Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> لائلپور پنجابی سلیکھ میلہ 2017: کالونیل پنجاب تے پنجابی زبان -4-

لائلپور پنجابی سلیکھ میلہ 2017: کالونیل پنجاب تے پنجابی زبان -4-

April 25th, 2017

ایس گل بات وچ مشتاق صوفی،عامرریاض رلتی سن تے گل بات ٹورن دے آہری سن امداد حُسین۔
صوفی ہوراں گل بات ٹوردے آکھیا انگریزاں دے پنجاب اُتے مَل پچھوں پنجاب چھیتی ای ملکہ برطانیہ دے ہیٹھ آ گیا سی۔انگریز دا واہ حاکم میل نال پیا تے انگریز انگریزی ای لاگو کرنا چاہندا سی۔پر اوہ نظام نوں بدلن نہیں آیا سی اوس دا نشانہ طبقاتی نظام نوں قائم کرنا سی۔اک وچار سی تعلیم کیہڑی بولی وچ دتی جائے۔مقامی بولی وچ دتی جائے؟ جس نوں اوہ ورنیکلر دا ناں دنیدا سی۔سوال اے تعلیم دی لوڑ کیوں پیدا ہوئی؟انگریز دُنیا وچ علم،ٹیکنلوجی وچ اگے سی،ایس نوں اگے ٹورنا اوس دی ذمہ داری سی۔کالونیاں اُتے قبضہ تاں کر لیا سی پر اوس نوں پتہ سی جد تیک ادارے نہیں بندے اوس دا کم نہیں ہو سکدا۔اوہ تھوڑا بہتا قاعدہ قنون چاہندا سی۔اوس کول ایڈوانس موڈ آف پروڈکشن سی۔ساڈے کم ہتھ نال ہوندے سن۔اوس جد اپنی ٹیکنلوجی ایتھے لیانی سی تے پھیر کم تاں نکلنے سن۔تہانوں خاص طراں دا علم چاہیدا سی۔ریلوے،ٹیلی گراف،ٹیلی فون،ڈاک خانہ،ہسپتال۔اوس یوپی سی پی ،سندھ وچ وی ایہی کیتا سی۔اُردو تے ہور دوجیاں بولیاں لئی اوس فورٹ ولیم کالج چلایا۔ایہہ سارا نظام بنایا گیا سی۔اہم تبدیلی پنجاب وچ آئی۔مُڈھلی۔مہاراجہ رنجیت توں مگروں پنجاب اُتے انگریزاں دا قبضہ ہویا۔ایتھے آ کے پالسی وچ بدلی آئی۔انگریزی چالو کیتی گئی۔اک وچار اسیں ایتھوں دی مقامی بولی نوں لاگو کراں گے۔ایس سلسلے وچ جیہڑی گل بات ہوئی بڑی مزے دار سی۔اوہناں سوچیا جے اسیں چاہندے آں پنجاب وچ تعلیم عام ہووے پھیر سانوں ایس وچ پڑھانا چاہیدا اے۔یوپی سی پی دا بڑا اثر سی۔پھیر ایہہ وچار وی سی پنجابی کوئی زبان نہیں۔ ایہنوں لان دی لوڑ نہیں۔
سبھ توں پہلے کوئی دوجے مُلک اُتے قبضہ کردا اے۔نویں شناخت دین دی کوشش کردا اے۔انگریزاں نے سبھ توں پہلاں فارسی نوں مُکایا۔دربار دی زبان فارسی سی۔پنجاب وچ وی فارسی سی۔اک بندہ سی اوس دا ناں سی رابرٹ کرس۔اوس نے پنجابی لاگو کرن اُتے زور دتا اتے آکھیااُردو دی لوڑ نہیں ۔پھیر کسے گل کیتی اُردو دی تھاں پنجابی لان دا کوئی فیدہ نہیں۔پنجابی اُردو دا بچہ اے۔Punjabi is merely a dialect of Urdu ۔پنجابی دی کوئی لکھت نہیں اے۔ایس دا اپنا کوئی ادب نہیں۔
اٹھ سو سال ہو چکے نیں پنجابی نوں لکھت وچ آئے۔شاہ مکھی،گُرمکھی کسے وچ شکل وچ پنجابی نوں لاگو نہیں کیتا۔شاہ پور دے ڈپٹی کمشنر نے سبھ توں زیادہ پنجابی دا مقدمہ پیش کیتا۔جو جواب دتے جو بحث کیتی اج وی اوہو ای اے۔پنجابی اک لہجہ اے۔میعاری املا کوئی نہیں۔کوئی اک لہجہ نہیں۔تُسیں جو کہندے او، اوہ پنجابی لہجہ اے اتے ایس وچ پڑھایا نہیں جا سکدا۔ایہہ کہنا پئی پنجابی دے لہجے نیں تے ساریاں زباناں اِنج دیاں نیں۔جرمن تے فرانسیسی زباناں دے وی لہجے نیں۔
پھیر قوم پرستی دا وی سوال سی۔پنجابی نوں لاگو نہ کرو۔سکھ شناخت نوں یاد کرائے گئی۔پنجابی پنجابیاں نوں اپنی یاد کرائے گئی۔
(چلدا)



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels