Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> کم کاج دی تھاواں تے مذہب،فرقے دا ورتارا تے ساڈے کوڑ رویے

کم کاج دی تھاواں تے مذہب،فرقے دا ورتارا تے ساڈے کوڑ رویے

تنویر زمان
April 11th, 2017

عورت نوں پردے وچ رہن دی تے مرد نوں اپنی عورت نوں پردے وچ لُکا کے رکھن دی بڑی پرانی تریخ ہے۔ پر ہن پاکستان وچ تے وڈے شہراں وچ ہی نہیں سگوں نکے نکے قصبیاں وچ وی زنانیاں دی بہت وڈی گنتری ہن پردے نوں رب راکھا کہہ چھڈیا ہے۔ پر مرداں نوں اے گل بالکل پسند نہیں۔ کیونجے مرد زنانی نوں اپنی جائداد سمجھدا ہے تے اوہدے جسم تے سوچ تے مل مار کے بیٹھنا چاہندا ے۔ اوہ ساری سوسائٹیاں جہناں ترقی کیتی اے اوتھے ترقی اوہدوں ہی ہوئی جدوں عورت نے آزادی دی گھٹ توں گھٹ ہر اک حد ٹپ لئی۔ اوہ خاص حد معاشی تے سیاسی آزادی دی ہے جیہڑی مرد نے اپنی اجارہ داری وچ رکھی ہوئی سی اتے ہن تیکر رکھی ہوئی ہے۔ جیہڑے لوک دنیا دے کمزور تے پچھے رہ گیاں تھاواں توں یورپ تے امریکہ گئے نیں، اوہناں دی بہت وڈی گنتری ہالے تیکر پچھے چھڈی پسماندگی نال لئی جڑے نیں۔ پچھلے دناں بلجیم وچ عدالت نے اک مسلمان عورت ولوں کیتے گئے اک مقدمے دا فیصلہ سنایا۔ زنانی نے ضد لائی ہوئی سی کہ ایہنوں کم دی جگہ (Work Place)تے کم دے دوران کنڈ کڈ کے (باپردا) کم کرن دی اجازت ہونی چاہیدی ہے کیونجے مذہبی آزادی پاروں ایہہ اوہدا حق ہے۔یورپی عدالت پورے دھیان نال مقدمہ سنیا تے بڑا سوہنا فیصلہ سنایا کہ کوئی وی ورکر کم دی جگہ تے اپنے سیاسی ،مذہبی تے فلسفے دیاں علامتاں Symbol نہیں ورت سکدا۔ جیویں سکھ پگ یا مسلمان عورتاں حجابیا مسیحی کراس نوں ورتدے نیں۔ عدالت نے آکھیا ایسی کوئی علامت جیہڑی کسے دی وکھری پہچان وکھاندی ہے، اوہدے نال جے کدی کسے کم دی وجہ نال وی ذرا اونچ نیچ ہوجائے تے ایہہ الزام آجاندا ہے کہ اے مینوں میرے مسلمان یا سکھ،مسیحی وغیرہ ہون دی وجہ نال وکھرا ورتارا کیتا گیاہے۔ ایس فیصلے تے بہوں سارے قدامت پسنداں نے اعتراض کیتا کہ مسلماناں نوں اوہناں دے حق تو روکیا گیا ہے۔ برطانیہ دی وزیراعظم نے آکھیا ہے کہ اوہ برطانیہ وچ تے ایسا کوئی قنون نہیں بنان گے پرجے کوئی وی مالک اپنے کم دی جگہ ، دفتر فیکٹریاں، دکاناں تے ایہہ طریقہ لاگو کرنا چاہے تے قنون پاروں سانوں کوئی اعتراض نہیں۔ یورپی عدالت دا اے فیصلہ بڑا سیکولر تے غیر جانبدار اے تے جس طراں سکولاں وچ بچیاں دی یونیفارم یا سپاہیاں دی وردی ہوندی اے ایسی ای طراں کم دی جگہ تے وی ہونا چاہیدا ہے۔ ایس لحاظ نال اے بڑا سیکولر فیصلہ اے پئی کم دے دوران Dress code چنگی گل ہے۔ مذہبی لوکاں نے کم دی جگہ تے مذہبی علامتاں Symbol دی روک تے بڑا واویلا کیتا ہے۔ ایتھے عام خیال کیتا جاندا ہے کہ کوئی وی آزادی اوتھے تیکر ٹھیک ہے جتھے تیک اوہ عالمی انسان حقاں دے چارٹر نال نہ ٹکرا کھاندی ہوئے۔ جس طراں اک زمانے وچ ہندواں وچ ستی دی رسم سی تے اوہ جے آکھن کہ ستی نوں ادا کرن دی آزادی ہونی چاہیدی ہے کیونجے ایہہ اوہناں دی مذہبی آزادی ہے تے ایس طراں دی اجازتاں کوئی سوسائٹی نہیں دے سکدی۔ ایس ای طراں اک زمانے وچ ہر سال اک قوم دے لوک اپنے خدانوں خوش کرن لئی اک جوان کڑی اوہدی راہ وچ قربان کردے سن تے اوہ مذہبی رسم ایس قسم دی آزادی سی جیہڑی دوسرے دی زندگی تے آزادی نوں روک لاندی سی۔ جیویں کم دی جگہ تے مرد کہن کہ اوہناں نوں جُبہ پاکے کم کرن دی اجازت ہونی چاہیدی ہے تے ایس قسم دی آزادی نری لڑائیاں پیدا کردی ہے۔ ایس لئی کہندے نیں کہ Dress Neutarility لوڑی دی ہے۔ کم دی جگہ تے سب لئی اکو جہیا لباس ہی ہوسکدا ہے۔ ساڈے ما پے بڑی نکی عمر توں بچیاں نوں مذہبی علامتاں پوا کے سکول گھل دیندے نیں۔ جیویں حجاب پگ ، صافہ، کراس وغیرہ اتے اوہدے نال بچے اک دوجے نال رلدے نہیں تے سوسائٹی وچ ونڈ تے تقسیم پیدا ہوندی ہے۔ ایس ونڈ دی اک ہور شکل ایہہ وے کہ اسیں مسیحاں یا کسی دوجے مذہب دے لوکاں دے پانڈے وکھرے کردیندے ہاں۔ جیہدا مطلب ہے ہے کہ اوہ ساڈے توں گھٹ نیں تے شاید گندے وی نیں۔ ایہہ اصل وچ ہندواں دی برہمن شوور والی سوچ ہے۔ ایس سوچ پاروں اساں فرقیاں وچ ونڈے ہوئے ہاں کیونجے ایہہ دائرہ ہولی ہولی تنگ ہوئی جاندا ہے تے اسیں اک دوجے نوں مارن ول جا رہے ہاں۔ ایس نقطے تے گھر تے باہر کھل کے گھل بات دی لوڑ ہے تے لبرل لوکاں نوں ایسے مسئلے نوں حل کرن لئی Postive کردار ادا کرنا چاہیدا ہے تے زنانیاں نوں ایس موضوع تے گل بات لئی ہر سطح تے شامل کرنا چاہیدا ہے۔
تنویر زمان برطانیہ وسدے پنجابی نیں اتے پاکستان وچ کھبے دی اوس لہر نال جڑے نیں جس دا جمہوری پکھاں ول اْلار ہے۔اوہ روزنامہ جنگ لندن دے لکھاری وی نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels