Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> مندِر مسِیت

مندِر مسِیت

جاوید بُوٹا
May 8th, 2017

پِچھلے مہینے بابری مسِیت تے رام مندِر بارے ہندوستان دی سُپریم کورٹ نے اِک بیان جاری کردیاں دونہاں ڈھانِیاں نوں صلاح دِتی کہ رل بیٹھ کے آپسی وچار وٹاندرے نال ایہہ مسئلہ حل کر لؤ۔ بھولے بادشاہو جے آپسی وچار وٹاندے نال ایہہ معاملہ سَور سکدا تاں ہزاراں زندگِیاں کیوں موت دی جھولی وِچ ہمیشاں لئی جا سوندِیاں۔ سُپرِیم کورٹ دا بیان سُن کے دونہاں ڈھانِیاں دے بیاناں دے تاء نال ہوا پھیر بُہتی تتی ہون لگ پئی۔ ویکھیا جائے، ٹھنڈی تاں ہے ای نہیں سی۔
مندِر مسِیت دا پھڈا پُرانا وی اے تے نواں وی۔ وِیہویں صدی دے اخیری دھاکے وِچ ایودھیا وِچ رام مندر تے بابری مسِیت دا پھڈا اوس پدھر اُتے جا اپڑیا جیہنے صدِیاں پُرانی مسِیت نوں ای پدھریاں کر دِتا۔ ہزاراں اِنساناں دِیاں زِندگیاں دا چڑھاوا لین دے باوجود اوسل وٹے لیندا ای رہندا اے۔
دھرمی کٹڑتا، اُونچ نِیچ اَتے ذات پات دی نفرت دا جھکھڑ جدوں وی جُھلدا اے تاں ایہنوں ٹھلن لئی، ایہدی سیدھ موڑن لئی امن تے شانتی دے نال پیار مُحبت نوں قایم رکھن والے وی ہِک چوڑی کر کے موہرے ہو کھلوندے نیں۔ جِیویں ’عدمِ برداشت‘ دی لہر دے وِرودھ وِچ ہندوستاں دے سُچیت اَتے سُرتے سُوجھواناں اپنے اِنعام تے اپنے ایواڑ سرکار نوں موڑ دِتے سن۔ ایہہ کوئی نِکی موٹی قُربانی نہیں ..... بُہت وڈی قُربانی اے۔
سومناتھ دے مُدے بارے رومیلا تھاپر ہوراں بُہت ہی اُچ پدھری پرکھ پڑچول کر کے تورِیخی حوالیاں دِیاں دلِیلاں دا پہاڑ جیہڈا ڈھیر لیا موہر رکھیا اے۔ اوہناں دی پرکھ پڑچول مُوجب انگریزاں دے آؤن توں پہلاں، محمُود غزنوی نوں بُت شِکن آکھن منن اَتے خاصکر سومناتھ مندِر دی لُٹ مار اَتے توڑ پھوڑ دا رَولا رپھڑ اُکاّ نہیں سی۔ واقع لازمی واپریا سی۔ پر انگریزاں ایس واقع نوں اپنی سیاسی تے حکومتی لوڑاں پاروں، رل مِل کے امن شانتی نال وسدی لوکائی وِچ پُھٹ تے پاڑ پان لئی توڑ مروڑ کے ڈھاڈی سُوجھ نال ورت کے کامیابی کھٹی۔ اتے ایہہ کھٹی انگریزاں توں آزادی بعدوں ساڈِیاں سرکاراں اج تائیں رج رج کے کھٹ رہیاں نیں۔
جِیویں رومیلا تھاپر ہوراں اپنی کِتاب ’سومناتھ‘ راہیں انگریزاں دے ایس تواریخی واقع دے ہنیر وِچ سُورج وانگ چانن کھلاریا اے اوویں ای بابری مسِیت اَتے رام مندِر دے پرسنگ وِچ ’اَمر تِرِپاٹھی‘ ہوراں وی اپنی نِکی جیہی لِکھت راہءں کُجھ توریخی حوالیاں توں گُھنڈٖ چُکیا اے۔ اَمر تِرِپاٹھی‘ جرنلِسٹ نیں، دِلی وِچ رہندے نیں۔ اوہناں نوں ایہہ ٹُٹی بھجی لِکھت ’واٹس اپ‘ راہیں کِسے بھیجی سی۔ اوہناں ایس لِکھت نوں سودھیا، سِدھا پدھرا کِیتا تے لوکاں نال سانجھیاں کرن لئی اگانہہ ٹور دِتی۔ ایس لِکھت وِچوں حوالے لئی کُجھ نقل کر کے سانجھیاں کرن دی تھاں ہندی توں پنجابی وِچ اُلتھا کر کے سانجھیاں کرن لئی موہرے رکھ دینا بہتر اے۔
ایہہ لِکھت جیہڑی اِک نِکیا جیہا دیوا اے۔ ایس دیوے دے چانن وِچ کیہڑا جاندا اے کِیہنوں کِناں کُو سچ جُھوٹھ وکھائی دیندا اے .........؟
رام، ایودھیا، مندِر، مسِیت
امر تِرِپاٹھی
(’امر تِرِپاٹھی‘ ہوراں دے ہندی لیکھ ’رام، ایودھیا، مندر، مسِیت‘ دا پنجابی اُلتھا)
پنجابی اُلتھا:۔ جاوید بُوٹا
ایودھیا دے سارے مندِراں دی عُمر400 - 500 ورھے ہے۔ مطلب ایہہ مندِر اوس ویلے اُسارے گئے، جدوں ہندوستان اُتے مُغلاں جاں مُسلماناں دا راج سی۔
اولّا جیہا جاپدا اے نا!
کِیویں اُسارن دِتے ہون گے مُسلماناں نے ایہہ مندِر ....! اوہناں نوں تاں مندِر توڑن والیاں دے طور تے چتاریا جاندا اے۔ اوہناں دے ہوندیاں اِک پُوراں شہر مندِراں وِچ بدل دا رہیا تے اوہناں کُجھ وی نہ کِیتا ؟؟؟ کیہو جیہے جابر ظالم سن او ؟؟؟ جیہڑے مندِراں لئی زمین دے رہے سن۔ خبرے اوہ لوک جھُوٹھے ہون گے جیہڑے دسدے نیں کہ جِتھے ’ گُلیلا‘ مندر بنیا سی اوہدے لئی زمین مُسلمان حاکماں نے ای دِتی۔
’ دِگنبر‘ اکھاڑے وِچ رکھیا اوہ لِکھتی ثبُوت وی غلط ای ہووے گا جِیہدے وِچ لِکھیا اے کہ مُسلمان راجیاں نے مندِر اُسارن لئی 500 بِیگھے زمین دِتی۔ ’ نِرموہی‘ اکھاڑے لئی نواب سراج اُلدولہ بارے زمین دین والی گل وی سچی نہیں ہووے گی۔ سچ تاں بابر اے تے اوہدی بنائی ہوئی بابری مسِیت!
ہُن تاں تُلسی وی غلط جاپن لگ پئے نیں جیہڑے لگ بھگ 1528 دے اگے پِچھے جمے سن۔
لوکی آکھدے نیں کہ 1528 وِچ ای بابر نے رام مندِر ڈھا کے بابری مسِیت اُساری سی۔ تُلسی نے تاں ویکھی جاں سُنی ہووے گی ایہہ ساری کار گُزاری۔ بابر، رام دی ’جنم ستھل‘ (جمن دی تھاں) نوں ڈھا رہیا سی تے تُلسی لِکھ رہے سن ......
’’مانگ کے کھائیِبو مسِیت میں سوئیِبو‘‘ (منگ کے کھاؤ مسِیت وِچ سونوو)
اَتے پھیر اوہناں نے ’رام چَرِت مانس لِکھ ماری‘۔
رام مندِر دے ڈھین تے بابری مسِیت دے اُسرن دا تُلسی نوں بھور جیہا وی دُکھ نہیں ہویا ہووے گا .....؟
کِتے لِکھیا کیوں نہیں .....؟
ایودھیا وِچ سچ تے جُھوٹھ اپنا آپ کھڑِیچ بیٹھے نیں۔ پنجاں پِیڑھیاں توں مُسلماناں دے اوتھے پُھلاں دے باغ نیں۔ اوہناں دے پُھل سارے مندِراں اُتے اوہناں وِچ وسدے دیوتاواں اُتے .... رام اُتے چڑھائے جاندے نیں۔
مُسلمان خبرے کدوں دے اوتھے کھڑاواں بناؤن دا کم کر رہے نیں۔ رِشی مُنِی، سنیاسی، رام بھگت، سبھ مُسلماناں دِیاں بنائیاں کھڑاواں پہندے رہے۔
سُندر بھوّن مندِر دا سارا پربندھ چار دہاکیاں تائیں مُسلماناں دے ہتھ وِچ رہیا۔ 1949 وِچ ایہدی کمان سنبھالن والے مُنُّومِیاں23 دسنمبر 1992 تائیں اوہدے مینیجر رہے۔ جدوں وی لوکی گھٹ ہوندے تاں آرتی ویلے مُنُّومِیاں آپ کھڑتال وجاؤن لئی اُٹھ کھلوندے۔کیہ اوس ویلے اوہ سوچدے ہون گے کہ ایودھیا دا سچ کیہ اے تے جُھوٹھ کیہ اے؟
اگر والاں دے بنوائے اِک مندِر دی ہر اِک اِٹ اُتے 786 لِکھیا اے۔ ایہدے لئی سارِیاں اِٹاں راجا حُسین علی خاں نے دِتِیاں۔
کِنوں سچ منیئے ..... ؟
کیہ مندِر بنوان والے اوہ اگروال سنکی سن جاں جھلا سی اوہ حُسین علی خاں جیہڑا مندِر لئی اِٹاں دے رہیا سی ..... ؟
***


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels