Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> اک خش فہمی نوں میں وی اپنے اندر پال رہیا واں

اک خش فہمی نوں میں وی اپنے اندر پال رہیا واں

منو بھائی
April 30th, 2017

انج لگدا ہے کہ میں انہاں دناں وچ اک خش فہمی وچ مبتلا واں تے ایہہ خش فہمی مینوں اپنے آپ نوں اک ذمہ وار تے اہم شخص سمجھن تے وی مجبور کررہی ہے تے ایہہ گل عام طور تے بہت چنگی لگدی ہے ۔خش فہمی ایہہ ہے کہ مغلاں دے جنرل ضیا الحق دی خوخصلت رکھن والے اک شہنشاہ اورنگزیب عالمگیر دی بہت جذباتی تے خفیہ شاعری فرمان والی شہزادی زیب النسا دے بنائے لہور دے چوبرجی پارک وچ پختہ سڑکاں دی تعمیر دا کم ہن میری فرمائش یا درخاست نال شروع کیتا گیا تے اندازہ ہوندا ہے کہ ایہہ لہور وچ اورنج ٹرین دے منصوبے دے اہم ترین ٹیشناں وچ رلتی ہوئے گا۔ میرے علاوہ لہور دے ہور دوجے بے شمار لوکاں نوں ایہہ اندیشہ لاحق سی کہ اورنج ٹرین منصوبہ وی کالاباغ دے منصوبے دی طراں اپنی تکمیل نہیں ویکھ سکے گا۔ کیونکہ ایس منصوبے نوں تیار کرن یا سوچن والیاں دی راہ وچ چند پرانے برساتی نالے وی حائل سن جہناں دی مرمت یا تعمیر ول کوئی خاص توجہ نہیں دتی جارہی سی تے ایہہ تعمیر تقریباً دوسال دے عرصے جاری رہی۔ انہاں برساتی نالیاں اوتے چھتاں تعمیر کرکے انسانی نگاہواں توں اوجھل کردتا گیا جس طراں کرپشن تے بددیانتی دی انتہائی خوفناک کار گزرایاں نوں محتسب اداریاں دی نگاہواں توں اوجھل کردتا جاندا ہے تے حکمراناں دی خوشنودی تے شاباش یا وزارت حاصل کیتی جاندی ہے۔ ایس دے بعد اورنج ٹرین لئی ریلوے لائن وچھان دا کم شروع کیتا گیا۔ علاقے دی اکھاڑ پچھاڑ شروع کردتی گئی جس توں سب توں زیادہ خطرناک انداز وچ متاثر ہون والیاں وچ دمہ تے سانس دی دوجیاں بماریاں وچ مبتلا لوک آئے۔ علاقے دے بے ناں بچے تے بچیاں دا دمہ تے سانس دی دوجی بماریاں وچ مبتلا لوکاں دے بعد سب توں زیادہ انہاں دی صحت تے تعلیم دا نقصان وی سی۔ بہت سارے بزرگاں دی طراں قدرت انمول کھلونے تے پھول جیہڑے بچے ہوئے نیں اورنج ٹرین دے منصوبے دی تعمیر دی زد وچ آکے شہید ہوگئے جہناں وچوں کئیاں نوں میں ذاتی طور تے جاندا ہاں تے قوماں دی تعمیراتی زندگی وچ ایس نوعیت دے حادثات ہوندے ہی رہندے نیں جہناں تے حکومت کسی قسم دے الزام دے بوجھ نوں کجھ زیادہ محسوس نہیں کردی۔ آپ میں وی کجھ زیادہ محسوس نہیں کردا کیونکہ حکومت پاکستان دے خادم اعلیٰ میری بماری تے ناسازی طبع دے دناں وچ سرکاری خرچے تے میرا علاج کروان دا مظاہرہ فرماچکے نیں۔ اورنج ٹرین دی تعمیراتی سرگرمیاں وچ اک توں بعد دوجی تعطل دے لمے لحات انسانی تریخ توں ساڈی بے پناہ محبت دی وجہ توں آندے رہیں نیں تے انشااللہ اگلے عام انتخاب توں پہلے وی آندے رہن گے۔ دراصل پاکستان اک ایسی سوہنی دھرتی تے بنیا ہے کہ جس تے پچھلے اٹھ ہزار سالاں دی تریخ ہے جو مہر گڑھ دی تہذیب توں شروع ہوکے میاں نواز شریف دے گھر دی تہذیب تو ہوندی ہوئی سی پیک دی تہذیب توں وی اگے چلی جائے گی۔ اپنے بزرگاں تے غیراں دی تہذیب توں لنگن دی قیمت وی ادا کرنی پیندی ہے۔ پنجاب دے خادم اعلیٰ میاں شہباز شریف وی ایہو قیمت ادا کررہے نیں۔ شہنشاہ اورنگزیب عالمگیر، زیب النسا تے مغلاں دے دور وچ تعمیر ہون والی عمارتاں نوں تحفظ فراہم کرن والے تے رب کول جاچکے نیں پر مغلاں دے دور وچ تعمیر ہون والی عمارتاں نوں تحفظ فراہم کرن والے قوانین ہن لاگو سمجھے جاندے نیں۔ انہاں قنوناں دے تحت سکھ مہاراجہ رنجیت سنگھ تے انہاں دے عزیزاں دی پراپرٹی دے علاوہ شہزادی زیب النسا دے چوبرجی پارک دی حفاظت کیتی جارہی ہے جس دا ہن صرف اک دروجا رہ گیا ہے تے ایس دروجے دے چار برجاں وچوں اک برج دریائے راوی دے سیلاب ڈیگ دتا سی۔ پر دریا دے خلاف کوئی کاروائی نہیں ہوسکدی سی۔ پر ہن ایس تریخی طور تے حفاظت وچ لے لتے گئے چوبرجی چوک وچوں اورنج ٹرین لنگے گی تے آن والیاں عام چوناں تے نواز شریف دی وزارت عظمیٰ دے چوتھے دور دے شروع ہون توں پہلاں ایہہ منصوبہ مکمل ہوجائے گا جس دا 2013 دی چوناں والے منشور وچ کوئی ذکرنہیں پایا جاندا سی۔
Courtesy Jang
Link of previous column
http://www.wichaar.com/news/119/ARTICLE/32846/2017-04-26.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels