Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> میچ

میچ

جاوید بُوٹا
April 18th, 2017

تڑکے اکھ کُھلن توں لے کے راتیں سَون تائیں نہ چاہوندیاں ساری دیہاڑی میچ کھیڈدیاں تے ویکھدیاں لنگھ جاندی اے۔ کدے کدے تاں بندہ سُفنے وِچ وی میچ کھیڈدا تے ویکھدا رہندا اے۔ ویکھیا جائے تاں میچ اَتے پھڈے وِچ کوئی بُہتا فرق نہیں، بس ناواں دا ای اے۔ پھڈا بُھورا اکھڑ اَتے کھروا جیہا چُبھواں ناں لگدا اے، پر میچ، لِسا، مسکِین اَتے نرول جیہا ہوندیاں ہویاں سوادلا جاپدا اے بھاویں کرتُوتاں دونہاں دِیاں لگ بھگ اِکو جہِیاں ای نیں۔
پھیر پھڈے دی، میرا مطلب اے میچ دی کیہڑی گل اے جدوں مرضی، جِتھے مرضی، جِیہدے نال مرضی پا لیئے جاں پے جاندا اے۔ چنگے بھیڑے ناشے پاروں گھر والی نال، کم تے جاندیاں ٹریفک نال، اپنے نال کم کرن والے ساتھی نال، اپنے افسر نال۔ ٹُرے جاندے بندے ول گُھور کے ویکھو تاں میچ پے جاندا اے۔ موڈھے نال موڈھا کھہہ جائے، میچ شروع۔ ویکھن والیاں دی وی تھوڑ نہیں ہوندی۔ گھڑی پل وِچ پِڑ بھر جاندا اے۔ شرِیکے داری دے میچ وی بڑے زبردست چٹ پٹے تے سوادی ہوندے نیں۔ جِیویں نونہہ سس دا میچ، ننان بھرجائی دا میچ، بھرا بھرا دا، چاچے بھتِیجے دا میچ۔ گوانڈھی نال میچ پاؤناں سبھ توں سوکھا اے۔ بندے دا اپنے آپ نال میچ تاں قبر دِیا کندھاں تائیں ٹُریا رہندا اے۔ بِنا میچاں دے زِندگی وی پِھکی پِھکی، بے سوادی لگدی اے۔ بھاویں بندیاں دی ہووے۔ پرواراں دی ہووے، برادرِیاں دی ہووے جاں پھیر مُلکاں دی ہوئے۔ پر مُلکاں دے میچ تاں ہمیشاں انتاں دی تباہی بربادی مچا دیندے نیں۔
ہُن ویکھو نا گل دھیان گوچری اے۔ ہندوستاں پاکِستان اِک ہوندا سی۔ اکٹھیاں رہندیاں شریکے داری دے اوکھے سوکھے میچ وی ٹُرے رہندے سن۔ ونڈ توں بعد شریکے داری دِیاں راہواں تے میچاں دے مُدے وی بدل گئے۔ ایس کرڑی اَتے کَوڑ بھری شریکے داری پاروں 65 اَتے71 وِچ دو وڈِیاں تباہیاں بربادِیاں والے میچ کھیڈ کے اپنی اپنی کُھرک مٹھی کر کے، فِلماں، کرِکٹ، ہاکی، کبڈی، کُشتی اَتے ہور ایداں دے میچاں نال مُڑ من پرچان لگ پئے۔ پر کُھرک وی شاہی بیماری اے کدے ودھ جاندی اے کدے مٹھی پے جاندی اے پر خبرے مُکدی نہیں۔ ایس لئی دونہاں پاسے کُھرک پھیر چِھڑ پئی لگدی اے جو کھیڈاں ولوں ہٹ کے پھیر چونبھڑا والے مُدیاں دی راہے ٹُر پئے نیں۔ ایس لئی فنکاراں دی آواجائی اتے کِرکٹ توں بعد خبرے ہاکی، کُشتی جاں ایداں دِیاں ہورناں کھیڈاں دے میچاں ولوں8 مُکھ موڑ کے غریب مچھیریاں دی پھڑن پھڑائی دا میچ چالو۔ تُسیں دس پھڑے نیں، لؤ، اسیں پندراں پھڑ لئے جے، کوئی گل نہیں اسیں وِیہہ پھڑ لاں گے۔ وچارے مچھیریاں نوں سمُندر دے پانی وِچ حد بنے لئی اُسری کندھ تاں وکھائی نہیں دیندی پر جیل وِچ چاروں پاسے اُسرِیاں کندھاں لازمی وکھائی دیندِیاں نیں۔
وِیزیاں دِیاں اڑِچاں اَتے سفارت خانیاں دے پھیرے۔ تُسیں چار اڑِچاں پا کے دس پھیرے مروائے نے؟ اسیں دس اڑِچاں دے نال وِیہہ پھیرے مرواواں گے۔ ایہناں اڑِچاں تے پھیراں دے میچ پاروں خبرے کِنے کُو پروار لکِیر دے آر پار وسدے اپنے پیاراں نال میل لئی ترسداں ہمیشاں ہمیشاں لئی زندگی دی لکِیر پار کر جاندے نیں۔ کشمیر وِچ اپنے پروار توں چونہہ قدماں دی وِتھ اُتے وسدے ’مُحمد اشرف‘ نوں ایہہ لکِیر پار کردیاں 26 ورھے لگے۔
اِک دُوجے اُتے ات وادی دے اِلزاماں دے ڈھیراں دے ڈھیر۔ نِکے وڈے سرکاری کامیاں کارِندیاں دے بیاناں دا ہڑ، تڑِیاں دے کڑکاویں لپھڑ۔ جیلاں وِچ موتاں۔ تُہاڈی جیل وِچ ساڈا اِک مریا اے، اسیں تُہاڈے دو ماراں گے۔ بے دوساں تے سدھارن لوکاں دے بھاء دا عذاب۔ نمبر ٹنگن لئی ریڈیو، اخبار تے ٹی. وی. مطلب مِیڈیا وی بانہواں، پہنچے ٹُنگ کے انھے واہ اِک دُوجے نوں کُد کُد کے پیندا اے۔
اجمل قصاب، تے پتا نہیں ہور کِنے جنے دونہاں پاسے اپنی اپنی مِیٹی پُگا بیٹھے نیں۔ اگلیاں اِک نویں میچ وِچ اِک نواں کھڈاری ’کُلبُھوشن‘ ٹھیلھ دِتا اے۔ میدان وِچ کلبُھوشن دے ٹِھلھن دی دیر سی کہ اوہدے مُقابلے لئی اِک پاکِستانی رٹائر فوجی کرنل حبِیب ظاہر نوں 6 اپریل توں نِیپال وِچوں تربیت لئی کِسے خُفیہ تھاں اپڑا دِتا اے تانجے لوڑ پیندیاں ای اوہنوں میدان وِچ ٹھیلھ دِتا جاوے۔
ڈر آؤندا اے، کِدھرے ایہہ نِکے موٹے میچ، 1965 جاں 1971 ورگا وڈا میچ کھیڈن لئی کوالِیفائیڈ راونڈ نہ بن جان۔ ایس لئی وڈی تباہی بربادی توں بچن لئی دوویں شریک عقل نوں ہتھ مار کے چِھڑی ہوئی کُھرک نوں مٹھیاں کرن لئی کھیڈاں دے میچاں ول پرت کے اپنا اپنا من پرچاؤندیاں اپنا اپنا رانجھا راضی کردے رہن۔ ایہدے وِچ ای سبھ دا بھلا اَتے سبھ دی خیر اے۔
****


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels