Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ٹرمپ نوں ہن ’’بھولا‘‘ سمجھنا چھڈ دیو۔نصرت جاوید

ٹرمپ نوں ہن ’’بھولا‘‘ سمجھنا چھڈ دیو۔نصرت جاوید

وچار ڈیسک
May 24th, 2017

پچھلے سال دے اخیریاں ترے مہینیاں دوران جداں امریکی صدارتی چوناں بارے مارا ماری اپنے عروج تے سی تے دنیا بھر دے میڈیا دی نقالی وچ ساڈے کئی کھوجی لکھاری وی ڈونلڈ ٹرمپ نوں دیوانہ سمجھ کے نظر انداز کردے رہے۔ انتخابی عمل دی حرکتاں تے اسی پاکستانی اونج وی اعتبار نہیں کردے۔ سازشی تھیوریاں دے مارے ساڈے ذہن ایس گل تے بضد رہندے نیں کہ ’’اصل گیم نوں توڑ تک پہنچان دا محض اک بہانہ ہوندا ہے۔ لوکاں نوں مصروف تے بے وقوف بنائے رکھن والا اک شعبدہ۔ آپ ساڈے ایتھے 2013 وچ قومی تے صوبائی اسمبلیاں لئی چوناں ہوئیاں تے انہاں چوناں نوں عالمی پدر تے جان پہچان رکھن والے اک کرکٹ سٹار تے ایچی سن کالج ا تے آکسفورڈ ورگے تعلیمی اداریاں توں تعلیم پان والے عمران خان ’’جعلی تے دھاندلی زدہ‘‘ قرار دتا سی۔ ساڈے کئی بے تحاشہ پڑھے لکھے افراد تے نوجواناں دی وڈی گنتری انہاں دے ایس دعوے نوں تسلیم کیتا۔ دھاندلی دے ذریعے قائم ہون والی ’’چوراں تے لُٹیریاں تے مشتمل‘‘ اسمبلی تے حکومت توں نجات پان لئی دھرنے وغیرہ وی دتے گئے ۔ نواز شریف تے آصف علی زرداری دے درمیاں ’’باریاں‘‘ والے ’’مک مکا‘‘ دی گل چلی۔ایس گل نوں ذہن وچ رکھدے ہوئے ساڈے ایتھے طے کر لتا گیا کہ امریکہ دے صدارتی انتخاب نوں 2016 وچ جتن دی ’’واری‘‘ ہن ہیلری کلنٹن دی ہے۔ اوہ امریکہ دی پہلی خاتون صدر منتخب ہوکے ’’تریخ‘‘ بنائے گی۔ ایس توں پہلے ایہو جہی ’’تریخ‘‘ اوبامہ نے پہلا افریقی نژاد صدر ہوندے ہوئے بنائی سی۔ ٹرمپ نوں غیر سنجیدہ تے مسخر اثابت کردے شور دے دوران تواتر دے نال بد نصیب ایہہ التجا کردا رہیا کہ اوہ پنجابی محاورے والا ’’بھولا‘‘ تے ہے پر اینا سادہ وی نہیں ۔ذرا غور کرو تے اوہ دیوانہ نظر آندا ہے جو بکار کویش ہوشیار تے ساڈے اک محاورے دے مطابق ’’گھنڈدا پکا‘‘ ہوندا ہے۔ دنیا بھر وچ کتھے وی چلے جاؤ کامیاب ترین کاروباری لوک ٹرمپ ورگے ہی نظر آندے نیں۔ فرق صرف انہاں دے ’’طریقہ واردات دے درمیان ہوندا ہے۔ ٹرمپ دا اصل کمال ایہہ وی ہے کہ اوہ اپنی گفتگو تے ٹوئٹس وغیرہ دے ذریعے تہاڈی توجہ کتھے ہورگلاں ول موڑدے ہوئے اپنے متھے ٹیچے ول بہوں مکاری تے ہشیاری نال ودھدے چلے جاندا ہے۔ امریکی عوام دی اکثریت پچھلے کئی سالاں توں منڈی دی معیشتاں پاروں کھڑچ کنڈل Globalization دی وجہ توں اپنے ملک وچ پھیلدی ہوئی بے روز گاری توں پریشان سی۔ ٹرمپ نے ایس بے روزگاری دا ذمہ وار چین نوں ٹھہرایا۔ تسلسل دے نال ایہہ دعویٰ کردا رہیا کہ چین نے ملک وچ موجود بے تحاشہ آبادی نوں غیر ملکی سرمایے توں اپنے ہاں کھلی صنعتاں لئی سستے مزدوراں وچ تبدیل کردتا ہے۔ امریکہ وچ فیکٹریاں بند ہوئیاں تے بے روز گاری ودھی۔ ایس بے روز گاری نوں میکسیکو یا دوجے ملکاں توں تارکین وطن نے سستی اجرت تے کم کردے ہوئے مزید خوفناک بنا دچھڈیا۔ امریکہ وچ کاروباری عمل نوں مڑ امریکیاں لئی فیدہ مند کرن دا ٹرمپ نے وعدہ کیتا کہ اوہ اپنے ملک وچ چین دی برآمدات دا داخلہ بہت مہنگا بناکے ہولے ہولے ایس نوں ناممکن بنادے گا۔ میسیکو ورگے ملکاں توں کسی نہ کسی طراں امریکہ پہنچ جان والے تارکین وطن نوں وطن لئی ایس ملک دے نال طویل سرحد ی کند کھڑی کردتی جائے گی۔ ٹیکس دے نظام نوں ’’دوستانہ‘‘ بناندے ہوئے امریکی سرمایہ داراں نوں اپنے ہی ملک وچ نویں صنعتاں لان ول لایا جا سی۔ اپنی معیشت دے جموداں تے بدحالیاں تون اڈ 9/11 دے روز توں امریکی عوام دی اکثریت ’’دہشت گردیاں‘‘ بارے وچ بہوں پریشان سی۔ ڈونلڈ ٹرمپ نے بغیر کسی لگی پٹی دے اسلام نوں دہشت گردی دا اصل گھما قرار دتا تے دن رات اسلام تے مسلماناں خلاف بیان تے بیان دیندارہیا۔ صدارتی چوکی سنبھا لدے ہی پہلا فیصلہ وی ایس نے مسلماناں دے اپنے ملک وچ ویزے دے باوجود داخلے نوں ناممکن بنان والا کیتا۔ امریکی عدالتی نظام دی بدولت اگرچہ اجہے فیصلیاں نوں ڈک دتا گیا۔ ایس دے حامیاں وچ پر ایس دے باوجود خوشی دی لہر دوڑ گئی۔ ٹرمپ انہاں نوں اپنے قول دا پکا نظر آیا۔وائٹ ہاؤس پہنچن دے بعد اپنے ابتدائی دناں ہی وچ قول دا پکا ثابت ہون دے بعد ہن ٹرمپ اپنے مڈھلے ٹیچے ول ودھنا شروع ہوگیا ۔ چینی صدر نوں ایس نے اپنے ملک اک عالی شان فارم ہاؤس وچ دیاا تے رلویں ملاقاتاں وچ اخیرطے ایہو ہویا کہ امریکہ تے چین اک دوجے دی لوڑ نیں۔
چین دے نال ’’مک مکا‘‘ دے بعد ٹرمپ نے اپنے پہلے غیر ملکی دورے لئی اسلام دنیا لئی اہم ترین منے جان والے ملک سعودی عرب دسٹاکڈھیا ۔ ہفتے دے دن اوتھے پہنچ کے ایس نے اپنے دورے دا آغاز کردتا ہے۔ ابتدا اک معاہدے توں ہوئی ہے جس دے ذریعے سعودی عرب اپنے دفاع لئی امریکہ توں اک کھرب ڈالر دا جدید ترین اسلحہ خریدے گا۔ آئندہ 15 سالاں وچ 350 ارب ڈالر دی لاگت توں سعودی افواج تے دفاعی نظام نوں جدید ترین تے ناقابل تسخیر بنا دتا جائے گا۔ اک کھرب ڈالر دے سودے طے پاون دی وجہ توں امریکہ دی اسلحہ بناون والیاں کمپنیاں وچ ہن رونق لگ جاسی۔ کئی شفٹاں وچ کم کردے ہوئے سعودی عرب توں آئے آرڈر والا مال تیار کرنا ہوئے گا۔
امریکی معیشت نوں کئی در حقیقت Military Industrial Complex قرار دیندے نیں۔ یعنی ایک ایہو جہی معیشت جتھے جدید اسلحہ دی تیاری تے فروخت اجتماعی معاشی تصویر وچ اصل رنگ بھردی ہے پئی ایہوایس دی رگاں وچ گردش کرن والا لہو ہے۔ ایس نوں زندہ رکھن لئی ضروری آکسیجن۔ ٹرمپ ورگے ’’بھولے‘‘ نے جو اسلام تے مسلماناں دے خلاف مسلسل زہر اگلدا رہیا سی، امریکہ دی جامد ہوئی معیشت نوں Kick-Start دے ذریعے پوری توانائی دے نال بحال کرن لئی سہارا عالم اسلام ہی دے اک اہم ترین ملک دے بے تحاشہ وسائل وچ لبھ لتا ہے۔ ایس دے بعد ایس نوں اک بے وقوف مسخرہ سمجھدے رہنا دانشوارانہ دیانتی ہوئے گی۔ گل محض امریکی معیشت دی بحالیاں تیک کھلوتی نہیں رہی۔ ٹرمپ نے ایہہ چورن وی ویچنا شروع کردتا ہے کہ ’’اسلام‘‘ توں خطرہ صرف امریکہ نوں نہیں سعودی عرب تے دوجے مسلمان ریاستاں نوں وی ہے۔ ’’اسلام‘‘ دے ناں تے بنائے ایس نویں خطرے دے ’’ماخذ‘‘ وی مسلماناں ہی نیں تے اوتھے ’’داعش‘‘ دی صورت وچ دسدے نیں۔ داعش دے بعد آندی ہے واری لبنان دی حزب اللہ، شام دے بشارالاسد تے انہاں سب دے پردھان’’اسلام جمہوریہ ایران‘‘ دی۔ مسلماناں نوں مسلماناں نال لڑان لئی جدید ترین اسلحہ دی تیاری تے فراہمی دے ذریعے امریکی معیشت نوں بھر پور توانائی دے نال بحال کرن والی گیم صرف ٹرمپ ہی سوچ سکدا سی۔ خدارا ایس نوں ہن ’’بھولا‘‘ سمجھنا چھڈ دیو۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels