Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> یورپ دا سیر سپاٹا

یورپ دا سیر سپاٹا

تنویر زمان خان
April 28th, 2017

میں لندن وچ رہندا ہاں تے ویکھیا اے کہ ایتھے سارے یورپیاں وچ دو تِن مہینے کم کرکے ہفتے لئی چھٹیاں تے جان دا بہت رواج ہے۔اوہ چھٹیاں پاروں ملک دے وچ تے ملکوں باہر وی جاندے نیں۔ اے ذہن تے جسم لئی بڑی چنگی عادت ہے۔ ساڈے دیسی لوکاں وچ اے عادت ذرا گھٹ ہے۔ اے زیادہ توں زیادہ سال وچ اک واری پاکستان دا پھیرا لا لیندے نیں۔ میرے بچیاں نوں ہالیڈے دا یورپی لوکاں دی طراں ہی شوق جے تے اکثر مینوں وی نال کھسیٹ کے لے جاندے نیں۔ خیر ہفتہ پہلے اساں سارے سوہیٹرز لینڈ تے اٹلی ویکھن گئے۔ اونجھ تے اے ملک پہلے وی پھرے ہوئے سن۔ پر ایس دفعہ بچیاں نے انہاں مُلکاں دے اوہ حصے چُنے جتھے ساڈے دیسی لوک گھٹ جاندے نیں۔ اسی اٹلی دے شہر ورونا verona گئے جیہڑا رومیو تے جیولیٹ دا شہر آکھیا جاندا ہے۔ ایہنوں پیار محبت دا شہر وی آکھیا جاندا ہے۔ ایتھے جیولیٹ دا گھروی ہے، گھر کیہ پورا محل ہے کیونکہ جیولیٹ بہت امیراں دی کڑی سی تے رومیو دے عشق وچ سب گھر بار چھڈن لئی تیار سی۔ اوہدے گھر دی ڈیوڑھی وچ وڑدیاں ہی دوناں پاسے کنداں تے محبت، پیار کرن والیاں نے اپناں کجھ لکھیا تے ٹھپیا ہویا ہے کہ کنداں اوتے لکھاریاں دے پیار تے دل دے پھٹ دا پورا پلستر ہویا ہے۔ کئی لوکاں نیں اپنے لہو نال سدھے لکھ کے لائے ہوئے نیں تے کئی زخم اوتے لان والے پلاسٹر تے اپنا خون لاکے رومیو جیولیٹ نال سانجھ دا اظہار کردے نیں۔ لکھیا تے اینا کجھ ہویا اے کہ ہر سیکسی سدھااوتھے پڑھن نوں ملدا ہے ۔ڈیوڑھی دے سامنے جیولیٹ دا بُت رکھیا ہویا ہے جیہدے نال لوک جھپیاں پا کے فوٹوواں بناندے نیں۔ اوس بُت تے بنے ہوئے جسم دے پرائیوٹ حصیاں نول لگ ھے وی فوٹواں بناندے نیں۔ اک بالکونی ہے جتھے آکھیا جاندا ہے کہ جیولیٹ کھڑی ہوندی سی تے تھلے رومیو نال گلاں تے اشارے بازی کردی سی۔ اوہدے گھر دا اندروں پھیرا لان دا ٹکٹ لگا ہویا ہے۔ پر ٹکٹ دی لمبی لائن لگی رہندی ہے۔ اسی اوہدے گھر دے اندر گئے جتھے اوہدا لباس تے بیڈروم وغیرہ ویکھے تے اندر اک لیٹر بکس وی لگا ہویا ہے تے اوہناں دا خیال اے کہ ایہدے وچ کوئی سنیہا لکھ کے پا دیوو تے اوہ جیولیٹ تیک اپڑ جائے گا۔ لوکی کجھ نہ کجھ لکھ کے اوس لیٹر بکس وچ پاندے رہندے نیں۔ اے خیال وی اوس طراں دا ہی ہے جیویں یہودی یروشلیم وچ اپنی گریا گری دی دیوار دے کول کھڑے ہوکے دعا منگدے نیں تے کند وچ اپنی دعا تے منگاں دا سنیہا وی لکھ کے رب تک گھلدے نیں۔ رومیو جیولیٹ دا قصہ وی ولیم شکپئیر نے ہیر رانجھا دے وارث شاہ وانگ لکھ کے ہمش لئی پکا کردتا۔ ویسے رومیو جیولیٹ دے بارے اطالوی مور خاں نے مختلف رائے دتی ہے۔ کئی کہندے نیں اوہ حقیقت وچ ہے سن تے کئی کہندے نیں کہ اوہ خیال تے فرضی قصہ ہے۔ آکھیا جاندا ہے کہ شہر وچ روزانہ ساری رونق ایس جیولیٹ دے بت تے گھر پاروں رہندی ہے تے اوتھے ہر ویلے لاہور دے داتا صاحب دی طراں میلہ لگیا رہندا ہے۔ اوتھوں نکل کے اسی جھیل گارڈا وی ویکھی جیہڑی چاروں پاسے پہاڑاں وچ گھری ہوئی اے تے بہت ہی سوہنا سماں بنا دی ہے۔ اٹلی وچ ساڈے دیسی لوکاں لئی کھان پین دا بڑا مسئلہ ہے۔ ریسٹورنٹ گھٹ تے شراب دیاں باراں زیادہ نیں تے اے شراب دیاں باراں ہی کھانا تے ٹکر وی دیندیاں نیں تے پورا اٹلی پیزا کھاندا ہے۔ پیزے تو علاوہ ہور کوئی شے لبنا مشکل کم اے۔ سپشل آرڈر تے کسے کسے تھاں تے مچھلی تے چاول لبھ جاندے نیں۔ اٹلی وچ وائن بہوں پیتی جاندی ہے۔ ایس لئی ہر پاسے انگوراں دے فارم ویکھے جاسکدے نیں تے نال وائن بنان دیاں فیکٹریاں۔ اٹلی دا شہر وینس تے سب جاندے نیں پانی نال گھریا ہویا ہے تے کئی واری پانی گھراں دے سامنے فرش توں وی اُچا ہوجاندا ہے۔ ایس لئی ہر گھر نے اپنے بوہے اگے ڈیڑھ ڈیڑھ فٹ اُچا اٹاں دی بنی بنائی ہوندی ہے تے سب اوس کند نوں ہی ٹپ کے آندے جاندے نیں۔ وینس کئی جزیریاں وچ ونڈیا ہویا ہے جنہاں نوں کشتیاں دے سراں نال جوڑ کے رکھیا ہے۔ جس طراں بس سروس ہوندی اے ایسے طراں چھوٹیاں فیریاں fevries چلدیاں نیں تے اپنے سٹاپاں تے کھلوندیاں نیں۔ ہر جزیرے وچ ٹورسٹاں لئی کھان پین دا بہت انتظام ہے پر کھان نوں پیزا ہی لبدا ہے۔ وینس دی سیر نوں بعد ایسی سوٹزر لینڈ دے بہت سوہنے علاقے انٹر لاکن Interlaken ول ٹرپئے۔ اے ساڈی واپسی دا سفر سی تے نویں تھاں ویکھن دا چارہ وی، اے دو جھیلاں دے وچ اک تھاں ہے جیہڑی ٹورسٹ activity لئی مشہور ہے۔ ایتھے ہالی ووڈ تے بالی ووڈ دیاں فلماں بنان والے تے ایکٹر آئے رہندے نیں تے ایتھوں دے منظر اں نوں اپنی فلماں وچ لیندے نیں۔ ایتھے گلائیڈنگ، کیبل ٹرین، کیبل کار، ہیلی کاپٹر تے سیر تو علاوہ ایلپس(ALPS) پہاڑاں دا سب تو اوچا سلسلہ وی ہے جتھے آپ چڑھ کے جاناں پیندا ہے۔ چوٹی تے چڑھ کے سارے پہاڑ تھلے تے نیویں نظر آندے نیں ۔سوٹزر لینڈ لندن توں قیمتاں وچ ڈبل توں زیادہ ہے۔ ایس ٹاؤن دی 23 ہزار آبادی ہے تے اوچے اوچے پہاڑاں دیاں چوٹیاں تکر لوکاں نیں ہوٹل بنا رکھے نیں ۔کئی لوکاں نے اپنے گھراں دے دو دو کمرے ہوٹل لئی ورتے ہوئے نیں۔ انٹرلاکن وچ ٹھنڈ بہت ہوندی ایس لئی سارا ٹائم برف باری وچ لنگیا۔ ایس شہر دی صفائی دی حالت توں لگدا ہے کہ ایہہ سارے یورپ توں ودیا ہے۔ اک سیکنڈ لئی وی برف سڑک تے نہیں رہن دیندے تاکہ آن جان والے پھس نہ جان۔ ایس لئی ایتھے تِن دن گذار کے واپسی دا سفر شروع کیتا۔ واپسی وی اک مہم سی۔ یاراں گھنٹیا دا سفر، سوئیٹزر کینڈ توں نکل کے فرانس وچ وڑنا سی تے سارا فرانس کراس کرکے کیلے دی پورٹ تے آناں سی۔ فرانس دا موٹروے دا سفر وی عام جئی گل نہیں۔ پہاڑاں نوں کٹ کٹ کے ستاراں ستاراں کلو میٹر لمیاں سرنگاںTunnels بنیاں ہویا نیں۔ اک یا دو وچ درجناں سرنگاں نیں۔ اوچے اوچے پہاڑاں تے تھلوں ایڈ وڈا کم کیویں کیتا، اے ویکھ کے بندہ صرف حیران ای رہ سکدا ہے ایس طراں سرنگاں بناکے کئی سو میل دا فاصلہ بہت گھٹا دتا ہے۔ خیر اے ایڈا سوہنا ٹرپ اخیر وچ بہوں پریشانی تے مکیا۔ ہویا ایہہ کہ واپسی دی ferry توں بعد میں ڈوورتوں لندن تیک اپنی وین چلا رہیا سی۔ اسی ٹوٹل 9 جی ایس وین وچ ساں۔ میری ساری فیملی تے اک دوست دی فیملی، تھکان وی بہوں سی تاں میں وین موٹروے توں سلپ روڈ تے لائی تے اوتھے میری اکھ لگ گئی ۔ وین سلپ روڈ توں ہولی ہولی دوباراں Fast lane وچ جاناں شروع ہوگئی تے چوتھی لین وچ چلی گئی۔ مینوں نہیں پتہ لگا، اوہ تے میرے نال بیٹھے میرے دوست نے ویکھیا تے مینوں جگان توں پہلے وین دا سٹیرنگ قابو کیتا کیونکہ وین اک سیکنڈ بعد آخری جنگلے وچ وجن لگی سی۔ رات دے ڈیڑھ دا ٹائم سی۔ فیر اوہناں مینوں بعد وچ جگایا تے میں گوڑی نیند ستا پیاسی ۔اوہناں پہلے نہ جگایا تاں جے وین کھڈے وچ نہ وج جائے۔ ایس توں بچن تے گئے۔ خیر ایس طراں ساڈااک سوہنا من موہنا ٹرپ اونتری Ending نال پورا ہویا۔
His previous article Link
http://www.wichaar.com/news/119/ARTICLE/32749/2017-04-11.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels