Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> صوبیاں دے تحفظاں نوں دور کرنا ہوسی!

صوبیاں دے تحفظاں نوں دور کرنا ہوسی!

May 5th, 2017

صوبیاں بارے اج اک چنگا اداریہ لکھیا گیا جس وچ مشرقی پاکستان توں سبق سکھدے ہوئے 1973دے آئین وچ صوبیاں نوں جوڑن دے ویژن دی گل چھوئی گئی۔پر لکھاری ایہہ گل بھل گئے کہ پہلے 23سال ساڈی ریاست وڈے صوبے نوں اوس دا حق دین دی تھاں ون یونٹ ورگے کھیڈ کھیڈدی رہی اتے 1971توں بعد وی ایہو کھیڈ جاری ہے۔پہلے مشرقی بنگال سی تے بعد وچ پنجاب کہ ایس صوبے دی کنتری زیادو ہونا یا پنجابیاں دا پاکستان وچ 65 فیصدی ہونا بہوں ساریاں نوں کھلدا ہے۔صوبے نوں ونڈن دی گل وی بعد وچ شروع کیتی گئی۔پنجابی زبان نوں تے اج تیک منیا نہیں پر ایس دے لہجیاں نوں منن لئی ہر کوئی تیار ہے۔مرکز تے اسلابادی ادارے اک وڈے صوبے توں کیوں ڈردے نیں؟ دنیا دے بہوں ملکاں وچ وڈا صوبہ ہوندا ہے۔اجہے دانشور وادھو جیہڑے پنجاب نوں ونڈن دی گل نوں جمہوریت دے وادھے نال جوڑی بیٹھے نیں۔انہاں نوں کوڑ لکھنو پیکٹ تے اوس دے خلاف پنجابی تے بنگالی مسلماناں دی جدوجہداں یاد نہیں کہ زبردستی کسے اکثریت نوں اقلیت تے اقلیت نوں اکثریت وچ ونڈن دی گل نال جمہوریت ہور ماڑی ہو سی۔وفاق، وفاقی اداریاں تے صوبیاں وچ جیہڑا فرق ہے اوس نوں پنجاب تے پنجابیاں دے کھاتے پانا، مسلیاں نوں کراہے پان والی گل ہے۔جے اساں پنجابی پنجاب دے 1947والے قتلام نوں بھل وی جائیے تاں جو کجھ پنجاب دے پانیاں نال اک ڈکٹیٹر کیتا اوہ کسے ہور صوبے نال نہیں ہویا۔کیہہ پنجابیاں نوں اپنے حصے پاروں نوکریاں ملدیاں نیں۔کالا باغ ڈیم دی سیاست گواہ کہ ایتھے وفاق نے تن تے اک صوبے دی لڑائیاں کروا کے رانجھا راضی کیتا۔جداں پنجابیاں نوں دوجے صوبیاں وچ ماریا جاندا ہے تے سب سنے ترقی پسند تے سیکولر، لبرل چپ رہندے نیں۔18ویں ترمیم بعدوں جے کوئی ہور صوبہ کجھ کم نہیں کر سکیا تے اوہ پنجاب دا قصور کیوں؟وفاق نوں صوبیاں وچ پاڑ دی تھاں ملن ورتن ودھان لئی کم کرنا لوڑی دا ہے۔ہن تساں جنگ دا اداریہ پڑھو۔

پانی، بجلی تے گیس دے منصوبیاں تے سندھ، خیبر پختونخوا تے بلوچستان دے تحفظاں پاروں منگل 2 ،مئی 2017 نوں وزیر اعظم سیکرٹریٹ اسلام آباد وچ مشترکہ مفادات کونسل دے 31 ویں اجلاس تاں مارے چنگا کم ہیکیونجے ایس وچ وفاق ولوں ساریاں صوبیاں نوں متھے کوٹے پاروں حقوق دین تے کسی صوبے نال زیادتی نہ ہوندا پک کروایا گیا۔ وزیراعظم نواز شریف دی پردھانی وچ 5 مہینیاں بعد ہون والے اجلاس دے ایجنڈے دی12 وچوں زیادو ترایٹماں تے گل بات نہ ہوسکی پر ملک وچ جاری سیاسی فضا تے آئے روز سامنے آن والی ہنگامی صورتحال وچ ایس اجلاس داہونا وڈی گل ہے سگوں ایس وچ کیتے جان والے فیصلیاں نوں بڑی حد تک اطمینان بخش آکھیا جاسکدا ہے۔ امید کیتی جانی چاہیدی ہے کہاک دو ہفتیاں تیک باقی ایجنڈے لئی دوجا اکٹھ وی ہو سی اتے ہور ماملیاں نوں آئینی تقاضیاں پاروں اگلے اجلاس وچسامنے لیایا جائے گا۔ پاکستان اک وفاقی ریاست ہے ایس لئی ایس وچ چاراں صوبیاں دی اکوجہی نمائندگی دی حامل ’’سینیٹ‘‘ دی طراں انہاں اداریاں دی وی خاص اہمیت ہے جو وفاقی اکائیاں دی آپسی شکایتاں یا مرکز توں ہون والے تحفظاں نوں دور کرن دا ذریعہ نیں۔ کونسل آف کامن انٹرسٹ (سی سی آئی) وی انہاں اداریاں وچ ہے جہناں نوں اسارنا مشرقی پاکستان بعدوں ضروری سمجھیا گیا سی۔ بلاشبہ ایہہ ایہو جہیا ادارہ ہے جہناں دے اجلاساں نوں تے جنگی حالات وچ وی نظر انداز نہیں کیتا جانا چاہیدا۔ ایہو جیہی صورت وچ کہ دو صوبیاں سندھ تے پنجاب وچ اپوزیشن پارٹیاں تے بلوچستان وچ حکمران مسلم لیگ (ن) دے نال دوجیاں جماعتاں دی سانجھی حکومت قائم ہے، صوبیاں دے تحفظاں نوں دور کرن دی لوڑ زیادہ ودھ جاندی ہے۔ منگل دے دیہاڑ ہون والے اجلاس وچ چاراں صوبیاں دے وزرائے اعلیٰ دے علاوہ خزانہ سمیت اہم وفاقی محکمیاں دے وزیر موجود سن۔ اجلاس وچ ملک بھر وچ جاری چھوِیں مردم شماری تے اطمینان دا اظہار کیتا گیا۔ مردم شماری دے نتائج دی بنیاد تے قومی و صوبائی اسمبلیاں دی نشستاں تے دوجی سہولتاں دی مڑ پڑچول دے حوالے نال قنونی اقدامات دے کسی شیڈول بارے تاحال کوئی گل بات معلوم نہیں ہوسکی۔ سندھ، خیبر پی کے تے بلوچستان دے وزارئے اعلیٰ نے پانی، بجلی تے گیس دے منصوبیاں تے جیہڑے تحفظات دا اظہار کیتا امید ہے انہاں تے وفاق ولوں کرائی گئی یقین دہانیاں وچ مناسب پیش رفت سامنے آئے گی تے ایس گل نوں یقینی بنایا جائے گا کہ کونسل آف کامن انٹرسٹ دے دائرہ کار وچ آن والے امور تے دوجیاں فورماں تے فیصلے کیتے جان۔ پانی دی کمیابی کراچی سمیت پورے سندھ وچ خاصی شدت توں محسوس کیتی جارہی ہے۔ پانی دی فراہمی وچ اضافے ،دستیاب وسائل نوں بہتر طور تے بروئے کار لان تے بین الاقوامی سفارت کاری دے ذریعے بھارت تے افغانستان دے نال ایسی جامع آبی پالیسی تے اتفاق رائے پیدا کرن دی اہمیت ودھ گئی ہے جس وچ ایس گل دا لحاظ رکھنا ہوئے گا کہ ملک وچ ودھدی ہوئی آبادی لئی صاف پانی مناسب مقدار وچ فراہم کرنا ممکن ہوئے۔ برقی پیداوار دے انتظاماں نوں یقینی بنائے جا سکن تے زراعت و صنعت دی ترقی متاثر نہ ہوئے۔ گیس، تیل تے پانی دے منافع دی ادائیگی تیل و گیس پیدا کرن والے علاقیاں دے قریبی دیہات نوں گیس فراہم کرنا، ایل این جی سمیت گیس دی منصفانہ تقسیم، موسمی وٹاندرے دے اثر نال نبڑن دے مسائل ایس قدر اہم نیں کہ انہاں دے حل لئی اک اک لمحے نوں غنیمت سمجھنا چاہیدا ہے۔ ایہہ گل پلے بنن دی ہے کہ منصوبیاں تے عملدرآمد وچ غفلتاں توں جتھے انہاں دے فیدے ملن وچ دیرہوندی ہے اوتھے ٹیکس دین والیاں تے خرچیاں دا دباؤ وی ودھ جاندا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels