Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> گارڈ فادر تے جسٹس کھوسہ دا اختلافی نوٹ: اسمبول تے کجھ نہ پھول

گارڈ فادر تے جسٹس کھوسہ دا اختلافی نوٹ: اسمبول تے کجھ نہ پھول

April 21st, 2017

وڈے لوک وڈی گلاں کردے نیں پر اکثر اوہ وڈے گھاٹے وی چھڈ جاندے نیں۔ جے وڈے جج ہوری پاکستانی اشرافیہ دی گل کردے اتے اوس وچ ’’زیدتے بکر‘‘ نوں وی رلاندے اتے 2 توں 3 ہزار پاکستانی امیراں ول اشارے کردے جس وچ سول ملٹری بیورو کریٹ، سرمایہ دار تے وڈیرے رلتی ہوندے تے انہاں دے گارڈ فادر ول اشارے نوں سب سراہندے۔ پر انہاں دی لکھت توں جاپدا ہے پاکستان وچ نرا اک خاندان ہے جس توں بعد پاکستان ’’پاک تے شفاف‘‘ ہوجائے گا۔جے ایس دا ہور کوئی تجزیہ نہ وی کیتا جائے تاں وی ایہہ بیانیہ اشرافیہ نوں بچاون دا چوکھا گھما ہے۔ اوہ ملتان دے قریشیاں تے رحیم یار خان دے ترین نوں بھل گئے، انہاں دی مرضی، پر حیرت ہے ڈی ایچ اے توں ملک ریاض تک وی انہاں نوں کوئی یاد نہ رہیا۔ ایہہ فیصلہ تریخی ضرور ہے اتے اختلافی نوٹاں دے گھپیاں پاروں وی ایہہ ہمیش یاد رکھیا جائے گا۔ اج تیک کڈے فیصلے اختلافی نوٹاں توں شروع ہوندے نیں ایہہ تے کوئی قنون دان ہی دس سکدا ہے۔گارڈ فادر کون کون ہے ملک پاکستان اندر، ایس دا اک ہور حوالہ پڑھ لو۔ طیبہ تشدد کیس وچ عدالت اک سول جج اگے تے بے بس نظر آئی پر ہر سولین ادارے نوں رگیدن وچ پیش پیش۔ کدی جج ہوری سائل دا روپ دھار کے کسے پٹواری تے سول جج نوں ملن تے سہی، اک وار نکی کچہریاں دا چکر لاون انہاں نوں لگ پتہ جاسی پئی گارڈ فادر ہوندا کیہ ہے؟عام لوکائی تے تحصیل تے ڈسٹرکٹ دے پدر تیک رہندی ہے تے اوتھے کون، کون گارڈ فادر ہے، ایہہ سب جاندے نیں۔
میرے اک یار، اپنی نوکری پاروں پنجاب سول سیکٹریٹ دی ’’کھچار‘‘ دے نیڑے بیٹھدے سن۔ انہاں دسیا پئی اک دن کسی سیکٹری دے چپڑاسی نوں اک وزیر ڈانٹ رہیا سی۔ اوس وزیر دے جان تو بعد لوکاں اوس نوں پچھیا کہ کیہ ہوریا سی؟ ماملہ کیہ ہے؟ اوس اطمینان نال جواب دتا پئی اک ’’کچا ملازم‘‘ اک ’’پکے ملازماں‘‘ نوں ڈانٹ رہیا سی۔ ہن جس ملک وچ ’’پکے ملازماں‘‘ ات مچائی رکھی اوتھے سیاستداناں نوں گارڈ فادر آکھنا اک خاص گروہ لئی تے پاپولر گل ہوسکدی ہے پر لوک جاندے نیں اصل طاقت کتھے ہے۔ پرویز مشرف نوں باہر گھلن لگے سب نوں پتہ چل گیا سی پئی عدالت تے حکومت کیہ ویچدے نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels