Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> میرے کجھ یار جلدیاں وچ نیں۔۔۔نصرت جاوید

میرے کجھ یار جلدیاں وچ نیں۔۔۔نصرت جاوید

وچار ڈیسک
May 4th, 2017

نواز شریف نال انھی نفرت وچ مبتلا میرے کجھ یار ہورے کیوں ایہہ حقیقت سمجھن نوں تیار ہی نہیں ہورہے کہ ’’مقدر دا سکندر‘‘ اکھواندے ساڈے وزیراعظم انہاں دناں سیاسی حوالیاں توں اپنے کمزور ترین لمحیاں توں لنگھ رہے نیں۔ 2016 دے اپریل توں انہاں دے سر تے پانامہ دستاویزاں والی بلا نازل ہوگئی سی۔ ایس دی وجہ توں اخیر شریف خاندان نوں وکلیاں راہیں اپنی تِن نسلاں دی دولت تے اثاثیاں دے بارے سپریم کورٹ دے روبرو وضاحتاں دینا پیاں۔ ساڈی وڈی ترین عدالت وچ بیٹھے منصف ایس ضمن وچ دتے جواباں توں راضینہیں ہوئے۔ اخیر انہاں چھ مختلف ریاستی اداریاں تے مشتمل اک JIT بناون دا فیصلہ کیتا۔ ایس کمیٹی وچ صرف افواج پاکستان دے چیف نوں جوابدہ دو اداریاں دے نمائندیاں نوں وی رلتی کیتا جائے گا۔ ایہہ کمیٹی ہر دوجے ہفتے بعدوں سپریم کورٹ نوں اپنی کھوج وچ بارے دسن دی پابند ہے۔ ایس کمیٹی لئی اپنا کم مکمل کرن دی مہلت وی بہوں گھٹ ہے۔ صرف 60 دن۔
ایہہ 60 دن شریف خاندان نوں ہمہ وقت کٹہرے وچ کھڑا رکھن گے۔ غلطی دی ایتھے کوئی گنجائش ہی نہیں۔ سپریم کورٹ نوں اپنی جانب توں چکے گئے سوالاں دا تسلی بخش جواب نہ ملیا تے نواز شریف دے کول وزارتِ عظمی توں مستعفی ہون دے علاوہ تے کوئی رستہ باقی نہیں بچے گا۔ وزارت عظمی توں فراغ ہون دے بعد انہاں دے خلاف کئی مقدمے وی بنائے جاسکدے نیں۔ پاکستان دی تریخ وچ لہذا پہلی وار کوئی ایسی صورت بن دی ہوئی نظر آرہی ہے جتھے اک صاف تے شفاف نظر آن والے عدالتی عمل دے ذریعے ایس ملک دا تیجی وار وزیر اعظم منتخب ہون والا سیاست دان نہ صرف اپنے عہدے توں الگ بلکہ مزید سیاسی تے اخلاقی رسوائی تے تنہائی دا شکار وی ہوسکدا ہے۔ ایس موقعہ تے ناں نہاد ’’ڈان لیکس دی وجہ توں لگی اگ دے شعلے نوں ہوا دے کے پاک فوج نوں ’’نواز شریف نوں سبق سکھان‘‘ لئی اکسان دی کوئی لوڑ نہیں۔ نواز شریف نال انھی نفرت وچ مبتلا میرے چند دوست پر جلدی وچ نیں۔ انہاں دی کاوشاں دی بدولت عسکری قیادت نے جے قدم اگے ودھا لتا تے ’’استعفیٰ‘‘ وی نہیں ملے گا۔ کجھ ہور ہی ہوئے گا۔ کجھ ہور ہویا تے مینوں یقین ہے کہ پاکستان دے سارے وڈے شہراں وچ مٹھائیاں وی ونڈیاں جان گیاں۔ چند ہی مہینیاں بعد قرۃالعین حیدر دے اک ناول وچ چکیا سوال قوم نوں بے چین کرنا شروع کردے گا۔ جی ہاں اوہی ’’ایہہ تے ہوگیا تے ہن کیہ؟‘‘ والا سوال۔ سیاست دا اک ادنی طالب علم ہوندے ہوئے میں ہر گز ایس دعوت توں اتفاق نہیں کردا کہ پاکستان ’’بدل‘‘ چکیا ہے۔ ایتھے مارشلا لان دی گنجائش باقی نہیں رہی۔ ساڈے صحافی پھنے خان ایس طراں نہیں ہون دین گے تے عدلیہ ایس نوں نگلن لئی ہرگز تیار نہیں ہوئے گی۔ ماؤزے تنگ نے اپنی سیاسی جدوجہد نوں ’’انقلابی‘‘ بناندے ہوئے چین دی عوام نوں یاد دوایا کہ Political Power Grows out of the Barrel of a Gun اور Gun ایس ملک وچ نواز شریف ایسے سیاستداناں دے کول نہیں ہوندی۔ معاملہ جد ’’تخت یا تختہ‘‘ دی صورت اختیار کرلے تے فتح اخیر ہاکیاں والیاں دی ہی ہوندی ہے۔ پاکستان وچ جمہوری نظام دے تسلسل دے یقینی ہون دا دعویٰ کردے ہوئے 2017 دے عالمی حالات دا وی بہت ذکر ہوندا ہے۔ اینج کردے ہوئے اسی مصر تے تھائی لینڈ نوں بھول جاندے ہاں۔ ’’انسانی حقوق‘‘ ہن ناں نہاد عالمی دنیا نوں پریشان نہیں کردے۔ مصر دے فوجی آمر نال ملاقات دے بعد دنیا بھر وچ این حقاں دے رکھے سمجھے جان والے ملک دے صدر ٹرمپ نے ہن فلپائن دے صدر نوں اپنے ہاں آن دی دعوت دتی ہے۔ ایہہ شخص جمہوری عمل پاروں وڈی اکثریتاں نال چنیا گیاسی۔ اقتدار سنبھالدے ہی ایس نے فلپائن وچ امن و امان نوں یقینی بنان والے اداریاں نوں ایہہ ختیار دتا کہ اوہ منشیات فروشاں تے سٹریٹ کرائم دے عادی افراد نوں کسی وی عدالتی نظام توں گذارے بغیر جتھے ویکھن گولی مار دین۔ سینکڑاں ماورائے عدالت قتل کران دے باوجود صدر ایس وقت ٹرمپ دی لوڑ ہے۔ اگرچہ ایس فلپائنی صدر نے اوبامہ نوں سرعام فحش گالاں وی دتیاں سن۔ ٹرمپ دے وائٹ ہاؤس پہنچ جان دے بعد امریکہ اک وار فیر افغانستان وچ استحکام لئی کجھ کرن دی بے چینی وی محسوس ہونا شروع ہوگئی ہے۔ پاکستان دا ایس ضمن وچ کردار کلیدی ہے تے ایہہ کردار صرف ساڈی عسکری قیادت دی معاونت ہی توں ادا کیتا جاسکدا ہے۔ میں ایہہ گل تسلیم کرن نوں لہذا ہر گز تیار نہیں کہ پاکستان دے پڑھے لکھے تے متوسط طبقات دی آزادی رائے توں لگن تے عالمی حالات رل مل کے ایس ملک وچ جمہوری نظام دے تسلسل نوں یقینی بناندے نیں۔ پاکستان پر مصر وی نہیں ا،سرائیل جس دا ہمسایہ ہے۔ ساڈے ہمسائے بھارت دی صورت اک ازلی دشمن موجود ہے۔ ایس ملک وچ بھاری اکثریت دے نال منتخب ہویا وزیراعظم چھاتی پھلا کے پاکستان دے علیحدگی پسنداں دے نال یگانگت دا اظہار کردا ہے۔ برہان وانی دی وحشیانہ ہلاکت دے بعد توں بھارتی فوج تے حکمران مقبوضہ کشمیر دے نہتے بچے تے بچیاں نے مسلسل جدوجہد دی بدولت درندہ صفت قابض قوت ثابت کردتے گئے۔ بھارت تے خاص کر ایس دے ہندی بولن والے علاقیاں وچ انہاں دناں ہندو انتہا پسندی فسطائی جنون دی شکل اختیار کرچکی ہے۔ گاؤ ماتا دی حرمت دے ناں تے مسلماناں نوں قتل کرنا تقریباً روزدے واقعات بن چکے نیں۔ ہندو انتہا پسندی تے مشتمل جنون نے دنیا دی سب توں وڈی جمہوریت تے سیکولر ہون دے دعوے دار India Shining دی حقیقت عیاں کردتی ہے۔ انہاں تلخ حقیقتاں توں توجہ ہٹان لئی مودی نوں پاکستان دے خلاف جنگی جنون نوں ہوا دین دی بہوں لوڑ ہے۔ ایس موقع تے پاکستان لئی ضروری ہے کہ اوہ دنیا دے سامنے اک متحد ملک نظر آئے جتھے ساریاں مشکلات دے باوجود اک جاندار جمہوری نظام موجود ہے۔ آزاد صحافت ہے تے اشرافیہ دا احتساب کرن والی عدلیہ۔ عسکری قیادت نوں سیاسی نظام دے خلاف اکساندے ہوئے میرے عزیز ہم وطناں دی خواہش کرن والے میری ناقص رائے وچ نواز شریف توں انھی نفرت دی وجہ نال انگریزی والی Big Picture نوں دیکھ نہیں پا رہے۔
انہاں نوں اپنی خاہشاں نوں لگام پانا چاہیدا ہے۔ صبر کرو تے نواز شریف نوں صرف تے صرف عدالتی تے سیاسی ذرائع توں اپنے انجام تک پہنچن دین۔ ’’قدم ودھاؤ‘‘ والا معاملہ ہوگیا تے کسی نوں نہ تے پانامہ یاد رہے گاتے نہ ہی ڈان لیکس۔مسرت نذیر دے گائے اک گیت والا ’’نوا پواڑا‘‘ متعارف ہوجائے گا۔ ایس ’’پواڑے‘‘ دا پہلا شکار، یقین منو انہاں دناں وچ ساڈی سکریناں تے بہت ہی بلند آہنگ تے حق گو نظر آن والے افراد ہون گے تی اخیر ’’تبدیلی‘‘ والیاں دے ہتھ وچ کجھ نہیں آئے گا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels