Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> پانامہ شہرتاں والی این جی او،آئی سی آئی جے نوں 4.5 ملین ڈالر (5 ارب)دی گرانٹ

پانامہ شہرتاں والی این جی او،آئی سی آئی جے نوں 4.5 ملین ڈالر (5 ارب)دی گرانٹ

May 5th, 2017

نویں دنیا دا بوتھا ڈیجیٹل ہے اتے ہر تھاں ڈیجیٹل دی چڑھتل وادھو۔ جداں دنیا وچ کاغذی نوٹ آئے سن تاں ویکھدے ہی ویکھدے دنیا پوری بدل گئی سی اتے ہن ڈیجیٹل والے کاغذی کرنسی نوں مکاون لئی تیار۔کیڈٹ کارڈ (پلاسٹک رقماں) ایس دا نکد جیہا اشارہ۔آئی سی آئی جے نوں پانامہ دی کامیابیاں بعدوں اک وڈے ڈیجیٹل کاروباری نیٹ ورک’’ امیدیار‘‘ نے 4.5 ملین ڈالر (5ارب)دی وڈے رقم دتی ہے۔ ایس نیٹ ورک دے دفتر سلیکون ویلی، بنگلور، جوہانس برگ، لندن، ممبئی، سنگارپور تے واشگٹن ڈی سی وچ نیں۔ ایہہ اوہی کمپنی ہے جس e-bay دا پراجیکٹ چلایا سی تے آن لائن آکشناں دی ریت پائی سی۔ دنیا نوں نواں بوتھا دین والی ایس کمپنی ڈیجیٹل دنیا وچ 1995 توں 2002 دے درمیان انقلاب لیایا سی اتے 2002 تیک ایہہ پورپ وچ ڈیجیٹل کاروبار دی وڈی سائٹ’’ ای بازار‘‘ تے پلاسٹک منی دے عالمی گھمے Pay Pall دی مالک سی۔ ڈیجیٹل کاروباریاں نوں آئی سی آئی جے وچ کیہ دلچسپی ہے کہ ایہہ گل سمجھن والی ہے۔ امیدیار اک امریکی ایرانی ہے جس نے ایہہ کم 1995 توں شروع کیتا سی۔ جیہڑا 4.5 ملین ڈالر گرانٹ وچ دے سکدا ہے اوہ آپ کڈا وڈا کاروبار کردا ہوسی ایہہ سمجھنا زیادہ اوکھا نہیں۔ کیہ دنیا ڈیجیٹل تے نان ڈیجیٹل (روائیتی) کاروباراں وچ ونڈی جاچکی ہے؟ کیہ امیدیار والیاں ایہہ رقم دے کے آئی سی آئی جے نوں اپنے ول منہ کرن توں ڈکیا ہے؟ ایہہ گل کون منے گا کہ امیدیار نرا آزاد میڈیا دا حمائیتی ہے۔ ایس توں پہلاں e-bay ولوں وی آئی سی آئی جے نوں پانامہ توں پہلاں پورے 100 ملین ڈالر دی امداد مل چکی ہے۔ ایس گرانٹ دے اعلان توں بعدوںآئی سی آئی جے والیاں دا آکھنا ہے کہ اساں ہن زیادہ آزاد کم کراں گے تے ساڈی تفتیشاں تیز ہون گیاں۔ ایہہ گلاں تے معلومات آئی سی آئی جے والیاں دی ویب سائٹ تے موجود نیں۔ انہاں ایہہ گل لکھی ہے کہ45لکھ ڈالر ڈیجیٹل کمپنی نے آزاد صحافت لئی دتے نیں۔
آئی سی آئی جے ورگی این جی او ہوئے یا فریڈم ہاؤس ورگی، انہاں نوں ایڈی وڈی فنڈنگ کون، کیوں کردا ہے؟ ایس فنڈنگ دی تفتیشاں کدی کسے نیں کیتیاں نیں؟ پہلاں میڈیا سرکار تے اشتہاری کمپنیاں دا غلام سی تے ہن وڈے وڈے کنسورشیم میڈیا نوں چلان گے؟ ایہہ سب تفتیشی صحافت دا نواں بوتھا ہے اتے ایس نوں اخلاقیات راہیں وادھا دین دی کوششاں ہورہیاں نیں۔ ایہہ وطنی ریاستاں دی اشرافیہ تے خود انہاں ملکاں نوں کنسوریشم تھلے لانا چاہندے نیں؟ اجہے بہوں سارے سوال اج ساڈے سامنے نیں۔جے ذرا غور نال ایس نویں کاروبار نوں ویکھو تاں پتہ چلدا ہے صاحب جی ایڈے دیالو کیوں ہو رہے نیں۔ہر کم پچھے مفاداں دی کہانی وادھو۔ایس وڈے مفاد وچ جے کوئی ’’عوامی مفاد‘‘ ہے تے سانوں تے اوس تے ہی نظر رکھنی ہے۔پر ایہہ نظر اوس ویلے کارگر ہو سی جداں تہاڈی پورے عمل بارے سمجھ ہو سی۔ایس سب کم دا الارڈیجیٹل کارویہار ول ہے جس نوں ماحولیات دا ایجنڈا وی سوٹ کردا ہے تے شفافیت دا وی۔دنیا وچ وڈے وڈے ڈونر اج کل ایہہ دو ایجنڈے ہی چلا رہے نیں۔اک نکی مثال کاغذ خلاف مہماں دی کہ کنڈل تے ڈیجیٹل ول دنیا تیزی نال ودھ رہی ہے ۔کاغذ پاروں درخت کٹے جاندے نیں تے ایہہ مہم بڑے بڑے چلا رہے نیں۔ہر شئے دا ریکارڈ رکھن لئی ایس نوں ڈیجیٹل کرو تے دنیا ایس دے مگر ہو چکی ہے۔پچھلی چار دہائیاں توں ڈیجیٹل کارویہار کتھوں کتھے اپڑ چکیا ہے۔شفافیت تے ماحولیات دا ایجنڈا جڈا اگے ودھ سی اوس نال ڈیجیٹل کارویہارنوں فیدے ہون گے۔جداں ٹرمپ ماحولیات دا مذاق اڈاندا ہے یا پیرس کانفرنس نوں نہیں منیندا تے اوس پچھے وی اک کہانی ہے۔کریڈٹ کارڈ توں سوشل میڈیا تیک ڈیجیٹل دی برکات توں اک دنیا جھلی ہو چکی ہے۔لوکاں تے صحافیاں نوں ایس وچ فیدہ اوسے ویلے ہوسی جداں انہاں نوں ایس سارے کھیڈ دا چانن ہوئے گا اتے مفاداتی گروہاں دی اتھل پتھل نوں وی اوہ سمجھدے ہون گے۔ہن ڈیجیٹل پاروں تے وڈیاں جسوسیاں وی ہو رہیاں نیں تے ایس بارے خبراں آندیاں رہندیاں نیں تے ہیکراں دی کہانیاں ہوشربا نیں۔اینج جاپدا ہے کہ جیہڑا کم سلیکون ویلی توں شروع ہویا سی اوہ نویں صدی دے دوجے دہاکے وچ اپنا رنگ کڈھ رہیا ہے۔ ایس رنگ وچ کون کون رنگیا جاندا ہے اتے ایس نال عام لوکاں نوں تے صحافتاں نوں کڈے فیدے ہوندے نیں ایہہ ہلے اک وڈا سوال ہی ہے۔
Link of the grant news
https://www.icij.org/blog/2017/04/omidyar-network-grants-45m-support-icij-projects


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels