟ تے جس اخبار وچ ایہہ لکھاری لکھ رہیا ہے اوس فرقہ پرست لڑائی وچ اوس دا کیہہ کردار سی؟ کیہہ راحیل شریف پہلے وڈے عہدیدار نیں جنہاں رٹائرمنٹ بعدوں ایہہ کم کیتا؟ گل ٹھیک پر بیانیہ غلط کہ جے روس نوں اسلام مخالف آکھ کے امریکی، مغربی حمائیتاں نوں نظریہ پاکستان آکھن والے اج امریکہ مخالفتاں کرن والے اوسے بہادر شاہ ظفر دے پچھلگ جیہڑا ترے نسلاں توں انگریز سرکار توں پنشن لے رہیا سی پر جداں تخت توں ہٹاون لگے تے اوس نوں جنگ آزادی یاد آگئی۔
Link of orignal article
http://www.nawaiwaqt.com.pk/adarate-mazameen/23-May-2017/607578
 


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels