Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ایہو جیہی کوئی گل ہے جو چپ لگی جے منو بھائی

ایہو جیہی کوئی گل ہے جو چپ لگی جے منو بھائی

وچار ڈیسک
May 3rd, 2017

طیب اردگان نے ہندوستانی حکمراناں نوں بہوں قیمتی مشورہ دتا ہے کہ اوہ پاکستان نال کشمیری جھیڑے بارے گل بات دے معاملے نوں اگے ودھان۔ سیاسی ماملیاں تے گل بات دا سلسلہ جارہی رہنا چاہیدا ہے۔ پکی گل ہے کہ ہندوستان دے حکمراناں نوں سیاسی ماملیاں دی سمجھ ہوئے گی پر کسی شاعر نے آکھیا ہے کہ ’’کچھ ایسی ہی بات جو چپ ہو، ورنہ کیا بات کرنا نہیں آتی‘‘ ہندوستان دے حکمران گل کرنا جاندے نیں تے بڑیاں گلاں کرسکدے نیں۔ انہاں نے تاشقند معاہدے دے ویلے بہت گلاں کیتیاں ہونیاں نیں۔ شملہ معاہدہ دے ویلے وی بہت گلاں کیتیاں ہونیاں نیں۔ پر کشمیری مسئلہ تے گلاں کجھ زیادہ دور نہیں جاندیاں کیونجے گل کرن توں پہلے ہی ’’اٹوٹ انگ‘‘ گلاں دی راہ وچ رکاوٹ بن جاندا ہے تے گل اگے نہیں ودھدی۔ بھارت ماتا دا پنجاب، سندھ، بلوچستان، سرحد وی اٹوٹ انگ ہویا کردے سن پر 1947,1946 دے سیاسی طوفان وچ ایہہ سارے انگ ہندوستان توں ٹٹ کے پاکستان نال جاملے۔ 1947 دے بعد دے ستر سالاں وچ ایس طراں دا کوئی ہور سیاسی ہون دی لوڑ سی جس وچ ریاست جموں و کشمیر دا اٹوٹ انگ وی اپنے لوکاں دی خاہش تے آرزواں پاروں پاکستان دے نال مل جاندا تے اینج پاکستان وی پورا ہوجاندا تے کشمیریاں دی لکھاں جاناں دی قربانیاں وی کامیابی دا مرحلہ طے کردیاں۔ کشمیر دے مسئلے تے گل بات توں گریز کرن لئی بھارتی حکمران آتشیں اسلحہ تے بربادی دے دوجے سارے وطیرے اپنے آل دوال تے اپنی حفاظتاں لئی جمع کررہے نیں تے جاندے نیں کہ ایہہ اسلحہ تے بربادی دا سامان تے ایٹمی ذخیرہ نہ تے روس دے کم آیا سی ،نہ چین دے کم آیا تے ہندوستان دے کم وی نہیں آسکدے۔ انہاں ساریاں انتظاماں دے اُتوں وقت دا فیصلہ اپنا کم کر جائے گا۔ کشمیر تے کشمیری ہندوستان دی غلامی توں نکل جاون گے۔ پاکستان دے نال شامل ہوجاون گے تے ہندووستان دے حکمران اپنے دوجے ’’اٹوٹ انگاں‘‘ نوں بچان دی کوشش وچ لگ جان گے پر انہاں دی حالت غریب کساناں طراں ہوجائے گی جس دے سر تے گناواں دی گٹھڑی تیزندی دے اندروں لنگدے وقت اپنے آپ کھل جائے گی تے ایس گٹھڑی نوں سنبھالن وچ مشکل پیش آئے۔ سال 1971 وچ ذوالفقار علی بھٹو نے آکھیا سی ہے کہ ہندوستان نے پاکستان دی سالمیت تے حملہ کرکے خود اپنے ملک دی سالمیت دے نال دشمنی دا مظاہرہ کیتا ہے۔ ہندوستان دنیا دی سب توں وڈی جمہوریت ہون دے خواب توں جاگن وچ کامیاب ہوجائے ،پر ہورے نہیں،اوہ وی ویلہ لنگھ گیا ہے۔
Courtesy Jang


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels